Κερέν Τουμαρό Διορισμός Σαρέ Τουμαρέ Γκίσαρ!
ΣΑΡ νιωθίνενα κάνα εκ λατσσό αμάλ μπουτσσαβέλα τουμένγκε εκ γράμμας σο ντέλα-τουμέν ζορ; Ο Χριστιανός μαθητής Τιμόθεος λιντάς εκ ασακό γράμμας κατά απόστολος Παύλος. Ανταβά γράμμας ακανά ισί αντρέ κι Αγία Γραφή ντα βακέρντιβελα Δεύτερη Επιστολή κο Τιμόθεος. Σίγουρα, ο Τιμόθεος μπεσέλας σαρ σαρ τι αρακχέλ εκ ήσυχος τθαν για τι ντικχέλ σο γραφιντάς λέσκε λέσκο αγαπημέ αμάλ. Μπορεί τι σκεφτίνελας: “Σαρ ισί ο Παύλος; Τθερέλα καέκ συμβουλή σο κα βοηθίνελ-μαν τι κεράβ λατσσές μο διορισμοί; Κα βοηθίνεν-μαν λέσκε λάφια τι κεράβ έργος ντα τι σικλιαράβ πιο λατσσές;” Σαρ κα ντικχάς, ο Τιμόθεος λιντάς ο απαντήσεις ανταλέ ερωτησιέντε ντα μπουτέ γιαβερέντε. Ακανά κα ντικχάς μερικές λατσσέ συμβουλές σο ισί ανταλέ πολύτιμε επιστολιάτε.
«ΝΤΑΪΝΤΙΝΑΒΑ ΣΑΡΕ Ο ΠΡΑΓΜΑΤΑ»
Κατά πρώτα λάφια σο διαβαντάς κι επιστολή, ο Τιμόθεος αγαντάς καζόμ μπουτ πφαμπόλας λέσκε ο Παύλος. Ο Παύλος βακερέλα λέσκε ότι ισί “εκ τσσαβό σο μανγκέλα μπουτ”. (2 Τιμ. 1:2) Παρόλο σο ο Τιμόθεος να ισινέ ούτε 40 μπρεσένγκο κάνα λιντάς ανταγιά επιστολή περίπου κο 65 Κ.Χ., ισινέ μπουτ μπρεσά πρεσβύτερος κι Χριστιανική κχανγκιρί. Κερντάας έργος ι Παυλόσαρ πιο μπουτ από ντες μπρεσά ντα σικλιλόας μπουτ πράγματα.
Ο Τιμόθεος πρέπει τι λιντάς μπουτ ζορ σο σικλιλό ότι ο Παύλος νταϊντιντάς πιστά ο δοκιμασίες. Ο Παύλος ισινέ φυλακή κι Ρώμη ντα ατζεχάνικ κα μουνταρένας-λες. (2 Τιμ. 1:15, 16· 4:6-8) Ο Τιμόθεος μπορίνελας τι ντικχέλ ο θάρρος ι Παυλόσκο αντράλ ακαλέ λαφίνταρ: «Νταϊντίναβα σαρέ ο πράγματα». (2 Τιμ. 2:8-13) Σαρ ο Τιμόθεος, αντικάς αμέν-ντα μπορίνασα τι λας ζορ κατά υπομονή ι Παυλόσκι.
«ΤΙ ΚΕΡΕΣ ΠΙΟ ΜΠΑΡΟ Ο ΧΑΡΙΣΜΑΣ»
Ο Παύλος βακερντάς κο Τιμόθεος τι τθερέλ πι γκοντιάτε ότι οντουλά σο κερέλας κι Ντεβλέσκι υπηρεσία ισινέ σημαντικά. Βακερντάς λέσκε “τι κερέλ πιο μπαρό ο χάρισμας ι Ντεβλέσκο” σο ισινέ αντρέ λέστε. (2 Τιμ. 1:6) Ο πουρανό μπαλαμανό λάφι χάρισμα βακέρντιβελα πιο μπουτ εκχέ πραγμάσκε σο ντιντιόλα εκχέ τζενέστε παρόλο σο να αξίνελα-λες, σο να ντινάς ντα να κερντάς κάτι για τι λελ-λες. Ο Τιμόθεος λιντάας ανταβά χάρισμας κάνα ντιντιλί-λες εκ σημαντική υπηρεσία αντρέ κι κχανγκιρί.—1 Τιμ. 4:14.
Σο βακερντάς ο Παύλος ι Τιμοθεόσκε τι κερέλ με το χάρισμας σο τθερέλας; Κάνα διαβαντάς ο λάφι «τι κερές πιο μπαρό», μπορεί τι γκιλί λέσκι γκοντί κι γιακ σο πφαμπαρένας ο τζενέ για τι κερέν χαμπέ, σο μπάζιμα ατσσόνας σάντε χάνικ ανγκαρά. Εκ τζενό έπρεπε τι ναμίνελ ο ανγκαρά για τι λεν-πες, δηλαδή τι πφαμπόν πάλι ντα τι νικαβέν πιο μπουτ τατιπέ. Εκ λεξικός βακερέλα ότι ο πουρανό μπαλαμανό λάφι ἀναζωπυρέω, σο γραφιντάς ο Παύλος, μανγκέλα τι βακερέλ «πφαμπαράβα πάλι εκ γιακ, τζουβντιαράβα-λα, κεράβα-λα τι λελ-πες», οτθάρ κάνα βακέρντιβελα εκχέ τζενέσκε, μανγκέλα τι βακερέλ «μανγκάβα τι κεράβ εκ μπουτί ατζέ πιο λατσσές». Γιαβερέ λαφίντζαρ, ο Παύλος βακερντάς κο Τιμόθεος: “Κερ το διορισμός σαρέ τι γκίσαρ!” Αντιβές, αμέν-ντα πρέπει τι κεράς-λες ανταβά—τι κεράς σο νακχέλα αμαρέ βαστέσταρ για τι υπηρετίνας ι Ντεβλές σαρέ αμαρέ γκίσαρ.
“ΑΡΑΚΧΑΒ ΑΝΤΑΒΑ ΘΗΣΑΥΡΟΣ ΣΟ ΝΤΙΝΤΙΛΟ ΤΟΥΤΕ”
Καζόμ ο Τιμόθεος συνεχίνελας τι διαβάνελ οντουλά σο γραφιντάας λέσκε ο Παύλος, αρακχλάς εκ γιαβέρ συμβουλή σο κα βοηθίνελας-λες τι τζαλ-λεν λατσσές κο έργος σο τθερέλας τι κερέλ. Ο Παύλος γραφιντάς: «Αράκχαβ ι άγιε πνευμάσαρ, σο μπεσέλα αντρ’ αμέντε, ανταβά θησαυρός σο ντιντιλό τούτε». (2 Τιμ. 1:14) Καβά ισινέ ανταβά θησαυρός; Κο εδάφιος σο ισί πιο οπρέ ανταλέ εδαφιόσταρ, ο Παύλος κερντάς λάφι “ι λαφίνγκε σο κερένα λατσσιπέ”, δηλαδή ι αληθειάκε σο ισί αντρέ κι Γραφή. (2 Τιμ. 1:13) Σαρ Χριστιανός, ο Τιμόθεος έπρεπε τι κερέλ λάφι ι αληθειάκε εμ αντρέ κι κχανγκιρί εμ κο τζενέ αβρί. (2 Τιμ. 4:1-5) Επίσης, ισινέ πρεσβύτερος ντα αρακχαβέλας ι Ντεβλέσκε μπρακέν. (1 Πέτρ. 5:2) Έπρεπε τι ντελ μπέσα κο άγιος πνεύμας κι Ιεχωβάσκο ντα Λέσκε Λαφίστε για τι μπορίνελ τι αρακχαβέλ ο θησαυρός σο ντιντιλόας λέστε—δηλαδή ι αλήθεια σο έπρεπε τι σικλιαρέλ.—2 Τιμ. 3:14-17.
Αμέντε-ντα αντιβές ντιντιλί ι αλήθεια σο σικλιαράσα κο έργος. (Ματθ. 28:19, 20) Κα σικαβάς αμαρί εκτίμηση ανταλέ μπουτ σουκάρ θησαυρόσκε άμα να τσσιναβάσα τι κεράς προσευχή ντα τι σικλιαράς-αμέν κατά Ντεβλέσκο Λάφι. (Ρωμ. 12:11, 12· 1 Τιμ. 4:13, 15, 16) Εκ τζενό μπορεί επίσης τι ισί πρεσβύτερος ή τι ισί κι ολοχρόνια υπηρεσία. Εκ ασακό διορισμός πρέπει τι κερέλ-αμέν τι αβάς ταπεινοί ντα τι κερέλ-αμέν τι αγαβάς καζόμ μπουτ μανγκάσα ι Ντεβλέσκι βοήθεια. Οτθάρ πρέπει τι γκεραβάς, δηλαδή τι αρακχαβάς, ο θησαυρός σο ντιντιλό αμέντε. Για τι κεράς-λες ανταβά, δεν πρέπει τι μπιστράς καζόμ μπαρί αξία τθερέλα ντα τι μανγκάς ι Ιεχωβάσκι βοήθεια για τι φροντίνας-λες.
«ΑΝΤΑΛΑ ΤΙ ΒΑΚΕΡΕΣ-ΛΕΝ ΠΙΣΤΕ ΤΖΕΝΕΝΓΚΕ»
Αντρέ κο διορισμοί σο τθερέλας ο Τιμόθεος ισινέ τι σικλιαρέλ γιαβερέν-ντα τι κερέν οντουλά σο κερέλας βοβ. Άκ’ σόσκε ο Παύλος βακερντάς: «Οντουλά σο ασουντάν μάνταρ . . . τι βακερές-λεν πιστέ τζενένγκε, σο κα μπορίνεν βον-ντα τι σικλιαρέν γιαβερέ-ντα τζενέν». (2 Τιμ. 2:2) Ο Τιμόθεος έπρεπε εμ τι σικλιόλ πι πφραλένταρ εμ τι σικλιαρέλ-λεν. Αντιβές, κάθε πρεσβύτερος πρέπει τι μαρέλ-πες τι κερέλ ο ίδιος αντρέ κι Χριστιανική κχανγκιρί. Ο λατσσό πρεσβύτερος να ατσσικιαρέλα πέσκε ο πράγματα σο τζανέλα εκχέ διορισμόσκε. Αλλά σικλιαρέλα-λεν γιαβερέντε-ντα για τι μπορίνεν τι κερέν βον-ντα ανταγιά μπουτί. Να νταρέλα ότι ο γιαβερά κα αβέν πιο λατσσέ λέσταρ άμα τζανένα πιο μπουτ πράγματα ή τθερένα πιο μπουτ ικανότητες λέσταρ. Οντουλέσκε, να σικλιαρέλα σάντε ο βασικά πράγματα. Μανγκέλα τι βοηθίνελ ι τζενέν σο σικλιαρέλα τι αγαβέν λατσσές ντα τι τσσουβέν πουμαρί γκοντί τι κχελέλ—τι αβέν ζουρανέ κι πίστη. Ανταλέ τροπόσαρ, ο “πιστά τζενέ” σο σικλιαρντάς κα τθερέν ατζέ πιο μπαρί αξία ι κχανγκιριάκε.
Σίγουρα, ο Τιμόθεος μπεϊντιντάς μπουτ ι επιστολή σο λιντάς κατά Παύλος ντα λιντάς μπουτ ζορ. Ντα μάλλον διαβαντάς παλάλ γιαβερέστε ανταλά λάφια σο τθερένα μπαρί αξία ντα σκεφτιντάς σαρ κα κερέλ-λεν πιο λατσσές κο διορισμούς σο τθερέλας.
Πρέπει αμέν-ντα τι αγαβάς καζόμ σημαντικές ισί ανταλά συμβουλές. Σαρ; Πρέπει τι κεράς σο νακχέλα αμαρέ βαστένταρ για τι κεράς πιο μπαρό αμαρό χάρισμας, για τι αρακχαβάς ο θησαυρός σο ντιντιλό αμέντε ντα για τι σικλιαράς ι γιαβερέν οντουλά σο τζανάσα. Ανταλέ τροπόσαρ, σαρ βακερντάς ο Παύλος κο Τιμόθεος, μπορίνασα τι “υπηρετίνας λατσσές ι Ντεβλές”.—2 Τιμ. 4:5.