Τι Αβέν Λατσσέ Αμαλά Πάλι ι Ιεχωβάσαρ

ΚΑΘΕ μπρες, μπουτ τζενέ σο τσσιναντέας τι υπηρετίνεν ι Ιεχωβάς βουρτίνενα κι Χριστιανική κχανγκιρί. Ανέν τουμαρέ γκοντιάτε ι “μπαρί χαρά σο αβέλα κο ουρανός” κάνα εκ ανταλέ τζενένταρ βουρτίνελα! (Λουκ. 15:7, 10) Άμα βουρτισάλεν κι αλήθεια, τι αβέν σίγουροι ότι ο Ιησούς, ο άγγελοι ντα ο ίδιος ο Ιεχωβά χαιρίνενα μπουτ σο ντικχένα-τουμέν τι αβέν πάλι αντρέ κι κχανγκιρί. Όμως, καζόμ αβένα πάλι αμαλά ι Ιεχωβάσαρ, μπέκιμ τι νακχένα δυσκολίες. Καλά ισί μερικές ανταλένταρ, ντα σο κα βοηθίνελ-τουμέν;

ΚΑΛΑ ΙΣΙ Ο ΔΥΣΚΟΛΙΕΣ

Μπουτ πφραλά ντα πφενιά συνεχίνενα τι νιωθίνεν μπέτι αντρέ πουμέντε παρόλο σο βουρτισάλε κι κχανγκιρί. Μπέκιμ τι αγαβένα σαρ νιωθίνελας ο βασιλιάς Δαβίδ. Ατζέ-ντα αφού συγχωρίντιλε λέσκε αμαρτίες, βακερντάς: «Μο λάθη τασαντέ-μαν». (Ψαλμ. 40:​12· 65:3) Κάνα εκ τζενό βουρτίνελα κο Ιεχωβά, συνεχίνελα τι χαν-λες ο τύψεις ή η λατζ μπέκιμ για μπουτ μπρεσά. Η Ιζαμπέλ ισινέ αποκομμέ πο μπουτ από 20 μπρεσά.a Βόι βακερντάς: «Ναστί πακιάβας ότι ο Ιεχωβά μπορίνελας τι συγχωρίνελ-μαν». Άμα κα χασαρέν τουμαρί ζορ, μπέκιμ τι κερέν πάλι ζιάνι κι φιλία σο τθερένα ι Ιεχωβάσαρ. (Παρ. 24:​10) Κερέν σο νακχέλα τουμαρέ βαστένταρ για μα τι αβέλ-πες κάτι ασακό.

Γιαβερά μπέκιμ τι ανησυχίνενα ότι ναστί κερένα σαρέ οντουλά σο χρειαζίντιβελα για τι αβέν πάλι λατσσέ αμαλά ι Ιεχωβάσαρ. Αφού βουρτισάλο κι αλήθεια, ο Αντουάν βακερντάς: «Μπισταρντόμας μπουτ κατά πράγματα σο σικλιλόμας ή κερντόμας κάνα ισινόμας Μάρτυρας ανγκλέ». Επειδή νιωθίνενα αντικάς, μερικοί μπέκιμ τι σακιντίνενα τι κερέν ο πο λατσσό ι Ιεχωβάσκε.

Για παράδειγμας, άμα εκ καταιγίδα κερντάς μπαρό ζιάνι κο κχερ εκχέ τζενέσκο, μπέκιμ ο τζενό τι σαστίνελα κάνα σκεφτίνελα καζόμ μπουτ βακίτι ντα καζόμ μπουτί μανγκέλα για τι κερντιόλ πάλι. Αντικάς, άμα αβιλό-πες ζιάνι κι φιλία σο τθερένα ι Ιεχωβάσαρ επειδή κερντέν εκ μπαρί αμαρτία, μπέκιμ τι πακιάνα ότι πρέπει τι μαρέν-τουμέν για τι αβέν πάλι λατσσέ αμαλά ι Ιεχωβάσαρ. Αλλά τθερένα βοήθεια.

Ο Ιεχωβά βακερέλα αμένγκε: «Ελάν, ακανά, τι τακτοποιήνας ο θέματα σο τθεράσα». (Ησ. 1:​18) Μαρντέν-τουμέν μπουτ για τι “τακτοποιήνεν ο θέματα”. Ο Ιεχωβά μανγκέλα-τουμέν ανταλέσκε σο κερντέν. Επειδή βουρτισάλεν κο Ιεχωβά, βοβ χρησιμοποιήνελα-τουμέν σαρ παράδειγμας για τι σικαβέλ ότι ο Μπενγκ ισί ψεύτης.​—Παρ. 27:11.

Κάνα κερντέν-λες ανταβά, αβιλέν πασέ κο Ιεχωβά, ντα βοβ ντέλα-τουμέν πο λάφι ότι κα αβέλ βοβ-ντα πασέ τουμέντε. (Ιακ. 4:8) Όμως, να ερεσέλα σάντε τι ντικχέν ο γιαβερά ότι βουρτισάλεν πάλι κι κχανγκιρί. Πρέπει τι συνεχίνεν τι μπαριαρέν τουμαρί αγάπη τουμαρέ Νταντέσκε ντα Αμαλέσκε, ι Ιεχωβάσκε. Σαρ μπορίνενα τι κερέν-λες ανταβά;

ΤΙ ΜΑΝΓΚΕΝ ΤΙ ΚΕΡΕΝ ΠΡΑΓΜΑΤΑ ΣΟ ΙΣΙ ΤΟΥΜΑΡΕ ΒΑΣΤΕΝΤΕ

Προσπαθίνεν τι μανγκέν τι κερέν πράγματα σο ισί τουμαρέ βαστέντε. Μπέκιμ ντένα-τουμέν ατζέ γκοντί ο βασικά πράγματα σο σικλιλέν ι Ιεχωβάσκε ντα ο λάφι σο ντινάς ότι κα ανέλ ο Παράδεισος. Αλλά ακανά χρειαζίντιβελα τι τθερέν εκ λατσσό πνευματικός πρόγραμμας πάλι, ανταβά μανγκέλα τι βακερέλ ότι πρέπει τι κερέν καζόμ πο μπουτ έργος αβέλα-πες, τι τζαν κο συναθροίσεις ντα τι κερέν παρέα ι πφραλέντζαρ ντα ι πφενίντζαρ. Ντικχέν σο μπορίνενα τι κερέν.

Τι κερέν μπουτ φαρ λάφι ι Ιεχωβάσαρ.Τουμαρό Ντατ αγαβέλα ότι, άμα ατζέκ ατζέκ χάνα-τουμέν ο τύψεις για το λάθος σο κερντέν, ανταβά μπέκιμ μα τι μουκχέλα-τουμέν τι κερέν προσευχή λέστε. (Ρωμ. 8:​26) Όμως, «μα τι τσσιναβέν τι κερέν προσευχή» ντα τι βακερέν κο Ιεχωβά καζόμ μπουτ μανγκένα τι αβέν αμαλά λέσκε. (Ρωμ. 12:​12) Ο Αντρέι ντέλα-πες γκοντί: «Τθεράβας μπαρέ τύψεις ντα λατζάβας μπουτ. Αλλά σοράν κάθε προσευχιάταρ, νιωθίναβας πο λατσσές. Τθεράβας πο μπουτ ειρήνη». Άμα να τζανένα σο τι βακερέν τουμαρέ προσευχιάτε, ντικχέν ο προσευχές ι μετανιωμέ Δαβιδίσκε σο ισί γραμμέ κο Ψαλμός 51 ντα 65.

Τι σικλιαρέν-τουμέν κατά Γραφή.Ανταβά κα βοηθίνελ-τουμέν τι κερέν πο μπαρί τουμαρί πίστη ντα τι μανγκέν ατζέ πο μπουτ ι Ιεχωβάς. (Ψαλμ. 19:​7-11) «Επειδή να τθεράβας εκ λατσσό πρόγραμμας για τι διαβάναβ ντα τι σικλιαράβ-μαν κατά Γραφή, αβιλόμ μπίζουρανο ντα πφανγκλόμ ο γκι ι Ιεχωβάσκο», βακερντάς ο Φιλίπε. «Να μανγκάβας τι κεράβ ατζέκ φαρ ανταβά λάθος, οτθάρ αποφασιντόμ τι σικλιαράβ-μαν κατά Γραφή». Μπορίνενα τουμέν-ντα τι κερέν-λες ανταβά. Άμα μανγκένα βοήθεια για τι τραμπίνεν καλά θέματα τι ντικχέν κάνα σικλιαρένα-τουμέν κατά Γραφή, μανγκέν εκχέ αμαλέσταρ σο ισί λατσσό αμάλ ι Ιεχωβάσκο τι βοηθίνελ-τουμέν.

Τι αβέν πάλι λατσσέ αμαλά τουμαρέ πφραλέντζαρ ντα πφενίντζαρ.Μερικοί σο βουρτίνενα κι κχανγκιρί νταρένα ότι ο γιαβερά κα αβέν χολιαμέ λέντζαρ. Η Λαρίσα βακερέλα: «Λατζάβας μπουτ. Νιωθίναβας ότι πφανγκλόμας ο γκι ι πφραλένγκο ντα ι πφενίνγκο. Νιωθίναβας μπουτ βακίτι αντικάς». Τι αβέν σίγουροι ότι ο πρεσβύτεροι ντα γιαβερά πφραλά μανγκένα τι βοηθίνεν-τουμέν τι αβέν πάλι λατσσέ αμαλά ι Ιεχωβάσαρ. (Ντικχέν ο πλαίσιος «Σο Μπορίνενα τι Κερέν ο Πρεσβύτεροι;») Χαιρίνενα μπουτ σο βουρτισάλεν ντα μανγκένα τι τζαν-λεν λατσσές!​—Παρ. 17:17.

Σο κα βοηθίνελ-τουμέν τι αβέν πο πασέ ι πφραλέντζαρ ντα ι πφενίντζαρ κι κχανγκιρί; Τι τζαν σαρέ κο συναθροίσεις τουμαρέ πφραλέντζαρ ντα πφενίντζαρ ντα τι νικιόν λέντζαρ μπουτ φαρ κο έργος. Σαρ κα βοηθίνελ-τουμέν ανταβά; Ο Φέλιξ βακερντάς: «Η κχανγκιρί μπεσέλας σαρ σαρ για τι βουρτίναβ. Νιωθίναβα ότι εκτιμίνενα-μαν. Σαρέ βοηθιντέ-μαν τι νιωθίναβ ότι ισινόμ αντρέ κι κχανγκιρί πάλι, ότι ο Ιεχωβά συγχωριντάς-μαν ντα ότι μπορίναβα τι συνεχίναβ τι υπηρετίναβ ι Ιεχωβάς».​—Ντικχέν ο πλαίσιος «Σο Μπορίνενα τι Κερέν Τουμέν;»

ΜΑ ΜΟΥΚΧΕΝ-ΤΟΥΜΕΝ!

Ο Μπενγκ να κα τσσιναβέλ τι ανέλ τουμένγκε γιαβερά-ντα καταιγίδες, σαρ τι βακεράας, για τι κερέλ-τουμέν τι χασαρέν τουμαρί ζορ καζόμ μαρένα-τουμέν τι αβέν πάλι λατσσέ αμαλά ι Ιεχωβάσαρ. (Λουκ. 4:​13) Για τι αβέν έτοιμοι οντουλένγκε σο κα αβέν-πες, κερέν ζουρανό τουμαρό πνευματικός κχερ, δηλαδή τουμαρί φιλία ι Ιεχωβάσαρ.

Ο Ιεχωβά ντέλα πο λάφι πι μπρακένγκε: «Κα ρόνταβ οντουλέσκε σο χασάρντιλο, κα ανάβ παλάλ οντουλές σο νασλό, κα πφάνταβ ο πληγές οντουλέσκε σο ντινάς-πες ντα κα κεράβ τι τθερέλ ζορ ο μπίζουρανο». (Ιεζ. 34:​16) Ο Ιεχωβά βοηθιντάς μπουτέ γιαβερέ τζενέν τι αβέν πάλι λατσσέ αμαλά λέσαρ. Τι αβέν σίγουροι ότι μανγκέλα τι βοηθίνελ-τουμέν τι μπαριαρέν ατζέ πο μπουτ ι φιλία σο τθερένα λέσαρ.