Νεβέ Αντρόγυνα ​—Τσσουβέν ι Υπηρεσία ι Ιεχωβάσκι Πρώτα Τουμαρέ Ζωγιάτε

1, 2. (α) Σόσκε ο νεβέ αντρόγυνα πρέπει τι ντεν μπέσα κο Ιεχωβά; (Ψαλμός 37:3, 4) (β) Σο κα ντικχάς ανταλέ μαθημάστε;

ΜΗΠΩΣ ετοιμάνενα-τουμέν τι παντρίνεν ή ισινέν νεβό ζευγάρι; Άμα βα, σίγουρα μπεκλεντίνενα τι απολαμβάνεν τουμαρί ζωή ι τζενέσαρ σο μανγκένα αζόμ μπουτ. Όμως, η παντριά τθερέλα πο δυσκολίες-ντα. Επίσης, πρέπει τι λιντιόν σημαντικές αποφάσεις. Οντουβά σο κερένα κάνα νακχένα δυσκολίες ντα ο αποφάσεις σο λένα κα επηρεάνελ ι ευτυχία ι ντουένγκι-ντα για μπουτ μπρεσά. Άμα κα ντεν μπέσα κο Ιεχωβά, κα λεν γκοντιαβέρ αποφάσεις, τουμαρό μπιαβ κα αβέλ πο ζουρανό ντα τουμέν κα αβέν πο ευτυχισμέ. Άμα να κα κερέν ο συμβουλές ι Ντεβλέσκε, μπέκιμ κα τθερέν δυσκολίες σο κα ανέν τουμένγκε προβλήματα τουμαρέ μπιαβέστε, ντα να κα αβέν ευτυχισμέ.​—Διαβάνεν Ψαλμός 37:3, 4.

² Παρόλο σο ανταβά μάθημας κερέλα λάφι ι νεβέ αντρογυνόνγκε, κα βακερέλ ι δυσκολιένγκε σο μπέκιμ τι τθερέν σαρέ ο αντρόγυνα. Κα βακερέλ σο μπορίνασα τι σικλιάς κατά παραδείγματα πιστέ μουρσένγκε ντα τζουβλίνγκε σο ισί αντρέ κι Γραφή. Ανταλά παραδείγματα ι Γραφιάκε σικλιαρένα-αμέν πράγματα σο μπορίνασα τι κεράς-λεν αμαρέ ζωγιάτε, ντα αμαρέ μπιαβέστε. Κα ντικχάς επίσης σο σικλιάσα μερικέ ζευγαρίνταρ αντιβές.

ΚΑΛΑ ΔΥΣΚΟΛΙΕΣ ΜΠΕΚΙΜ ΤΙ ΤΘΕΡΕΝ Ο ΝΕΒΕ ΑΝΤΡΟΓΥΝΑ;

3, 4. Καλά δυσκολίες μπέκιμ τι τθερέν ο νεβέ αντρόγυνα;

³ Μερικοί μπέκιμ τι βακερένα κο νεβέ αντρόγυνα τι τζουβντιόν σαρ ο πο μπουτ τζενέ αντιβές. Φιρειπείν ο νταντά, ο νταγιά ντα λένγκε τζενέ μπέκιμ τι πιένενα εκχέ νεβέ αντρογυνός τι κερέλ τσσαβέν καζόμ πο σουγκό αβέλα-πες. Ή ο αμαλά ντα ο τζενέ λένγκε μπέκιμ τι βακερένα κο νεβό ζευγάρι τι κινέλ κχερ ντα τι πφερέλ-λες σουκάρ πραγματέντζαρ.

⁴ Άμα εκ ζευγάρι να προσοχίνελα, μπέκιμ τι λελ αποφάσεις σο κα ανέλ μπαρέ μπόρτζια. Άμα κα αβέλ-πες ανταβά, πρέπει τι κερέν μπουτί ο ντούι-ντα μπουτ σαάτια για τι ποκινέν πουμαρέ μπόρτζια. Η μπουτί μπέκιμ τι αρχίνελ τι λελ λένταρ ο σαάτι σο έπρεπε τι ντεν για τι σικλιαρέν-πες κατά Γραφή, τι κερέν ι φαμιλιάκι λατρεία ντα τι νικιόν κο έργος. Μπέκιμ ατζέ-ντα τι χασαρένα συναθροίσεις σόσκε κερένα πο μπουτ σαάτια μπουτί για τι νικαβέν πο μπουτ λοβέ ή για τι μπορίνεν τι ατσσικιαρέν πουμαρί μπουτί. Οτθάρ, χασαρένα σουκάρ ευκαιρίες τι κερέν πο μπουτ πράγματα κι υπηρεσία κι Ιεχωβάσκι.

5. Σο σικλιόνα κατά Κλάους ντα κατά Μαρίσα;

⁵ Μπουτ εμπειρίες σικαντέ ότι, άμα ο πο σημαντικός πράγμας αμαρέ ζωγιάτε ισί τι κεράς λοβέ, ανταβά να κα κερέλ-αμέν χαρούμενους. Ντικχέν σο σικλιλό ο Κλάους ντα η Μαρίσα ανταλέσταρ.b Κάνα παντρισάλε, κερένας ο ντούι-ντα μπουτ σαάτια μπουτί για τι νικαβέν πο μπουτ λοβέ. Αλλά να ισινέ μπαγιά ευτυχισμέ. Ο Κλάους βακερέλα: «Τθεράας σο μανγκάας, αλλά να τθεράας αμαρέ γκοντιάτε τι κεράς πο μπουτ ι Ιεχωβάσκε. Για τι βακεράβ μι αλήθεια, αμαρί ζωή ισινέ μπερδεμέ ντα πφερντί άγχος». Μπέκιμ τουμέν-ντα ντικχλέν ότι άμα τθερένα τουμαρέ γκοντιάτε τι κερέν πο μπουτ λοβέ νανέ πφερντί τουμαρί ζωή. Άμα ανταβά αβιλό-πες τουμένγκε, μα χασαρέν τουμαρί ζορ. Μπορίνενα τι βοηθίντιβεν άμα κα ντικχέν ο λατσσό παράδειγμας ι γιαβερένγκο. Πρώτα, κα ντικχάς σο μπορίνελα τι σικλιόλ εκ παντριμέ μουρς κατά βασιλιάς Ιωσαφάτ.

ΣΑΡ Ο ΒΑΣΙΛΙΑΣ ΙΩΣΑΦΑΤ, ΤΙ ΝΤΕΝ ΜΠΕΣΑ ΚΟ ΙΕΧΩΒΑ

6. Σαρ κερντάς ο Ιωσαφάτ ι συμβουλή σο ισί κο εδάφια Παροιμίες 3:5, 6 κάνα τσσουντάς-λεν λέσκε λαόσαρ εκ μπαρό στρατός;

⁶ Μουρσάλεν σο ισινέν παντριμέ, μήπως μπάζιμα νιωθίνενα ότι τασαβένα-τουμέν τουμαρέ ευθύνες; Άμα βα, μπορίνενα τι βοηθίντιβεν κατά βασιλιάς Ιωσαφάτ. Σαρ βασιλιάς, ο Ιωσαφάτ ισινέ υπεύθυνος τι αβέλ αρακχαντό σαρό ο λαός! Σαρ ντινάς πέρα οντιά μπαρί ευθύνη; Κερντάς σο νακχέλας λέσκε βαστένταρ για τι αρακχαβέλ σαρέ ι λαός. Κερντάς ο βουτσσέ ντουβάρια κι πόλη σο ισί κο Ιούδας ντα γκιντιντάς 1.160.000 ντα πο μπουτ στρατιωτέν. (2 Χρον. 17:​12-19) Πο σοράν, ο Ιωσαφάτ τθερέλας εκ μπαρό πρόβλημας. Εκ μπαρό στρατός Αμμωνιτένγκο, Μωαβιτένγκο ντα οντουλένγκο σο μπεσένας κο βεσά κο Σηείρ, τσσουντάς-λεν λέσαρ, λέσκε φαμιλιάσαρ ντα λέσκε λαόσαρ. (2 Χρον. 20:1, 2) Σο κερντάς ο Ιωσαφάτ; Μανγκλάς βοήθεια ντα ζορ κατά Ιεχωβά. Ανταβά ταιριάνελας με την συμβουλή ι εδαφιόνγκι Παροιμίες 3:5, 6. (Διαβάνεν) Η ταπεινή προσευχή σο κερντάς ο Ιωσαφάτ, σο ισί γραμμέ κο εδάφια 2 Χρονικών 20:​5-12, σικαβέλα καζόμ μπουτ μπέσα ντέλας πι λατσσέ Νταντέστε, κο Ιεχωβά. Σαρ απαντιντάς ο Ιεχωβά κι προσευχή σο κερντάς ο Ιωσαφάτ;

7. Σαρ απαντιντάς ο Ιεχωβά κι προσευχή σο κερντάς ο Ιωσαφάτ;

⁷ Ο Ιεχωβά κερντάς λάφι κο Ιωσαφάτ αντράλ εκχέ Λευιτίσταρ, σο βακερένας λέσκε Ιααζιήλ. Ο Ιεχωβά βακερντάς: «Λεν τουμαρί θέση, ατσσόν οτθέ ντα ντικχέν σαρ κα σώνελ-τουμέν ο Ιεχωβά». (2 Χρον. 20:​13-17) Σίγουρα, να αβέλα-πες αντικάς εκ τζένγκι! Όμως, οντουλά οδηγίες να ισινέ τζενένταρ, αλλά κατά Ιεχωβά. Ο Ιωσαφάτ ντινάς μπαρί μπέσα κο Ιεχωβά ντα κερντάς οντουβά σο βακέρντιλο λέσκε. Κάνα βοβ ντα ο λαός γκιλέ τι αρακχέν πουμαρέ ντουσμανίς, να τσσουντάς ανγκλάλ ι στρατιωτέν σο τθερένας μπουτ μπαρέ ικανότητες, αλλά οντουλέν σο βακερένας ύμνοι ντα να τθερένας όπλα. Ο Ιεχωβά ατσσικιαρντάς ο λάφι σο ντινάς κο Ιωσαφάτ. Νικιντάς πι ντουσμανίν.​—2 Χρον. 20:​18-23.

8. Σο μπορίνελα τι σικλιόλ εκ παντριμέ μουρς κατά Ιωσαφάτ;

⁸ Μουρσάλεν σο ισινέν παντριμέ, μπορίνενα τι σικλιόν κατά Ιωσαφάτ. Τουμέν ισινέν υπεύθυνοι τουμαρέ φαμιλιάκε, οτθάρ τι μαρέν-τουμέν για τι αρακχαβέν ντα τι ανέν ο αναγκαία τουμαρέ φαμιλιάκε. Κάνα νακχένα δυσκολίες, μπέκιμ τι νιωθίνενα ότι τθερένα ι ζορ τι ντεν-λεν πέρα κορκορέ. Αλλά μα ντεν μπέσα τουμαρέ ζοριάτε. Οκιά μπάνταρ, τι μανγκέν ι βοήθεια ι Ιεχωβάσκι αντράλ κατά προσευχές σο κερένα. Επίσης, κερέν τουμαρέ ρομνιάσαρ προσευχή αντράλ τουμαρέ γκίσταρ. Τι μανγκέν τι οδηγίνελ-τουμέν ο Ιεχωβά αντράλ κατά σικλιαριπέ ι Γραφιάκο ντα κατά εκδόσεις σο ντέλα η οργάνωση ι Ντεβλέσκι, ντα τι κερέν ο συμβουλές σο αρακχένα. Μερικοί μπέκιμ μα τι συμφωνίνενα με το αποφάσεις σο λένα αντράλ κατά Γραφή ντα μπέκιμ τι βακερένα ότι νανέ γκοντιαβέρ οντουβά σο κερένα. Μπέκιμ τι βακερένα ότι ο λοβέ ντα ο πράγματα σο κιντιόνα λέντζαρ κα αβέλ o πο λατσσό αρακχαϊπέ τουμαρέ φαμιλιάκε. Αλλά τι ντεν-τουμέν γκοντί σο κερντάς ο Ιωσαφάτ. Βοβ ντινάς μπέσα κο Ιεχωβά ντα σικαντάς-λες ανταβά οντουλέντζαρ σο κερέλας. Ο Ιεχωβά να μουκχλάς οντουλέ αφοσιωμέ μουρσές ντα να κα μουκχέλ τουμέν-ντα. (Ψαλμ. 37:​28· Εβρ. 13:5) Σο μπορίνενα τι κερέν ο ζευγάρια για τι αβέν σίγουροι ότι λένγκι ζωή κα αβέλ ευτυχισμέ;

ΣΑΡ Ο ΠΡΟΦΗΤΗΣ ΗΣΑΪΑΣ ΝΤΑ ΛΕΣΚΙ ΡΟΜΝΙ, ΤΣΣΟΥΒΕΝ ΠΡΩΤΑ ΤΟΥΜΑΡΕ ΖΩΓΙΑΤΕ Ι ΥΠΗΡΕΣΙΑ Ι ΙΕΧΩΒΑΣΚΙ

9. Σο μπορίνασα τι βακεράς ι Ησαϊάσκε ντα λέσκε ρομνιάκε;

⁹ Ο προφήτης Ησαΐας ντα λέσκι ρομνί τσσουντέ πρώτα πουμαρέ ζωγιάτε ι υπηρεσία ι Ιεχωβάσκι. Ο Ησαΐας ισινέ προφήτης, ντα ντικχίντιβελα ότι λέσκι ρομνί τθερέλας ο διορισμός τι βακερέλ προφητείες, αφού βακέρντιβελα “η προφήτισσα”. (Ησ. 8:​1-4) Σαρ αντρόγυνος, ο Ησαΐας ντα λέσκι ρομνί τσσουβένας ι υπηρεσία ι Ιεχωβάσκι πρώτα πουμαρέ ζωγιάτε. Σο σουκάρ παράδειγμας μουκχλέ ι αντρογυνόνγκε αντιβές!

10. Σαρ κα αβέν ο αντρόγυνα πο αποφασισμέ τι κερέν καζόμ πο μπουτ αβέλα-πες ι Ιεχωβάσκε άμα διαβάνενα ο προφητείες ι Γραφιάκε;

¹⁰ Ο αντρόγυνα αντιβές κα μοιάζεν κο Ησαΐας ντα λέσκε ρομνιάτε κάνα κερένα ο πο λατσσό κι υπηρεσία κι Ιεχωβάσκι. Μπορίνενα τι μπαριαρέν πο μπουτ πουμαρί μπέσα κο Ιεχωβά κάνα διαβάνενα γιεκ ο προφητείες ι Γραφιάκε ντα ντικχένα σαρ νικιόνα μπαγιά πάντα.c (Τίτο 1:2) Μπορίνενα τι σκεφτίνεν σο τι κερέν για τι βοηθίνεν τι νικιόν μπαγιά ο προφητείες ι Γραφιάκε. Για παράδειγμας, μπορίνενα τι βοηθίνεν τι νικιόλ μπαγιά η προφητεία σο βακερντάς ο Ιησούς ότι ο λατσσέ αμπέρια κα βακέρντιβεν σαρί κι πφουβ πριν τι αβέλ ο τέλος. (Ματθ. 24:​14) Καζόμ πο σίγουρος ισί εκ αντρόγυνος ότι ο προφητείες ι Γραφιάκε νικιόνα μπαγιά, αζόμ πο αποφασισμέ κα αβέλ τι κερέλ πο μπουτ ι Ιεχωβάσκε.

ΣΑΡ Η ΠΡΙΣΚΙΛΛΑ ΝΤΑ Ο ΑΚΥΛΑΣ, ΤΙ ΤΣΣΟΥΒΕΝ Ι ΒΑΣΙΛΕΙΑ ΠΡΩΤΑ ΤΟΥΜΑΡΕ ΖΩΓΙΑΤΕ

11. Σο μπορισάλε τι κερέν η Πρίσκιλλα ντα ο Ακύλας, ντα σόσκε;

¹¹ Ο τερνέ αντρόγυνα μπορίνενα τι σικλιόν κατά Πρίσκιλλα ντα κατά Ακύλας, σο ισινέ εκ αντρόγυνος Ιουδαιόνγκο σο τζουβντιόνας κι Ρώμη. Ασουντέας ο λατσσέ αμπέρια ι Ιησούσκε ντα αβιλέας Χριστιανοί. Σίγουρα, νιωθίνενας πφερντέ πουμαρέ ζωγιάτε. Όμως, λένγκι ζωή αλλαξάλι οτθέ σο να μπεκλεντίνενας-λες κάνα ο αυτοκράτορας Κλαύδιος βακερντάς σαρέ κο Ιουδαίοι τι νασέν κατά Ρώμη. Σκεφτίνεν σο μανγκέλας τι βακερέλ ανταβά ι Ακυλάσκε ντα ι Πρισκιλλάκε. Έπρεπε τι μουκχέν ο τθαν σο τζανένας, τι πουτρέν νεβό κχερ ντα τι αρχίνεν τι κερέν πάλι τσαντίρια εκχέ νεβέ τθανέστε. Κα κερέλας-λεν ανταγιά νεβί δυσκολία τι τσσουβέν κι νάκρη ι Βασιλεία; Μάλλον τζανένα ι απάντηση. Κάνα γκιλέ τι μπεσέν κι Κόρινθος, ο Ακύλας ντα η Πρίσκιλλα αρχισάλε τι βοηθίνεν ι κχανγκιρί σο ισινέ οτθέ ντα γιεκ ι απόστολε Παυλόσαρ ντένας ζορ ι πφραλέν. Σοράν, γκιλέ τι μπεσέν τθανέντε σο η ανάγκη τι βακέρντιβεν ο λατσσέ αμπέρια ισινέ πο μπαρί. (Πράξ. 18:​18-21· Ρωμ. 16:​3-5) Τθερένας μπουτ πράγματα τι κερέν πουμαρέ ζωγιάτε ντα ισινέ ευτυχισμέ!

12. Σόσκε πρέπει εκ αντρόγυνος τι τσσουβέλ πνευματικούς στόχους;

¹² Ο αντρόγυνα αντιβές μπορίνενα τι μοιάζεν κι Πρίσκιλλα ντα κο Ακύλας κάνα τσσουβένα ι Βασιλεία πρώτα πουμαρέ ζωγιάτε. Ο πο λατσσό σαάτι για τι κερέλ λάφι εκ ζευγάρι οντουλένγκε σο μανγκέλα τι κερέλ πι ζωγιάτε ισί πριν τι παντρίνελ. Κάνα ο ντούι-ντα λένα αποφάσεις γιεκ ντα μαρένα-πες τι κερέν ο πνευματικούς στόχους σο τσσουντέ, τθερένα πο μπουτ ευκαιρίες τι ντικχέν ο πνεύμας ι Ιεχωβάσκο πουμαρέ ζωγιάτε. (Εκκλ. 4:9, 12) Ντικχέν σο αβιλό-πες κο Ράσελ ντα κι Ελίζαμπεθ. Ο Ράσελ βακερέλα: «Πριν τι παντρίνας, βακερντάμ καλά πράγματα μανγκάσα τι κεράς ι Ιεχωβάσκε». Η Ελίζαμπεθ βακερέλα: «Κερντάμ λάφι ανταλέσκε για τι αβάς σίγουροι, κάνα κα λάας αποφάσεις πο σοράν, ότι οντουλά σο τραμπιντάμ τι κεράς να κα τσσιναβέν-αμέν οντουλένταρ σο μανγκάας τι κεράς αμαρέ ζωγιάτε». Ο Ράσελ ντα η Ελίζαμπεθ, μπορισάλε τι τζαν κι Μικρονησία για τι υπηρετίνεν οτθέ σο η ανάγκη ισινέ πο μπαρί επειδή ο πράγματα λένγκε ζωγιάτε μουκχένας-λεν τι κερέν-λες ανταβά.

13. Σο κα αβέλ-πες άμα ντάσα μπέσα κο Ιεχωβά σαρ βακερέλα ο εδάφιος Ψαλμός 28:7;

¹³ Σαρ ο Ράσελ ντα η Ελίζαμπεθ, μπουτ ζευγάρια τραμπιντέ τι ατσσικιαρέν απλή πουμαρί ζωή για τι μπορίνεν τι βακερέν ντα τι σικλιαρέν ο λατσσέ αμπέρια καζόμ πο μπουτ αβέλα-πες. Κάνα εκ ζευγάρι μανγκέλα τι κερέλ σο νακχέλα λένγκε βαστένταρ ι Ιεχωβάσκε ντα σοράν κερένα γιεκ ο πο λατσσό για τι κερέν-λες ανταβά, κα αβέν-πες λατσσέ πράγματα. Κα ντικχέν σαρ αρακχαβέλα-λεν ο Ιεχωβά, κα τθερέν πο μπουτ μπέσα λέστε ντα κα αβέν μπαγιά ευτυχισμέ.​—Διαβάνεν Ψαλμός 28:7.

ΣΑΡ Ο ΑΠΟΣΤΟΛΟΣ ΠΕΤΡΟΣ ΝΤΑ ΛΕΣΚΙ ΡΟΜΝΙ, ΤΙ ΝΤΕΝ ΜΠΕΣΑ ΚΟ ΛΑΦΙ ΚΙ ΙΕΧΩΒΑΣΚΟ

14. Σαρ σικαντάς ο απόστολος Πέτρος ντα λέσκι ρομνί ότι ντένας μπέσα κο λάφι κι Ιεχωβάσκο σο ισί κο εδάφια Ματθαίος 6:​25, 31-34;

¹⁴ Ο αντρόγυνα μπορίνενα τι σικλιόν εμ κατά απόστολος Πέτρος ντα λέσκε ρομνιάταρ. Πασέ σιοβ μάσεκ ή εκ μπρες σοράν κατά πρώτη φαρ σο ντικχλάς ι Ιησούς, ο απόστολος Πέτρος έπρεπε τι λελ εκ σημαντική απόφαση. Ο Πέτρος ασταρέλας ματσσέν για τι νικαβέλ ο μαντρό πι φαμιλιάκο. Οτθάρ, κάνα ο Ιησούς βακερντάς λέσκε τι τζαλ παλά-λέστε ολοχρόνια, ο Πέτρος έπρεπε τι σκεφτίνελ πι φαμιλί. (Λουκ. 5:​1-11) Τραμπιντάς τι τζαλ παλάλ κο Ιησούς κο έργος σο κερέλας. Ισινέ γκοντιαβέρ ανταβά σο τραμπιντάς! Ντα τθεράσα μπουτ λόγους τι πακιάς ότι ι Πετρόσκι ρομνί βοηθιντάς-λες ανταλέστε σο τραμπιντάς. Η Γραφή σικαβέλα ότι, σοράν κατά ανάσταση ι Ιησούσκι, βόι ισινέ φαρ σο κερέλας ταξίδια ι Πετρόσαρ. (1 Κορ. 9:5) Σίγουρα, επειδή ισινέ εκ λατσσί Χριστιανή ρομνί, ο Πέτρος μπορίνελας τι κερέλ λάφι ελεύθερα κάνα ντέλας συμβουλές κο παντριμέ μουρσά ντα τζουβλιά σο ισινέ Χριστιανοί. (1 Πέτρ. 3:​1-7) Ντικχίντιβελα ότι εμ ο Πέτρος αλλά εμ λέσκι ρομνί, ντένας μπέσα κο λάφι κι Ιεχωβάσκο ότι κα ντέλας-λεν σο-ντα χρειαζίντιβενας άμα κα τσσουβένας ι Βασιλεία κι πρώτη θέση πουμαρέ ζωγιάτε.​—Διαβάνεν Ματθαίος 6:​25, 31-34.

15. Σο σικλιόνα οντουλένταρ σο αβιλέ-πες κο Τιάγκου ντα κι Έστερ;

¹⁵ Άμα ισινέν μερικά μπρεσά παντριμέ, σο μπορίνενα τι κερέν για μα τι τσσιναβέν τι μανγκέν τι κερέν πο μπουτ κο έργος; Εκ τρόπος ισί τι σικλιόν σο αβιλό-πες γιαβερέ ζευγαρίνγκε. Για παράδειγμας, μπορίνενα τι διαβάνεν θέματα κατά σειρά «Πρόσφεραν Πρόθυμα τον Εαυτό Τους». Ασακέ θέματα βοηθιντέ εκχέ αντρογυνός κατά Βραζιλία, σο βακερένα λένγκε Τιάγκου ντα Έστερ, τι μανγκέν τι υπηρετίνεν οτθέ σο η ανάγκη ισί πο μπαρί. Ο Τιάγκου βακερέλα: «Καζόμ διαβάναας εμπειρίες σο σικαβένας σαρ ο Ιεχωβά βοηθιντάς πι υπηρετόν αμαρέ ντιβεσέντε, μανγκάας αμέν-ντα τι ντικχάς λέσκο βας τι οδηγίνελ-αμέν ντα τι αρακχαβέλ-αμέν». Τελικά, γκιλέ κι Παραγουάη, ντα κατά 2014 κερένα έργος τζενέντε σο κερένα λάφι πορτογαλικά. Η Έστερ βακερέλα: «Εκ εδάφιος σο μανγκάσα ο ντούι-ντα μπουτ ισί ο Εφεσίους 3:​20. Μπουτ φαρ, ντικχλάμ ανταλά λάφια τι νικιόν μπαγιά καζόμ υπηρετίνασα ι Ιεχωβάς». Οντουλέ επιστολιάτε σο μπουτσσαντάς κο Εφεσίους, ο Παύλος ντινάς πο λάφι ότι ο Ιεχωβά κα ντελ-αμέν πο μπουτ οντουλένταρ σο μανγκάσα. Καζόμ μπαγιά ισί ανταβά λάφι σο ντινάς ο Παύλος!

16. Κάσταρ μπορίνενα τι μανγκέν συμβουλές ο τερνέ ζευγάρια κάνα σκεφτίνενα οντουλά σο μανγκένα τι κερέν πουμαρέ ζωγιάτε;

¹⁶ Ο τερνέ αντρόγυνα αντιβές μπορίνενα τι βοηθίντιβεν γιαβερένταρ σο σικλιλέ τι ντεν μπέσα κο Ιεχωβά. Μερικά αντρόγυνα μπέκιμ τι κερένα μπουτ μπρεσά σκαπανικός. Μανγκέν λένγκι συμβουλή άμα νιωθίνενα ότι τθερένα ανάγκη τι σκεφτίνεν πο λατσσές τουμαρέ στόχοι. Ανταβά ισί ατζέκ εκ τρόπος τι σικαβέν ότι ντένα μπέσα κο Ιεχωβά. (Παρ. 22:​17, 19) Ο πρεσβύτεροι-ντα μπορίνενα τι βοηθίνεν ι τερνέ αντρογυνόν τι τσσουβέν ντα τι κερέν πνευματικούς στόχους.

17. Σο αβιλό-πες κο Κλάους ντα κι Μαρίσα, ντα σο σικλιάσα αμέν λένταρ;

¹⁷ Μπάζιμα μπέκιμ τι μανγκάσα τι κεράς πο μπουτ ι Ιεχωβάσκε εκχέ τροπόσαρ, αλλά τι σικαβέλα αμένγκε ότι μανγκέλα τι υπηρετίνας-λες εκχέ γιαβερέ τροπόσαρ. Ανταβά αβιλό-πες κο Κλάους ντα κι Μαρίσα, σο βακερντάμ κι αρχή. Τριν μπρεσά αφού παντρισάλε, νασλέ πουμαρέ τθεμέσταρ ντα μανγκλέ τι τζαν τι βοηθίνεν κι οικοδόμηση κο γραφείος τμήματος κι Φινλανδία. Όμως, σικλιλέ ότι να κα μουκχένας-λεν τι μπεσέν οτθέ πο μπουτ από σιοβ μάσεκ. Κι αρχή, πφανγκιλό λένγκο γκι. Μπουτ σουγκό όμως καλιντέ-λεν τι σικλιόν αραβικά ντα ακανά τθερένα ι χαρά τι κερέν έργος τζενέντε σο κερένα λάφι αραβικά εκχέ γιαβερέ τθεμέστε. Κάνα η Μαρίσα ανέλα πι γκοντιάτε οντουλά σο αβιλέ-πες, βακερέλα: «Νταράβας τι κεράβ πράγματα σο να κερντόμας-λεν γιαβέρ φαρ ντα τι νταβ σαρί μι μπέσα κο Ιεχωβά. Αλλά ντικχλόμ ότι ο Ιεχωβά πάντα βοηθίνελα-αμέν τροπόντζαρ σο να μπεκλεντίνασα. Σοράν ανταλέσταρ, ντάβα πο μπουτ μπέσα κο Ιεχωβά». Σαρ σικαβέλα ανταβά παράδειγμας, μπορίνενα τι αβέν σίγουροι ότι ο Ιεχωβά πάντα κα ευλογίνελ-τουμέν άμα ντένα σαρί τουμαρί μπέσα λέστε.

18. Σο μπορίνενα τι κερέν ο αντρόγυνα για μα τι τσσιναβέν τι ντεν μπέσα κο Ιεχωβά;

¹⁸ Ο μπιαβ ισί δώρος κατά Ιεχωβά. (Ματθ. 19:5, 6) Βοβ μανγκέλα τι απολαμβάνεν ο αντρόγυνα ανταβά δώρος. (Παρ. 5:​18) Τερνέ αντρόγυνα, μήπως κα αβέλας λατσσό τι σκεφτίνεν σο κερένα τουμαρέ ζωγιάτε; Κερένα σο νακχέλα τουμαρέ βαστένταρ για τι σικαβέν κο Ιεχωβά καζόμ μπουτ εκτιμίνενα ο δώρα σο ντινάς-τουμέν; Κερέν λάφι κο Ιεχωβά αντράλ κατά προσευχή. Ρόντεν λέσκε Λαφίστε ο αρχές σο ισί τουμένγκε. Σοράν, κερέν ο συμβουλές σο ντέλα-τουμέν ο Ιεχωβά. Μπορίνενα τι αβέν σίγουροι ότι κα τθερέν εκ ευτυχισμέ ντα πφερντί ζωή άμα τσσουβένα σαρ αντρόγυνος πρώτα τουμαρέ ζωγιάτε ι υπηρεσία ι Ιεχωβάσκι!