Σο Σικαβέλα Αμένγκε η Αγία Γραφή Οντουλέσκε σο Γραφιντάς-λα;

1. Σόσκε εκτιμίνενα ι Γραφή;

ΕΚΤΙΜΙΝΑΣΑ μπουτ ι Ιεχωβά Ντεβλές σόσκε ντινάς-αμέν ι Αγία Γραφή! Αντράλ λάκε σελιδένταρ, βοβ ντέλα-αμέν γκοντιαβέρ συμβουλές σο βοηθίνενα-αμέν τι ντας πέρα ο προβλήματα σο τθεράσα αντιβές. Ντέλα-αμέν επίσης εκ μπουτ σουκάρ ελπίδα ι ντιβεσένγκε σο κα αβέν. Ο πο σημαντικός ισί ότι ο Ιεχωβά, αντράλ κατά Γραφή, σικαντάς αμένγκε σο χαρακτήρας τθερέλα. Καζόμ σκεφτίνασα λατσσές λέσκε σουκάρ ιδιότητες, πουτάρντιβελα αμαρό γκι, ντα ανταβά τσσίντελα-αμέν τι τζας πασέ αμαρέ Ντεβλέστε ντα τι μπαριαράς εκ ζουρανί φιλία λέσαρ.​—Ψαλμ. 25:14.

2. Καλέ τροπόντζαρ σικαντάς ο Ιεχωβά πο νεαυτός κο τζενέ;

² Ο Ιεχωβά μανγκέλα τι γνωρίνεν-λες ο τζενέ. Κο πουρανέ μπρεσά, σικαντάς κον ισί αντράλ κατά σουνέ, κατά φαντασίες, ατζέ-ντα κατά άγγελοι. (Αριθ. 12:6· Πράξ. 10:3, 4) Αλλά σαρ κα μπορίναας τι σικλιαράς-αμέν κατά σουνέ, κατά φαντασίες ή κατά λάφια ι αγγελόνγκε, άμα να γραφίντιλεας; Οτθάρ, ο Ιεχωβά τσσουντάς μερικέ τζενέν τι “γραφίνεν εκχέ βιβλιόστε” οντουλά σο μανγκέλας τι σικλιάς. (Ιερ. 30:2) Επειδή «ο ντρομ ι αληθινέ Ντεβλέσκο ισί τέλειος», μπορίνασα τι αβάς σίγουροι ότι ανταβά τρόπος σο τραμπιντάς τι κερέλ αμέντζαρ λάφι ισί ο πο λατσσό, ντα βοηθίνελα-αμέν.​—Ψαλμ. 18:30.

3. Σο κερντάς ο Ιεχωβά για τι αρακχαβέλ ι Γραφή; (Ησαΐας 40:8)

³ Διαβάνεν Ησαΐας 40:8. Ο Λάφι ι Ντεβλέσκο ντέλα γκοντιαβέρ συμβουλές πιστέ μουρσέντε ντα τζουβλίντε χιλιάδες μπρεσά ακανά. Σαρ αβέλα-πες ανταβά; Ανταγιά ισί εκ λατσσί ερώτηση σόσκε η Γραφή γραφισάλι μπουτ μπρεσά πο τζανγκλέ κο ρόλοι ντα κο περγαμηνές σο χαλάντιλε ι μπρεσέντζαρ σο νακχένας. Οτθάρ, αντιβές να τθεράσα οντουλά ρόλοι ντα περγαμηνές. Αλλά ο Ιεχωβά κερντάς τι αβέν αντίγραφα οντουλέ άγιε λαφίνγκε. Παρόλο σο ο αντιγραφείς ισινέ ατελείς, ισινέ μπουτ προσεκτικοί. Για παράδειγμας, εκ σπουδαγμέ τζενό γραφιντάς για το Εβραϊκές Γραφές: «Μπορίνασα τι βακεράς με σιγουριά ότι καέκ γιαβέρ πουρανό βιβλίος να ατσσιλό σαρ ισινέ χωρίς τι αλλάνεν λέσκε λάφια». Άρα, παρόλο σο η Γραφή γραφίντιλι μπουτ μπρεσά πο τζανγκλέ πραγματέντε σο χαλάντιβενας, ντα ο τζενέ σο κερντέ-λα αντιγραφή ισινέ ατελείς, μπορίνασα τι αβάς σίγουροι ότι ο λάφια σο διαβάνασα κι Γραφή αντιβές ισί ο σκέψεις Οντουλέσκε σο γραφιντάς-λα, ι Ιεχωβάσκε.

4. Σο κα ντικχάς ανταλέ μαθημάστε;

⁴ «Σαρέ ο λατσσέ ντα τέλεια δώρα αβένα» κατά Ιεχωβά. (Ιακ. 1:​17) Η Γραφή ισί εκ κατά πο λατσσέ δώρα σο ντινάς-αμέν ο Ιεχωβά. Εκ δώρος σικαβέλα αμένγκε κάτι οντουλέσκε σο ντινάς-λες αμέντε​—καζόμ λατσσές τζανέλα αμέν ντα αμαρέ ανάγκες. Ανταβά αβέλα-πες Οντουλέσαρ-ντα σο ντινάς-αμέν ι Γραφή. Κάνα διαβάνασα ανταβά δώρος, σικλιάσα μπουτ ι Ιεχωβάσκε. Σικλιάσα καζόμ λατσσές τζανέλα αμέν ντα αμαρέ ανάγκες. Ανταλέ μαθημάστε, κα ντικχάς σαρ σικαβέλα η Γραφή τριν ιδιότητες ι Ιεχωβάσκε: λέσκι σοφία, λέσκι δικαιοσύνη ντα λέσκο μανγκιπέ. Για τι ντικχάς πρώτα καλέ τροπόντζαρ σικαβέλα η Γραφή ι Ντεβλέσκι σοφία.

Η ΓΡΑΦΗ ΣΙΚΑΒΕΛΑ Ι ΣΟΦΙΑ Ι ΝΤΕΒΛΕΣΚΙ

5. Καβά ισί εκ τρόπος σο σικαβέλα η Γραφή ι σοφία ι Ντεβλέσκι;

⁵ Ο Ιεχωβά τζανέλα ότι χρειαζίντιβασα λέσκε γκοντιαβέρ συμβουλές. Λέσκο δώρος, η Γραφή, ισί πφερντό κατά σοφία λέσκι. Ο συμβουλές ι Γραφιάκε κερένα λατσσιπέ κο τζενέ. Η Γραφή αλλάνελα ζωές. Κάνα γραφίντιλε λάκε πρώτα βιβλία, ο Μωυσής βακερντάς κο λαός κι Ντεβλέσκο, κο Ισραηλίτες: «Ανταλά νανέ λάφια σο να τθερένα ιτς σημασία τουμένγκε, αλλά κα τζουβντιόν άμα κα ντεν καν ανταλέ λαφίντε». (Δευτ. 32:​47) Οντουλά σο ντένας καν κι Γραφή κα μπορίνενας τι τζαν λατσσές ντα τι αβέν χαρούμενοι. (Ψαλμ. 1:2, 3) Παρόλο σο νακχλό μπουτ βακίτι, η ζορ σο τθερέλα ο Λάφι ι Ντεβλέσκο τι κερέλ πο λατσσέ ι τζενένγκε ζωές να χουρντιλί. Για παράδειγμας, κο ιστότοπος jw.org, κο «Ιστορίες Τζενένγκε», κο βίντεα «Η Αλήθεια Αλλάνελα Ντιπ ο Ζωές», κα αρακχέν μπουτ ιστορίες τζενένγκε σο σικαβένα ότι η Γραφή επηρεάνελα μπουτ ι “πιστέ” τζενέν αντιβές.​—1 Θεσ. 2:13.

6. Σόσκε μπορίνασα τι βακεράς ότι η Γραφή νανέ σαρ καέκ γιαβέρ βιβλίος;

⁶ Καέκ γιαβέρ βιβλίος νανέ σαρ ο Λάφι ι Ντεβλέσκο. Σόσκε βακεράσα-λες ανταβά; Σόσκε Οντουβά σο γραφιντάς ανταβά βιβλίος, ο Ιεχωβά Ντεβέλ, ισί ο πο ζουρανό. Τζουβντιόλα για πάντα ντα τθερέλα σοφία σαρ καέκ γιαβέρ. Μπουτ γιαβερά βιβλία συνεχίνενα τι διαβάντιβεν σοράν κατά μεριπέ οντουλέσκο σο γραφιντάς-λεν. Αλλά καζόμ νακχέλα ο βακίτι, ο πο μπουτ φαρ λένγκε συμβουλές να ατσσικιαρένα για πάντα. Οκιά μπάνταρ, ο γκοντιαβέρ συμβουλές ι Γραφιάκε βοηθίνενα-αμέν πάντα ντα κερένα λατσσιπέ τζενέντε κάθε βακιτίστε. Καζόμ διαβάνασα οντουβά ιερός βιβλίος ντα σκεφτίνασα λατσσές οντουλά σο σικλιάσα, ο Ιεχωβά αντράλ πι ζουρανέ άγιε πνευμάσταρ βοηθίνελα-αμέν τι αγαβάς σαρ μπορίνασα τι κεράς ο συμβουλές ι Γραφιάκε αμαρέ ζωγιάτε. (Ψαλμ. 119:​27· Μαλ. 3:​16· Εβρ. 4:​12) Βα, βοβ ισί τζουβντό ντα μανγκέλα τι βοηθίνελ-τουμέν. Ανταβά πρέπει τι κερέλ-αμέν τι μανγκάς τι διαβάνας ι Γραφή συνέχεια!

7. Σαρ η Γραφή κερέλας τι αβέλ γιεκ ι Ντεβλέσκο λαός κο πουρανέ μπρεσά;

⁷ Εκ γιαβέρ σημαντικός τρόπος σο η Γραφή σικαβέλα ι Ντεβλέσκι σοφία ισί ότι βοηθίνελα ι Ντεβλέσκε λαός τι αβέλ γιεκ. Κάνα ο Ισραηλίτες τσσουντέ-πες κο Υποσχεμέ Τθεμ, μπεσλέ διαφορετικέ τθανέντε. Μερικοί λένταρ αβιλέ ψαράδες, γιαβερά ισινέ τσομπάνια, ντα γιαβερά καλλιεργίνενας ι πφουβ. Ο Ισραηλίτες σο τζουβντιόνας εκχέ τθανέστε κα μπορίνενας εύκολα τι τσσιναβέν τι πφαμπόν ι γιαβερέ Ισραηλιτένγκε σο τζουβντιόνας γιαβερτθέ. Όμως ο Ιεχωβά κανονιντάς τι γκιντίντιβεν ο Ισραηλίτες μερικέ ντιβεσέντε για τι ασουνέν τι διαβάντιβελ ντα τι εξηγίντιβελ λέσκο Λάφι. (Δευτ. 31:​10-13· Νεεμ. 8:2, 8, 18) Ανέν τουμαρέ γκοντιάτε σαρ κα αβέλας εκχέ πιστέ Ισραηλιτίσκε κάνα κα ερεσέλας κι Ιερουσαλήμ ντα κα ντικχέλας μπέκιμ εκατομμύρια πφραλέν λέσκε σαρό κατά τθεμ! Αντικάς ο Ιεχωβά βοηθίνελας πι λαός τι ατσσόλ γιεκ. Πο σοράν, κάνα αβιλί η Χριστιανική κχανγκιρί, τθερέλας μουρσέν ντα τζουβλίν σο κερένας λάφι μπουτ τσσιμπά. Μερικοί λένταρ τθερένας νάμι ενώ γιαβερά ισινέ απλά τζενέ. Μερικοί ισινέ χουλανέ ενώ γιαβερά τσορορέ. Επειδή όμως μανγκένας ι Γραφή, ισινέ γιεκ κι λατρεία κι αληθινέ Ντεβλέσκι. Οντουλά σο αβένας πιστοί, μπορίνενας τι αγαβέν ο Λάφι ι Ντεβλέσκο σάντε άμα κα λένας ι βοήθεια λένγκε πφραλένγκι ντα άμα κα κερένας συνάθροιση λέντζαρ.​—Πράξ. 2:​42· 8:​30, 31.

8. Σαρ η Γραφή κερέλα τι αβέλ γιεκ ι Ιεχωβάσκο λαός αντιβές;

⁸ Αμαρό γκοντιαβέρ Ντεβέλ συνεχίνελα τι σικλιαρέλ ντα τι κερέλ γιεκ πι λαός αντράλ κατά Αγία Γραφή. Ο πνευματικός χαμπέ σο μπεϊντίνασα αζόμ μπουτ αβέλα λέσταρ. Γκιντίντιβασα μπουτ φαρ αμαρέ συναθροισιέντε ντα αμαρέ συνελευσιέντε για τι ασουνάς τι διαβάντιβελ ντα τι εξηγίντιβελ η Γραφή. Άρα η Γραφή ισί εκ μπουτ σημαντικός εργαλείος σο χρησιμοποιήνελα ο Ιεχωβά για τι βοηθίνελ πι λαός «τι υπηρετίνεν-λες σαρέ γιεκ».​—Σοφ. 3:9.

9. Καγιά ιδιότητα χρειαζίντιβελα για τι αγαβάς οντουβά σο βακερέλα η Γραφή; (Λουκάς 10:21)

⁹ Ντικχέν κάτι γιαβέρ σο σικαβέλα ότι ο Ιεχωβά τθερέλα σοφία. Κερντάς τι γραφίντιβεν μπουτ μέρη κατά Γραφή τροπόσαρ σο κα μπορίνενας τι αγαβέν-λεν σάντε ο ταπεινά τζενέ. (Διαβάνεν Λουκάς 10:​21) Τζενέ σαρό κο ντουνιάς διαβάνενα ι Γραφή. Εκ σπουδαγμέ τζενό βακερντάς ότι η Γραφή «νανέ σάντε ο βιβλίος σο διαβαντέ-λες ο πο μπουτ τζενέ, αλλά ο βιβλίος σο διαβαντέ-λες πο προσεκτικά-ντα». Όμως σάντε ο ταπεινά τζενέ αγαβένα μπαγιά οντουλά σο βακερέλα ντα κερένα-λεν.​—2 Κορ. 3:​15, 16.

10. Καβά ισί εκ γιαβέρ τρόπος σο σικαβέλα η Γραφή ι σοφία ι Ιεχωβάσκι;

¹⁰ Αγαβάσα ι σοφία ι Ιεχωβάσκι κι Γραφή ατζέκ εκχέ τροπόσαρ. Ο Ιεχωβά χρησιμοποιήνελα ι Γραφή, όχι σάντε για τι σικλιαρέλ σαρέ πι λαός σαρ ομάδα αλλά επίσης για τι σικλιαρέλ ντα τι λοκχιαρέλ ο γκι ι κάθε εκχέσκο αμένταρ. Σαρέ νιωθίνασα καζόμ μπουτ πφαμπόλα ο Ιεχωβά αμένγκε καζόμ διαβάνασα λέσκο Λάφι. (Ησ. 30:​21) Αβιλό-πες τουμένγκε τι νακχέν εκ πρόβλημας ντα τι διαβάνεν κι Γραφή εκ εδάφιος σο ντικχίντιβελας ότι ισινέ γραμμέ ειδικά τουμένγκε; Όμως η Γραφή να ταρτίνελα σάντε τουμέν, αλλά εκατομμύρια τζενέν-ντα. Σαρ αβέλα-πες λάκε λάφια τι αβέν ντιπ αμαρέ ντιβεσένγκε ντα τι βοηθίνεν-τουμέν κο ανάγκες σο τθερένα τουμέν; Ανταβά αβέλα-πες σάντε επειδή Οντουβά σο γραφιντάς-λα ισί ο πο γκοντιαβέρ σαριλένταρ.​—2 Τιμ. 3:​16, 17.

Η ΓΡΑΦΗ ΣΙΚΑΒΕΛΑ Ι ΔΙΚΑΙΟΣΥΝΗ Ι ΝΤΕΒΛΕΣΚΙ

11. Σαρ σικαντάς ο Ντεβέλ ότι να ξεχωρίνελα ι τζενέν κάνα γραφίντιβελας η Γραφή;

¹¹ Εκ γιαβέρ ιδιότητα ι Ιεχωβάσκι ισί η δικαιοσύνη. (Δευτ. 32:4) Ο τζενό σο ισί δίκαιος να ξεχωρίνελα ι γιαβερέν. Ανταβά κερέλα ο Ιεχωβά-ντα. (Πράξ. 10:​34, 35· Ρωμ. 2:​11) Αγαβάσα-λες ανταβά κατά τσσιμπά σο χρησιμοποιησάλε για τι γραφίντιβελ η Γραφή. Ο πρώτα 39 βιβλία γραφισάλε πο μπουτ κι εβραϊκή τσσιπ, σο αγαβέλας εύκολα ι Ντεβλέσκο λαός αζομάν. Όμως κο ντιβεσά κι πρώτε Χριστιανόνγκε, ο πο μπουτ τζενέ κερένας λάφι ι μπαλαμανί τσσιπ. Οτθάρ, ο τελευταία 27 βιβλία γραφισάλε πο μπουτ οντουλέ τσσιμπάτε. Ο Ιεχωβά να βακερντάς ότι λέσκο Λάφι έπρεπε τι γραφίντιβελας σάντε εκχέ τσσιμπάτε. Αντιβές, ο τζενέ σαρί κι πφουβ ισί πασέ οχτώ δισεκατομμύρια ντα κερένα λάφι μπουτ τσσιμπά. Σαρ αβέλα-πες αζόμ μπουτ τζενέ τι σικλιόν ι Ιεχωβάσκε;

12. Καβά ισί εκ τρόπος σο αβέλα-πες μπαγιά ο εδάφιος Δανιήλ 12:4 κο τελευταία ντιβεσά;

¹² Αντράλ κατά προφήτης Δανιήλ, ο Ιεχωβά ντινάς πο λάφι ότι κο τελευταία ντιβεσά, «ο αληθινός σικλιαριπέ» σο ισί κι Γραφή “κα αβγατίντιβελας”. Μπουτ τζενέ κα αγαβένας-λες. (Διαβάνεν Δανιήλ 12:4) Εκ τρόπος σο αβγατίντιβελα ανταβά σικλιαριπέ ισί ότι μεταφράντιβενα, τυπώντιβενα ντα ντιντιόνα Γραφές ντα έντυπα. Η Γραφή ισί εκ βιβλίος σο τζανένα-λες ο πο μπουτ τζενέ ντα μεταφράντιβελα πο μπουτ τσσιμπέντε σαρέ κατά γιαβερά βιβλία. Μερικές μεταφράσεις ι Γραφιάκε σο νικαβένα ο εταιρίες ισί μπουτ πααλίς. Ο λαός ι Ιεχωβάσκο μεταφραντάς μέχρι ακανά σαστό ο Λάφι ι Ντεβλέσκο ή εκ μέρος λέσκο πο μπουτ από 240 τσσιμπέντε. Ντα κον μανγκέλα, μπορίνελα τι λελ εκ Γραφή χωρίς τι ποκινέλ. Αντικάς, τζενέ σαρέ κατά τθεμά σικλιόνα ο «λατσσέ αμπέρια ι Βασιλειάκε» πριν τι αβέλ ο τέλος. (Ματθ. 24:​14) Αμαρό δίκαιος Ντεβέλ μανγκέλα τι ντελ καζόμ πο μπουτ τζενέντε αβέλα-πες ι ευκαιρία τι διαβάνεν λέσκο Λάφι ντα αντικάς τι σικλιόν-λες, σόσκε μανγκέλα-αμέν σαριλέν μπουτ.

Η ΓΡΑΦΗ ΣΙΚΑΒΕΛΑ Ο ΜΑΝΓΚΙΠΕ Ι ΝΤΕΒΛΕΣΚΟ

13. Σόσκε μπορίνασα τι βακεράς ότι η Γραφή σικαβέλα ο μανγκιπέ ι Ιεχωβάσκο; (Ιωάννης 21:25)

¹³ Η Γραφή σικαβέλα ι πο μπαρί ιδιότητα Οντουλέσκι σο γραφιντάς-λα, ο μανγκιπέ. (1 Ιωάν. 4:8) Σκεφτίνεν σο τσσουντάς ο Ιεχωβά αντρέ κι Γραφή ντα σο να τσσουντάς. Ντινάς ντιπ οντουβά σο χρειαζίντιβασα για τι αβάς αμαλά λέσαρ, τι τζουβντιάς ευτυχισμέ ακανά ντα τι τθεράς ζωή για πάντα. Όμως επειδή ο Ιεχωβά μανγκέλα-αμέν, να πφερντάς-αμέν πο μπουτ πραγματέντζαρ οντουλένταρ σο χρειαζίντιβενα.​—Διαβάνεν Ιωάννης 21:25.

14. Καλέ γιαβερέ τροπόσαρ σικαβένα ο λάφια ι Γραφιάκε ο μανγκιπέ ι Ντεβλέσκο;

¹⁴ Εκ γιαβέρ τρόπος σο ο Ιεχωβά σικαντάς μανγκιπέ ισινέ ότι κερντάς αμέντζαρ λάφι τροπόσαρ σο ντέλα-αμέν αξία. Αντρέ κι Γραφή, να τσσουβέλα αμένγκε κανόνες ι κάθε πραγμάσκε για τι κερέλ κουμάντος αμαρί ζωή. Οκιά μπάνταρ, αντράλ κατά ιστορίες τζενένγκε, κατά προφητείες ντα κατά λατσσέ συμβουλές, βοηθίνελα-αμέν τι λας γκοντιαβέρ αποφάσεις. Ανταλέ τροπόντζαρ, ο Λάφι ι Ντεβλέσκο τσσίντελα-αμέν τι μανγκάς ι Ντεβλές ντα τι ντας-λες καν αντράλ αμαρέ γκίσταρ.

15. (α) Σαρ σικαντάς ο Ιεχωβά ότι πφαμπόλα οντουλένγκε σο διαβάνενα λέσκο Λάφι; (β) Κι φωτογραφία, καλέ τζενέν κατά Γραφή σκεφτίνελα η χουρντί τσσάι, ο τερνό πφραλ ντα η πφουρί πφεν; (Γέν. 39:1, 10-12· 2 Βασ. 5:​1-3· Λουκ. 2:​25-38)

¹⁵ Η Γραφή σικαβέλα ότι ο Ιεχωβά πφαμπόλα αμένγκε μπουτ. Σαρ; Λέσκο Λάφι ισί πφερντό ιστοριέντζαρ σο σικαβένα ο αισθήματα ι τζενένγκε. Μπορίνασα τι αγαβάς σαρ νιωθίνενας οντουλά τζενέ κατά Γραφή, σόσκε ισινέ τζενέ “σο τθερένας αισθήματα σαρ αμαρέ”. (Ιακ. 5:​17) Ο πο σημαντικός ισί ότι, καζόμ ντικχάσα σαρ συμπεριφερισάλο ο Ιεχωβά τζενέντε σαρ αμέν, αγαβάσα πο λατσσές ότι «σικαβέλα μπουτ μανγκιπέ ντα συγχωρίνελα».​—Ιακ. 5:11.

16. Σο σικλιάσα ι Ιεχωβάσκε κάνα διαβάνασα κι Γραφή τζενένγκε σο κερντέ λάθη; (Ησαΐας 55:7)

¹⁶ Η Γραφή σικαβέλα ο μανγκιπέ ι Ιεχωβάσκο αμένγκε ατζέκ εκχέ τροπόσαρ. Κερέλα-αμέν τι αβάς σίγουροι ότι αμαρό Ντεβέλ να μουκχέλα-αμέν κάνα κεράσα λάθη. Ο Ισραηλίτες αμαρτιντέ κόντρα κο Ιεχωβά παλάλ γιαβερέστε. Κάνα όμως μετανιώνενας μπαγιά, ο Ιεχωβά συγχωρίνελας-λεν. (Διαβάνεν Ησαΐας 55:7) Εμ ο πρώτοι Χριστιανοί αγαβένας ο μανγκιπέ ι Ιεχωβάσκο. Ι Ντεβλέσκε πνευμάσαρ, ο απόστολος Παύλος βακερντάς πι πφραλένγκε τι συγχωρίνεν ντα τι παρηγορίνεν εκχές σο τζουβντιλό αντρέ κι αμαρτία αλλά μετανιωσάλο. (2 Κορ. 2:6, 7· 1 Κορ. 5:​1-5) Σο σουκάρ ισί σο ο Ιεχωβά να μουκχέλας πι υπηρετόν σάντε επειδή κερντέας λάθη! Οκιά μπάνταρ, μανγκιμάσαρ προσπαθίνελας τι βοηθίνελ-λεν, διορθώνελας-λεν ντα μανγκέλας τι αβέν πάλι λέσκε αγκαλιάτε. Ντέλα πο λάφι τι κερέλ-λες ανταβά σαρέ ι αμαρτωλέ τζενένγκε αντιβές σο μετανιωσάλε.​—Ιακ. 4:​8-10.

ΕΚΤΙΜΙΝΕΝ Ο ΛΑΦΙ Ι ΝΤΕΒΛΕΣΚΟ, ΑΝΤΑΒΑ “ΛΑΤΣΣΟ ΔΩΡΟΣ”

17. Σόσκε ισί η Γραφή αζόμ ξεχωριστός δώρος;

¹⁷ Ο Ιεχωβά ντινάς-αμέν εκ μπουτ σουκάρ δώρος. Σόσκε ισί αζόμ ξεχωριστός λέσκο Λάφι; Σαρ σικλιλάμ, η Γραφή σικαβέλα ι σοφία, ι δικαιοσύνη ντα ο μανγκιπέ ι Ντεβλέσκο. Ανταβά βιβλίος σικαβέλα ότι ο Ιεχωβά μανγκέλα τι γνωρίνας-λες. Μανγκέλα τι αβάς λέσκε αμαλά.

18. Σαρ μπορίνασα τι σικαβάς ότι εκτιμίνασα ι Γραφή, ανταβά “λατσσό δώρος” ι Ιεχωβάσκο;

¹⁸ Δεν πρέπει τι αμντίνας ότι ο Λάφι ι Ντεβλέσκο, ανταβά “λατσσό δώρος”, ισί κάτι συνηθισμέ. (Ιακ. 1:​17) Οτθάρ, τι συνεχίνας τι σικαβάς αμαρί εκτίμηση. Μπορίνασα τι κεράς-λες ανταβά άμα διαβάνασα με προσευχή λέσκε ιερά λάφια ντα σκεφτίνασα-λεν λατσσές. Αντικάς, μπορίνασα τι αβάς σίγουροι ότι Οντουβά σο κερντάς τι γραφίντιβελ η Αγία Γραφή κα ευλογίνελ αμαρέ προσπάθειες ντα “κα μπορίνας τι σικλιάς ι Ντεβλέσκε”.​—Παρ. 2:5.