Σαρ κα Τθερέν Επιτυχία κι Γνωριμία;

1, 2. Σαρ νιωθίνενα μερικοί για τη γνωριμία;

Η ΓΝΩΡΙΜΙΑ μπορεί τι αβέλ εκ βακίτι σο νιωθίνεσα μπουτ σουκάρ ντα ισινάν ευτυχισμέ. Άμα κερέσα γνωριμία ακανά, σίγουρα μανγκέσα τι τζαλ λατσσές. Ντα για μπουτ ζευγάρια, η γνωριμία μπαγιά τζάλα λατσσές. Η Σίον,a εκ πφεν κατά Αιθιοπία, βακερέλα: «Εκ μπουτ ευτυχισμέ βακίτι μι ζωγιάτε ισινέ κάνα νικιάβας ραντεβού μι ρομέσαρ. Κεράας λάφι σοβαρέ πραγματένγκε, αλλά εμ ασάας-ντα. Κάνα αβιλόμ σίγουρη ότι μο ρομ μανγκέλας-μαν ντα μανγκάβας-λες με-ντα, πφερντιλόμ χαρά».

² Όμως ο Αλέσιο, εκ πφραλ κατά Ολλανδία, βακερέλα: «Ισινέ μπουτ σουκάρ σο γνωρίναβας μι ρομνιά καζόμ νικιάας ραντεβού, αλλά αμαρί γνωριμία τθερέλας πο δυσκολίες-ντα». Ανταλέ μαθημάστε, κα ντικχάς κάποιες δυσκολίες σο μπορεί τι τθερέν ο ζευγάρια ντα μερικές αρχές ι Γραφιάκε σο κα βοηθίνεν-λεν τι τθερέν επιτυχία κι γνωριμία. Κα ντικχάς επίσης σαρ μπορίνενα ο γιαβερά κι κχανγκιρί τι βοηθίνεν ανταλά ζευγάρια.

ΣΟ ΣΚΟΠΟΣ ΤΘΕΡΕΛΑ Η ΓΝΩΡΙΜΙΑ;

3. Καβά σκοπός τθερέλα η γνωριμία; (Παροιμίες 20:25)

³ Παρόλο σο η γνωριμία μπορεί τι αβέλ εκ βακίτι σο νιωθίνεσα σουκάρ, ισί επίσης εκ σοβαρός βήμας σο μπέκιμ τι γκερέλ-τουτ κο μπιαβ. Ο ντιβές σο εκ ζευγάρι παντρίνελα, ντένα πουμαρό λάφι ανγκλάλ κο Ιεχωβά τι μανγκέν ντα τι σεβάνεν ο εκ ι γιαβερές σαρέ πουμαρέ ζωγιάτε. Πριν τι ντας αμαρό λάφι εκχέ πραγμάσκε, πρέπει τι εξετάνας-λες μπουτ προσεκτικά. (Διαβάνεν Παροιμίες 20:25) Ανταβά ισί σίγουρα μπαγιά κο λάφι σο ντένα ο ρομ ντα η ρομνί πουμαρέ μπιαβέστε. Η γνωριμία ντέλα κο τσσαβό ντα κι τσσάι ι ευκαιρία τι γνωρίντιβεν ντα τι λεν εκ λατσσί απόφαση. Μερικές φορές, η απόφαση ισί τι παντρίνεν, ενώ γιαβερά φορές ισί τι τσσιναβέν ι γνωριμία. Άμα εκ ζευγάρι κα χωρίνελ, ανταβά να μανγκέλα τι βακερέλ ότι λένγκι γνωριμία να τθερέλας επιτυχία. Οκιά μπάνταρ, ανταβά βακίτι βοηθιντάς-λεν τι αγαβέν ο σκοπός σο τθερέλας λένγκι γνωριμία. Βοηθιντάς-λεν τι λεν εκ λατσσί απόφαση.

4. Σόσκε πρέπει τι τθεράς ι σωστή άποψη για τη γνωριμία;

⁴ Σόσκε ισί σημαντικός τι τθεράς ι σωστή άποψη για τη γνωριμία; Κάνα ο μπίπαντριμε τζενέ τθερένα ι σωστή άποψη, να κα νικιόν ραντεβού εκχέ τζενέσαρ σο να τθερένα σκοπός τι παντρίνεν λέσαρ. Όμως, νανέ σάντε ο μπίπαντριμε τζενέ σο χρειαζίντιβελα τι τθερέν ι σωστή άποψη. Σαρέ αμέν πρέπει τι τθεράς-λα. Για παράδειγμας, μερικοί πακιάνα ότι, άμα ντούι τζενέ νικιόνα ραντεβού, πρέπει σίγουρα τι παντρίνεν. Σαρ επηρεάνελα ι μπίπαντριμε Χριστιανόν ανταβά τρόπος σκέψης; Η Μελίσα, εκ μπίπαντριμε πφεν κατά Ηνωμένες Πολιτείες, βακερέλα: «Κάνα ντούι Μάρτυρες νικιόνα ραντεβού, νιωθίνενα μπαρί πίεση σόσκε ο γιαβερά μπεκλεντίνενα ότι σίγουρα κα παντρίνεν. Ο αποτέλεσμας ισί ότι μερικά ζευγάρια σακιντίνενα τι τσσιναβέν ι γνωριμία, παρόλο σο να τζάλα λατσσές. Γιαβερά μπίπαντριμε τζενέ ούτε καν αρχίνενα τι νικιόν ραντεβού. Ισί φαρ σο ναστί νταϊντίνεσα ανταγιά πίεση».

ΓΝΩΡΙΝΕΝ ΛΑΤΣΣΕΣ Ο ΕΚ Ι ΓΙΑΒΕΡΕΣ

5, 6. Κάνα ντούι τζενέ κερένα γνωριμία, καλά πράγματα πρέπει τι προσπαθίνεν τι σικλιόν ο εκ ι γιαβερέσκε; (1 Πέτρου 3:4)

⁵ Άμα ακανά κερένα γνωριμία, σο κα βοηθίνελ-τουμέν τι αποφασίνεν άμα κα παντρίνεν ή όχι; Τι γνωρίνεν λατσσές ο εκ ι γιαβερές. Μάλλον σικλιλέν κάποια πράγματα ι γιαβερέ τζενέσκε πριν τι αρχίνεν τι νικιόν ραντεβού. Αλλά ακανά τθερένα ι ευκαιρία τι γνωρίνεν “ο γκι” ι γιαβερέ τζενέσκο. (Διαβάνεν 1 Πέτρου 3:4) Ανταβά μανγκέλα τι βακερέλ τι σικλιόν άμα τθερέλα λατσσί φιλία ι Ιεχωβάσαρ, ντα τι σικλιόν πο μπουτ πράγματα για το χαρακτήρας ντα για το τρόπος σο σκεφτίνελα ανταβά τζενό. Καζόμ νακχέλα ο βακίτι, πρέπει τι τζανέν ο απαντήσεις κο ερωτήσεις σαρ ακαλά: “Κα αβέλ ανταβά τζενό εκ λατσσό ρομ ή εκ λατσσί ρομνί μάνγκε;” (Παρ. 31:26, 27, 30· Εφεσ. 5:33· 1 Τιμ. 5:8) “Μπορίναβα με τι νταβ-λες ι αγάπη ντα ι προσοχή σο χρειαζίντιβελα, ντα τι κερέλ-λες βοβ-ντα ανταβά μάνγκε; Μπορίναβα τι νταϊντίναβ ο μπέτι πράγματα σο τθερέλα λέσκο χαρακτήρας, ντα βοβ τι κερέλ ο ίδιος μάνγκε;”b (Ρωμ. 3:23) Καζόμ γνωρίνενα ο εκ ι γιαβερές, τι ντεν-τουμέν γκοντί ακαβά: Για τι αγαβέν άμα ταιριάνενα, ο πο σημαντικός νανέ καζόμ μπουτ μοιάζενα, αλλά καζόμ μπουτ μανγκένα τι κερέν αλλαγές κο πράγματα σο ισινέν διαφορετικοί.

⁶ Καλά γιαβερά πράγματα πρέπει τι σικλιόν ι γιαβερέ τζενέσκε καζόμ κερένα γνωριμία; Πριν τι τσσουβέν μεράκι ο εκ ι γιαβερέσκε, κα αβέλας λατσσό τι συζητίνεν μερικά σημαντικά πράγματα, σαρ ισί ο στόχοι σο τθερέλα ο κάθε εκ. Αλλά σο αβέλα-πες μερικέ πραγματέντζαρ σαρ ισί ο προβλήματα υγείας, ο προβλήματα ι λοβέντζαρ ή ο μπέτι πράγματα σο νακχλάς εκ τζενό πι ζωγιάτε ντα επηρεαντέ-λες μπουτ; Να χρειαζίντιβελα τι συζητίνες σαρέ ο πράγματα κι αρχή κι γνωριμία. (Ντικχέν Ιωάννης 16:12) Άμα νιωθίνενα ότι νανέ ατζέκ η στιγμή για τι απαντίνεν κο ερωτήσεις σο ανένα-τουμέν σε δύσκολη θέση, τι βακερέν-λες ανταβά. Όμως, πο σοράν, ανταβά τζενό κα χρειαζίντιβελ τι σικλιόλ ανταλά πράγματα για τι μπορίνελ τι λελ εκ λατσσί απόφαση. Οτθάρ, κα αβέλ η στιγμή σο πρέπει ο ντούι-ντα τι κερέν λάφι ξεκάθαρα ο εκ γιαβερέσαρ.

7. Σαρ μπορίνενα ντούι τζενέ σο κερένα γνωριμία τι γνωρίντιβεν πο λατσσές; (Ντικχέν ο πλαίσιος-ντα «Άμα Κερένα Γνωριμία Εκχέ Τζενέσαρ σο Ισί Ντουρ») (Ντικχέν ο φωτογραφίες-ντα)

⁷ Σαρ μπορίνενα τι σικλιόν σαρ ισί ο γιαβέρ τζενό ντιπ αντρέ πι γκίστε; Εκ κατά πο λατσσέ τρόποι ισί τι κερέν ερωτήσεις ντα σοράν τι ασουνέν προσεκτικά ο εκ γιαβερές. Κο απαντήσεις σο ντένα, χρειαζίντιβελα ο ντούι-ντα τι βακερέν σαρ νιωθίνενα μπαγιά. (Παρ. 20:5· Ιακ. 1:19) Οντουλέσκε, μπέκιμ τι τραμπίνεν τι κερέν πράγματα σο ντένα-τουμέν ι ευκαιρία τι συζητίνεν, σαρ ισί τι χαν γιεκ, τι τζαν βόλτες εκχέ τθανέστε σο ισί τζενέ ντα τι κερέν έργος γιεκ. Μπορίνενα επίσης τι σικλιόν πο μπουτ πράγματα ο εκ ι γιαβερέσκε κάνα νακχένα σαάτι γιεκ τουμαρέ αμαλέντζαρ ντα τουμαρέ τζενέντζαρ. Επίσης, τι κανονίνεν τι κερέν πράγματα σο κα σικαβέν τουμένγκε σαρ συμπεριφερίντιβελα ανταβά τζενό διαφορετικέ περιπτωσιέντε ντα διαφορετικέ τζενέντζαρ. Ντικχέν σο προσπαθίνελας τι κερέλ ο Έσγουιν κατά Ολλανδία κάνα κερέλας γνωριμία με την Αλίσια. Βοβ βακερέλα: «Προσπαθίναας τι κεράς πράγματα σο κα βοηθίνενας-αμέν τι σικλιάς ο εκ ι γιαβερές. Μπουτ φαρ, κεράας απλά πράγματα, σαρ ισί τι κεράς χαμπέ γιεκ ή τι κεράς μπουτιά γιεκ. Καζόμ κεράας ανταλά πράγματα, ντικχάας εμ ο λατσσές ιδιότητες εμ ο ατέλειες ο εκ ι γιαβερέσκε».

8. Σαρ κα βοηθίντιβεν ντούι τζενέ σο κερένα γνωριμία άμα κα σικλιαρέν-πουμέν γιεκ;

⁸ Μπορίνενα επίσης τι σικλιόν ο εκ ι γιαβερές κάνα σικλιαρένα-τουμέν γιεκ κατά Γραφή. Άμα κα παντρίνεν, κα χρειαζίντιβελ τι ντεν τουμαρέ σαατίσταρ για τι κερέν ι φαμιλιάκι λατρεία, ντα αντικάς τι αβέλ ο Ντεβέλ αντρέ τουμαρέ μπιαβέστε. (Εκκλ. 4:12) Οτθάρ, μπορίνενα τι αρακχέν σαάτι για τι σικλιαρέν-τουμέν κατά Γραφή ακανά, καζόμ κερένα γνωριμία. Σίγουρα, εκ ζευγάρι σο κερέλα γνωριμία νανέ ατζέκ εκ φαμιλί, ντα ο πφραλ νανέ ο σορό ι πφενιάκο. Όμως, κάνα σικλιαρένα-τουμέν γιεκ μπουτ φαρ, μπορίνενα τι σικλιόν σαρ ισί η φιλία ανταλέ τζενέσκι ι Ιεχωβάσαρ. Ο Μαξ ντα η Λάισα, εκ ζευγάρι κατά Ηνωμένες Πολιτείες, ντικχλέ εκ γιαβέρ-ντα λατσσιπέ. Ο Μαξ βακερέλα: «Κατά αρχή κι γνωριμία αμαρί, αρχισάλαμ τι σικλιαράς-αμέν θεματένταρ σαρ ισί ο ραντεβού, ο μπιαβ ντα σο πρέπει τι κερέλ ο ζευγάρι αντρέ κι φαμιλί. Ανταβά ντέλας-αμέν ι ευκαιρία τι κεράς λάφι μπουτέ σημαντικέ πραγματένγκε σο κα δυσκολίντιβαας τι συζητίνας-λεν γιαβέρτουλους».

ΓΙΑΒΕΡΑ-ΝΤΑ ΣΗΜΕΙΑ ΣΟ ΠΡΕΠΕΙ ΤΙ ΣΚΕΦΤΙΝΕΝ

9. Καλά σημεία πρέπει τι σκεφτίνεν ντούι τζενέ σο κερένα γνωριμία πριν τι αποφασίνεν κάστε κα βακερέν-λες;

⁹ Κάστε πρέπει τι βακερέν ότι κερένα γνωριμία; Ανταβά κα αποφασίνεν-λες τουμέν σαρ ζευγάρι. Κι αρχή κι γνωριμία τουμαρί, μπέκιμ τι αποφασίνεν τι βακερέν-λες χάνικ τζενέντε. (Παρ. 17:27) Αντικάς, ο γιαβερά να κα κερέν τουμένγκε μπουτ ερωτήσεις ούτε κα πιένεν-τουμέν τι λεν εκ απόφαση. Όμως, άμα να κα βακερέν-λες καεκχέστε, μπέκιμ τι αρχίνεν τι αβέν κορκορέ ι γιαβερέ τζενέσαρ, επειδή νταρένα μα τι σικλιόν-λες ο γιαβερά. Ανταβά μπορεί τι αβέλ επικίνδυνος. Οτθάρ, ισί γκοντιαβέρ τι βακερέν ότι κερένα γνωριμία ι τζενένγκε σο μπορίνενα τι ντεν-τουμέν λατσσέ συμβουλές ντα βοήθεια. (Παρ. 15:22) Για παράδειγμας, κα μπορίνενας τι βακερέν-λες μερικέ τζενέντε τουμαρέ φαμιλιάταρ, κο ώριμα αμαλά ή κο πρεσβύτεροι.

10. Σαρ μπορίνελα εκ ζευγάρι τι ατσσικιαρέλ πι γνωριμία πάκι κι Ντεβλέσκε γιακχά; (Παροιμίες 22:3)

¹⁰ Σαρ μπορίνενα τι ατσσικιαρέν τουμαρί γνωριμία πάκι κι Ντεβλέσκε γιακχά; Καζόμ τουμαρέ αισθήματα μπαριόνα, ισί φυσιολογικός τι μανγκέν τι αβέν πο πασέ ο εκ κο γιαβέρ. Σο κα βοηθίνελ-τουμέν τι ατσσόν πάκι κι Ντεβλέσκε γιακχά; (1 Κορ. 6:18) Μα βακερέν λουμνικανέ λάφια, μα ατσσόν ντουρ κατά γιαβερά ντα μα πιν μπουτ. (Εφεσ. 5:3) Ανταλά πράγματα μπορεί τι κερέν-τουμέν τι μανγκέν τι σοβέν γιεκ, ντα τι δυσκολίνεν-τουμέν μπουτ τι κερέν ο σωστός. Ισί γκοντιαβέρ τι συζητίνεν μπουτ φαρ καλά πράγματα μπορίνενα τι κερέν για τι ατσσικιαρέν τουμαρί γνωριμία πάκι κι Ντεβλέσκε γιακχά. (Διαβάνεν Παροιμίες 22:3) Ντικχέν σο βοηθιντάς τον Νταουίτ ντα την Αλμάζ κατά Αιθιοπία: «Νακχάας σαάτι γιεκ τθανέντε σο ισινέ μπουτ τζενέ ή κο παρέες αμαλέντζαρ. Ποτές να ατσσάας κορκορέ κο αυτοκίνητος ή εκχέ κχερέστε. Αντικάς, νασάας ντουρ πραγματένταρ σο κα τσσουβένας-αμέν κο πειρασμός».

11. Κάνα εκ ζευγάρι αποφασίνελα καλά πράγματα κα κερέλ για τι σικαβέλ σαρ νιωθίνελα ο εκ ι γιαβερέσκε, καλά σημεία πρέπει τι σκεφτίνελ;

¹¹ Πρέπει εκ ζευγάρι τι κερέλ μερικά πράγματα για τι σικαβέλ σαρ νιωθίνελα ο εκ ι γιαβερέσκε; Καζόμ τουμαρί αγάπη μπαριόλα, μπέκιμ μερικά πράγματα ισί σωστά. Όμως, άμα κα αρχίνεν τι μανγκέν τι σοβέν ο εκ ι γιαβερέσαρ, να κα μπορίνεν τι ντικχέν σαρ ισί μπαγιά ανταβά τζενό. (Άσμ. Ασμ. 1:2· 2:6) Επίσης, κάνα κερένα μερικά πράγματα για τι σικαβέν σαρ νιωθίνενα ο εκ ι γιαβερέσκε, ισί εύκολος τι νασέν κατά όρια ντα τι κερέν κάτι σο νανέ σωστός. (Παρ. 6:27) Οτθάρ, κατά αρχή κι γνωριμία τουμαρί, τι συζητίνεν καλά όρια κα τσσουβέν, αντικάς σαρ βακερένα ο αρχές ι Γραφιάκε.c (1 Θεσ. 4:3-7) Σαρ ζευγάρι, πουτσέν-τουμέν: “Σαρ κα ντικχένας ο τζενέ αμαρέ τθανέστε ο πράγματα σο κεράσα για τι σικαβάς σαρ νιωθίνασα ο εκ ι γιαβερέσκε; Κα μπορίνενας ανταλά πράγματα τι κερέν εκχές αμένταρ τι μανγκέλ τι σοβέλ ι γιαβερέσαρ;”

12. Άμα εκ ζευγάρι σο κερέλα γνωριμία τθερέλα προβλήματα ή να συμφωνίνελα, σο πρέπει τι σκεφτίνελ;

¹² Σο αβέλα-πες άμα τθερένα προβλήματα ή να συμφωνίνενα; Άμα να συμφωνίνενα μερικές φορές, μήπως ανταβά σικαβέλα ότι τουμαρί γνωριμία να τζάλα λατσσές; Όχι πάντα. Σαρέ ο ζευγάρια να συμφωνίνενα μπάζιμα. Εκ μπιαβ ισί ζουρανό κάνα ο ντούι-ντα μπορίνενα τι προσπαθίνεν γιεκ ντα τι νακχαβέν ο πράγματα σο να συμφωνίνενα. Οτθάρ, ο τρόπος σο λύνενα ο προβλήματα ακανά μπέκιμ τι σικαβέλ άμα κα τθερέν εκ επιτυχιμέ μπιαβ. Σαρ ζευγάρι, πουτσέν-τουμέν: “Μπορίνασα τι συζητίνας ο πράγματα ήρεμα ντα με σεβασμός; Βακεράσα αμέσως αμαρέ λάθη ντα προσπαθίνασα τι αβάς πο λατσσέ τζενέ; Ισινάμ έτοιμοι τι κεράς παλάλ, τι μανγκάς συγνώμη ντα τι συγχωρίνας;” (Εφεσ. 4:31, 32) Όμως, άμα συνέχεια να συμφωνίνενα ή χάνα-τουμέν κι γνωριμία, ο πράγματα μάλλον να κα τζαν πο λατσσές σοράν κατά μπιαβ. Άμα κα αγαβέν ότι ανταβά τζενό νανέ τουμένγκε, ισί πο λατσσές ι ντουένγκε-ντα τι σταματίνεν ι γνωριμία.d

13. Σο κα βοηθίνελ εκ ζευγάρι τι αποφασίνελ καζόμ βακίτι κα ατσσικιαρέλ πουμαρί γνωριμία;

¹³ Καζόμ βακίτι πρέπει τι ατσσικιαρέλ τουμαρί γνωριμία; Κάνα σιγκιαράσα τι λας εκ απόφαση, ο πο μπουτ φαρ ο πράγματα να τζάνα λατσσές. (Παρ. 21:5) Οτθάρ, τουμαρί γνωριμία πρέπει τι ατσσικιαρέλ καζόμ βακίτι χρειαζίντιβελα για τι μπορίνεν τι γνωρίνεν λατσσές ι γιαβερές. Δεν πρέπει όμως τι συνεχίνεν τι κερέν γνωριμία πο μπουτ βακίτι από ό,τι χρειαζίντιβελα. Η Αγία Γραφή βακερέλα επίσης: «Κάνα εκ τζενό μπεκλεντίνελα εκχέ πραγμάσκε σο να αβέλα νασφάλιβελα λέσκο γκι». (Παρ. 13:12) Επίσης, καζόμ η γνωριμία συνεχίντιβελα, μπέκιμ τι αβέλ πο δύσκολος τι ατσσικιαρέν-τουμέν για μα τι σοβέν ι γιαβερέσαρ. (1 Κορ. 7:9) Αντίς τι σκεφτίνεν καζόμ βακίτι νικιόνα ραντεβού, κα μπορίνενας τι πουτσέν-τουμέν: “Σο γιαβέρ χρειαζίντιβελα τι σικλιάβ ι γιαβερέ τζενέσκε για τι λαβ εκ απόφαση;”

ΣΑΡ ΜΠΟΡΙΝΕΝΑ Ο ΓΙΑΒΕΡΑ ΤΙ ΒΟΗΘΙΝΕΝ Ο ΖΕΥΓΑΡΙΑ ΣΟ ΚΕΡΕΝΑ ΓΝΩΡΙΜΙΑ;

14. Καλέ τροπόντζαρ μπορίνενα τι βοηθίνεν ο γιαβερά εκ ζευγάρι σο κερέλα γνωριμία; (Ντικχέν ι φωτογραφία-ντα)

¹⁴ Άμα τζανάσα ότι ντούι τζενέ κερένα γνωριμία, σαρ μπορίνασα τι βοηθίνας-λεν; Κα μπορίναας τι καλίνας-λεν για τι χας γιεκ, τι κεράς γιεκ ι φαμιλιάκι λατρεία ή τι διασκεδάνας γιεκ. (Ρωμ. 12:13) Αντικάς, ο ντούι τζενέ μπέκιμ τι γνωρίντιβεν ατζέ πο λατσσές. Μήπως μπορίνενα τι βοηθίνεν-λεν ακαλέ τροπόντζαρ; Τι τζαν λέντζαρ βόλτα, τι αβέν κο αυτοκίνητος λέντζαρ ή τι καλίνεν-λεν τουμαρέ κχερέστε για τι μπορίνεν τι κερέν λάφι χωρίς τι ατσσόν κορκορέ. (Γαλ. 6:10) Η Αλίσια ντέλα-πες γκοντί σο εκτιμίνελας βόι ντα ο Έσγουιν. Βόι βακερέλα: «Ισινέ μπουτ σουκάρ κάνα μερικά πφραλά βακερένας αμένγκε ότι μπορίναας τι τζας λένγκε κχερέντε άμα χρειαζίντιβαας εκ τθαν για τι αβάς γιεκ, αλλά όχι κορκορέ». Άμα εκ ζευγάρι κα μανγκέλ τουμένταρ τι νακχέν σαάτι λέντζαρ, τι ντικχέν-λες ανταβά σαρ προνόμιος τουμένγκε. Προσοχίνεν μα τι μουκχέν-λεν κορκορέ τθανέντε σο νανέ τζενέ, αλλά τι αγαβέν κάνα χρειαζίντιβελα τι μουκχέν-λεν τι κερέν λάφι χωρίς τι ασουνέλ-λεν καέκ τζενό.​—Φιλιπ. 2:4.

15. Σο γιαβέρ μπορίνενα τι κερέν ο αμαλά για τι βοηθίνεν εκ ζευγάρι σο κερέλα γνωριμία; (Παροιμίες 12:18)

¹⁵ Μπορίνασα επίσης τι βοηθίνας ο ζευγάρια σο κερένα γνωριμία οντουλέντζαρ σο βακεράσα ντα οντουλέντζαρ σο να βακεράσα. Μερικές φορές, χρειαζίντιβελα τι ατσσικιαράς αμαρό νεαυτός. (Διαβάνεν Παροιμίες 12:​18) Για παράδειγμας, μπέκιμ μπεσάσα σαρ σαρ τι βακεράς κο γιαβερά ότι ντούι τζενέ αρχισάλε γνωριμία, αλλά ανταλά τζενέ μπέκιμ μανγκένα τι βακερέν-λες βον ανταβά αμπέρι. Δεν πρέπει τι κουτσομπολίνας εκ ζευγάρι σο κερέλα γνωριμία ούτε τι κρίνας-λεν για αποφάσεις σο τθερένα τι κερέν λέντζαρ. (Παρ. 20:19· Ρωμ. 14:10· 1 Θεσ. 4:11) Επίσης, ο ζευγάρι μπορεί τι ενοχλίντιβελα κατά λάφια ή κατά ερωτήσεις σο μανγκένα τι βακερέν ότι πρέπει τι παντρίνεν ή ότι σίγουρα κα παντρίνεν. Εκ πφεν, η Ελίζ, ντα λάκο ρομ ντένα-πουμέν γκοντί: «Ισινάμας σε δύσκολη θέση κάνα ο γιαβερά πουτσένας-αμέν σο κα κεράς αμαρέ μπιαβέστε, ενώ αμέν ούτε καν να κερντάμας λάφι ανταλέσκε».

16. Σο πρέπει τι κεράς άμα εκ ζευγάρι κα σταματίνελ πι γνωριμία;

¹⁶ Σο αβέλα-πες άμα εκ ζευγάρι κα λελ ι απόφαση τι σταματίνελ ι γνωριμία; Δεν πρέπει ούτε τι κεράς ερωτήσεις σο κα ανέν-λεν σε δύσκολη θέση ούτε τι βακεράς ότι ο εκ τθερέλας δίκιος ντα ο γιαβέρ άδικος. (1 Πέτρ. 4:15) Εκ πφεν, η Λία, βακερέλα: «Κάνα εκ πφραλ ντα με χωρισάλαμ, σικλιλόμ ότι κάποια τζενέ νικαβένας συμπεράσματα πουμαρέ γκοντιάταρ σόσκε αβιλό-πες ανταβά. Οτθάρ, στεναχωρισάλομ μπουτ». Σαρ βακερντάμ πο οπρέ, άμα εκ ζευγάρι κα χωρίνελ, ανταβά να μανγκέλα πάντα τι βακερέλ ότι λένγκι γνωριμία να τθερέλας επιτυχία. Ο πο μπουτ φαρ, ανταβά μανγκέλα απλώς τι βακερέλ ότι αγαντέ ο σκοπός σο τθερέλας λένγκι γνωριμία. Βοηθιντάς-λεν τι λεν εκ λατσσί απόφαση. Όμως, ανταγιά απόφαση μπορεί τι ανέλ λένγκε ντουκχ ντα τι κερέλ-λεν τι νιωθίνεν κορκορέ. Οτθάρ, μπορίνασα τι ρόντας τρόπους για τι βοηθίνας-λεν.​—Παρ. 17:17.

17. Σο πρέπει τι συνεχίνεν τι κερέν ο ζευγάρια σο κερένα γνωριμία;

¹⁷ Σαρ ντικχλάμ, η γνωριμία μπορεί τι τθερέλα πο δυσκολίες, αλλά μπορεί τι αβέλ εκ βακίτι-ντα σο νιωθίνενα σουκάρ. Η Τζέσικα ντέλα-πες γκοντί: «Τι βακεράβ μι αλήθεια, η γνωριμία μανγκέλας μπουτ μπουτί. Αλλά σίγουρα αξίνελας σο χρησιμοποιηντάμ αμαρό σαάτι ντα κερντάμ μπαρέ προσπάθειες για τι σικλιάς-αμέν λατσσές». Άμα ακανά κερένα γνωριμία, συνεχίνεν τουμαρί προσπάθεια για τι γνωρίνεν λατσσές ο εκ ι γιαβερές. Άμα κα κερέν-λες ανταβά, τουμαρί γνωριμία κα τθερέλ επιτυχία. Κα βοηθίνελ ι ντουέν-ντα τι λεν εκ γκοντιαβέρ απόφαση.