Τι Σικαβέν Εκτίμηση ι Μουρσένγκε σο ο Ιεχωβά ντα ο Ιησούς “Ντινέ σαρ Δώρα”

1. Καλά ισί μερικά δώρα σο λιντάμ κατά Ιησούς;

ΚΑΕΚ τζενό να κερντάς πο μπουτ πράγματα οντουλένταρ σο κερντάς ο Ιησούς για τι βοηθίνελ-αμέν. Κάνα ισινέ κι πφουβ, μπουτ φαρ κερέλας θαύματα για τι βοηθίνελ ι γιαβερέν. (Λουκ. 9:12-17) Κάνα ντινάς πι ζωή αμένγκε, κερντάς ο πο μπαρό δώρος. (Ιωάν. 15:13) Από αζομάν σο αναστισάλο ο Ιησούς, συνεχίνελα τι βοηθίνελ-αμέν. Σαρ ντινάας πο λάφι, μανγκλάς κατά Ιεχωβά τι χρησιμοποιήνελ πο άγιος πνεύμας για τι σικλιαρέλ-αμέν ντα τι ντελ-αμέν παρηγοριά. (Ιωάν. 14:16, 17· 16:13) Επίσης, αντράλ κατά συναθροίσεις σο κεράσα ο Ιησούς συνεχίνελα τι ντελ-αμέν οντουλά σο χρειαζίντιβασα για τι κεράς μαθητέν σαρί κι πφουβ.​—Ματθ. 28:18-20.

2. Καλά ισί μερικά κατά τζενέ σο βακέρντιβενα “τζενέ σαρ δώρα” κο εδάφια Εφεσίους 4:7, 8;

² Σκεφτίνεν εκ γιαβέρ δώρος σο κερντάς αμένγκε ο Ιησούς. Ο απόστολος Παύλος γραφιντάς ότι αφού ο Ιησούς νικλίστιλο κο ουρανός, «ντινάς τζενέν σαρ δώρα». (Διαβάνεν Εφεσίους 4:7, 8) Ο Παύλος εξηγιντάς ότι ο Ιησούς ντινάς ανταλά δώρα για τι στηρίνεν ι κχανγκιρί μπουτέ τροπόντζαρ. (Εφεσ. 1:22, 23· 4:11-13) Αντιβές, κάποια κατά “τζενέ σο ισί σαρ δώρα” ισί ο διακονικοί υπηρέτες, ο πρεσβύτεροι ντα ο επίσκοποι περιοχής.a Όμως, ανταλά μουρσά ισί ατελείς ντα κερένα λάθη. (Ιακ. 3:2) Αλλά αμαρό Κύριος ο Ιησούς Χριστός χρησιμοποιήνελα-λεν για τι βοηθίνεν-αμέν. Ισί λέσκε δώρα αμένγκε.

3. Σικαβέν εκχέ παραδειγμάσαρ σαρ μπορίνασα σαρέ τι υποστηρίνας ο έργος σο κερένα ο “τζενέ σο ισί σαρ δώρα”.

³ Ο Ιησούς ντινάς ι ευθύνη ανταλέ “τζενέντε σο ισί σαρ δώρα” τι ντεν ζορ κο πφραλά κι κχανγκιρί. (Εφεσ. 4:12) Αλλά αμέν ο γιαβερά μπορίνασα τι βοηθίνας-λεν τι κερέν ανταγιά σημαντική μπουτί. Για παράδειγμας, μερικοί αμένταρ βοηθίνενα για τι χτίντιβεν Αίθουσες Βασιλείας. Γιαβερά υποστηρίνενα ανταβά έργος κάνα βοηθίνενα ανταλέ πφραλέν. Κερένα-λες ανταβά κάνα ντένα-λεν χαμπίματα ντα γιαβερά πράγματα σο χρειαζίντιβενα ή βοηθίνενα-λεν γιαβερέ τροπόντζαρ. Αντικάς σαρέ μπορίνασα τι υποστηρίνας, οντουλέντζαρ σο βακεράσα ντα κεράσα, ι διακονικέ υπηρετόν, ι πρεσβυτερόν ντα ι επισκοπόν ι περιοχιάκε. Ελάν τι ντικχάς σαρ βοηθίντιβασα λένγκε λατσσέ μπουτιάταρ ντα σαρ μπορίνασα τι σικαβάς λένγκε ντα κο Ιησούς σο ντινάς-αμέν ανταλέ “τζενέν σο ισί σαρ δώρα”, ότι εκτιμίνασα-λεν.

Ο ΔΙΑΚΟΝΙΚΟΙ ΥΠΗΡΕΤΕΣ «ΝΤΕΝΑ ΒΟΗΘΕΙΑ ΚΟ ΓΙΑΒΕΡΑ»

4. Καλά ισινέ μερικά πράγματα σο κερένας ο διακονικοί υπηρέτες κι πρώτη Χριστιανική κχανγκιρί για τι βοηθίνεν ι γιαβερέν;

⁴ Κι πρώτη Χριστιανική κχανγκιρί, κάποια πφραλά διορίντιβενας διακονικοί υπηρέτες. (1 Τιμ. 3:8) Σαρ ντικχίντιβελα, ανταλά ισινέ ο πφραλά σο βακερντάας ο Παύλος ότι κα “ντένας βοήθεια κο γιαβερά”. (1 Κορ. 12:28) Άρα ο διακονικοί υπηρέτες μάλλον κερένας κάποια πράγματα σο ισινέ πρακτικά αλλά εμ μπουτ σημαντικά. Αντικάς ο πρεσβύτεροι μπορίνενας τι ατσσόν αφοσιωμέ κι μπουτί σο τθερένας τι σικλιαρέν ντα τι φροντίνεν ι κχανγκιρί. Για παράδειγμας, ο διακονικοί υπηρέτες ίσως κερένας αντιγραφή ι Γραφή. Ή μπορεί τι κινένας ο πράγματα σο χρειαζίντιβενας για τι αβέλ-πες ανταγιά αντιγραφή.

5. Καλά ισί μερικά σημαντικά μπουτιά σο κερένα ο διακονικοί υπηρέτες αντιβές;

⁵ Σκεφτίνεν μερικά σημαντικά πράγματα σο κερένα ο διακονικοί υπηρέτες τουμαρέ κχανγκιριάτε. (1 Πέτρ. 4:10) Μπορεί τι ντιντιόλ-λεν η ευθύνη για το λογαριασμοί ι κχανγκιριάκε ή για το τομείς. Μπορεί τι κερένα παραγγελία έντυπα ι κχανγκιριάκε ντα τι ντένα-λεν κο πφραλά ή τι αβέν κο ήχος ντα κι εικόνα, τι υπηρετίνεν σαρ ταξιθέτες ή τι βοηθίνεν για τι αβέν-πες κάποια μπουτιά κι Αίθουσα Βασιλείας. Σαρέ ανταλά σημαντικά πράγματα σο κερένα βοηθίνενα ι πφραλέν τι απολαμβάνεν ο συναθροίσεις ντα τι κερέν ο έργος εκχέ οργανωμέ τροπόσαρ. (1 Κορ. 14:40) Επίσης, μερικοί διακονικοί υπηρέτες τθερένα ο ομιλίες κι συνάθροιση Ζωή ντα ο Έργος ντα δημόσιες ομιλίες. Εκ διακονικός υπηρέτης μπορεί επίσης τι διορίντιβελ σαρ βοηθός επισκόπου ομίλου. Μερικές φορές, κάποιοι διακονικοί υπηρέτες τζάνα γιεκ ι πρεσβυτερόντζαρ για τι ντεν ζορ εκχέ πφραλές κατά κχανγκιρί.

6. Καλά ισί μερικοί λόγοι σο εκτιμίνασα ι λατσσί μπουτί σο κερένα ο διακονικοί υπηρέτες;

⁶ Σαρ βοηθίντιβενα ο κχανγκιριά κατά μπουτί σο κερένα ο διακονικοί υπηρέτες; «Απολαμβάναβα ο συναθροίσεις», βακερέλα η Μπέβερλι,b εκ πφεν κι Βολιβία. «Χάρη οντουλένταρ σο κερένα, μπορίναβα τι γκιλιαβάβ ύμνους, τι νταβ απαντήσεις, τι ασουνάβ ομιλίες ντα τι σικλιάβ κατά βίντεα ντα κατά φωτογραφίες. Βον αρακχαβένα-αμέν ντα βοηθίνενα ι πφραλέν σο τσσουβένα-πες κο Zoom. Σοράν κατά συνάθροιση, βοηθίνενα για τι καθαρίντιβελ η αίθουσα, βοηθίνενα κο λογαριασμοί ντα κανονίνενα τι τθεράς ο έντυπα σο χρειαζίντιβασα. Εκτιμίναβα μπουτ σαρέ ανταλά σο κερένα!» Η Λέσλι, σο τζουβντιόλα κι Κολομβία ντα λάκο ρομ υπηρετίνελα σαρ πρεσβύτερος, βακερέλα: «Μο ρομ τθερέλα μπαρί βοήθεια κατά διακονικοί υπηρέτες σόσκε κερένα διάφορα μπουτιά. Μπι λένγκο κα τθερέλας ατζέ πο χάνικ χρόνος. Οτθάρ, εκτιμίναβα μπουτ σο κερένα σαρέ ανταλά πράγματα αντράλ πουμαρέ γκίσταρ ντα ισί έτοιμοι τι βοηθίνεν». Σίγουρα αμέν-ντα νιωθίνασα αντικάς.​—1 Τιμ. 3:13.

7. Σαρ μπορίνασα τι σικαβάς εκτίμηση ι διακονικέ υπηρετόνγκε; (Ντικχέν ι φωτογραφία-ντα)

⁷ Παρόλο σο εκτιμίνασα ι διακονικέ υπηρετόν, η Αγία Γραφή βακερέλα: «Τι σικαβέν εκτίμηση». (Κολ. 3:15) Ο Κζίστοφ, εκ πρεσβύτερος κι Φινλανδία, σικαβέλα πι εκτίμηση ακαλέ τροπόσαρ: «Μπουτσσαβάβα εκ κάρτα ή γραφίναβα εκ μήνυμας ντα βακεράβα εκ εδάφιος ντα εκ συγκεκριμέ τρόπος σο ανταβά διακονικός υπηρέτης ντινάς-μαν ζορ ή γραφίναβα σόσκε εκτιμίναβα ι μπουτί σο κερέλα». Ο Πασκάλ ντα η Ζαέλ, σο τζουβντιόνα κι Νέα Καληδονία, προσευχίντιβενα ι διακονικέ υπηρετόνγκε. «Ακανά τελευταία προσευχίντιβασα μπουτ ι διακονικέ υπηρετόνγκε σο τθεράσα αμαρέ κχανγκιριάτε. Ευχαριστίνασα ι Ιεχωβάς σο ντινάς-λεν αμέντε ντα μανγκάσα λέσταρ τι αβέλ λέντζαρ ντα τι βοηθίνελ-λεν». Ο Ιεχωβά ασουνέλα ασακέ προσευχές ντα βοηθίντιβελα σαρί η κχανγκιρί.​—2 Κορ. 1:11.

Ο ΠΡΕΣΒΥΤΕΡΟΙ «ΜΑΡΕΝΑ-ΠΕΣ ΤΟΥΜΕΝΓΚΕ»

8. Σόσκε μπορίνελας ο Παύλος τι γραφίνελ ότι ο πρεσβύτεροι κι πρώτη Χριστιανική κχανγκιρί “μαρένας-πες” πουμαρέ πφραλένγκε; (1 Θεσσαλονικείς 5:12, 13)

⁸ Ο πρεσβύτεροι κι πρώτη Χριστιανική κχανγκιρί μαρένας-πες μπουτ ι πφραλένγκε. (Διαβάνεν 1 Θεσσαλονικείς 5:​12, 13· 1 Τιμ. 5:17) “Οδηγίνενας” ι πφραλέν σο ισινέ κι κχανγκιρί. Κερένας-λες ανταβά αντράλ κατά συναθροίσεις ντα κάνα λένας αποφάσεις σαρ πρεσβυτέριος. Επίσης “ντένας συμβουλές” κο πφραλά ντα κο πφενιά με αγάπη για τι βοηθίνεν-λεν τι ατσσόν ζουρανέ κι πίστη. (1 Θεσ. 2:11, 12· 2 Τιμ. 4:2) Σίγουρα ανταλά μουρσά μαρένας-πες επίσης μπουτ για τι ανέν ο αναγκαία πουμαρέ φαμιλιάτε ντα για τι ατσσόν βον-ντα πνευματικά ζουρανέ.​—1 Τιμ. 3:2, 4· Τίτο 1:6-9.

9. Καλά ισί μερικά μπουτιά σο κερένα ο πρεσβύτεροι αντιβές;

⁹ Ο πρεσβύτεροι αντιβές τθερένα τι κερέν μπουτ πράγματα. Βακερένα ο λατσσέ αμπέρια. (2 Τιμ. 4:5) Ντένα ο λατσσό παράδειγμας καζόμ βακερένα αντράλ πουμαρέ γκίσταρ ο λατσσέ αμπέρια. Κανονίνενα τι αβέλ-πες οργανωμέ τροπόσαρ ο έργος κο τομέας σο τθερέλα λένγκι κχανγκιρί ντα σικλιαρένα-αμέν τι βακεράς ντα τι σικλιαράς ο λατσσέ αμπέρια λατσσέ τροπόσαρ. Επίσης κρίνενα μερικά ζητήματα κι κχανγκιρί. Κερένα-λες ανταβά σουκάρ τροπόσαρ, χωρίς τι ξεχωρίνεν ι γιαβερέν. Κάνα εκ Χριστιανός κερέλα εκ σοβαρή αμαρτία, ο πρεσβύτεροι προσπαθίνενα τι βοηθίνεν-λες τι λατσσαρέλ πι φιλία ι Ιεχωβάσαρ. Επίσης προσοχίνενα τι ασταρέν πάκι ι κχανγκιρί. (1 Κορ. 5:12, 13· Γαλ. 6:1) Πρώτα πρώτα όμως, ο πρεσβύτεροι αρακχαβένα ντα σικλιαρένα ι πφραλέν κι κχανγκιρί. (1 Πέτρ. 5:1-3) Προετοιμάνενα ντα κερένα ομιλίες αντράλ κατά Αγία Γραφή. Προσπαθίνενα τι γνωρίνεν σαριλέν κι κχανγκιρί ντα τζάνα κο πφραλά για τι ντεν-λεν ζορ. Μερικοί πρεσβύτεροι επίσης βοηθίνενα για τι χτίντιβεν ντα τι αβέν-πες μερικά γιαβερά μπουτιά κο Αίθουσες Βασιλείας. Οργανώνενα συνελεύσεις, ισί κο Επιτροπές Προσέγγισης Νοσοκομείων ντα κο Ομάδες Επισκέψεων σε Ασθενείς. Εκτός ανταλένταρ τθερένα γιαβερά-ντα διορισμούς. Ο πρεσβύτεροι μαρένα-πες μπουτ αμένγκε!

10. Καλά ισί μερικοί λόγοι σο εκτιμίνασα αμαρέ πρεσβυτερόν;

¹⁰ Ο Ιεχωβά βακερντάας ότι αμαρέ τσομπάνια κα φροντίνενας-αμέν λατσσές ντα ότι “να κα νταράας ατζέκ φαρ ντα να κα ιζράας κατά νταρ”. (Ιερ. 23:4) Η Γιοχάνα, εκ πφεν κι Φινλανδία, αγαντάς καζόμ μπαγιά ισί ανταλά λάφια κάνα λάκι ντάι νασφάλιλιας μπουτ. Η Γιοχάνα βακερέλα: «Παρόλο σο ισί μάνγκε δύσκολος τι βακεράβ σο νιωθίναβα, εκ πρεσβύτερος σο να τζανάβας-λες αζόμ λατσσές κερντάς υπομονή μάντζαρ, προσευχισάλο μάντζαρ ντα βακερντάς μάνγκε καζόμ μπουτ μανγκέλα-μαν ο Ιεχωβά. Να ντάβα-μαν γκοντί ντιπ λέσκε λάφια, αλλά ντάβα-μαν γκοντί ότι νιωσάλομ αρακχαντί. Πακιάβα ότι ο Ιεχωβά μπουτσσαντάς-λες για τι βοηθίνελ-μαν ακριβώς αζομάν σο χρειαζίντιβαβας-λες». Σαρ βοηθιντέ-τουμέν ο πρεσβύτεροι τουμαρέ κχανγκιριάκε;

11. Σαρ μπορίνενα τι σικαβέν τουμαρί εκτίμηση κο πρεσβύτεροι; (Ντικχέν ι φωτογραφία-ντα)

¹¹ Ο Ιεχωβά μανγκέλα τι σικαβάς αμαρί εκτίμηση αντράλ αμαρέ γκίσταρ κο πρεσβύτεροι οντουλένγκε σο κερένα. (1 Θεσ. 5:12, 13) Η Χενριέτα, σο τζουβντιόλα βόι-ντα κι Φινλανδία, βακερέλα: «Ο πρεσβύτεροι ισί έτοιμοι τι βοηθίνεν ι γιαβερέν, αλλά ανταβά να μανγκέλα τι βακερέλ ότι τθερένα πο μπουτ χρόνος ντα ζορ κατά γιαβερά ή ότι να τθερένα πουμαρέ προβλήματα. Κάποιες φαρ, βακεράβα λένγκε απλά: “Τι βακεράβ τούκε κάτι; Ισινάν μπουτ λατσσό πρεσβύτερος. Μανγκάβα τι τζανές-λες ανταβά”». Εκ πφεν κι Τουρκία, η Σερά βακερέλα: «Ο πρεσβύτεροι χρειαζίντιβενα ενθάρρυνση για τι συνεχίνεν. Οτθάρ, μπορίνασα τι γραφίνας λένγκε εκ κάρτα, τι ντας-λεν βίκος αμαρέ κχερέστε για τι χαν ή τι νικιάς λέντζαρ γιεκ κο έργος». Αβέλα τουμαρέ γκοντιάτε εκ πρεσβύτερος σο εκτιμίνενα μπουτ ο προσπάθειες σο κερέλα; Ρόντεν τρόπους για τι σικαβέν λέσκε τουμαρί εκτίμηση.​—1 Κορ. 16:18.

ΕΠΙΣΚΟΠΟΙ ΠΕΡΙΟΧΗΣ ΓΙΑ ΤΙ ΝΤΕΝ ΖΟΡ

12. Καλέ γιαβερέ τζενέν χρησιμοποιηντάς ο Ιησούς για τι ντεν ζορ κο κχανγκιριά; (1 Θεσσαλονικείς 2:7, 8)

¹² Ο Χριστός Ιησούς ντινάς κι κχανγκιρί «τζενέν σαρ δώρα» σο υπηρετίνενας εκχέ γιαβερέ-ντα τροπόσαρ. Ο Ιησούς χρησιμοποιηντάς ι πρεσβυτερόν κι Ιερουσαλήμ για τι μπουτσσαβέν τον Παύλο ντα τον Βαρνάβα ντα γιαβερέν για τι αβέν επίσκοποι. (Πράξ. 11:22) Σόσκε; Για τι κερέν βον-ντα οντουβά σο κερένας ο διακονικοί υπηρέτες ντα ο πρεσβύτεροι​—τι ντεν ζορ κο κχανγκιριά. (Πράξ. 15:40, 41) Οντουλά μουρσά κερένας θυσίες ντα τσσουβένας ατζέ-ντα πουμαρί ζωή σε κίνδυνος για σικλιαρέν ντα τι ντεν ζορ κο γιαβερά.​—Διαβάνεν 1 Θεσσαλονικείς 2:7, 8.

13. Καλά ισί μερικά μπουτιά σο τθερένα ο επίσκοποι περιοχής;

¹³ Ο επίσκοποι περιοχής κερένα μπουτ ταξίδια. Μερικοί κερένα μπουτ χιλιόμετρα για τι τζαν κατά εκ κχανγκιρί κι γιαβέρ. Κάθε εβδομάδα εκ επίσκοπος περιοχής κερέλα μπερεκέτι ομιλίες, τζάλα κο πφραλά για τι ντελ-λεν ζορ ντα κερέλα εκ συνάθροιση ι σκαπανίνγκε, εκ συνάθροιση ι πρεσβυτερόνγκε ντα ξεκινήματα. Ετοιμάνελα ομιλίες ντα οργανώνελα συνελεύσεις περιοχής ντα περιφερειακές συνελεύσεις. Σικλιαρέλα κο σχολές σκαπανέων ντα οργανώνελα εκ συνάθροιση σαρέ ι σκαπανίντζαρ σο ισί κι περιοχή. Εκτός σαρέ ανταλένταρ, τθερέλα τι κερέλ γιαβερά-ντα μπουτ σημαντικά μπουτιά σο ντιντιόνα-λες κατά Μπέθελ ντα μπάζιμα πρέπει τι κερέλ-λεν σουγκό-ντα.

14. Καλά ισί μερικοί λόγοι σο εκτιμίνασα αμαρέ επισκοπόν σο μαρένα-πες αμένγκε;

¹⁴ Σαρ βοηθίντιβενα ο κχανγκιριά κατά επίσκοποι περιοχής; Εκ πφραλ κι Τουρκία βακερέλα: «Κάθε φαρ σο αβένα ο επίσκοποι, ανταβά βοηθίνελα-μαν τι νταβ πο μπουτ μι σαατίσταρ για τι βοηθίναβ μι πφραλέν ντα μι πφενίν. Γνωριντόμ μπουτέ επισκοπόν, όμως καέκ λένταρ να κερντάς-μαν τι νιωθίναβ ότι να τθερέλα χρόνος μάνγκε ή ότι να μανγκέλα τι κερέλ λάφι μάντζαρ». Η Γιοχάνα νικίστιλι κο έργος εκχέ επισκοπόσαρ αλλά να αρακχλέ καεκχές. Όμως, βακερέλα: «Κα νταβ-μαν γκοντί πάντα οντουβά ντιβές. Μο ντούι-ντα πφενιά πριν από χάνικ βακίτι μετακομιντέ εκχέ γιαβερέ τθεμέστε ντα σικλιντίναβας λένγκε μπουτ. Ο επίσκοπος περιοχής ντινάς-μαν μπουτ ζορ ντα βοηθιντάς-μαν τι αγαβάβ ότι ακανά μπορεί μα τι αβέλα-πες τι τζουβντιάς πασέ αμαρέ φαμιλιάτε ντα αμαρέ αμαλέντε, αλλά κο νεβό ντουνιάς κα τθεράς μπουτ ευκαιρίες τι νακχάς χρόνος γιεκ». Μπουτ αμένταρ τθεράσα ασακέ σουκάρ πράγματα τι ντας-αμέν γκοντί κατά επίσκοποι περιοχής.​—Πράξ. 20:37–21:1.

15. (α) Σαρ σικαβένα ο εδάφια 3 Ιωάννη 5-8, σαρ μπορίνασα τι σικαβάς εκτίμηση ι επισκοπόνγκε; (Ντικχέν ι φωτογραφία-ντα) (β) Σόσκε πρέπει τι σικαβάς ότι σκεφτίνασα ι ρομνίν σο τθερένα ο διορισμέ πφραλά, ντα σαρ μπορίνασα τι κεράς-λες ανταβά; (Ντικχέν ο πλαίσιος «Ντεν-τουμέν Γκοντί Λένγκε Ρομνίν»)

¹⁵ Ο απόστολος Ιωάννης βακερντάς κο Γάιος τι σικαβέλ φιλοξενία μερικέ πφραλέντε σο κα τζάνας οτθέ ντα “τι φροντίνελ λένγκε ταξιδίσκε σαρ μανγκέλα ο Ντεβέλ”. (Διαβάνεν 3 Ιωάννη 5-8) Εκ τρόπος για τι κεράς-λες ανταβά ισί τι καλίνας ι επισκοπός αμαρέ κχερέστε για τι χας γιεκ. Εκ γιαβέρ τρόπος ισί τι τζας κο ξεκινήματα σο κερέλα. Η Λέσλι σικαβέλα πι εκτίμηση γιαβερέ-ντα τροπόντζαρ. «Προσευχίντιβαβα τι φροντίνελ ο Ιεχωβά για το ανάγκες σο τθερένα», βακερέλα. «Επίσης, μο ρομ ντα με γραφίνασα λένγκε γράμματα ντα βακεράσα λένγκε καζόμ μπουτ βοηθίνενα-αμέν κάθε φαρ σο αβένα». Ντεν-τουμέν γκοντί ότι ο επίσκοποι περιοχής ισί τζενέ σαρ αμέν. Μπάζιμα, νασφάλιβενα, ανησυχίνενα ή ατζέ-ντα χασαρένα πουμαρί ζορ. Μπορεί τουμαρέ λατσσέ λάφια ή εκ χουρντό δώρος τι αβέν η απάντηση κο προσευχές σο κερέλα τουμαρό επίσκοπος περιοχής!​—Παρ. 12:25.

ΧΡΕΙΑΖΙΝΤΙΒΑΣΑ «ΤΖΕΝΕΝ ΣΑΡ ΔΩΡΑ»

16. Σαρ βακερέλα ο εδάφιος Παροιμίες 3:27, καλά ερωτήσεις κα μπορίνενας τι κερέν πουμαρέ νεαυτόστε ο πφραλά;

¹⁶ Σαρό κο ντουνιάς, χρειαζίντιβασα ατζέ πο μπουτ πφραλέν σο ισί «σαρ δώρα». Άμα ισινάν μπολντό πφραλ, «ισί τι βαστέστε τι βοηθίνες»; (Διαβάνεν Παροιμίες 3:​27) Κα μαρές-τουτ για τι ερεσές κο σημείος τι αβές διακονικός υπηρέτης; Μήπως κα μπορίνεας τι αβές πρεσβύτερος για τι φροντίνες ο ανάγκες τι πφραλένγκε;c Μπορίνεσα τι κερές μερικές αλλαγές τι ζωγιάτε για τι κερές αίτηση για τη Σχολή για Ευαγγελιστές της Βασιλείας; Ανταγιά σχολή κα σικλιαρέλ-τουτ ντα κα βοηθίνελ-τουτ για τι χρησιμοποιήνελ-τουτ πο μπουτ ο Ιησούς. Άμα νιωθίνεσα ότι να ισινάν έτοιμος κερ προσευχή κο Ιεχωβά. Μανγκ λέσταρ τι βοηθίνελ-τουτ πι πνευμάσαρ τι κερές λατσσές σο-ντα διορισμός ντιντιόλα-τουτ.​—Λουκ. 11:13· Πράξ. 20:28.

17. Σο αγαβάσα αμαρέ Βασιλιάσκε, ι Ιησού Χριστόσκε κατά “τζενέ σο ντινάς σαρ δώρα”;

¹⁷ Ο πφραλά σο διοριντάς ο Ιησούς τι αβέν “τζενέ σαρ δώρα” σικαβένα ότι βοβ οδηγίνελα-αμέν ανταλέ τελευταίε ντιβεσέντε. (Ματθ. 28:20) Ισινάμ πφερντέ εκτίμηση σο τθεράσα εκχέ Βασιλιάς σο μανγκέλα-αμέν, ντέλα-αμέν μπουτ λατσσέ πράγματα ντα τζανέλα σο χρειαζίντιβασα ντα αντικάς ντέλα-αμέν πφραλέν σο βοηθίνενα-αμέν. Οτθάρ, τι ρόντας ευκαιρίες τι σικαβάς αμαρί εκτίμηση ανταλέ μουρσέντε σο μαρένα-πες. Ντα ποτές μα τι μπιστρέν τι βακερέν ευχαριστώ κο Ιεχωβά σο λέσταρ αβένα «σαρέ ο λατσσέ ντα τέλεια δώρα».​—Ιακ. 1:17.