Τι Ντεν-τουμέν Γκοντί ο Σημαντικά Σημεία

Αβιλό-πες τουμένγκε καέκ φαρ τι δυσκολίντιβεν τι ντεν-τουμέν γκοντί κάτι σο μόλις διαβαντέν; Ανταβά μπάζιμα αβέλα-πες σαριλέντε. Σο μπορίνελα τι βοηθίνελ; Τι ντεν-τουμέν γκοντί ο σημαντικά σημεία.

Καζόμ σικλιαρένα-τουμέν, ατσσόν χάνικ για τι σκεφτίνεν οντουλά σο μόλις διαβαντέν. Τσσουβέν σημασία σαρ βοηθιντάς ο απόστολος Παύλος οντουλέν σο κα διαβάνενας λέσκι επιστολή τι κερέν-λες ανταβά. Γραφιντάς: «Ο πο σημαντικός . . . ισί ακαβά». (Εβρ. 8:1) Ανταλέ λαφίντζαρ, βοηθιντάς οντουλέν σο ασουνένας-λες τι αγαβέν σο μανγκέλας τι βακερέλ. Επίσης βοηθιντάς-λεν τι αγαβέν σαρ ο κάθε πράγμας σο βακερέλας τθερέλας σχέση με το πο σημαντικός πράγμας σο μανγκέλας τι νακχαβέλ.

Κα μπορίνενας τι ξεχωρίνεν χρόνος, μπέκιμ ντες λεπτά χάνικ πριν τι τελειώνεν τουμαρό διάβασμας, για τι σκεφτίνεν ο σημαντικά σημεία σο σικλιλέν. Άμα ναστί ντένα-λεν γκοντί, ντικχέν πάλι ο υπότιτλοι ή διαβάνεν ατζέκ εκ φαρ ι πρώτη πρόταση σο ισί κι κάθε παράγραφος για τι ανέν-λεν πάλι τουμαρέ γκοντιάτε. Άμα σικλιλέν κάτι νεβό, προσπαθίνεν τι εξηγίνεν-λες τουμαρέ λαφίντζαρ. Κάνα ανένα τουμαρέ γκοντιάτε ο σημαντικά σημεία, κα αβέλ τουμένγκε πο εύκολος μα τι μπιστρέν-λεν. Επίσης κα μπορίνεν τι αγαβέν ατζέ πο λατσσές σαρ τι κερέν-λεν τουμαρέ ζωγιάτε.