Σαρ Μπορίνασα τι Συγχωρίνας Αντικάς σαρ Συγχωρίνελα ο Ιεχωβά;

1, 2. (α) Κάνα μπορεί τι δυσκολίντιβας πο μπουτ τι συγχωρίνας εκχέ τζενές; (β) Σαρ συγχωριντάς η Ντενίζ;

ΔΥΣΚΟΛΙΝΤΙΒΕΝΑ τι συγχωρίνεν ι γιαβερέν; Μπουτ αμένταρ δυσκολίντιβασα, ντα ειδικά άμα κάποιος κα βακερέλ ή κα κερέλ κάτι σο ντουκχαβέλα μπουτ αμαρό γκι. Όμως, μπορίνασα τι νασκιαράς αμαρί χολί ντα ο μπέτι αισθήματα ντα τι συγχωρίνας. Σκεφτίνεν για παράδειγμας εκχέ πφενιά, την Ντενίζ,a σο συγχωριντάς εκχέ τζενές αντράλ πι γκίσταρ. Κο 2017, η Ντενίζ ντα λάκι φαμιλί γκιλέ τι ντικχέν ο Παγκόσμια Κεντρικά Γραφεία ι Ιεχωβάσκε Μαρτυρένγκε σο μόλις πουτάρντιλεας. Καζόμ βουρτίνενας κχερέ πουμαρέ κουρσάσαρ, εκ γιαβέρ οδηγός χωρίς τι αγαβέλ-λες πελό οπρά-λέντε. Η Ντενίζ μπαϊλντισάλι. Κάνα αγαντάς-πες, σικλιλί ότι λάκε τσσαβέ ντινέας-πες μπουτ ντα λάκο ρομ, ο Μπράιαν, μουλόας. Κάνα ντέλα-πες γκοντί οντουβά σο αβιλό-πες, η Ντενίζ βακερέλα: «Μουλόμ κατά στεναχώρια». Πο σοράν σικλιλί ότι ο οδηγός να ματιλόας, ντα να λιντάας ναρκωτικά, ούτε νασλί λέσκι προσοχή επειδή ντικχέλας ο κινητός ή κερέλας γιαβερά πράγματα. Οτθάρ, προσευχισάλι κο Ιεχωβά τι ντελ-λα ειρήνη για τι μπορίνελ τι συγχωρίνελ-λες.

² Ο οδηγός αστάρντιλο ντα κα γκερένας-λες κο δικαστήριος επειδή μουνταρντάς εκχέ τζενές σε ατύχημας. Άμα κα καταδικάντιβελας, κα τσσουβένας-λες κι φυλακή. Όμως ο δικαστήριος βακερντάς κι Ντενίζ ότι ανταλένταρ σο κα βακερέλας βόι κα αποφασίνενας άμα κα τσσουβντιόλας φυλακή ή όχι. Η Ντενίζ βακερέλα: «Νιωσάλομ ότι κάποιος πουταρντάς μι πληγή ντα τσσουντάς αντρέ εκ κουβάς λον, επειδή έπρεπε τι ξανατζουβντιάβ ο πο μπέτι στιγμές μι ζωγιάκε». Χάνικ εβδομάδες πο σοράν, η Ντενίζ γκιλί κο δικαστήριος ντα τθερέλας ανγκλά-πέστε ι τζενές σο αντάας αζόμ μπαρί ντουκχ λάκε φαμιλιάτε. Σο βακερντάς; Η Ντενίζ μανγκλάς κατά δικαστής τι τζιτζίνελ οντουλέ τζενέσκε.b Κάνα μπιτισκιαρντάς πο λάφια, ο δικαστής αρχισάλο τι ροβέλ μπουτ ντα βακερντάς: «Σαρέ ανταλά 25 μπρεσά σο ισινόμ δικαστής να ασουντόμ ποτές κάτι ασακό κο δικαστήριος. Ποτές να ασουνάβα κατά φαμιλί ι αθώε τζενέσκι τι μανγκέλ τι τζιτζίναβ ι τζενέσκε σο φταίνελας. Ποτές να ασουνάβα λάφια σο σικαβένα αγάπη ντα συγχώρηση».

3. Σόσκε αποφασιντάς η Ντενίζ τι συγχωρίνελ;

³ Σο βοηθιντάς την Ντενίζ τι συγχωρίνελ; Σκεφτιντάς λατσσές σαρ συγχωρίνελα ο Ιεχωβά. (Μιχ. 7:18) Κάνα εκτιμίνασα ο τρόπος σο συγχωριντάς-αμέν ο Ιεχωβά, μανγκάσα αμέν-ντα τι συγχωρίνας ι γιαβερέν.

4. Σο μανγκέλα ο Ιεχωβά τι κεράς; (Εφεσίους 4:32)

⁴ Ο Ιεχωβά συγχωρίνελα-αμέν αντράλ πι γκίσταρ ντα μανγκέλα αμέν-ντα τι συγχωρίνας ι γιαβερέν αντικάς. (Διαβάνεν Εφεσίους 4:32) Μανγκέλα αμένταρ τι αβάς έτοιμοι τι συγχωρίνας οντουλέν σο πληγώνενα-αμέν. (Ψαλμ. 86:5· Λουκ. 17:4) Ανταλέ μαθημάστε, κα ντικχάς πράγματα σο κα βοηθίνεν-αμέν τι συγχωρίνας ατζέ πο μπουτ ι γιαβερέν.

ΜΑ ΚΕΡΕΝ ΠΕΡΑ ΤΟΥΜΑΡΕ ΑΙΣΘΗΜΑΤΑ

5. Σαρ βακερέλα ο εδάφιος Παροιμίες 12:18, σαρ μπορεί τι νιωθίνας κάνα προσβαλίνελα-αμέν κάποιος;

⁵ Μπορεί κάποιος τι ντουκχαντάς αμαρό γκι οντουλέσαρ σο βακερντάς ή κερντάς. Ντα η ντουκχ αβέλα ατζέ πο μπαρί άμα οντουβά τζενό ισί εκ αμάλ αμαρό ή κάποιος αμαρέ φαμιλιάταρ. (Ψαλμ. 55:12-14) Μπάζιμα η ντουκχ σο τθεράσα αντρέ αμαρέ γκίστε ισί σαρ τι ντελ-αμέν κάποιος τσσουριάσαρ. (Διαβάνεν Παροιμίες 12:18) Μπορεί τι προσπαθίνας τι τασαβάς ή τι κεράς πέρα αμαρί ντουκχ. Αλλά ανταβά κα αβέλας σαρ τι ντέλας-αμέν κάποιος τσσουριάσαρ ντα σοράν τι μουκχάας ι τσσουρί αντρέ κι πληγή. Αντικάς-ντα αβέλα-πες με το αισθήματα αμαρέ. Ναστί μπεσάσα ότι κα νασέν άμα απλά να κα ντας-λεν σημασία.

6. Σο μπορεί τι νικιόλ αμένταρ τι κεράς κάνα εκ τζενό προσβαλίνελα-αμέν;

⁶ Κάνα εκ τζενό προσβαλίνελα-αμέν, ο πρώτος πράγμας σο νικιόλα αμένταρ μπέκιμ ισί τι χολιάνας. Η Αγία Γραφή βακερέλα ότι ισί λογικός μπάζιμα τι χολιάνας. Αλλά βακερέλα αμένγκε τι προσοχίνας μα τι συνεχίνας τι αβάς χολιαμέ. (Ψαλμ. 4:4· Εφεσ. 4:26) Σόσκε; Επειδή μπουτ φαρ αμαρέ αισθήματα γκερένα-αμέν τι κεράς οντουλά σο τθεράσα αμαρέ γκίστε. Ντα ο πο μπουτ φαρ, η χολί ανέλα μπέτι αποτελέσματα. (Ιακ. 1:20) Ντεν-τουμέν γκοντί ότι αυτόματα νικιόλα αμένταρ τι χολιάνας, αλλά αμαρέ βαστέστε ισί άμα κα τραμπίνας τι ατσσικιαράς χολί.

7. Καλά γιαβερά αισθήματα μπορεί τι νιωθίνας κάνα εκ τζενό ντουκχαβέλα αμαρό γκι;

⁷ Άμα συμπεριφερισάλε αμένγκε μπέτι τροπόσαρ, μπέκιμ νιωθίνασα γιαβερά-ντα μπέτι αισθήματα. Για παράδειγμας εκ πφεν, η Αν, βακερέλα: «Κάνα ισινόμας χουρντί, μο ντατ μουκχλάς μι νταγιά ντα παντρισάλο ι τζουβλιάσαρ σο ποκινέλας-λα μι φαμιλί για τι ντικχέλ-μαν. Νιωσάλομ κορκορί. Κάνα κερντέ πουμαρέ τσσαβέν, νιωσάλομ ότι βον λιντέας μι θέση. Καζόμ μπαριάβας αισθάντιβαβας ότι να μανγκέλα-μαν καέκ». Εκ γιαβέρ πφεν, η Ζορζέτ, βακερέλα σαρ νιωσάλι κάνα λάκο ρομ γκιλό γιαβεράσαρ: «Ισινάμας αμαλά χουρντιαρέλα. Κεράας σκαπανικός γιεκ. Πφανγκιλό μπουτ μο γκι». Ντα εκ γιαβέρ πφεν, η Ναόμι, βακερέλα: «Ποτές να σκεφτιντόμας ότι μο ρομ κα ντουκχαβέλας μο γκι. Οτθάρ, κάνα μουτθαντάς μάνγκε ότι ντικχέλας αποτσοράλ πορνογραφία νιωσάλομ ότι χουχαντάας-μαν ντα προδοντάας-μαν».

8. (α) Καλά ισί μερικοί λόγοι σο πρέπει τι συγχωρίνας; (β) Σαρ βοηθίντιβασα κάνα συγχωρίνασα; (Ντικχέν ο πλαίσιος «Σο Αβέλα-πες άμα η Ντουκχ σο Τθεράσα Αμαρέ Γκίστε Ισί Μπουτ Μπαρί;»)

⁸ Νανέ αμαρέ βαστέστε οντουλά σο κα βακερέν ή κα κερέν ο γιαβερά. Αλλά ισί αμαρέ βαστέστε τι μαράς-αμέν για τι κεράς κουμάντος αμαρί αντίδραση. Ντα ο πο μπουτ φαρ η πο λατσσί αντίδραση ισί τι συγχωρίνας. Σόσκε; Επειδή μανγκάσα ι Ιεχωβάς ντα βοβ μανγκέλα τι συγχωρίνας. Άμα ατσσικιαράσα χολί ντα να συγχωρίνασα, μπορεί τι κεράς καέκ ντινιλιπέ. Μπορεί ατζέ-ντα τι κεράς ζιάνι αμαρέ νεαυτόστε. (Παρ. 14:17, 29, 30) Τσσουβέν σημασία σο βακερντάς εκ πφεν, η Κριστίν: «Κάνα νιωθίναβα χολιαμέ ντα ότι προσβαλιντέ-μαν ο γιαβερά, ασάβα πο χάνικ. Χάβα σο τ’ αβέλ. Να σοβάβα μπουτ, ντα ισί μάνγκε πο δύσκολος τι κεράβ κουμάντος μο συναισθήματα. Ανταβά επηρεάνελα μο μπιαβ ντα μο σχέσεις ι γιαβερέντζαρ».

9. Σόσκε πρέπει τι νασκιαράς αντρ’ αμένταρ ι χολί;

⁹ Ο τζενό σο ντουκχαντάς αμαρό γκι μπορεί μα τι δεχτίνελ ποτές ότι φταίνελα. Ατζέ-ντα αζομάν όμως, μπορίνασα μα τι μουκχάς-λες ανταβά τι κερέλ αμένγκε μπαρί ζημιά. Σαρ; Η Ζορζέτ βακερέλα: «Λιντάς μάνταρ χάνικ καιρός αλλά τελικά τσσιναντόμ τι αβάβ χολιαμέ ι ρομέσκε σο τθεράβας πριν. Αντικάς, αρχισάλομ τι νιωθίναβ μπουτ μπαρί ηρεμία». Κάνα νασκιαράσα αντρ’ αμένταρ ι χολί, να μουκχάσα ο κερκιπέ τι κερέλ ζιάνι αμαρέ γκίστε. Επίσης κεράσα εκ δώρος αμαρέ νεαυτόστε​—μουκχάσα παλ’ αμέντε οντουβά σο αβιλό-πες ντα συνεχίνασα τι απολαμβάνας αμαρί ζωή. (Παρ. 11:17) Σο αβέλα-πες όμως άμα παρόλο σο να κερντέν πέρα τουμαρέ αισθήματα, δυσκολίντιβενα ατζέ τι συγχωρίνεν;

ΣΑΡ ΤΙ ΚΕΡΕΝ ΚΟΥΜΑΝΤΟΣ ΤΟΥΜΑΡΕ ΑΙΣΘΗΜΑΤΑ

10. Σόσκε πρέπει τι ντας χρόνος αμαρέ νεαυτόστε για τι τσσιναβάς τι νιωθίνας χολιαμέ; (Ντικχέν ο φωτογραφίες-ντα)

¹⁰ Σο κα βοηθίνελ-τουμέν τι τσσιναβέν τι νιωθίνεν χολιαμέ; Εκ τρόπος ισί τι ντεν χρόνος τουμαρέ νεαυτόστε για τι αβέλ λατσσές. Εκ τζενό σο ντινάς-πες μπουτ, να χρειαζίντιβελα σάντε βοήθεια κατά γιατρούς αλλά χρειαζίντιβελα χρόνος-ντα για τι αβέλ λατσσές οτθέ σο ντινάς-πες. Αντικάς αμέν-ντα μπέκιμ χρειαζίντιβασα χρόνος για τι μπορίνας τι συγχωρίνας εκχέ τζενές αντράλ αμαρέ γκίσταρ.​—Εκκλ. 3:3· 1 Πέτρ. 1:22.

11. Σαρ μπορίνελα τι βοηθίνελ-τουμέν η προσευχή τι συγχωρίνεν;

¹¹ Προσευχίντιβεν κο Ιεχωβά ντα μανγκέν λέσταρ τι βοηθίνελ-τουμέν τι συγχωρίνεν.c Η Αν βακερέλα σαρ βοηθιντάς-λα η προσευχή: «Μανγκλόμ κατά Ιεχωβά τι συγχωρίνελ ι κάθε εκχές αμένταρ κι φαμιλί για το πράγματα σο να κερντάμ λατσσές. Σοράν, γραφιντόμ εκ γράμμας μι νταντέστε ντα λέσκε νεβέ ρομνιάτε ντα βακερντόμ λένγκε ότι συγχωρίναβα-λεν». Η Αν βακερέλα ότι ανταβά να ισινέ λάκε εύκολος. Αλλά βακερέλα: «Μακάρι η προσπάθεια σο κερντόμ για τι συγχωρίναβ σαρ ο Ιεχωβά, τι βοηθίνελ μι νταντές ντα λέσκε ρομνιά τι μανγκέν τι σικλιόν πο μπουτ Λέσκε».

12. Σόσκε πρέπει τι ντας μπέσα κο Ιεχωβά ντα όχι κο αισθήματα αμαρέ; (Παροιμίες 3:5, 6)

¹² Τι ντεν μπέσα κο Ιεχωβά, όχι κο αισθήματα τουμαρέ. (Διαβάνεν Παροιμίες 3:5, 6) Ο Ιεχωβά πάντα τζανέλα σο ισί πο λατσσό αμένγκε. (Ησ. 55:8, 9) Ντα ποτές να κα μανγκέλ αμένταρ τι κεράς κάτι σο κα κερέλ αμένγκε ζιάνι. Οτθάρ, κάνα βακερέλα αμένγκε τι συγχωρίνας, μπορίνασα τι αβάς σίγουροι ότι ανταβά ισί αμαρέ λατσσιμάσκε. (Ψαλμ. 40:4· Ησ. 48:17, 18) Οκιά μπάνταρ, άμα ντάσα μπέσα κο αισθήματα αμαρέ, μπέκιμ μα τι μπορίνας ποτές τι συγχωρίνας. (Παρ. 14:12· Ιερ. 17:9) Η Ναόμι βακερέλα: «Κι αρχή νιωθίναβας ότι τθεράβας δίκιος σο να συγχωρίναβας μι ρομές σο ντικχέλας πορνογραφία. Νταράβας ότι κα ντουκχαβέλας πάλι μο γκι. Ή ότι κα μπιστρέλας σο μπαρό κακός κερντάας μάνγκε. Ντα σκεφτίναβας ότι ο Ιεχωβά αγαβέλα μο αισθήματα. Χάνικ χάνικ όμως αγαντόμ ότι ενώ ο Ιεχωβά αγαβέλα μο αισθήματα, ανταβά να μανγκέλα τι βακερέλ ότι συμφωνίνελα-ντα. Βοβ τζανέλα σαρ νιωθίναβα ντα ότι χρειαζίντιβαβα χρόνος για τι αβάβ λατσσές. Αλλά μανγκέλα επίσης τι συγχωρίναβ».d

ΜΠΑΡΙΑΡΕΝ ΛΑΤΣΣΕ ΑΙΣΘΗΜΑΤΑ

13. Σαρ σικαβένα ο εδάφια Ρωμαίους 12:18-21, σο χρειαζίντιβελα τι κεράς;

¹³ Κάνα συγχωρίνασα εκχέ τζενές σο πληγωντάς-αμέν μπουτ, να ερεσέλα σάντε τι αποφασίνας ότι να κα ξανακεράς λάφι ανταλέσκε σο αβιλό-πες. Άμα ο τζενό σο πληγωντάς-αμέν ισί πφραλ ή πφεν, αμαρό στόχος ισί τι κεράς ειρήνη. (Ματθ. 5:23, 24) Αντίς τι αβάς χολιαμέ, τραμπίνασα τι τζιτζίνας ντα τι συγχωρίνας. (Διαβάνεν Ρωμαίους 12:18-21· 1 Πέτρ. 3:9) Σο κα βοηθίνελ-αμέν τι κεράς-λες ανταβά;

14. Σο πρέπει τι προσπαθίνας τι κεράς, ντα σόσκε;

¹⁴ Πρέπει τι προσπαθίνας τι ντικχάς ι τζενές σο προσβαλιντάς-αμέν σαρ ντικχέλα-λες ο Ιεχωβά. Ο Ιεχωβά τραμπίνελα τι ρόντελ ο λατσσιπέ κο τζενέ. (2 Χρον. 16:9· Ψαλμ. 130:3) Ο πο μπουτ φαρ αρακχάσα κο τζενέ οντουλά σο ρόντασα λέντε​—είτε ο λατσσέ πράγματα σο κερένα είτε ο γκεραλέ. Κάνα ρόντασα ο λατσσιπέ κο γιαβερά, κα αβέλ αμένγκε πο εύκολος τι συγχωρίνας-λεν. Για παράδειγμας, εκ πφραλ, ο Τζάροντ, βακερέλα: «Ισί μάνγκε πο εύκολος τι συγχωρίναβ εκχέ πφραλές κάνα συγκρίναβα λέσκο λάθος με το μπουτ λατσσέ πράγματα σο εκτιμίναβα λέστε».

15. Σόσκε μπορεί τι βοηθίνελ τι βακερέν εκχέ τζενέσκε ότι συγχωριντέν-λες;

¹⁵ Κάτι γιαβέρ σημαντικός σο κα μπορίνενας τι κερέν ισί τι βακερέν κο τζενό ότι συγχωριντέν-λες. Σόσκε; Τσσουβέν σημασία σο βακερέλα η Ναόμι: «Μο ρομ πουτσλάς-μαν: “Συγχωριντάν-μαν;” Κάνα πουταρντόμ μο μούι για τι βακεράβ λέσκε: “Συγχωρίναβα-τουτ”, κολλισάλομ. Αγαντόμ ότι αντρέ μι γκίστε να συγχωριντόμας-λες μπαγιά. Καζόμ νακχέλας ο καιρός, μπορισάλομ τι βακεράβ ακαλά ζουρανέ λάφια: “Συγχωρίναβα-τουτ”. Ναστί πακιάβας καζόμ μπουτ λοκχιαρντάς ανταβά μι ρομέσκο γκι σο ντικχέλας-μαν δακρυσμέ ντα καζόμ μπουτ λοκχιλό μιρό-ντα γκι. Ακανά τθεράβα πάλι μπέσα μι ρομέστε ντα ισινάμ πάλι ο πο λατσσέ αμαλά».

16. Σο σικλιλέν για την συγχώρηση;

¹⁶ Ο Ιεχωβά μανγκέλα τι συγχωρίνας. (Κολ. 3:13) Αλλά ισί μπαγιά ότι ανταβά μπορεί τι αβέλ αμένγκε δύσκολος. Μπορίνασα όμως τι καταφερίνας-λεν άμα να κα κεράς πέρα αμαρέ αισθήματα ντα κα προσπαθίνας τι κεράς-λεν κουμάντος. Σοράν, μπορίνασα τι μπαριαράς νεβέ, λατσσέ αισθήματα.​—Ντικχέν ο πλαίσιος-ντα «Τριν Πράγματα σο Μπορίνενα τι Κερέν για τι Συγχωρίνεν ι Γιαβερέν».

ΣΚΕΦΤΙΝΕΝ Ο ΛΑΤΣΣΙΜΑΤΑ ΣΟ ΑΒΕΝΑ ΚΑΤΑ ΣΥΓΧΩΡΗΣΗ

17. Καλά λατσσίματα αβένα κάνα συγχωρίνασα;

¹⁷ Τθεράσα μπουτ λόγους τι συγχωρίνας. Για τι ντικχάς μερικούς ανταλένταρ. Πρώτον, μοιάζασα αμαρέ Νταντέστε, κο Ιεχωβά, σο τζιτζίνελα ι γιαβερένγκε ντα κεράσα λέσκο γκι. (Λουκ. 6:36) Δεύτερον, σικαβάσα εκτίμηση ι Ιεχωβάσκε σο συγχωρίνελα-αμέν λατσσιμάσαρ. (Ματθ. 6:12) Ντα τρίτον, αμαρί υγεία αβέλα πο λατσσί ντα αμαρέ φιλίες πο ζουρανέ.

18, 19. Καβά μπορεί τι αβέλ ο αποτέλεσμας άμα συγχωρίνασα;

¹⁸ Κάνα συγχωρίνασα ι γιαβερέν μπορεί τι τθεράς ευλογίες σο να μπεσάας λένγκε. Για παράδειγμας, ντικχέν σο αβιλό-πες κι Ντενίζ. Παρόλο σο βόι να τζανέλας-λες αζομάν, ο τζενό σο μουνταρντάας λάκε ρομές μανγκέλας τι μουνταρέλ-πες σοράν κατά δικαστήριος. Αλλά συγκινισάλο αζόμ μπουτ σο συγχωριντάς-λες η Ντενίζ. Ανταβά κερντάς-λες τι αρχίνελ μελέτη ι Ιεχωβάσκε Μαρτυρέντζαρ.

¹⁹ Μπορεί τι νιωθίνας ότι τι συγχωρίνας εκχέ τζενές ισί εκ κατά πο δύσκολα πράγματα σο κα χρειαζίντιβελ τι κεράς ποτές. Αλλά μπορεί τι αβέλ εκ κατά πο σουκάρ-ντα πράγματα. (Ματθ. 5:7) Οτθάρ μανγκάσα σαρέ τι κεράς ο πο λατσσό σο μπορίνασα για τι συγχωρίνας σαρ ο Ιεχωβά.