Σόσκε Χρειαζίντιβελα τι Μανγκάς Συμβουλή;

1. Σαρ μπορίνασα τι λας γκοντιαβέρ αποφάσεις σο κα ανέν αμένγκε λατσσιπέ αμαρέ ζωγιάτε; (Παροιμίες 13:10· 15:22)

ΣΑΡΕ μανγκάσα τι λας γκοντιαβέρ αποφάσεις για τι τζαν λατσσές ο πράγματα αμαρέ ζωγιάτε. Ο Λάφι ι Ντεβλέσκο βακερέλα αμένγκε ότι για τι καταφερίνας-λες ανταβά, πρέπει τι μανγκάς συμβουλές.​—Διαβάνεν Παροιμίες 13:10· 15:22.

2. Σο ντέλα πο λάφι ο Ιεχωβά τι κερέλ αμένγκε;

² Σίγουρα ο πο λατσσέ συμβουλές λάσα-λεν αμαρέ Νταντέσταρ, κατά Ιεχωβά. Οτθάρ, πρέπει τι προσευχίντιβας λέστε ντα τι μανγκάς λέσκι σοφία. Βοβ ντέλα πο λάφι ότι κα βοηθίνελ-αμέν, ντα βακερέλα: «Κα νταβ-τουτ συμβουλή ντα κα τθεράβ μι γιακχ οπρά-τούτε». (Ψαλμ. 32:8) Ανταλά λάφια σικαβένα ότι ο Ιεχωβά να ντέλα-αμέν απλά εκ συμβουλή. Βοβ ντέλα-αμέν ακριβώς ι συμβουλή σο χρειαζίντιβασα ντα βοηθίνελα-αμέν εμ τι εφαρμόνας-λα.

3. Σο κα ντικχάς ανταλέ μαθημάστε;

³ Ανταλέ μαθημάστε, κα λας απαντήσεις σταρέ ερωτησιέντε, αντράλ κατά Λάφι ι Ντεβλέσκο: (1) Καγιά ιδιότητα πρέπει τι τθεράβ για τι μπορίναβ τι βοηθίντιβαβ από εκ λατσσί συμβουλή; (2) Κον μπορίνελα τι ντελ-μαν λατσσί συμβουλή; (3) Σαρ μπορίναβα τι σικαβάβ ότι μο γκι ισί έτοιμος για τι δεχτίνελ συμβουλή; (4) Σόσκε δεν πρέπει τι μανγκάβ γιαβερένταρ τι λεν αποφάσεις μάνγκε;

ΚΑΓΙΑ ΙΔΙΟΤΗΤΑ ΠΡΕΠΕΙ ΤΙ ΤΘΕΡΑΒ;

4. Καγιά ιδιότητα πρέπει τι τθεράς για τι βοηθίντιβας από εκ λατσσί συμβουλή;

⁴ Πρέπει τι αβάς ταπεινοί για τι μπορίνας τι βοηθίντιβας από εκ λατσσί συμβουλή. Πρέπει τι αγαβάς ότι χρειαζίντιβασα ι βοήθεια ι γιαβερένγκι για τι λας εκ γκοντιαβέρ απόφαση κάνα νακχάσα κάτι σο να ξανανακχλάμ-λες ποτές. Επίσης, πρέπει τι αγαβάς ότι να τζανάσα-λεν σαρέ. Άμα να ισινάμ ταπεινοί, ο Ιεχωβά να κα μπορίνελ τι βοηθίνελ-αμέν. Αντικάς, κάνα διαβάνασα λέσκο Λάφι, να κα αγαβάς καγιά συμβουλή κερέλα λάφι αμένγκε. (Μιχ. 6:8· 1 Πέτρ. 5:5) Όμως, άμα ισινάμ ταπεινοί, κα αβάς έτοιμοι τι ασουνάς ντα τι εφαρμόνας σο-ντα συμβουλή αβέλα κατά Γραφή.

5. Καλά μπαρέ πράγματα σο κερντάας ο Δαβίδ κα μπορίνενας τι κερέν-λες τι αβέλ μπαρικανό;

⁵ Ελάν τι ντικχάς σο μπορίνασα τι σικλιάς κατά βασιλιάς Δαβίδ. Παρόλο σο κερντάας μπουτ μπαρέ πράγματα, να αβιλό μπαρικανό. Μπουτ μπρεσά πριν τι αβέλ βασιλιάς, ο τζενέ τζανένας ότι ισινέ εκ μπουτ λατσσό μουσικός. Ατζέ-ντα ο βασιλιάς μανγκέλας λέσταρ τι κχελέλ λέσκε μουσική. (1 Σαμ. 16:18, 19) Αφού ο Ιεχωβά κερντάς ι Δαβιδίς βασιλιάς, ντινάς-λες πο άγιος πνεύμας. (1 Σαμ. 16:11-13) Ο τζενέ ισαρένας-λες επειδή μουνταρέλας λένγκε ντουσμανίν, σαρ για παράδειγμας τον γίγαντα Γολιάθ. (1 Σαμ. 17:37, 50· 18:7) Εκ μπαρικανό τζενό σο κερντάας αζόμ μπαρέ πράγματα, κα μπορίνελας τι σκεφτίνελ ότι να χρειαζίντιβελας τι ασουνέλ συμβουλή κατά γιαβερά. Αλλά ο Δαβίδ να σκεφτίνελας αντικάς.

6. Σαρ τζανάσα ότι ο Δαβίδ δεχτίνελας χαράσαρ ο συμβουλές; (Ντικχέν ι φωτογραφία-ντα)

⁶ Αφού αβιλό βασιλιάς, ο Δαβίδ τραμπιντάς αμαλέν σο κα μπορίνενας τι ντεν-λες συμβουλές. (1 Χρον. 27:32-34) Ανταβά να κερέλα αμένγκε εντύπωση, επειδή ο Δαβίδ ισινέ πάντα έτοιμος τι ασουνέλ ι γιαβερέν κάνα ντένας-λες λατσσέ συμβουλές. Δεχτίνελας συμβουλές όχι σάντε κατά μουρσά αλλά κατά τζουβλιά-ντα, σαρ για παράδειγμας κατά Αβιγαία. Βόι ισινέ η ρομνί εκχέ μουρσέσκι, του Νάβαλ, σο ισινέ μπαρικανό ντα να σικαβέλας ιτς εκτίμηση ντα σεβασμός. Ο Δαβίδ κερντάς ταπεινά λάκι λατσσί συμβουλή ντα αντικάς να πελό σε εκ μπουτ μπαρό λάθος.​—1 Σαμ. 25:2, 3, 21-25, 32-34.

7. Σο μπορίνασα τι σικλιάς κατά Δαβίδ; (Εκκλησιαστής 4:13) (Ντικχέν ο φωτογραφίες-ντα)

⁷ Σο σικλιάσα κατά Δαβίδ; Μπορεί τι τζανάσα κάτι λατσσές ή τι τθεράσα κάποια εξουσία. Ατζέ-ντα αζομάν δεν πρέπει ποτές τι σκεφτίνας ότι τζανάσα-λεν σαρέ ντα ότι να χρειαζίντιβασα συμβουλή. Ντα σαρ ο Δαβίδ, πρέπει τι αβάς έτοιμοι τι ασουνάς εκ λατσσί συμβουλή, χωρίς τι ντικχάς κον ντέλα-λα. (Διαβάνεν Εκκλησιαστής 4:13) Άμα κεράσα-λεν ανταλά, κα αβέλ πο δύσκολος τι περάς σε εκ λάθος σο μπορεί τι ανέλ ντουκχ εμ αμένγκε εμ κο γιαβερά.

ΚΟΝ ΜΠΟΡΙΝΕΛΑ ΤΙ ΝΤΕΛ-ΜΑΝ ΛΑΤΣΣΙ ΣΥΜΒΟΥΛΗ;

8. Σόσκε μπορίνελας ο Ιωνάθαν τι ντελ συμβουλή κο Δαβίδ;

⁸ Σκεφτίνεν κάτι ατζέκ σο μπορίνασα τι σικλιάς κατά Δαβίδ. Βοβ ασουνέλας ι συμβουλή τζενένγκι σο τθερένας λατσσί φιλία ι Ιεχωβάσαρ αλλά εμ μπορίνενας τι αγαβέν λατσσές οντουβά σο νακχέλας. Για παράδειγμας, κάνα μανγκέλας τι σικλιόλ άμα ο βασιλιάς Σαούλ κα μανγκέλας τι κερέλ ειρήνη λέσαρ, ο Δαβίδ ασουντάς ι συμβουλή σο ντινάς-λες ο Ιωνάθαν, ο τσσαβό του Σαούλ. Σόσκε μπορίνελας ο Ιωνάθαν τι ντελ-λες λατσσί συμβουλή; Επειδή ο Ιωνάθαν εμ τθερέλας ζουρανί φιλία ι Ιεχωβάσαρ, εμ τζανέλας λατσσές τον Σαούλ. (1 Σαμ. 20:9-13) Σο μπορίνασα τι σικλιάς ανταλέσταρ;

9. Κον μπορίνελα τι ντελ-αμέν συμβουλή; Εξηγίνεν. (Παροιμίες 13:20)

⁹ Κάνα χρειαζίντιβασα συμβουλή, κα αβέλας λατσσό τι πουτσάς εκχέ τζενές σο εμ τθερέλα ζουρανί φιλία ι Ιεχωβάσαρ αλλά εμ νακχλό οντουβά σο νακχάσα αμέν-ντα.a (Διαβάνεν Παροιμίες 13:20) Για παράδειγμας, βακερέν ότι εκ τερνό πφραλ μανγκέλα τι αρακχέλ κάσαρ κα παντρίνελ. Κον κα ντέλας-λες λατσσί συμβουλή; Εκ αμάλ λέσκο σο ισί εργένη μπορεί τι βοηθίνελ-λες άμα κα ντελ-λες εκ συμβουλή αντράλ κατά Γραφή. Αλλά ο πφραλ μάλλον κα βοηθίντιβελ πο μπουτ άμα κα μανγκέλ συμβουλή εκχέ παντριμέ ζευγαρίσταρ σο τζανέλα-λες λατσσές, ισί παντριμέ κάποια μπρεσά ντα τθερέλα εκ ευτυχισμέ μπιαβ. Βον κα μπορίνεν τι βακερέν λέσκε σαρ τι εφαρμόνελ ο συμβουλές ι Γραφιάκε, αλλά κα μπορίνελ τι σικλιόλ-ντα εμ λένγκε μπιαβέσταρ.

10. Σο κα ντικχάς ακανά;

¹⁰ Μέχρι ακανά, ντικχλάμ εκ ιδιότητα σο πρέπει τι τθεράς-λα εμ αμέν εμ οντουβά σο ντέλα-αμέν συμβουλή. Ακανά κα ντικχάς σόσκε πρέπει τι αβέλ έτοιμος αμαρό γκι ντα αμαρί γκοντί για τι δεχτίνας συμβουλή, ντα άμα πρέπει τι μανγκάς κατά γιαβερά τι λεν αποφάσεις αμένγκε.

ΣΑΡ ΜΠΟΡΙΝΑΒΑ ΤΙ ΤΘΕΡΑΒ ΕΤΟΙΜΟΣ ΓΚΙ;

11, 12. (α) Σο μπέκιμ τι νικιόλ αμένταρ τι κεράς μπάζιμα; (β) Σο κερντάς ο βασιλιάς Ροβοάμ κάνα τθερέλας τι λελ εκ σημαντική απόφαση;

¹¹ Μπάζιμα εκ τζενό μπορεί τι μανγκέλα συμβουλή κατά γιαβερά. Όμως, άμα αποφασιντάς ήδη σο κα κερέλ, κι πραγματικότητα μανγκέλα απλά τι ντικχέλ άμα ο γιαβερά συμφωνίνενα με την απόφαση σο λιντάς. Εκ ασακό τζενό να τθερέλα μπαγιά έτοιμος γκι για τι δεχτίνελ συμβουλή. Πρέπει τι σικλιόλ οντουλέσταρ σο αβιλό-πες κο βασιλιάς Ροβοάμ.

¹² Ο Ροβοάμ αβιλό βασιλιάς κο Ισραήλ αφού μουλό λέσκο ντατ ο Σολομώντας. Κάνα ο Ροβοάμ αβιλό βασιλιάς, αρακχλάς ο τθεμ σε λατσσί κατάσταση. Αλλά ο τζενέ νιωθίνενας ότι ο Σολομώντας τσσουβέλας-λεν τι κερέν μπουτ μπουτί. Ο τζενέ γκιλέ κο Ροβοάμ ντα μολιντέ-λες τι κερέλ λένγκι μπουτί χάνικ πο εύκολη. Ο Ροβοάμ μανγκλάς λένταρ τι ντεν λέστε χάνικ χρόνος για τι σκεφτίνελ σο απόφαση κα λέλας. Κι αρχή μανγκλάς συμβουλή κατά πφουρέ μουρσά σο βοηθίνενας τον Σολομώντα. (1 Βασ. 12:2-7) Όμως, να δεχτιντάς ι συμβουλή σο ντινέ-λες. Σόσκε κερντάς-λες ανταβά; Μάλλον αποφασιντάας ήδη σο κα κερέλας, ντα μπεκλεντίνελας ότι οντουλά πφουρέ μουρσά κα βακερένας λέσκε οντουβά σο μανγκέλας τι ασουνέλ. Οτθάρ, κάνα πουτσλάς πι τερνέ αμαλέν, ντα βακερντέ λέσκε οντουβά σο μανγκέλας τι ασουνέλ, μπεϊντιντάς οντουβά σο βακερντέ λέσκε. (1 Βασ. 12:8-14) Αντικάς ο Ροβοάμ βακερντάς κο λαός ακριβώς οντουβά σο βακερντέ λέσκε ο αμαλά λέσκε. Οτθάρ, μπουτ τζενέ κατά λαός γκιλέ λέσαρ κόντρα ντα τραμπιντέ εκχέ γιαβερέ βασιλιάς. Από αζομάν ο Ροβοάμ τθερέλας συνέχεια προβλήματα.​—1 Βασ. 12:16-19.

13. Σαρ μπορίνασα τι τζανάς άμα αμαρό γκι ισί έτοιμος τι δεχτίνελ συμβουλή;

¹³ Σο σικλιάσα κατά Ροβοάμ; Κάνα μανγκάσα συμβουλή, πρέπει αμαρό γκι τι αβέλ έτοιμος για τι δεχτίνελ-λα. Σαρ κα τζανάς άμα αμαρό γκι ισί έτοιμος; Μήπως μανγκάβα συμβουλή αλλά σοράν να δεχτίναβα-λα επειδή νανέ οντουβά σο μανγκάβα τι ασουνάβ; Σκεφτίνεν εκ παράδειγμας.

14. Σο πρέπει τι ντας-αμέν γκοντί κάνα λάσα συμβουλή; Βακερέν εκ παράδειγμας. (Ντικχέν ι φωτογραφία-ντα)

¹⁴ Σκεφτίνεν ότι κάποιος βακερέλα εκχέ πφραλέσκε εκχέ μπουτ λατσσέ μπουτιάκε. Πριν τι δεχτίνελ-λα, ο πφραλ μανγκέλα συμβουλή εκχέ πρεσβυτερόσταρ. Ο πφραλ βακερέλα ότι ιτιρί ανταλέ μπουτιάταρ, κα χρειαζίντιβελ τι αβέλ ντουρ πι φαμιλιάταρ για μπουτ βακίτι. Ο πρεσβύτερος βοηθίνελα ι πφραλές τι αγαβέλ αντράλ κατά Γραφή ότι λέσκι πο σημαντική ευθύνη ισί τι βοηθίνελ ντα τι οδηγίνελ πι φαμιλί αντράλ κατά Λάφι ι Ντεβλέσκο. (Εφεσ. 6:4· 1 Τιμ. 5:8) Ο πφραλ αμέσως νικαβέλα λάθος ι συμβουλή ι πρεσβυτερόσκι ντα συνεχίνελα τι πουτσέλ γιαβερέ πφραλέν κι κχανγκιρί μέχρι τι αρακχέλ εκχές σο κα βακερέλ λέσκε τι δεχτίνελ ι μπουτί. Σο βακερένα; Μανγκέλα ανταβά πφραλ μπαγιά συμβουλή; Ή μήπως λιντάς ήδη πι απόφαση ντα απλά ρόντελα εκχέ τζενές για τι συμφωνίνελ λέσαρ; Πρέπει τι ντας-αμέν γκοντί ότι αμαρό γκι μπορίνελα τι χουχαβέλ-αμέν. (Ιερ. 17:9) Μπάζιμα, η συμβουλή σο να μπεϊντίνασα ισί οντιά σο χρειαζίντιβασα πο μπουτ.

ΠΡΕΠΕΙ ΤΙ ΜΑΝΓΚΑΒ ΓΙΑΒΕΡΕΝΤΑΡ ΤΙ ΛΕΝ ΑΠΟΦΑΣΕΙΣ ΜΑΝΓΚΕ;

15. Σο πρέπει τι προσοχίνας μα τι κεράς, ντα σόσκε;

¹⁵ Ο κάθε εκ αμένταρ τθερέλα ι ευθύνη τι λελ αποφάσεις πέσκε. (Γαλ. 6:4, 5) Σικλιλάμ ότι πριν τι λας εκ απόφαση, ισί σημαντικός τι μανγκάς συμβουλή κατά Λάφι ι Ντεβλέσκο ντα γιαβερένταρ σο υπηρετίνενα πιστά ι Ιεχωβάς για μπουτ βακίτι. Όμως, πρέπει τι προσοχίνας μα τι μανγκάς κατά γιαβερά τι λεν αποφάσεις αμένγκε. Μερικά τζενέ μπορεί τι κερένα-λες ανταβά ντα τι πουτσένα εκχέ τζενές σο ντένα λέσκε μπέσα: «Σο κα κερέας τούι άμα κα αβέας μι θεσιάτε;» Γιαβερά μπορεί τι λένα ακριβώς ι ίδια απόφαση σο λιντάς εκ γιαβέρ τζενό χωρίς τι σκεφτίνεν-λες ιτς.

16. Καγιά απόφαση έπρεπε τι λεν ο Χριστιανοί κι Κόρινθος ι μασέσκε σο θυσιάντιλο κο είδωλα; (1 Κορινθίους 8:7· 10:25, 26)

¹⁶ Σκεφτίνεν ι απόφαση σο έπρεπε τι λεν ο Χριστιανοί κι κχανγκιρί κι Κόρινθος, ι μασέσκε σο μπορεί τι θυσιάντιλο κο είδωλα. Ο Παύλος βακερντάς οντουλέ Χριστιανόνγκε: «Τζανάσα ότι εκ είδωλος νανέ αληθινός ντεβέλ ντα ότι υπαρχίντιβελα σάντε εκ Ντεβέλ». (1 Κορ. 8:4) Επειδή βακερντάς-λες ανταβά ο Παύλος, μερικοί κι κχανγκιρί αποφασιντέ τι χαν μας σο κιντέας κατά αγορά, παρόλο σο μπορεί τι θυσιάντιλο κο είδωλα. Γιαβερά αποφασιντέ ότι να κα μπορίνενας τι χαν ασακό μας, σόσκε ανταβά κα ενοχλίνελας λένγκι συνείδηση. (Διαβάνεν 1 Κορινθίους 8:7, 10:25, 26) Ανταγιά ισινέ εκ απόφαση σο έπρεπε τι λελ-λα ο κάθε εκ κορκορό. Ο Παύλος ποτές να βακερντάς κο Κορίνθιοι τι λεν αποφάσεις βον αντίς ι γιαβερένγκε ούτε τι κερέν οντουβά σο κερένας ο γιαβερά. Ο κάθε εκ λένταρ “κα ντέλας λογαριασμός πι νεαυτόσκε κο Ντεβέλ”.​—Ρωμ. 14:10-12.

17. Σο κα μπορίνελας τι αβέλ-πες άμα απλά κεράσα σο κερένα ο γιαβερά; Βακερέν εκ παράδειγμας. (Ντικχέν ο φωτογραφίες-ντα)

¹⁷ Κάτι ασακό μπορεί τι αβέλ-πες αντιβές-ντα. Σκεφτίνεν για παράδειγμας ο κλάσματα ι ρατέσκε. Κάθε Χριστιανός πρέπει τι αποφασίνελ κορκορό άμα κα δεχτίνελ ή να κα δεχτίνελ κλάσματα ι ρατέσκε.b Μπορεί τι αβέλ αμένγκε δύσκολος τι αγαβάς λατσσές ανταβά θέμας, αλλά ο κάθε εκ αμένταρ χρειαζίντιβελα τι λελ πιρί απόφαση οπράλ ανταλέστε. (Ρωμ. 14:4) Άμα απλά κεράσα σο κερένα ο γιαβερά, ποτές να κα αβάς γκοντιαβέρ. Μπορίνασα τι αβάς γκοντιαβέρ σάντε άμα λάσα αμέν αποφάσεις αμαρέ νεαυτόσκε αντράλ κατά Γραφή. (Εβρ. 5:14) Άρα κάνα πρέπει τι μανγκάς συμβουλή εκχέ γκοντιαβέρ Χριστιανόσταρ; Άμα ροντιντάμ πρώτα κορκορέ αλλά δυσκολίντιβασα πάλι τι αγαβάς σαρ τι εφαρμόνας οντουλά σο βακερέλα η Γραφή αμαρέ περιπτωσιάτε.

ΣΥΝΕΧΙΝΕΝ ΤΙ ΜΑΝΓΚΕΝ ΣΥΜΒΟΥΛΗ

18. Σο κερντάς ο Ιεχωβά αμένγκε;

¹⁸ Ο Ιεχωβά μουκχλάς-αμέν τι λας κορκορέ αποφάσεις αμαρέ νεαυτόσκε ντα αντικάς σικαντάς ότι ντέλα αμένγκε μπαρί μπέσα. Ντέλα-αμέν πο Λάφι, ι Αγία Γραφή. Επίσης ντέλα-αμέν γκοντιαβέρ αμαλέν, σο μπορίνενα τι βοηθίνεν-αμέν τι αγαβάς σαρ τι εφαρμόνας οντουλά σο σικλιάσα κι Γραφή. Ανταλέ τροπόντζαρ, ο Ιεχωβά φροντίνελα-αμέν σαρ εκ λατσσό Ντατ. (Παρ. 3:21-23) Σαρ μπορίνασα τι σικαβάς λέσκε αμαρί εκτίμηση;

19. Σαρ μπορίνασα τι συνεχίνας τι κεράς ι Ιεχωβάς χαρούμενος;

¹⁹ Σκεφτίνεν ακαβά: Ο νταντά ντα ο νταγιά χαιρίνενα τι ντικχέν πουμαρέ τσσαβέν τι μπαριόν ντα τι αβέν γκοντιαβέρ υπηρέτες ι Ιεχωβάσκε σο βοηθίνενα ι γιαβερέν. Αντικάς ο Ιεχωβά-ντα χαιρίνελα κάνα ντικχέλα-αμέν τι αβάς πο λατσσέ Χριστιανοί, τι μανγκάς συμβουλή κατά γιαβερά ντα τι λας αποφάσεις σο σικαβένα αμαρί αγάπη λέσκε.