Σαρ τι Ντας Λατσσέ Συμβουλές

1. Κον χρειαζίντιβελα τι ντελ συμβουλή; Εξηγίνεν.

ΜΠΕΪΝΤΙΝΕΝΑ τι ντεν συμβουλές κο γιαβερά; Κάποιοι χαιρίνενα τι κερέν-λες ανταβά. Όμως μερικά τζενέ νταρένα ή να νιωθίνενα αζόμ άνετα τι ντεν συμβουλές κο γιαβερά. Σαρ-ντα τι αβέν ο πράγματα όμως, σαρέ ισί ανάγκη μπάζιμα τι κεράς-λες ανταβά. Σόσκε; Επειδή ο Ιησούς βακερντάς ότι ο αληθινοί μαθητές λέσκε κα αγαντίντιβενας κατά αγάπη σο κα σικαβένας ο εκ κο γιαβέρ. (Ιωάν. 13:35) Ντα εκ τρόπος για τι σικαβάς αγάπη ισί κάνα ντάσα συμβουλή αμαρέ πφραλέντε ντα αμαρέ πφενίντε κάνα χρειαζίντιβενα-λες. Ο Λάφι ι Ντεβλέσκο βακερέλα ότι κάνα ντάσα συμβουλή αντράλ αμαρέ γκίσταρ, σικαβάσα ότι ισινάμ “λατσσέ αμαλά”.​—Παρ. 27:9.

2. Σο πρέπει τι κερέν ο πρεσβύτεροι ντα σόσκε; (Ντικχέν ο πλαίσιος-ντα «Συμβουλή κι Συνάθροιση σο Αβέλα-πες Αντρέ κι Εβδομάδα»)

² Ο πρεσβύτεροι χρειαζίντιβελα τι τζανέν σαρ τι ντεν λατσσέ συμβουλές κο γιαβερά. Ο Ιεχωβά ντα ο Ιησούς διοριντέ ανταλέ μουρσέν για τι φροντίνεν ι κχανγκιρί. (1 Πέτρ. 5:2, 3) Εκ τρόπος για τι κερέν-λες ανταβά ισί κάνα ντένα συμβουλές αντράλ κατά Αγία Γραφή κο ομιλίες σο κερένα κι συνάθροιση. Επίσης μπορεί τι χρειαζίντιβελ τι ντεν συμβουλή προσωπικά σε εκ πφραλ ντα τι βοηθίνεν οντουλέν σο μουκχλέ ι Ιεχωβάς τι βουρτίνεν παλάλ κι κχανγκιρί. Σαρ μπορίνενα ο πρεσβύτεροι ντα σαρέ αμέν τι ντας λατσσέ συμβουλές;

3. (α) Σαρ μπορίνασα τι σικλιάς τι ντας λατσσέ συμβουλές; (Ησαΐας 9:6· ντικχέν ο πλαίσιος-ντα «Τι Ντεν Συμβουλή σαρ ο Ιησούς») (β) Σο κα ντικχάς κο μάθημας ανταβά;

³ Μπορίνασα τι σικλιάς σαρ τι ντας λατσσέ συμβουλές άμα κα διαβάνας σαρ κερντέ-λες ανταβά κάποια τζενέ σο ισί κι Αγία Γραφή. Ο Ιησούς πάντα ντέλας ο πο λατσσέ συμβουλές. Εκ κατά τίτλους σο τθερέλα ο Ιησούς ισί «Μπουτ Λατσσό Σύμβουλος». (Διαβάνεν Ησαΐας 9:6) Κο μάθημας ανταβά, κα ντικχάς σο μπορίνασα τι κεράς κάνα μανγκένα αμένταρ συμβουλή ντα σο μπορίνασα τι κεράς κάνα πρέπει τι ντας συμβουλή χωρίς τι μανγκέν-λα αμένταρ. Επίσης κα ντικχάς καζόμ σημαντικός ισί τι ντας συμβουλή κο σωστός σαάτι ντα ι σωστέ τροπόσαρ.

ΚΑΝΑ ΚΑΠΟΙΟΣ ΜΑΝΓΚΕΛΑ ΑΜΕΝΤΑΡ ΣΥΜΒΟΥΛΗ

4, 5. Κάνα κάποιος μανγκέλα αμένταρ συμβουλή, σο πρέπει τι σκεφτίνας πρώτα; Βακερέν εκ παράδειγμας.

⁴ Κάνα εκ αμάλ τουμαρό μανγκέλα τουμένταρ συμβουλή, μπορεί τι χαιρίνενα σο ντέλα τουμένγκε μπέσα. Ντα μπορεί τι μανγκένα τι βοηθίνεν-λες αμέσως. Όμως πρέπει πρώτα τι σκεφτίνεν άμα τζανένα μπερεκέτι πράγματα ανταλέ θεμάσκε για τι μπορίνεν τι ντεν συμβουλή τουμαρέ αμαλές. Μπάζιμα ο πο λατσσό τρόπος για τι βοηθίνας νανέ τι ντας συμβουλή αλλά τι βοηθίνας-λες τι αρακχέλ εκχέ τζενές σο τζανέλα λατσσές ανταβά θέμας.

⁵ Σκεφτίνεν ακαβά παράδειγμας. Βακερέν ότι εκ λατσσό αμάλ τουμαρό νασφάλιβελα πφαρές. Βακερέλα τουμένγκε ότι αρχισάλο τι ρόντελ μερικές θεραπείες ντα σοράν πουτσέλα-τουμέν καγιά θεραπεία πακιάνα τουμέν ότι κα αβέλας πο λατσσί λέσκε. Παρόλο σο τουμέν μπορεί τι μπεϊντίνενα εκ συγκεκριμέ θεραπεία, να ισινέν γιατρός ντα να λιντέν κάποια εκπαίδευση για τι τζανέν σαρ τι αντιμετωπίνεν ανταλά νασφαλίματα. Σε εκ ασακί περίπτωση, ο πο λατσσό τρόπος σο μπορίνενα τι βοηθίνεν τουμαρέ αμαλές ισί τι ρόντεν γιεκ λέσαρ εκχέ τζενέσκε σο λιντάς εκπαίδευση ανταλέ θεμάσκε ντα τζανέλα σο μπορεί τι βοηθίνελ-λες.

6. Σο ισί λατσσό τι κεράς πριν τι ντας συμβουλή;

⁶ Μπάζιμα μπορεί τι νιωθίνασα ότι μπορίνασα τι ντας συμβουλή αμαρέ αμαλές εκχέ θεμάσκε. Ατζέ-ντα αζομάν όμως, ισί λατσσό μα τι ντας ι συμβουλή αμέσως. Σόσκε; Ο εδάφιος Παροιμίες 15:28 βακερέλα ότι «ο γκι ι δίκαιε τζενέσκο σκεφτίνελα πριν τι απαντίνελ». Άρα ατζέ-ντα άμα τζανάσα σο τι βακεράς, κα αβέλας πο λατσσό πρώτα τι ρόντας, τι κεράς προσευχή ντα τι σκεφτίνας προσεκτικά σο συμβουλή κα ντας. Αντικάς κα αβάς πο σίγουροι ότι αμαρί συμβουλή κα αβέλ αντικάς σαρ μανγκέλα ο Ιεχωβά τι αβέλ. Ντικχέν ο παράδειγμας του προφήτη Νάθαν.

7. Σο σικλιάσα κατά παράδειγμας του Νάθαν;

⁷ Ο βασιλιάς Δαβίδ βακερντάς κο προφήτης Νάθαν ότι μανγκέλας τι χτίνελ εκ ναός ι Ιεχωβάσκε. Ο Νάθαν αμέσως βακερντάς λέσκε τι κερέλ-λες. Αλλά οντουβά σο βακερντάς λέσκε να ισινέ οντουβά σο μανγκέλας ο Ιεχωβά. Οτθάρ, πριν τι ντελ-λες συμβουλή, ο Νάθαν έπρεπε πρώτα τι πουτσέλ ι Ιεχωβάς σο μανγκέλας Βοβ τι κερέλ ο Δαβίδ. (1 Χρον. 17:1-4) Σαρ σικαβέλα ανταβά παράδειγμας, κάνα μανγκένα αμένταρ τι ντας συμβουλή, σικαβάσα ότι ισινάμ γκοντιαβέρ άμα “να σιγκιαράσα τι κεράς λάφι”.​—Ιακ. 1:19.

8. Καβά ισί εκ γιαβέρ λόγος σο πρέπει τι προσοχίνας κάνα ντάσα συμβουλή;

⁸ Ντικχέν ατζέκ εκ λόγος σο πρέπει τι προσοχίνας κάνα ντάσα συμβουλή. Μπορεί τι φταίνασα αμέν-ντα άμα ντινάμ εκ λάθος συμβουλή εκχέ τζενέστε ντα αντάς λέσκε μπέτι αποτελέσματα. Σίγουρα, ισί μπουτ σημαντικός τι σκεφτίνας προσεκτικά πριν τι ντας συμβουλή.

ΣΑΡ ΤΙ ΝΤΑΣ ΣΥΜΒΟΥΛΗ ΚΑΝΑ ΝΑ ΜΑΝΓΚΕΛΑ-ΛΕΣ ΑΜΕΝΤΑΡ ΚΑΠΟΙΟΣ

9. Πριν τι ντεν συμβουλή, καλέ πραγμάσκε πρέπει τι αβέν σίγουροι ο πρεσβύτεροι; (Γαλάτες 6:1)

⁹ Μπάζιμα ο πρεσβύτεροι πρέπει τι ντεν συμβουλή εκχέ πφραλέστε ή εκχέ πφενιάτε σο «λιντάς εκ λάθος ντρομ». (Διαβάνεν Γαλάτες 6:1) Εκ τζενό μπορεί τι τραμπίνελ τι κερέλ κάτι σο νανέ αζόμ γκοντιαβέρ ντα ανταβά σοράν μπορεί τι γκερέλ-λες σε εκ σοβαρή αμαρτία. Οντουβά σο μανγκένα τι καταφερίνεν ο πρεσβύτεροι ισί τι βοηθίνεν ι τζενές τι ατσσόλ κο ντρομ σο γκερέλα κι αιώνια ζωή. (Ιακ. 5:19, 20) Για τι αβέλ λατσσί λένγκι συμβουλή όμως, πρέπει πρώτα τι αβέν σίγουροι ότι ο τζενό μπαγιά λιντάς εκ λάθος ντρομ. Αγαβένα ότι άμα εκ τζενό λιντάς εκ απόφαση σο ισί διαφορετική οντουλάταρ σο κα λένας βον, ανταβά να μανγκέλα τι βακερέλ ότι πφανγκλάς ο γκι ι Ιεχωβάσκο. (Ρωμ. 14:1-4) Όμως, άμα ο πρεσβύτεροι αγαντέ ότι εκ τζενό κερντάς κάτι σο κα μπορίνελας τι κερέλ ζιάνι κι φιλία σο τθερέλα ι Ιεχωβάσαρ, σαρ μπορίνενα τι ντεν-λες συμβουλή;

10-12. Κάνα ο πρεσβύτεροι πρέπει τι ντεν συμβουλή σε κάποιον σο να μανγκλάς-λα λένταρ, σο πρέπει τι κερέν; Βακερέν εκ παράδειγμας. (Ντικχέν ο φωτογραφίες-ντα)

¹⁰ Νανέ εύκολος ι πρεσβυτερόνγκε τι ντεν συμβουλή εκχέ τζενέστε σο να μανγκλάς-λα λένταρ. Σόσκε; Ο απόστολος Παύλος βακερντάς ότι εκ τζενό μπορεί τι λελ εκ λάθος ντρομ χωρίς τι αγαβέλ-λες. Οτθάρ, ο πρώτος πράγμας σο πρέπει τι κερέν ο πρεσβύτεροι ισί τι ετοιμάνεν ι τζενές για τι δεχτίνελ ι συμβουλή.

¹¹ Σκεφτίνεν ακαβά παράδειγμας: Εκ κηπουρός μαρέλα-πες τι φροντίνελ εκ φυτός για τι μπαριόλ. Πριν ο κηπουρός τι φυτίνελ ο σπόρος, οργώνελα ο πράχος. Ανταβά σο κερέλα κοβλιαρέλα ο πράχος ντα ετοιμάνελα-λες για τι δεχτίνελ ο σπόρος. Σοράν, φυτίνελα ο σπόρος. Κο τέλος, ποτίνελα ο σπόρος για τι βοηθίνελ-λες τι μπαριόλ. Αντικάς-ντα υπαρχίντιβενα κάποια πράγματα σο μπορίνελα τι κερέλ εκ πρεσβύτερος για τι αβέλ πο εύκολος ι πφραλέσκε τι δεχτίνελ ι συμβουλή. Για παράδειγμας, ο πρεσβύτερος μπορίνελα τι μπεκλεντίνελ ο σωστός σαάτι για τι κερέλ λάφι ντα σοράν τι βακερέλ κο πφραλ ότι πφαμπόλα λέσκε ντα ότι υπαρχίντιβελα κάτι σο κα μανγκέλας τι βακερέλ λέσκε. Άμα εκ τζενό μανγκέλα τι ντελ εκ συμβουλή, πρέπει τι σκεφτίνελ ακαβά: «Τζανένα-μαν ο γιαβερά σαρ εκ τζενό σο σικαβέλα αγάπη ντα λατσσιπέ κο γιαβερά;» Άμα τθερέλα εκ ασακό ναβ, κα αβέλ πο εύκολος ι γιαβερένγκε τι δεχτίνεν λέσκι συμβουλή.

¹² Καζόμ κερένα λάφι, ο πρεσβύτερος μπορίνελα επίσης τι κερέλ πο εύκολος ι τζενέσκε τι δεχτίνελ ι συμβουλή άμα κα ανέλ λέσκε γκοντιάτε ότι σαρέ κεράσα λάθη ντα ότι μπάζιμα χρειαζίντιβασα συμβουλή. (Ρωμ. 3:23) Με ήρεμη φωνή ντα με μπαρό σεβασμός, ο πρεσβύτερος σικαβέλα ξεκάθαρα λέσκε αντράλ κατά Γραφή καβά ισινέ ο λάθος σο κερντάς. Κάνα ο πφραλ κα αγαβέλ ότι κερντάς εκ λάθος, ο πρεσβύτερος πρέπει τι εξηγίνελ λέσκε ξεκάθαρα καλά πράγματα πρέπει τι κερέλ για τι διορθώνελ ι κατάσταση. Κο τέλος, ο πρεσβύτερος μπορίνελα τι κερέλ πο εύκολος ι πφραλέσκε τι δεχτίνελ ι συμβουλή, άμα κα βακερέλ λέσκε ο λατσσέ πράγματα σο κερέλα ντα άμα κα κερέλ προσευχή λέσαρ.​—Ιακ. 5:15.

13. Σαρ μπορίνενα τι αβέν σίγουροι ο πρεσβύτεροι ότι ο τζενό αγαντάς ι συμβουλή;

¹³ Μπάζιμα γιαβέρ βακερέλα οντουβά σο ντέλα ι συμβουλή ντα γιαβέρ αγαβέλα οντουβά σο ασουνέλα ι συμβουλή. Σο μπορίνενα τι κερέν ο πρεσβύτεροι για μα τι αβέλ-πες ανταβά; Μπορίνενα τι κερέν με σεβασμός κάποιες σουκάρ ερωτήσεις για τι αβέν ξεκάθαρα ο σημαντικά σημεία. (Εκκλ. 12:11) Ο απαντήσεις ι τζενέσκε κα βοηθίνεν ι πφραλές σο ντέλα ι συμβουλή τι αβέλ σίγουρος ότι ο τζενό αγαντάς-λα σωστά.

ΝΤΕΝ ΣΥΜΒΟΥΛΗ ΚΟ ΣΩΣΤΟΣ ΣΑΑΤΙ ΝΤΑ Ι ΣΩΣΤΕ ΤΡΟΠΟΣΑΡ

14. Πρέπει τι ντας συμβουλή κάνα ισινάμ νευριασμέ; Εξηγίνεν.

¹⁴ Σαρέ ισινάμ ατελείς, οτθάρ μερικές φορές σαρέ κεράσα ή βακεράσα κάτι σο στεναχωρίνελα ι γιαβερέν. (Κολ. 3:13) Η Γραφή βακερέλα ότι μπάζιμα κάποιος μπορεί ατζέ-ντα τι βακερέλ ή τι κερέλ κάτι σο κα νευριάνελ-αμέν. (Εφεσ. 4:26) Όμως δεν πρέπει τι ντας συμβουλή κάνα ισινάμ νευριασμέ. Σόσκε; Επειδή «ο τζενό σο ισί χολιαμέ να κερέλα οντουβά σο ισί δίκαιος κο γιακχά κι Ντεβλέσκε». (Ιακ. 1:20) Άμα κα ντάας συμβουλή κάνα ισινάμ χολιαμέ, κα κεράας ο πράγματα χειρότερα. Ανταβά να μανγκέλα τι βακερέλ ότι δεν πρέπει ποτές τι βακεράς οντουλά σο σκεφτίνασα ντα νιωθίνασα κο τζενό σο νευριαντάς-αμέν. Όμως, μπορίνασα τι συζητίνας πο λατσσές άμα κα μπεσάς μέχρι τι ηρεμίνας. Ελάν τι σικλιάς κατά Ελιού σο ντινάς συμβουλή κο Ιώβ.

15. Σο σικλιάσα κατά παράδειγμας του Ελιού; (Ντικχέν ι φωτογραφία-ντα)

¹⁵ Για μερικά ντιβεσά, ο Ιώβ προσπαθίνελας τι διορθώνελ ο λάθος πράγματα σο βακερντέας λέσκε ο ψεύτικα αμαλά σο τθερέλας. Ο Ελιού ασουνέλας οντουλά σο βακερέλας ο Ιώβ. Ο Ελιού πφαμπιλό για τον Ιώβ. Όμως, κάνα ο Ιώβ προσπαθιντάς τι σικαβέλ ότι να κερντάς κάτι κακός, βακερντάς πράγματα ι Ιεχωβάσκε σο να ισινέ μπαγιά. Ανταβά χολιασκιαρντάς μπουτ τον Ελιού. Όμως ο Ελιού να κερντάς αμέσως λάφι ντα σοράν κάνα ντινάς συμβουλή κο Ιώβ, κερντάς-λες ανταβά ήρεμα ντα με σεβασμός. (Ιώβ 32:2· 33:1-7) Μπορίνασα τι σικλιάς εκ μπουτ σημαντικός μάθημας κατά Ελιού. Ισί πο λατσσό τι ντας συμβουλή κάνα ισινάμ ήρεμοι ντα τι ντας-λα με σεβασμός ντα αγάπη.​—Εκκλ. 3:1, 7.

ΣΥΝΕΧΙΝΕΝ ΤΙ ΝΤΕΝ ΝΤΑ ΤΙ ΔΕΧΤΙΝΕΝ ΣΥΜΒΟΥΛΗ

16. Σο σικλιάσα κατά Ψαλμός 32:8;

¹⁶ Ο βασικός εδάφιος ανταλέ μαθημάσκο βακερέλα ότι “ο Ιεχωβά κα ντελ-αμέν συμβουλή ντα κα τθερέλ πι γιακχ οπρ’ αμέντε”. (Διαβάνεν Ψαλμός 32:8) Ανταβά μανγκέλα τι βακερέλ ότι κα συνεχίνελ τι βοηθίνελ-αμέν. Να ντέλα-αμέν σάντε συμβουλή, αλλά βοηθίνελα-αμέν επίσης εμ τι εφαρμόνας-λα. Σο λατσσό παράδειγμας ισί ανταβά αμένγκε! Κάνα χρειαζίντιβελα τι ντας συμβουλή κο γιαβερά, κα μοιάζας κο Ιεχωβά άμα τθεράσα αμαρί γιακχ οπρά-λέντε ντα άμα ντάσα-λεν σο-ντα βοήθεια χρειαζίντιβενα για τι τθερέν επιτυχία.

17. Σαρ κερένα-αμέν τι νιωθίνας ο πρεσβύτεροι κάνα ντένα-αμέν συμβουλές αντράλ κατά Αγία Γραφή; (Ησαΐας 32:1, 2)

¹⁷ Ειδικά αμαρέ ντιβεσέντε ισί ατζέ πο μπουτ ανάγκη τι ντας ντα τι λας λατσσέ συμβουλές. (2 Τιμ. 3:1) Ο πρεσβύτεροι σο ντένα συγκεκριμέ συμβουλή αντράλ κατά Αγία Γραφή ισί «σαρ λενιά εκχέ τθεμέστε σο να τθερέλα ιτς πανί». (Διαβάνεν Ησαΐας 32:1, 2) Αμαρέ αμαλά σο τζανένα σο κα μανγκάας τι ασουνάς αλλά βακερένα αμένγκε οντουβά σο χρειαζίντιβασα τι ασουνάς ντένα-αμέν εκ αζόμ πααλίς δώρος σο μοιάζελα με «χρυσά πφαμπαγιά αντρέ σε ασημένιους δίσκους». (Παρ. 25:11) Μακάρι σαρέ αμέν τι συνεχίνας τι σικλιάς σαρ τι ντας ντα τι δεχτίνας λατσσέ συμβουλές.