Μπορίνενα τι Τζαν Κόντρα κο Μπέτι Πράγματα σο Μανγκέλα Τουμαρό Γκι!

1. Σο μαράσα-αμέν τι κεράς σαρέ;

ΝΙΩΣΑΛΕΝ ποτές ότι τουμαρό γκι μανγκέλας μπουτ τι κερέλ κάτι σο ο Ιεχωβά μισίνελα; Άμα βα, μα χασαρέν τουμαρί ζορ. Η Γραφή βακερέλα: «Γιαβερά-ντα τζενέ νακχλέ σο-ντα δοκιμασία νακχένα τουμέν». (1 Κορ. 10:13) Ανταβά μανγκέλα τι βακερέλ ότι σο-ντα μπέτι πράγμας ντέλα τουμαρό γκι ντα μαρένα-τουμέν τι νασκιαρέν, γιαβερά-ντα τζενέ μαρένα-πες τι κερέν ο ίδιος. Να ισινέν κορκορέ, ντα ι Ιεχωβάσκε βοηθειάσαρ, μπορίνενα τι νικίνεν!

2. Καλά πειρασμοί μπορεί τι αντιμετωπίνενα μερικοί Χριστιανοί ντα μερικά τζενέ σο κερένα μελέτη; (Ντικχέν ο φωτογραφίες-ντα)

² Η Αγία Γραφή βακερέλα επίσης: «Ο κάθε εκ δοκιμάντιβελα κάνα ταρτίντιβελα κατά πράγματα σο μανγκέλα λέσκο γκι». (Ιακ. 1:14) Γιαβέρ μπορεί τι ταρτίνελα εκχέ τζενές ντα γιαβέρ μπορεί τι ταρτίνελα εκχέ γιαβερές. Για παράδειγμας, μερικοί Χριστιανοί μπορεί τι ντεν κο πειρασμός τι κερέν λουμνιπέ, είτε μουρς τζουβλιάσαρ είτε μουρς μουρσέσαρ ντα τζουβέλ τζουβλιάσαρ. Οντουλά σο τσσιναντέ τι ντικχέν πορνογραφία μπορεί τι νιωθίνενα ότι λένγκο γκι τσσίντελα-λεν τι κερέν-λες πάλι ανταβά. Εμ οντουλά σο τσσιναντέ τι πιν ναρκωτικά ή μολιά μπορεί τι αντιμετωπίνενα-λες ανταβά. Ανταλά ισί μερικά κατά πράγματα σο μαρένα-πες τι νασκιαρέν κάποιοι Χριστιανοί ντα κάποια τζενέ σο κερένα μελέτη. Κάποια στιγμή, σαρέ νιωσάλαμ σαρ ο απόστολος Παύλος, σο γραφιντάς: «Κάνα μανγκάβα τι κεράβ ο σωστός, ο γκεραλιπέ ισί αντρέ μάντε».​—Ρωμ. 7:21.

3. Σαρ μπορεί τι επηρεάνελ εκχέ τζενές εκ μπέτι πράγμας σο μανγκέλα λέσκο γκι;

³ Άμα μαρένα-τουμέν συνέχεια για τι νασκιαρέν εκ μπέτι πράγμας σο μανγκέλα τουμαρό γκι, μπορεί τι χασαρέν τουμαρί ζορ ντα τι πακιάν ότι να μπορίνενα τι τζαν κόντρα κο πειρασμός. Επίσης μπορεί τι νιωθίνενα ότι να τθερένα ελπίδα επειδή τουμαρό γκι μανγκέλα κάτι μπέτι. Μπορίνενα τι αβέν σίγουροι ότι τίποτα ανταλέ πραγματένταρ νανέ μπαγιά! Για τι εξηγίνας-λες ανταβά, ανταλέ μαθημάστε κα απαντίνας ντουέ ερωτησιέντε: (1) Κατάρ αβένα ανταλά αισθήματα; (2) Σαρ μπορίνενα τι νικίνεν ο μπέτι πράγματα σο μανγκέλα τουμαρό γκι;

ΣΑΡ ΜΑΝΓΚΕΛΑ ΤΙ ΝΙΩΘΙΝΑΣ Ο ΜΠΕΝΓΚ

4. (α) Σόσκε μανγκέλα ο Μπενγκ τι πακιάς ότι να τθεράσα ζορ; (β) Σόσκε ισινάμ σίγουροι ότι μπορίνασα τι τζας κόντρα κο πειρασμός;

⁴ Ο Μπενγκ μανγκέλα τι νιωθίνας ότι να τθεράσα ι ζορ για τι τζας κόντρα κο πειρασμός. Ο Ιησούς σικαντάς-λες ανταβά κάνα βακερντάς πι μαθητένγκε τι προσευχίντιβεν ακαλέ λαφίντζαρ: «Μα μουκχ τι περάς κο πειρασμός, αλλά σώνε-αμέν κατά πφιρνό». (Ματθ. 6:13) Ο Μπενγκ βακερέλα ότι ο τζενέ να κα ντεν καν ι Ιεχωβάς άμα κα τθερέν εκ πειρασμός. (Ιώβ 2:4, 5) Σο μπαρό ντινιλιπέ ισί ανταβά! Οντουβά σο πελό κο πειρασμός ντα να ατσσιλό πιστός κο Ιεχωβά ισί ο Μπενγκ. Σαρ αγαβάσα, βοβ πακιάλα ότι κα αβάς σαρ λέστε ντα ότι κα μουκχάς ι Ιεχωβάς κάνα κα αβέλ ανγκλ’ αμέντε εκ πειρασμός. Ο Μπενγκ πακιάλας ότι ατζέ-ντα ο τέλειος Τσσαβό ι Ντεβλέσκο κα περέλας κο πειρασμός ανταβά! (Ματθ. 4:8, 9) Αλλά σκεφτίνεν: Μπαγιά να τθεράσα ι ζορ τι τζας κόντρα κο μπέτι πράγματα σο μανγκέλα αμαρό γκι; Σίγουρα όχι! Πακιάσα αμέν-ντα ο λάφια ι Παυλόσκε, σο γραφιντάς: «Σαρέ ι πραγματένγκε τθεράβα ι ζορ αντράλ οντουλέσταρ σο ντέλα-μαν ζορ».​—Φιλιπ. 4:13.

5. Σαρ τζανάσα ότι ο Ιεχωβά ισί σίγουρος ότι μπορίνασα τι τζας κόντρα κο μπέτι πράγματα σο μανγκέλα αμαρό γκι;

⁵ Σο-ντα τι πακιάλα ο Μπενγκ, ο Ιεχωβά ισί ντιπ σίγουρος ότι μπορίνασα τι τζας κόντρα κο μπέτι πράγματα σο μανγκέλα αμαρό γκι. Σαρ τζανάσα-λες ανταβά; Επειδή ο Ιεχωβά βακερντάς ότι εκ μπαρό πλήθος τζενένγκο σο κα ατσσόν πιστοί κα νακχέν τζουβντέ κατά μπαρί στεναχώρια. Σκεφτίνεν σο μανγκέλα τι βακερέλ ανταβά. Ο Ιεχωβά, σο ναστί χουχαβέλα, βακερέλα ότι κα νακχέλ εκ μπαρό πλήθος κο Παράδεισος, όχι σάντε χάνικ τζενέ. Ανταβά πλήθος κα αβέλ “ιριαντό παρνέ σεΐντζαρ”, δηλαδή κα αβέν πάκι κο γιακχά κι Ιεχωβάσκε. (Αποκ. 7:9, 13, 14) Σαρ αγαβάσα, ο Ιεχωβά πακιάλα ότι μπορίνασα τι τζας κόντρα κο μπέτι πράγματα σο μανγκέλα αμαρό γκι.

6, 7. Σόσκε μανγκέλα ο Μπενγκ τι πακιάς ότι να τθεράσα ελπίδα καζόμ προσπαθίνασα τι τζας κόντρα κο πειρασμός;

⁶ Ο Μπενγκ μανγκέλα τι πακιάς ότι επειδή αμαρό γκι μανγκέλα μπέτι πράγματα, ο Ιεχωβά να κα μουκχέλ-αμέν τι τζουβντιάς για πάντα. Σκεφτίνεν πάλι σο μπαρό ντινιλιπέ ισί ανταβά! Οντουβά σο ποτές να κα δεχτίνελ-λες ο Ιεχωβά, σο ποτές να κα ντελ-λες ι ευκαιρία τι τζουβντιόλ για πάντα ντα κα καταστραφίντιβελ ντιπ, ισί ο Μπενγκ. (Γέν. 3:15· Αποκ. 20:10) Ο Μπενγκ ζηλίνελα-αμέν μπουτ σο τθεράσα ι ευκαιρία τι τζουβντιάς για πάντα. Οτθάρ, μαρέλα-πες για τι κερέλ-αμέν τι πακιάς ότι ισινάμ σαρ βοβ ντα ότι να τθεράσα ελπίδα για το μέλλον. Όμως ανταβά νανέ μπαγιά σόσκε η Γραφή βακερέλα ότι ο Ιεχωβά μανγκέλα τι βοηθίνελ-αμέν, όχι τι καταδικάνελ-αμέν. Βοβ «να μανγκέλα τι καταστραφίντιβελ καέκ αλλά τι μετανιώνεν σαρέ».​—2 Πέτρ. 3:9.

⁷ Άμα πακιάσα ότι νανέ-αμέν ζορ ή ελπίδα τι τζας κόντρα κο μπέτι πράγματα σο μανγκέλα αμαρό γκι, σκεφτίνασα αντικάς σαρ μανγκέλα ο Μπενγκ τι σκεφτίνας. Κάνα αγαβάσα-λες λατσσές ανταβά, μπορίνασα τι τζας λέσαρ κόντρα.​—1 Πέτρ. 5:8, 9.

ΣΑΡ ΜΠΟΡΕΙ ΤΙ ΝΙΩΘΙΝΑΣ ΕΠΕΙΔΗ ΙΣΙΝΑΜ ΑΤΕΛΕΙΣ

8. Σο γιαβέρ μπορεί τι κερέλ-αμέν τι νιωθίνας ότι ναστί τζάσα κόντρα κο μπέτι πράγματα σο μανγκάσα; (Ψαλμός 51:5) (Ντικχέν επίσης ο «Σο Μανγκέλα τι Βακερέλ»)

⁸ Εκτός κατά Μπενγκ, υπαρχίντιβελα κάτι γιαβέρ-ντα σο μπορεί τι κερέλ-αμέν τι νιωθίνας ότι να τθεράσα ζορ ντα ελπίδα τι τζας κόντρα κο μπέτι πράγματα σο μανγκάσα. Σο ισί ανταβά; Η αμαρτία σο λιντάμ σαρέ κατά Αδάμ ντα κατά Εύα.a​—Ιώβ 14:4· διαβάνεν Ψαλμός 51:5.

9, 10. (α) Σαρ επηρεαντάς ι αμαρτία τον Αδάμ ντα την Εύα; (Ντικχέν ι φωτογραφία-ντα) (β) Σαρ επηρεάνελα η αμαρτία αμέν;

⁹ Σκεφτίνεν σαρ νιωσάλε ο Αδάμ ντα η Εύα κάνα αβιλέ ατελείς. Κάνα να ντινέ καν ι Ιεχωβάς, γκεραντέ-πες ντα ιτσσαρντέ πουμαρέ σώματα. Κο Ενόραση στις Γραφές βακερέλα οπράλ ανταλέστε: «Η αμαρτία κερντάς-λεν τι νιωθίνεν τύψεις, ανησυχία, λατζ ντα ότι να ισινέ αρακχαντέ». Λένγκι κατάσταση μοιάζελας σαρ τι αβένας πφαντέ σε εκ κχερ σο τθερέλας σάντε ανταλά σταρ δωμάτια. Ο Αδάμ ντα η Εύα μπορίνενας τι τζαν κατά εκ δωμάτιος κο γιαβέρ αλλά ναστί νικιόνας κατά κχερ. Ναστί νασένας κατά ατέλεια.

¹⁰ Σίγουρα να ισινάμ κι ίδια κατάσταση σο ισινέ ο Αδάμ ντα η Εύα. Βον ναστί βοηθίντιβενα κατά λύτρος. Αλλά αμέν μπορίνασα τι βοηθίντιβας κατά λύτρος σόσκε αντράλ λέσταρ συγχωρίντιβενα αμαρέ αμαρτίες ντα τθεράσα λατσσί φιλία ι Ντεβλέσαρ. (1 Κορ. 6:11) Ισί μπαγιά όμως ότι λιντάμ ι αμαρτία ντα ι ατέλεια. Οτθάρ, να κερέλα αμένγκε εντύπωση σο αμέν-ντα νιωθίνασα τύψεις, ανησυχία, λατζ ντα ότι να ισινάμ αρακχαντέ. Κι πραγματικότητα, η Γραφή βακερέλα ότι η αμαρτία συνεχίνελα τι επηρεάνελ μπουτ ι τζενέν. Ντα κερέλα-λες ανταβά “ατζέ-ντα οντουλέντε σο να αμαρτιντέ οντουλέ τροπόσαρ σο αμαρτιντάς ο Αδάμ”. (Ρωμ. 5:14) Αλλά να χρειαζίντιβελα τι νιωθίνας ότι επειδή μπιάντιλαμ αμαρτωλοί, να κα μπορίνας ποτές τι κεράς ο σωστός ντα τι τθεράς ελπίδα για το μέλλον. Μπορίνασα τι νασκιαράς ανταλά μπέτι αισθήματα. Σαρ;

11. Ατζέ-ντα άμα νιωθίνασα ότι ναστί τζάσα κόντρα κο μπέτι πράγματα σο μανγκάσα, σο μπορίνασα πάντα τι κεράς; (Ρωμαίους 6:12)

¹¹ Επειδή ισινάμ ατελείς, μπάζιμα μπορεί τι νιωθίνας ότι να τθεράσα ι ζορ τι τζας κόντρα κο μπέτι πράγματα σο μανγκάσα. Κάνα νιωθίνασα-λες ανταβά, ισί σαρ τι κερέλα λάφι η αμαρτία σο τθεράσα αντρ’ αμέντε ντα τι βακερέλα αμένγκε ότι ποτές να κα μπορίνας τι νικίνας ο μπέτι πράγματα σο μανγκέλα αμαρό γκι. Αλλά αμέν δεν πρέπει τι ασουνάς-λα. Σόσκε; Επειδή η Γραφή σικλιαρέλα-αμέν μα τι μουκχάς ι αμαρτία “τι κερέλ κουμάντος σαρ βασίλισσα αμαρέ ζωγιάτε”. (Διαβάνεν Ρωμαίους 6:12) Ανταβά μανγκέλα τι βακερέλ ότι μπορίνασα τι τραμπίνας τι κεράς ο σωστός. (Γαλ. 5:16) Ο Ιεχωβά ισί σίγουρος ότι μπορίνασα τι τζας κόντρα κο πειρασμός, οτθάρ-ντα βακερέλα αμένγκε τι μαράς-αμέν ανταλέσκε. (Δευτ. 30:11-14· Ρωμ. 6:6· 1 Θεσ. 4:3) Ισί ξεκάθαρος ότι να ισινάμ μπίζουρανε καζόμ μαράσα-αμέν τι νασκιαράς ο μπέτι πράγματα σο μανγκάσα.

12. Ατζέ-ντα άμα νιωθίνασα ότι να τθεράσα ελπίδα τι νικίνας ο μπέτι πράγματα σο μανγκέλα αμαρό γκι, σο μπορίνασα πάντα τι κεράς;

¹² Αντικάς-ντα, επειδή ισινάμ ατελείς, μπάζιμα μπορεί τι νιωθίνας ότι ο Ιεχωβά καταδικάνελα-αμέν επειδή αμαρό γκι μανγκέλα μπέτι πράγματα. Κάνα νιωθίνασα-λες ανταβά, ισί σαρ τι κερέλα λάφι αμένγκε η αμαρτία σο τθεράσα αντρ’ αμέντε ντα τι βακερέλα αμένγκε ότι ποτές να κα μπορίνας τι νικίνας ο μπέτι πράγματα σο μανγκέλα αμαρό γκι. Αλλά αμέν δεν πρέπει τι ασουνάς-λα. Σόσκε; Επειδή η Γραφή σικλιαρέλα ότι ο Ιεχωβά αγαβέλα ότι ισινάμ ατελείς. (Ψαλμ. 103:13, 14) Βοβ «τζανέλα-λεν σαρέ» αμένγκε. Τζανέλα ατζέ-ντα σαρ επηρεαντάς-αμέν ι αμαρτία σο λιντάμ. (1 Ιωάν. 3:19, 20) Άμα τζάσα κόντρα κο μπέτι πράγματα σο μανγκέλα αμαρό γκι ντα να κεράσα-λεν αμαρέ ζωγιάτε, μπορίνασα τι νιωθίνας πάκι κο γιακχά κι Ιεχωβάσκε. Σόσκε μπορίνασα τι αβάς σίγουροι ανταλέσκε;

13, 14. Μήπως ο μπέτι πράγματα σο μανγκέλα αμαρό γκι σικαβένα ότι ο Ιεχωβά να δεχτίνελα-αμέν; Εξηγίνεν.

¹³ Η Γραφή σικαβέλα ότι γιαβέρ ισί τι μανγκάς εκ μπέτι πράγμας ντα γιαβέρ τι κεράς ανταβά μπέτι πράγμας. Να μπορίνασα πάντα τι κεράς κουμάντος οντουλά σο μανγκέλα αμαρό γκι, αλλά μπορίνασα τι κεράς κουμάντος οντουλά σο κεράσα. Για παράδειγμας, μερικοί Χριστιανοί κι Κόρινθος τζάνας μουρσά μουρσέντζαρ ντα τζουβλιά τζουβλίντζαρ. Ο Παύλος γραφιντάς: «Ασακέ τζενέ ισινένας μερικοί τουμένταρ». Μήπως ανταβά μανγκέλα τι βακερέλ ότι ποτές να κα νικιόλας λένταρ πάλι τι κερέν ασακέ πράγματα; Νανέ λογικός τι βακεράς-λες ανταβά επειδή ο πο μπουτ φαρ ισί δύσκολος τι νικαβάς ντιπ ασακέ πράγματα αμαρέ γκίσταρ. Αλλά ο Ιεχωβά δεχτίνελας ι Χριστιανόν σο ατσσικιαρένας πουμαρό νεαυτός ντα να κερένας ο πράγματα σο μανγκέλας λένγκο γκι. Λέσκε γιακχίντε ισινέ «πάκι ντα άγιοι». (1 Κορ. 6:9-11) Ο ίδιος αβέλα-πες τουμέντζαρ-ντα.

¹⁴ Σο-ντα μπέτι πράγμας τι μανγκέλα τουμαρό γκι, μπορίνενα τι νικίνεν-λες. Ατζέ-ντα άμα να μπορίνενα τι νασκιαρέν-λες ντιπ, μπορίνενα τι σικλιόν τι κερέν-τουμέν κουμάντος για μα τι “κερέν ο μπέτι πράγματα σο μανγκέλα τουμαρό σώμας ντα ο πράγματα σο σκεφτίνενα”. (Εφεσ. 2:3) Άρα σο κα βοηθίνελ-τουμέν τι τζαν κόντρα κο μπέτι πράγματα σο μανγκέλα τουμαρό γκι;

ΣΑΡ ΤΙ ΝΙΚΙΝΑΣ

15. Σόσκε πρέπει τι αγαβάς κατέ ισινάμ μπίζουρανε για τι τζας κόντρα κο μπέτι πράγματα σο μανγκέλα αμαρό γκι;

¹⁵ Για τι νικίνας ο μπέτι πράγματα σο μανγκέλα αμαρό γκι, πρέπει τι αγαβάς κατέ ισινάμ μπίζουρανε. Τθερέν τουμαρί γκοντί για μα τι χουχαβέν τουμαρό νεαυτός «πραγματέντζαρ σο ντικχίντιβενα τουμένγκε σωστά». (Ιακ. 1:22) Για παράδειγμας, εκ τζενό σο τθερέλα πρόβλημας ι μολιάσαρ μπορεί τι πακιάλα ότι λέσκο πρόβλημας νανέ αζόμ μπαρό επειδή σκεφτίνελα ότι γιαβερά τζενέ πίνα πο μπουτ λέσταρ. Ή κάποιος σο τθερέλα πρόβλημας με την πορνογραφία μπορεί τι κατηγορίνελ ι γιαβερέν ντα τι βακερέλ: “Να κα μανγκάβας τι ντικχάβ πορνογραφία άμα μι ρομνί κα σικαβέλας μάνγκε πο μπουτ αγάπη”. Άμα σκεφτίνασα αντικάς, κεράσα-λες αμένγκε πο εύκολος τι περάς κο πειρασμός. Οτθάρ, ατζέ-ντα τουμαρέ γκοντιάτε, μα δικαιολογίνεν τουμαρό νεαυτός. Πρέπει τι λεν ι ευθύνη οντουλένγκε σο κερένα.​—Γαλ. 6:7.

16. Σαρ μπορίνενα τι αβέν πο σίγουροι ότι κερένα ο σωστός;

¹⁶ Να ερεσέλα σάντε τι αγαβέν κατέ ισινέν μπίζουρανε. Πρέπει επίσης τι αβέν πο αποφασισμέ μα τι περέν κο πειρασμός. (1 Κορ. 9:26, 27· 1 Θεσ. 4:4· 1 Πέτρ. 1:15, 16) Σκεφτίνεν κάνα ισί πο εύκολος τουμένγκε τι περέν κο πειρασμός ντα σο οδηγίνελα-τουμέν λέστε. Μπορεί τι αβέλ εκ συγκεκριμέ πράγμας σο δυσκολίνελα-τουμέν ή εκ συγκεκριμέ σαάτι αντρέ κο ντιβές σο ισί πο δύσκολος τουμένγκε τι κερέν κουμάντος τουμαρό νεαυτός. Για παράδειγμας, μήπως ισί πο δύσκολος τουμένγκε τι αρακχαβέν-τουμέν κατά πειρασμός κάνα ισινέν κχινέ ή κάνα ισί αργά ιράτ; Ετοιμάνεν τουμαρό νεαυτός ντα αποφασίνεν σο κα κερέν για τι αρακχαβέν-τουμέν κάνα κα αβέλ ανγκλά-τουμέντε ο πειρασμός. Ο πο λατσσό σαάτι για τι κερέν-λες ανταβά ισί πριν τι αβέλ εκ πειρασμός.​—Παρ. 22:3.

17. Σο μπορίνασα τι σικλιάς κατά παράδειγμας του Ιωσήφ; (Γένεση 39:7-9) (Ντικχέν ο φωτογραφίες-ντα)

¹⁷ Σκεφτίνεν σο κερντάς ο Ιωσήφ κάνα η ρομνί του Πετεφρή προσπαθιντάς τι κερέλ-λες τι σοβέλ λάσαρ. Βακερντάς λάκε αμέσως όχι. (Διαβάνεν Γένεση 39:7-9) Σο σικλιαρέλα-αμέν ανταβά; Ο Ιωσήφ τζανέλας λατσσές από πριν ότι άμα κα σοβέλας ανταλέ τζουβλιάσαρ σοράν κα νιωθίνελας τύψεις. Σαρ κερντάς ο Ιωσήφ, τουμέν-ντα μπορίνενα τι αβέν πο αποφασισμέ τι κερέν ανταβά σο ισί σωστός πριν τι αβέλ εκ πειρασμός. Αντικάς, κάνα κα αβέλ τουμένγκε εκ πειρασμός, κα μπορίνεν πο εύκολα τι ακολουθίνεν ι απόφαση σο λιντέν ντα τι κερέν ο σωστός.

«ΣΥΝΕΧΙΝΕΝ ΤΙ ΕΞΕΤΑΝΕΝ ΤΟΥΜΑΡΟ ΝΕΑΥΤΟΣ»

18. Σαρ μπορίνενα τι τζαν κόντρα κο μπέτι πράγματα σο μανγκέλα τουμαρό γκι; (2 Κορινθίους 13:5)

¹⁸ Για τι τζαν κόντρα κο μπέτι πράγματα σο μανγκέλα τουμαρό γκι, χρειαζίντιβελα τι «συνεχίνεν τι εξετάνεν τουμαρό νεαυτός». (Διαβάνεν 2 Κορινθίους 13:5) Μπάζιμα ισί λατσσό τι εξετάνεν οντουλά σο σκεφτίνενα ντα οντουλά σο κερένα ντα τι κερέν αλλαγές οτθέ σο χρειαζίντιβελα. Ατζέ-ντα κάνα ντένα-λεν πέρα με εκ πειρασμός, πουτσέν-τουμέν: “Καζόμ σουγκό βακερντόμ όχι;” Άμα να βακερντέν όχι αμέσως, μα χασαρέν τουμαρί ζορ. Οκιά μπάνταρ, σκεφτίνεν σο μπορίνενα τι κερέν για τι νασέν αμέσως ντουρ κατά πειρασμός ι γιαβέρ φαρ. Σκεφτίνεν ακαλά ερωτήσεις: “Κάνα αβέλα μάνγκε εκ μπέτι σκέψη, μπορίναβα τι νασκιαράβ-λα ατζέ πο σουγκό; Μήπως ο πράγματα σο ντικχάβα, διαβάναβα ή ασουνάβα κερένα-λες πο δύσκολος μάνγκε τι νασάβ ντουρ κατά πειρασμός; Πφάνταβα αμέσως μο γιακχά κάνα αβένα ανγκλά-μάντε λουμνικανέ φωτογραφίες; Αγαβάβα ότι, παρόλο σο χρειαζίντιβελα τι κεράβ κουμάντος μο νεαυτός για τι νταβ καν κο Ιεχωβά, λέσκε κανόνες ισί πάντα μι λατσσιμάσκε;”​—Ψαλμ. 101:3.

19. Σαρ ο χουρντέ αποφάσεις σο νανέ γκοντιαβέρ μπορεί τι δυσκολίνεν-αμέν τι τζας κόντρα κο μπέτι πράγματα σο μανγκέλα ο γκι;

¹⁹ Καζόμ εξετάνενα τουμαρό νεαυτός, προσοχίνεν μα τι αρακχέν δικαιολογίες για εκ λάθος συμπεριφορά. Η Γραφή βακερέλα: «Ο γκι μπορίνελα τι χουχαβέλ-αμέν πο μπουτ σαρέ κατά γιαβερά πράγματα, ντα κάνα ισί απελπισμέ μπορίνελα τι κερέλ τα πάντα». (Ιερ. 17:9) Ο Ιησούς βακερντάς ότι κατά γκι νικιόνα «πφιρνικανέ σκέψεις». (Ματθ. 15:19) Για παράδειγμας, εκ τζενό σο τσσιναντάς τι ντικχέλ πορνογραφία, σοράν από κάποιος βακίτι, μπορεί τι αμντίνελ ότι νανέ επικίνδυνος τι ντικχέλ φωτογραφίες σο νανέ πορνογραφία, αλλά κα μπορίνενας τι ανέν λέσκε λουμνικανέ σκέψεις. Ή μπορεί τι σκεφτίνελ: “Νανέ κακός τι ανάβ φαντασία μο νεαυτός τι κερέλ μπέτι πράγματα αφού να κεράβα-λεν κι πραγματικότητα”. Άμα κάποιος σκεφτίνελα αντικάς, ισί σαρ “τι σκεφτίνελα πο τζανγκλέ σαρ κα κερέλ οντουλά σο μανγκέλα ο σώμας”. (Ρωμ. 13:14) Σαρ μπορίνενα μα τι κερέν-λες ανταβά; Τθερέν τουμαρί γκοντί! Προσοχίνεν μα τι λεν χουρντέ αποφάσεις σο νανέ γκοντιαβέρ σόσκε ανταβά κα οδηγίνελ-τουμέν τι λεν μπαρέ-ντα αποφάσεις σο νανέ γκοντιαβέρ, σαρ για παράδειγμας τι περέν σε εκ αμαρτία.b Νασκιαρέν σαρέ ο «πφιρνικανέ σκέψεις» σο κα κερένας-τουμέν τι δικαιολογίνεν τουμαρί μπέτι συμπεριφορά.

20. Σο μπεσάσα τι αβέλ-πες κο μέλλον, ντα σο βοήθεια τθεράσα ακανά;

²⁰ Σαρ σικλιλάμ, ι Ιεχωβάσκε βοηθειάσαρ, τθεράσα ι ζορ τι τζας κόντρα κο πειρασμός. Επίσης, επειδή ο Ιεχωβά τζιτζίνελα αμένγκε, τθεράσα ι ελπίδα τι τζουβντιάς για πάντα κο νεβό ντουνιάς. Σο μπαρί χαρά κα τθεράς κάνα κα μπορίνας τι υπηρετίνας ι Ιεχωβάς χωρίς τι νικιόλ αμένγκε τι κεράς μπέτι πράγματα! Μέχρι αζομάν, μπορίνασα τι αβάς σίγουροι ότι τθεράσα εμ ι ελπίδα εμ ι ζορ για τι τζας κόντρα κο μπέτι πράγματα σο μανγκέλα αμαρό γκι. Επειδή ο Ιεχωβά ευλογίνελα αμαρέ προσπάθειες, μπορίνασα τι νικίνας!