ΚΕΦΑΛΑΙΟΣ ΝΤΕΣΟΥΕΚ
Σόσκε Υπαρχίντιβενα Αζόμ Μπουτ Βάσανα;
1, 2. Σο πράγματα πουτσένα μπουτ τζενέ;
ΚΑΘΕ ντιβές ασουνάσα τι αβέν-πες μπέτι πράγματα κο ντουνιάς. Για παράδειγμας, ασουνάσα ότι εκ μπαρί πλημμύρα καταστραφίνελα εκ γκαβ. Εκ τζενό πυροβολίνελα αντρέ εκχέ κχανγκιριάτε ντα ο αποτέλεσμας ισί τι τραυματίνελ ντα τι μουνταρέλ μπουτέ τζενέν. Εκ ντάι μερέλα επειδή τθερέλα καρκίνος ντα μουκχέλα παλάλ πι παντζέ τσσαβέν.
2 Όταν αβένα-πες πράγματα σο πφαμπαρένα ι τζενένγκο γκι σαρ οντουλά σο βακερντάμ πιο οπρέ, μπουτ τζενέ πουτσένα: «Σόσκε;» Επίσης, μπουτ τζενέ πουτσένα σόσκε ισί ο ντουνιάς πφερντό μίσος ντα βάσανα. Κερντάν τούι-ντα ποτές ασακέ ερωτήσεις;
3, 4. (α) Σο πουτσλάς ο Αββακούμ; (β) Σο απάντηση ντινάς-λες ο Ιεχωβά;
3 Κατά Αγία Γραφή σικλιάσα ότι μπουτ τζενέ σο τθερένας μπαρί πίστη κο Ντεβέλ κερντέ ασακέ ερωτήσεις. Για παράδειγμας, ο προφήτης Αββακούμ πουτσλάς ι Ιεχωβάς: «Σόσκε κερέσα-μαν τι ντικχάβ μπέτι πράγματα ντα μουκχέσα τι αβέν αδικίες; Ντα σόσκε ντικχάβα ανγκλά-μάντε τσοριπέ ντα βία, ντα σόσκε χάνα-πες ο τζενέ, ντα σόσκε τζάνα κόντρα ο εκ ι γιαβερέσαρ;»—Αββακούμ 1:3.
4 Κο εδάφια Αββακούμ 2:2, 3, διαβάνασα ι απάντηση ι Ντεβλέσκι κο ερωτήσεις σο κερντάς ο Αββακούμ ντα ι υπόσχεση σο ντινάς-λες τι λατσσαρέλ ο πράγματα. Ο Ιεχωβά μανγκέλα μπουτ ι τζενέν. Η Αγία Γραφή βακερέλα: «Βοβ πφαμπόλα τουμένγκε». (1 Πέτρου 5:7) Ο Ντεβέλ να μανγκέλα ιτς τι ντικχέλ ο βάσανα ντα στεναχωρίντιβελα πιο μπουτ αμένταρ όταν ντικχέλα-λεν. (Ησαΐας 55:8, 9) Οτθάρ, για τι ντικχάς ι ερώτηση: Σόσκε υπαρχίντιβενα αζόμ μπουτ βάσανα κο ντουνιάς;
ΣΟΣΚΕ ΥΠΑΡΧΙΝΤΙΒΕΝΑ ΑΖΟΜ ΜΠΟΥΤ ΒΑΣΑΝΑ;
5. Σο βακερένα μπουτ παπάζια ντα γιαβερά τζενέ ι βασανένγκε σο υπαρχίντιβενα κο ντουνιάς; Σο σικλιαρέλα η Αγία Γραφή;
5 Ο παπάζια ντα ο τζενέ σο σικλιαρένα ι θρησκειάκε βακερένα μπουτ φαρ ότι ισί θέλημας ι Ντεβλέσκο τι τθερέν προβλήματα ο τζενέ. Κάποιοι μπορεί τι βακερένα ότι ο Ντεβέλ αποφασιντάς πιο τζανγκλέ σαρέ οντουλά σο αβένα-πες κι ζωή εκχέ τζενέσκι, εμ ο πράγματα σο πφαμπαρένα λέσκο γκι, ντα ότι αμέν να μπορίνασα τι αγαβάς σόσκε αβένα-πες ανταλά πράγματα. Γιαβερά μπορεί ατζέ-ντα τι βακερένα ότι ο τζενέ, αλλά εμ ο χουρντέ μαξίμια-ντα, μερένα για τι τζαν κο ουρανός ντα τι αβέν γιεκ ι Ντεβλέσαρ. Αλλά ανταβά νανέ μπαγιά. Ο Ιεχωβά ποτές να ανέλα ο μπέτι πράγματα. Η Γραφή βακερέλα: «Να νακχέλα κατά γκοντί ότι ο αληθινός ντα μπουτ ζουρανό Ντεβέλ κερέλα πφιρνιπέ ντα αδικία!»—Ιώβ 34:10.
6. Σόσκε μπουτ τζενέ κατηγορίνενα ι Ντεβλές ι βασανένγκε σο υπαρχίντιβενα κο ντουνιάς;
6 Μπουτ τζενέ κατηγορίνενα ι Ντεβλές ι βασανένγκε σο υπαρχίντιβενα επειδή πακιάνα ότι βοβ κυβερνίνελα ι ντουνιάς. Αλλά σαρ σικλιλάμ κο Κεφάλαιος 3, οντουβά σο κερέλα μπαγιά κουμάντος ανταλέ ντουνιάς ισί ο Σατανάς ο Διάβολος.
7, 8. Σόσκε υπαρχίντιβενα αζόμ μπουτ βάσανα κο ντουνιάς;
7 Η Γραφή βακερέλα αμένγκε ότι «σαρέ ι ντουνιάς κερέλα-λες κουμάντος ο πφιρνό». (1 Ιωάννη 5:19) Ο άρχοντας ανταλέ ντουνιάσκο, ο Μπενγκ, ισί γκεραλό ντα σκληρός. Βοβ «χουχαβέλα σαρέ ι ντουνιάς». (Αποκάλυψη 12:9) Μπουτ τζενέ μοιάζενα λέστε. Ντα ανταβά ισί σάντε εκ λόγος σο ο τζενέ βακερένα ψέματα, τθερένα μίσος ντα ισί άγριοι.
8 Ισί γιαβερά-ντα λόγοι σο υπαρχίντιβενα αζόμ μπουτ βάσανα κο ντουνιάς. Όταν ο Αδάμ ντα η Εύα γκιλέ κόντρα ι Ντεβλέσαρ, αβιλέ αμαρτωλοί ντα νακχαντέ ι αμαρτία πουμαρέ τσσαβέντε-ντα. Ντα επειδή ο τζενέ τθερένα ι αμαρτία αντρέ πουμέντε, ανένα προβλήματα ι γιαβερένγκε. Μπουτ φαρ μανγκένα τι αβέν πιο σημαντικοί κατά γιαβερά. Χάνα-πες, τζάνα κο τζένγκια ντα νταραβένα ι γιαβερέν. (Εκκλησιαστής 4:1· 8:9) Μερικές φορές ο τζενέ τθερένα προβλήματα επειδή “μπορεί τι αβέλ λένγκε κάτι σο να μπεσένα”. (Εκκλησιαστής 9:11) Όταν ο τζενέ ισί σε λάθος τθαν κο λάθος σαάτι, μπορεί τι αβέν-πες ατυχήματα ντα γιαβερά μπέτι πράγματα.
9. Σόσκε μπορίνασα τι αβάς σίγουροι ότι ο Ιεχωβά τθερέλα εκ μπουτ σημαντικός λόγος σο μουκχέλα τι συνεχίντιβεν ο βάσανα;
9 Ο Ιεχωβά ποτές να ανέλα ο βάσανα. Να φταίνελα βοβ ι τζενγκίνγκε, ι μουνταριματένγκε ντα ι προβληματένγκε σο ισί κο ντουνιάς. Ο Ντεβέλ να ανέλα καταστροφές, σαρ για παράδειγμας σεισμούς, πλημμύρες ντα ζουρανέ μπαρμπαλιά σο κερένα ζημιές. Αλλά μπορεί τι πουτσές: “Άμα ο Ιεχωβά ισί ο πιο ζουρανό, σόσκε να σταματίνελα ανταλά μπέτι πράγματα;” Τζανάσα ότι ο Ντεβέλ πφαμπόλα μπουτ αμένγκε, άρα πρέπει τι τθερέλα εκ μπουτ σημαντικός λόγος σο μουκχέλα τι συνεχίντιβεν ο βάσανα.—1 Ιωάννη 4:8.
ΣΟΣΚΕ ΜΟΥΚΧΕΛΑ Ο ΝΤΕΒΕΛ Ο ΒΑΣΑΝΑ
10. Σαρ κατηγοριντάς ο Μπενγκ ι Ιεχωβάς;
10 Κο κήπος της Εδέμ, ο Μπενγκ χουχαντάς τον Αδάμ ντα την Εύα. Ο Μπενγκ κατηγοριντάς ι Ντεβλές ότι να κυβερνίνελα λατσσές. Βακερντάς ότι ο Ντεβέλ γκεραβέλας κάτι λατσσό κατά Αδάμ ντα κατά Εύα. Ο Μπενγκ μανγκέλας τι πακιάν ότι βοβ κα κυβερνίνελας πιο λατσσές κατά Ιεχωβά ντα ότι να χρειαζίντιβενας ι Ντεβλές.—Γένεση 3:2-5· ντικχ ι Σημείωση 27 κο παλαϊνέ σελίδες.
11. Καλέ ερωτησιάτε πρέπει τι απαντίνας;
11 Ο Αδάμ ντα η Εύα να ασουντέ ι Ιεχωβάς ντα γκιλέ λέσαρ κόντρα. Σκεφτιντέ ότι τθερένας ο δικαίωμας τι αποφασίνεν βον πουμαρέ νεαυτόσκε σο ισινέ σωστός ντα σο ισινέ λάθος. Σαρ κα μπορίνελας ο Ιεχωβά τι σικαβέλ ότι οντουλά σο γκιλέ λέσαρ κόντρα κερντέ λάθος ντα ότι βοβ τζανέλα καβά ισί ο πιο λατσσό αμένγκε;
12, 13. (α) Σόσκε να καταστραφιντάς αμέσως ο Ιεχωβά οντουλέν σο γκιλέ λέσαρ κόντρα; (β) Σόσκε μουκχλάς ο Ιεχωβά ι Μπενγκές τι αβέλ ο άρχοντας ανταλέ ντουνιάσκο ντα ι τζενέν τι κυβερνίνεν πουμαρό νεαυτός;
12 Ο Ιεχωβά να καταστραφιντάς αμέσως τον Αδάμ ντα την Εύα. Αλλά μουκχλάς-λεν τι κερέν τσσαβέν. Σοράν, ο Ιεχωβά ντινάς κο τσσαβέ του Αδάμ ντα της Εύας ι ευκαιρία τι τραμπίνεν κας κα μανγκένας τι κυβερνίνελ-λεν. Ο σκοπός ι Ιεχωβάσκο ισινέ τι πφερέλ ι πφουβ τέλειε τζενέντζαρ, ντα τελικά οντουβά κα αβέλας-πες, παρόλο σο ο Μπενγκ να μανγκέλας τι αβέλ-πες.—Γένεση 1:28· Ησαΐας 55:10, 11.
13 Ο Μπενγκ κατηγοριντάς ι Ιεχωβάς ανγκλάλ εκατομμύρια αγγελόντε. (Ιώβ 38:7· Δανιήλ 7:10) Οτθάρ, ο Ιεχωβά μουκχλάς χρόνος κο Μπενγκ τι σικαβέλ άμα οντουβά σο βακερντάας ισινέ μπαγιά. Επίσης, μουκχλάς χρόνος κο τζενέ τι κερέν πουμαρέ κυβερνήσεις, σο κι πραγματικότητα κα κερέλας-λεν κουμάντος ο Μπενγκ. Αντικάς, κα σικαβένας άμα κα μπορίνενας τι ντεν-λεν πέρα χωρίς τι τθερέν ι βοήθεια ι Ντεβλέσκι.
14. Σο σικάντιλο καζόμ νακχλέ ο μπρεσά;
14 Για χιλιάδες μπρεσά, ο τζενέ προσπαθιντέ τι κυβερνίνεν πουμαρό νεαυτός, αλλά να μπορισάλε τι καταφερίνεν-λες. Σικάντιλο ότι ο Μπενγκ ισί ψεύτης. Ο τζενέ τθερένα ανάγκη ι βοήθεια ι Ντεβλέσκι. Ο προφήτης Ιερεμίας τθερέλας δίκιος όταν βακερντάς: «Τζανάβα λατσσές, Ιεχωβά, ότι ο τζενό σο ισί κερντό κατά τσικ να τθερέλα ο δικαίωμας τι αποφασίνελ πι ντρομέσκε. Ο τζενό σο πφιρέλα να τθερέλα ο δικαίωμας τι αποφασίνελ κατέ κα τζαλ».—Ιερεμίας 10:23.
ΣΟΣΚΕ ΜΠΕΚΛΕΝΤΙΝΕΛΑΣ ΑΖΟΜ ΜΠΟΥΤ Ο ΙΕΧΩΒΑ;
15, 16. (α) Σόσκε μουκχέλα ο Ιεχωβά τι συνεχίντιβεν ο βάσανα αζόμ μπουτ καιρός; (β) Σόσκε να νασκιαρντάς ο Ιεχωβά ο προβλήματα σο αντάς ο Μπενγκ;
15 Σόσκε μουκχέλα ο Ιεχωβά τι συνεχίντιβεν ο βάσανα αζόμ μπουτ καιρός; Σόσκε να σταματίνελα ο μπέτι πράγματα; Έπρεπε τι νακχέλ χρόνος για τι σικάντιβελ ότι ο Μπενγκ να κυβερνίνελα λατσσές. Ο τζενέ τραμπιντέ διάφορες κυβερνήσεις, αλλά χωρίς τι τθερέν επιτυχία. Παρόλο σο ο επιστήμονες αμαρέ ντιβεσέντε μπορίνενα τι κερέν πιο μπουτ πράγματα, υπαρχίντιβελα πιο μπουτ αδικία, τσοροριπέ, μουνταρίματα ντα τζένγκια από ό,τι πριν. Να μπορίνασα τι κυβερνίνας αμαρό νεαυτός ντα τι τθεράς επιτυχία χωρίς ι βοήθεια ι Ντεβλέσκι.
16 Όμως, ο Ιεχωβά να νασκιαρντάς ο προβλήματα σο αντάς ο Μπενγκ. Άμα κα κερέλας-λες ανταβά, κα σικαβέλας ότι υποστηρίνελα ι κυβέρνηση ι Μπενγκέσκι. Επίσης, ο τζενέ κα πακιάνας ότι μπορίνενα τι κυβερνίνεν πουμαρό νεαυτός ντα τι τθερέν επιτυχία. Αλλά ανταβά ισί ψέμας, ντα ο Ιεχωβά ποτές να κα μανγκέλας τι υποστηρίνελ εκ ασακό ψέμας. Ο Ντεβέλ ποτές να βακερέλα ψέματα.—Εβραίους 6:18.
17, 18. Σο κα κερέλ ο Ιεχωβά για τι διορθώνελ σαρέ ο προβλήματα σο αντάς ο Μπενγκ;
17 Μπορίνελα ο Ιεχωβά τι νασκιαρέλ σαρέ ο προβλήματα σο αντέ ο Μπενγκ ντα ο τζενέ όταν γκιλέ Λέσαρ κόντρα; Βα. Ο Ντεβέλ μπορίνελα τι κερέλ τα πάντα. Ο Ιεχωβά τζανέλα κάνα κα ντιντιόν απαντήσεις σαρέ κο ψέματα σο βακερντάς λέσκε ο Μπενγκ. Αζομάν κα κερέλ ι πφουβ παράδεισος, σαρ ισινέ κι αρχή. Σαρέ οντουλά σο ισί «κο μεζάρια» κα αναστίντιβεν. (Ιωάννης 5:28, 29) Ο τζενέ ποτές να κα νασφάλιβεν ούτε κα μερέν. Ο Ιησούς κα νασκιαρέλ σαρέ ο προβλήματα σο αντάς ο Μπενγκ. Ο Ιεχωβά κα τσσουβέλ ι Ιησούς «τι καταστραφίνελ σαρέ ανταλά μπέτι πράγματα σο κερέλα ο Μπενγκ». (1 Ιωάννη 3:8) Εκτιμίνασα ι υπομονή σο κερντάς αμέντζαρ ο Ιεχωβά για τι μπορίνας τι σικλιάς λέσκε ντα τι αποφασίνας ότι μανγκάσα τι αβέλ βοβ αμαρό Βασιλιάς. (Διάβανε 2 Πέτρου 3:9, 10) Ατζέ-ντα κάνα τθεράσα προβλήματα, βοβ βοηθίνελα-αμέν τι νταϊντίνας.—Ιωάννης 4:23· διάβανε 1 Κορινθίους 10:13.
18 Ο Ιεχωβά να τσσουβέλα-αμέν ζορίσαρ τι τραμπίνας-λες για τι αβέλ αμαρό Βασιλιάς. Ντινάς κο τζενέ εκ μπουτ σουκάρ δώρος—ι ελευθερία τι τραμπίνεν σο κα κερέν πουμαρέ ζωγιάτε. Για τι ντικχάς σο μανγκέλα τι βακερέλ ανταβά αμένγκε.
ΣΑΡ ΚΑ ΧΡΗΣΙΜΟΠΟΙΗΝΕΣ ΤΟΥΙ Ι ΕΛΕΥΘΕΡΙΑ ΣΟ ΤΘΕΡΕΣΑ ΤΙ ΤΡΑΜΠΙΝΕΣ;
19. Καβά ισί εκ μπουτ σουκάρ δώρος σο ντινάς-αμέν ο Ιεχωβά; Σόσκε πρέπει τι εκτιμίνας ανταβά δώρος;
19 Η ελευθερία σο ντινάς-αμέν ο Ιεχωβά τι τραμπίνας σο κα κεράς αμαρέ ζωγιάτε κερέλα-αμέν τι αβάς διαφορετικοί κατά ζώα. Ο ζώα να μπορίνενα τι αγαβέν καβά ισί ο σωστός ντα καβά ισί ο λάθος, αλλά αμέν μπορίνασα τι τραμπίνας σαρ κα τζουβντιάς ντα τι αποφασίνας άμα μανγκάσα τι κεράς ι Ιεχωβάς τι χαιρίνελ. (Παροιμίες 30:24) Επίσης, να ισινάμ σαρ ο μηχανήματα σο ισί κερντέ τι κερέν σάντε συγκεκριμέ πράγματα. Αμέν ισινάμ ελεύθεροι τι αποφασίνας σο τζενέ μανγκάσα τι αβάς, καλέ τζενέν μανγκάσα τι τθεράς αμαλέν ντα σο μανγκάσα τι κεράς αμαρέ ζωγιάτε. Ο Ιεχωβά μανγκέλα τι χαιρίνας ι ζωή.
20, 21. Καγιά ισί η πιο λατσσί επιλογή σο μπορίνεσα τι κερές ακανά;
20 Ο Ιεχωβά μανγκέλα τι μανγκάς-λες. (Ματθαίος 22:37, 38) Βοβ ισί σαρ εκ ντατ σο χαιρίνελα τι ασουνέλ πι τσσαβές τι βακερέλ «μανγκάβα-τουτ» αντράλ πι γκίσταρ, όχι επειδή ισί υποχρεωμέ τι βακερέλ-λες. Ο Ιεχωβά ντινάς-αμέν ι ελευθερία τι τραμπίνας άμα κα υπηρετίνας-λες ή όχι. Ο Μπενγκ, ο Αδάμ ντα η Εύα να μανγκλέ τι ντεν καν ι Ιεχωβάς. Σαρ κα χρησιμοποιήνες τούι ι ελευθερία σο τθερέσα τι τραμπίνες σο κα κερές τι ζωγιάτε;
21 Χρησιμοποίηνε ανταγιά ελευθερία για τι υπηρετίνες ι Ιεχωβάς. Υπαρχίντιβενα εκατομμύρια γιαβερά-ντα τζενέ σο αποφασιντέ τι κερέν ι Ντεβλές τι χαιρίνελ ντα μα τι κερέν οντουλά σο μανγκέλα ο Μπενγκ. (Παροιμίες 27:11) Σο μπορίνεσα τι κερές ακανά για τι αβές οτθέ, κο νεβό ντουνιάς κι Ντεβλέσκο, όταν κα νασκιαρέλ σαρέ ο βάσανα; Ο γιαβέρ κεφάλαιος κα απαντίνελ ανταλέ ερωτησιάτε.