Ο Τζενέ σο Διαβάνενα Πουτσένα

Κάνα ο ψαλμωδός Δαβίδ γραφιντάς κο εδάφιος Ψαλμός 61:8 ότι κα ισαρέλας ι Ντεβλέσκο ναβ «για πάντα», μήπως κερντάς μπαρό λάφι;

Νάα. Ο λάφια σο γραφιντάς ο Δαβίδ ισινέ σωστά.

Ντικχέν σο γραφιντάς ανταλέ ντα γιαβερέ ασακέ εδαφιόντε: «Κα γκιλιαβάβ τι ναβέστε για πάντα, καζόμ κα ατσσικιαράβ μο υποσχέσεις κάθε ντιβές». «Δοξάναβα-τουτ, Ιεχωβά Ντέβλα μου, σαρέ μι γκίσαρ,  . . .  για πάντα». «Κα ευλογίναβ το ναβ για πάντα».​—Ψαλμ. 61:8· 86:​12· 145:1, 2.

Ο Δαβίδ να κερντάς μπαρό λάφι. Να αμντίνελας ότι να κα μερέλας ποτές. Τζανέλας ότι ο Ιεχωβά βακερντάς ότι ο τζενέ κα μερένας ιτιρί κατά αμαρτία, ντα ο Δαβίδ αγαβέλας ότι ισινέ αμαρτωλός. (Γέν. 3:3, 17-19· Ψαλμ. 51:4, 5) Τζανέλας ότι ατζέ-ντα τζενέ σο τθερένας ι ευλογία ι Ντεβλέσκι, σαρ ισινέ ο Αβραάμ, ο Ισαάκ ντα ο Ιακώβ, μουλέας. Ντα ο Δαβίδ τζανέλας ότι βοβ-ντα κα μερέλας. (Ψαλμ. 37:​25· 39:4) Αλλά λέσκε λάφια σο ισί κο Ψαλμός 61:8 σικαβένας καζόμ μπουτ μανγκέλας τι ισαρέλ ι Ντεβλές για πάντα, δηλαδή καζόμ κα τζουβντιόλας.​—2 Σαμ. 7:12.

Ισινέ φαρ σο ο Δαβίδ γραφίνελας οντουλά σο νακχλάας πι ζωγιάτε, σαρ ντικχάσα κο λάφια σο ισί πριν τι αρχίνεν ο Ψαλμοί 18, 51 ντα 52. Κο Ψαλμός 23, ο Δαβίδ βακερντάς ότι ο Ιεχωβά ισί τσομπάνης σο ντέλα οδηγίες, λοκχιπέ ντα αρακχαϊπέ. Ο Δαβίδ ισινέ ασακό τσομπάνης βοβ-ντα. Ντα μανγκέλας τι υπηρετίνελ ι Ντεβλές “σαρέ ο ντιβεσά πι ζωγιάκε”.​—Ψαλμ. 23:6.

Μα μπιστρέν ατζέκ ότι ο Ιεχωβά ντινάς πο πνεύμας κο Δαβίδ για τι γραφίνελ. Αντρέ οντουλέντε σο γραφιντάς, ισινέ προφητείες-ντα οντουλένγκε σο κα αβένας-πες μπουτ πο σοράν. Για παράδειγμας, κο Ψαλμός 110, ο Δαβίδ κερντάς λάφι εκχέ βακιτίσκε σο λέσκο Κύριος κα “μπεσέλας κο δεξιά [κι Ντεβλέσκε]” κο ουρανός ντα κα λέλας μπαρί εξουσία. Σόσκε; Για τι κερέλ κουμάντος ι Ντεβλέσκε ντουσμανίν ντα για τι κρίνελ ι τθεμέν κι πφουβ. Ο Δαβίδ ισινέ εκ τζενό σο λέσταρ κα αστάρντιβελας ο Μεσσίας, οντουβά σο κα κυβερνίνελας κατά ουρανός ντα κα αβέλας «ιερέας για πάντα». (Ψαλμ. 110:​1-6) Ο Ιησούς βακερντάς ότι η προφητεία κο Ψαλμός 110 τθερέλας τι κερέλ λέσαρ ντα κα νικιόλας μπαγιά κο μέλλον.​—Ματθ. 22:​41-45.

Βα, ο Δαβίδ ι Ντεβλέσκε πνευμάσαρ γραφιντάς εμ πιρέ βακιτίσκε εμ εκχέ βακιτίσκε σο κα αβέλας, αζομάν σο κα τζουβντιόλας πάλι ντα κα ισαρέλας ι Ιεχωβάς για πάντα. Οτθάρ, ισί λογικός τι αγαβάς ότι ο εδάφια Ψαλμός 37:​10, 11, 29 σικαβένα σαρ ισινέ ο πράγματα εμ κο πουρανό Ισραήλ εμ σαρ κα αβέν κο μέλλον σαρό κο ντουνιάς, κάνα ο Ντεβέλ κα κερέλ τι νικιόν μπαγιά λέσκε λάφια.​—Ντικχέν ι παράγραφος 8 κο μάθημας «Κα Αβές Μάντζαρ κο Παράδεισος» ανταλέ περιοδικόστε.

Ο εδάφιος Ψαλμός 61:8 ντα γιαβερά ασακέ εδάφια σικαβένα ότι ο Δαβίδ μανγκέλας τι δοξάνελ ι Ιεχωβάς κο πουρανό Ισραήλ μέχρι τι μερέλας. Ατζέ, σικαβένα σο κα μπορίνελ τι κερέλ ο Δαβίδ κο μέλλον κάνα ο Ιεχωβά κα ανέλ-λες πάλι κι ζωή.