Σο Σικλιάσα Κατά Τελευταία Λάφια σο Βακερντάς ο Ιακώβ πι Γιαβερέ Οχτώ Τσσαβέντε

1. Καλά κατά τελευταία λάφια σο βακερντάς ο Ιακώβ πριν τι μερέλ κα ντικχάς κο μάθημας ανταβά;

Ο ΤΣΣΑΒΕ του Ιακώβ γκιντισάλε ντονταλάι λέσταρ, για τι ασουνέν προσεκτικά ο ευλογίες σο τθερέλας τι βακερέλ λένγκο ντατ κο κάθε εκ λένταρ. Κο γιαβέρ μάθημας, σικλιλάμ ότι ο Ιακώβ βακερντάς κο Ρουβήν, κο Συμεών, κο Λευί ντα κο Ιούδας πράγματα σο να μπεκλεντίνενας τι ασουνέν-λεν. Άρα, μπορεί τι μανγκένας τι ασουνέν σο κα βακερέλας πι γιαβερέ οχτώ τσσαβέντε. Ελάν τι ντικχάς σο μπορίνασα τι σικλιάς οντουλένταρ σο βακερντάς κο Ζαβουλών, κο Ισσάχαρ, κο Δαν, κο Γαδ, κο Ασήρ, κο Νεφθαλί, κο Ιωσήφ ντα κο Βενιαμίν.a

ΖΑΒΟΥΛΩΝ

2. Σο βακερντάς ο Ιακώβ κο Ζαβουλών ντα σαρ ανταλά λάφια νικίστιλε μπαγιά; (Γένεση 49:13) (Ντικχέν ο πλαίσιος-ντα)

² Διαβάνεν Γένεση 49:13. Ο Ιακώβ βακερντάς ότι η φάρα του Ζαβουλών κα τζουβντιόλας πασέ κι ντεριάβ. Λένγκε τθανά κα αβένας οπρέ οπρέ κο Υποσχεμέ Τθεμ. Αφού νακχλέ πο μπουτ από 200 μπρεσά, η φάρα του Ζαβουλών λιντάς πο τθανά. Τθερέλας εκχέ μπαντάταρ ι Θάλασσα της Γαλιλαίας ντα κατά γιαβέρ μπάντα ι Μεσόγειος Θάλασσα. Ο Μωυσής βακερντάας ακαγιά προφητεία: «Τι χαιρίνες, Ζαβουλών, κάνα νικιόσα». (Δευτ. 33:18) Ανταβά μπορεί τι βακέρντιλο επειδή η φάρα του Ζαβουλών ισινέας κο μασκάρ κατά ντούι ντεριαβά ντα κα αβέλας πο εύκολος λάκε τι μπικινέλ ντα τι κινέλ κατά τζενέ σο ισινέ γιαβερέ τθεμένταρ. Σαρ-ντα τι αβένας ο πράγματα, η φάρα του Ζαβουλών τθερέλας λόγους για τι αβέλ χαρούμενη.

3. Σο κα βοηθίνελ-αμέν τι αβάς χαρούμενοι οντουλέντζαρ σο τθεράσα;

³ Σο σικλιάσα; Κατέ-ντα τι τζουβντιάσα ή σαρ-ντα τι αβέν ο πράγματα αμαρέ ζωγιάτε, τθεράσα πάντα λόγους τι χαιρίνας. Κα ατσσάς χαρούμενοι άμα ντάσα-αμέν γκοντί ο λατσσέ πράγματα σο τθεράσα. (Ψαλμ. 16:6· 24:5) Μπάζιμα ισί πο εύκολος τι ντας προσοχή κο πράγματα σο να τθεράσα παρά κο λατσσέ πράγματα σο απολαμβάνασα. Άρα μαρέν-τουμέν για τι ντεν-τουμέν γκοντί ο λατσσέ πράγματα σο τθερένα ντα απολαμβάνενα κι ζωή.​—Γαλ. 6:4.

ΙΣΣΑΧΑΡ

4. Σο βακερντάς ο Ιακώβ κο Ισσάχαρ ντα σαρ νικίστιλε ανταλά λάφια μπαγιά; (Γένεση 49:14, 15) (Ντικχέν ο πλαίσιος-ντα)

⁴ Διαβάνεν Γένεση 49:14, 15. Ο Ιακώβ ισαρντάς τον Ισσάχαρ ι πφαρέ μπουτιάκε σο κερέλας. Βακερντάς ότι ο Ισσάχαρ ισινέ αζόμ ζουρανό σαρ εκ ζώος σο ακχαρέλας πφαρέ φορτία. Ο Ιακώβ επίσης βακερντάς ότι ο Ισσάχαρ κα τθερέλας εκ τθαν σο κα ντέλας-λες χαρά. Ο λάφια σο βακερντάς ο Ιακώβ νικίστιλε μπαγιά επειδή η φάρα του Ισσάχαρ λιντάς εκ τθαν πασέ κι λεν Ιορδάνης σο νικαβέλας μπουτ καρπούς. (Ιησ. Ναυή 19:22) Σίγουρα μαρντάς-πες για τι καλλιεργίνελ πο τθαν, αλλά μαρντάς-πες επίσης για τι βοηθίνελ ι γιαβερέν. (1 Βασ. 4:7, 17) Για παράδειγμας, κάνα ο κριτής Βαράκ ντα η προφήτισσα Δεββώρα μανγκλέ κατά Ισραηλίτες τι βοηθίνεν-λεν τι πολεμίνεν τον Σισάρα, η φάρα του Ισσάχαρ ισινέ εκ κατά φάρες σο βοηθιντέ. Ντα ισινέ έτοιμοι γιαβερά-ντα φορές τι πολεμίνεν.​—Κριτ. 5:15.

5. Σόσκε πρέπει τι μαράς-αμέν κι υπηρεσία κι Ιεχωβάσκι;

⁵ Σο σικλιάσα; Ο Ιεχωβά εκτιμίνελας ι φάρα του Ισσάχαρ σο μαρέλας-πες μπουτ. Αντικάς εκτιμίνελα αμέν-ντα σο μαράσα-αμέν κι υπηρεσία λέσκι. (Εκκλ. 2:24) Σκεφτίνεν για παράδειγμας ι πφραλέν σο μαρένα-πες μπουτ ι κχανγκιριάκε. (1 Τιμ. 3:1) Ανταλά πφραλά να τζάνα σε κανονικός τζένγκι,b αλλά μαρένα-πες για τι αρακχαβέν ι πφραλέν ντα ι πφενίν πραγματένταρ σο κα μπορίνενας τι κερέν ζιάνι κι φιλία σο τθερένα ι Ιεχωβάσαρ. (1 Κορ. 5:1, 5· Ιούδα 17-23) Επίσης μαρένα-πες για τι ετοιμάνεν ντα τι κερέν ομιλίες σο κα ντεν ζορ κι κχανγκιρί.​—1 Τιμ. 5:17.

ΔΑΝ

6. Καβά διορισμός λιντάς η φυλή του Δαν; (Γένεση 49:17, 18) (Ντικχέν ο πλαίσιος-ντα)

⁶ Διαβάνεν Γένεση 49:17, 18. Ο Ιακώβ βακερντάς ότι ο Δαν ισινέ σαρ εκ σαπ σο κερέλας επίθεση πο μπαρέ ζωόντε, σαρ για παράδειγμας εκχέ γκραστέστε σο χρησιμοποιήντιβελας κο τζένγκι. Ο Δαν κα αβέλας επικίνδυνος για το ντουσμάνια ι Ισραηλίσκε. Καζόμ ο λαός τζάλας κο Υποσχεμέ Τθεμ, η φυλή του Δαν “λέλας πι θέση παλάλ κατά λαός για τι αρακχαβέλ-λεν”. (Αριθ. 10:25) Ανταβά διορισμός ισινέ σημαντικός, παρόλο σο ο λαός ναστί ντικχέλας σαρέ οντουλά σο κερέλας η φυλή του Δαν σο πφιρέλας παλά-λένταρ.

7. Σαρ πρέπει τι νιωθίνας για το διορισμοί σο λάσα κι υπηρεσία κι Ιεχωβάσκι;

⁷ Σο σικλιάσα; Νιωσάλεν ποτές ότι κερντέν εκ διορισμός ντα καέκ να προσοχιντάς οντουβά σο κερντέν; Μπορεί τι βοηθιντέν τι καθαρίντιβελ ή τι λατσσάρντιβελ η Αίθουσα Βασιλείας, τι κερντέν κάποια μπουτιά κι συνέλευση, ή τι βοηθιντέν εκχέ γιαβερέ τροπόσαρ. Άμα κερντέν κάτι ανταλένταρ, αξίνενα ισαριπέ! Πάντα τι ντεν-τουμέν γκοντί ότι ο Ιεχωβά ντικχέλα ντα εκτιμίνελα σο-ντα κερένα λέσκε. Αβέλα μπουτ λέσκο γκι κάνα υπηρετίνενα-λες, όχι επειδή μανγκένα τι ισαρέν-τουμέν ο γιαβερά, αλλά επειδή μανγκένα τι σικαβέν τουμαρί μπαρί αγάπη λέσκε.​—Ματθ. 6:1-4.

ΓΑΔ

8. Σόσκε ισινέ εύκολος ι ντουσμανίνγκε τι κερέν επίθεση κι φάρα του Γαδ; (Γένεση 49:19) (Ντικχέν ο πλαίσιος-ντα)

⁸ Διαβάνεν Γένεση 49:19. Ο Ιακώβ βακερντάας ότι εκ ομάδα τσορένγκι κα κερέλας επίθεση κο Γαδ. Αφού νακχλέ πο μπουτ από 200 μπρεσά, η φάρα του Γαδ λιντάς εκ τθαν οτθέ σο ισινέ η λεν Ιορδάνης. Ντονταλάι οντουλέ τθανέσταρ ισινέ λένγκε ντουσμάνια. Οτθάρ, ισινέ εύκολος τι κερένας λένγκε επίθεση. Επίσης η φάρα του Γαδ μανγκέλας τι μπεσέλ οτθέ επειδή μπορίνενας τι αρακχέν πο εύκολα χαμπέ πουμαρέ ζωόνγκε. (Αριθ. 32:1, 5) Σίγουρα οντουλά τζενέ ισινέ μπουτ μπίνταρανε. Εκτός ανταλέσταρ, ντένας μπέσα ότι ο Ιεχωβά κα βοηθίνελας-λεν τι νικίνεν καλέ-ντα ντουσμανίν κα αβένας για τι λένας ο τθαν σο ντινάας-λεν ο Ντεβέλ. Για μπουτ μπρεσά, μπουτσσαβένας επίσης πουμαρέ στρατιωτέν κατά γιαβέρ μπάντα του Ιορδάνη για τι βοηθίνεν ο γιαβερά φάρες τι λεν γιαβερά-ντα τθανά σο ισινέ αντρέ κο Υποσχεμέ Τθεμ. (Αριθ. 32:16-19) Ντένας μπέσα ότι ο Ιεχωβά κα αρακχαβέλας λένγκε ρομνίν ντα λένγκε τσσαβέν καζόμ ο μουρσά ισινέ ντουρ. Ο Ιεχωβά ευλογιντάς-λεν για το θάρρος λένγκο ντα για τη βοήθεια σο ντινέ κο γιαβερά παρόλο σο να ισινέ εύκολος.​—Ιησ. Ναυή 22:1-4.

9. Σο αποφάσεις κα λας άμα ντάσα μπέσα κο Ιεχωβά;

⁹ Σο σικλιάσα; Για τι υπηρετίνας ι Ιεχωβάς ατζέ-ντα κάνα τθεράσα δυσκολίες, πρέπει τι συνεχίνας τι ντας μπέσα λέστε. (Ψαλμ. 37:3) Παρόλο σο νανέ πάντα εύκολος, μπουτ τζενέ αντιβές κερένα θυσίες για τι βοηθίνεν κι οικοδόμηση, τι κερέν έργος οτθέ σο η ανάγκη ισί πο μπαρί ή τι βοηθίνεν ι Ιεχωβάσκι οργάνωση γιαβερέ τροπόντζαρ. Κερένα-λες ανταβά επειδή ισί σίγουροι ότι ο Ιεχωβά πάντα κα φροντίνελ-λεν.​—Ψαλμ. 23:1.

ΑΣΗΡ

10. Σο να κερντάς η φάρα του Ασήρ; (Γένεση 49:20) (Ντικχέν ο πλαίσιος-ντα)

¹⁰ Διαβάνεν Γένεση 49:20. Ο Ιακώβ βακερντάας ότι η φάρα του Ασήρ κα αβέλας χουλανί ντα ακριβώς ανταβά αβιλό-πες. Η φάρα του Ασήρ λιντάς κάποια τθανά κο Ισραήλ σο νικαβένας μπουτ καρπούς. (Δευτ. 33:24) Λένγκε τθανά ισινέ πασέ κι Μεσόγειος Θάλασσα ντα τθερένας αντρέ ο λιμάνι της Σιδώνας σο οτθέ ισινέ μπουτ χουλανιπέ. Όμως η φάρα του Ασήρ να νασκιαρντάς ι Χαναναιόν οντουτθάρ. (Κριτ. 1:31, 32) Ο χουλανιπέ σο τθερένας αλλά εμ ο Χαναναίοι σο ατσσιλέ μάλλον κερντέ ι φάρα του Ασήρ μα τι πφαμπόλ αζόμ μπουτ για την πάκι λατρεία. Για παράδειγμας, κάνα ο κριτής Βαράκ μανγκλάς κατά Ισραηλίτες τι βοηθίνεν για τι πολεμίνεν ο στρατός ι Χαναναιόνγκο, η φάρα του Ασήρ να βοηθιντάς-λες. Οτθάρ, να ντικχλέ ο μπουτ σουκάρ πράγματα σο κερντάς ο Ιεχωβά για τι βοηθίνελ ι Ισραηλιτέν τι νικίνεν «πασέ κο πανιά σο ισί κι Μεγιδδώ». (Κριτ. 5:19-21) Η φάρα του Ασήρ μάλλον λατζασάλι κάνα ασουντάς τον Βαράκ ντα τη Δεββώρα τι γκιλιαβέν: «Ο Ασήρ μπεσλό πφαντέ βαστέντζαρ πασέ κι ντεριάβ».​—Κριτ. 5:17.

11. Σόσκε δεν πρέπει τι αβέν ο λοβέ ο πο σημαντικός πράγμας αμαρέ ζωγιάτε;

¹¹ Σο σικλιάσα; Μανγκάσα τι ντας κο Ιεχωβά ο πο λατσσό σο μπορίνασα. Για τι κεράς-λες ανταβά, χρειαζίντιβελα τι προσοχίνας μα τι αβάς σαρ ο τζενέ κο ντουνιάς ντα τι πακιάς ότι ο λοβέ ντα ο πράγματα σο τθεράσα ισί ο πο σημαντικά. (Παρ. 18:11) Παρόλο σο χρειαζίντιβασα ο λοβέ, να πακιάσα ότι ισί πο σημαντικός τι τθεράς μπουτ λοβέ παρά τι υπηρετίνας ι Ιεχωβάς. (Εκκλ. 7:12· Εβρ. 13:5) Να χασαράσα αμαρό σαάτι ντα αμαρί ζορ για τι μπορίνας τι τθεράς πράγματα σο να χρειαζίντιβασα-λεν μπαγιά. Οκιά μπάνταρ, μαράσα-αμέν για τι ντας κο Ιεχωβά ο πο λατσσό αμαρέ σαατίσταρ ντα αμαρέ ζοριάταρ ακανά ντα τζανάσα ότι ο Ιεχωβά κα ευλογίνελ-αμέν ντα κα ντελ-αμέν εκ μπουτ σουκάρ ζωή κο μέλλον.​—Ψαλμ. 4:8.

ΝΕΦΘΑΛΙ

12. Σαρ νικίστιλε μπαγιά ο λάφια σο βακερντάς ο Ιακώβ για τον Νεφθαλί; (Γένεση 49:21) (Ντικχέν ο πλαίσιος-ντα)

¹² Διαβάνεν Γένεση 49:21. Ο Ιακώβ βακερντάς ότι ο Νεφθαλί κα βακερέλας «γκουλντέ λάφια». Ανταβά μάλλον μανγκέλας τι σικαβέλ ο τρόπος σο κερέλας λάφι ο Ιησούς κάνα κερέλας έργος. Ο Ιησούς, μπεσέλας μπουτ φαρ κι Καπερναούμ σο οτθέ ισινέ η φάρα του Νεφθαλί. Άκ’ σόσκε βακέρντιβελας ότι η Καπερναούμ ισινέ “η πόλη σο τζουβντιόλας” βοβ. (Ματθ. 4:13· 9:1· Ιωάν. 7:46) Ο Ησαΐας βακερντάας ότι ο Ιησούς κα αβέλας σαρ εκ «μπαρό φως» σο κα ντικχένας ο φάρες Ζαβουλών ντα Νεφθαλί. (Ησ. 9:1, 2) Επειδή ο Ιησούς σικλιαρέλας ι τζενέν ισινέ «o αληθινός φως, σο λέλα-πες οπράλ σαβέ τι μανγκές τζενέντε».​—Ιωάν. 1:9.

13. Σαρ κα αβάς σίγουροι ότι αμαρέ λάφια κερένα ι Ιεχωβάσκο γκι;

¹³ Σο σικλιάσα; Ι Ιεχωβάσκε τθερέλα σημασία σο βακεράσα ντα σαρ βακεράσα-λες. Σαρ μπορίνασα τι βακεράς «γκουλντέ λάφια» σο κερένα ι Ιεχωβάσκο γκι; Πρώτα, κάνα βακεράσα ι αλήθεια. (Ψαλμ. 15:1, 2) Σοράν, κάνα βακεράσα λάφια σο ντένα ζορ κο γιαβερά σαρ για παράδειγμας κάνα ισαράσα-λεν ι λατσσέ πραγματένγκε σο κερένα ντα να κεράσα λάφι για το λάθη σο κερένα ο γιαβερά τζενέ ούτε γκρινιάνασα. (Εφεσ. 4:29) Επίσης μπορίνασα τι τσσουβάς στόχος τι πουτράς συζητήσεις για τι ντας μαρτυρία ντα καζόμ τζάλα τι αβάς πο λατσσέ ανταλέστε.

ΙΩΣΗΦ

14. Σαρ νικίστιλι μπαγιά η προφητεία σο βακερντάας ο Ιακώβ ι Ιωσηφίσκε; (Γένεση 49:22, 26) (Ντικχέν ο πλαίσιος-ντα)

¹⁴ Διαβάνεν Γένεση 49:22, 26. Ο Ιακώβ σίγουρα καμαρώνελας μπουτ πι τσσαβές τον Ιωσήφ. Ο Ιεχωβά “ξεχωριντάας-λες λέσκε πφραλένταρ” ντα χρησιμοποιηντάας-λες εκχέ μπουτ σουκάρ τροπόσαρ. Ο Ιακώβ βακερντάς ότι ισινέ εκ «κλαδίς δεντρόσκο σο νικαβέλα καρπός». Ο Ιακώβ ισινέ ο δέντρος ντα λέσκο τσσαβό ο Ιωσήφ ισινέ σαρ εκ κλαδίς οντουλέ δεντρόσταρ. Ο Ιωσήφ ισινέ ο πρώτος τσσαβό σο κερντάας ο Ιακώβ πι αγαπημέ ρομνιάσαρ με τη Ραχήλ. Ο Ιακώβ βακερντάας ότι ο Ιωσήφ κα λέλας ι κληρονομιά σο ισινέ τι λέλας λέσκο πρώτος τσσαβό ο Ρουβήν σο κερντάας-λες με τη Λεία. (Γέν. 48:5, 6· 1 Χρον. 5:1, 2) Ανταβά μέρος κατά προφητεία νικίστιλο μπαγιά κάνα ο ντούι τσσαβέ ι Ιωσηφίσκε, ο Εφραΐμ ντα ο Μανασσής, αβιλέ ντούι ξεχωριστές φάρες κο Ισραήλ ντα η κάθε εκ λιντάς πιρί κληρονομιά.​—Γέν. 49:25· Ιησ. Ναυή 14:4.

15. Σο κερντάς ο Ιωσήφ κάνα αδικιντέ λες;

¹⁵ Ο Ιακώβ βακερντάας επίσης ότι κάποια τζενέ κα “τσσίντενας με τόξος οπράλ κο [Ιωσήφ] ντα κα μισίνενας-λες”. (Γέν. 49:23) Οντουλά τζενέ ισινέ λέσκε πφραλά σο κάποτε τθερένας λέσκε χολί ντα φταίνενας για μπουτ κατά αδικίες σο νακχλόας ο Ιωσήφ. Όμως, ο Ιωσήφ να τθερέλας κερκιπέ πι πφραλένγκε ή ι Ιεχωβάσκε. Σαρ βακερντάς ο Ιακώβ: «[Ι Ιωσηφίσκο] τόξος ατσσιλό πι θεσιάτε ντα λέσκε βαστά ατσσιλέ ζουρανέ ντα να ισινέ σουκέ». (Γέν. 49:24) Ο Ιωσήφ ντέλας μπέσα κο Ιεχωβά καζόμ νακχέλας δοκιμασίες. Όχι σάντε συγχωριντάς πι πφραλέν αλλά σικαντάς λένγκε λατσσιπέ-ντα. (Γέν. 47:11, 12) Ο Ιωσήφ μουκχλάς ο δοκιμασίες σο νακχλό τι κερέν-λες πο λατσσό τζενό. (Ψαλμ. 105:17-19) Αντικάς, ο Ιεχωβά μπορίνελας τι χρησιμοποιήνελ-λες για τι κερέλ μπουτ σημαντικά πράγματα.

16. Κάνα νακχάσα δοκιμασίες, σαρ μπορίνελα τι βοηθίνελ-αμέν ο παράδειγμας ι Ιωσηφίσκο;

¹⁶ Σο σικλιάσα; Να μανγκάσα ποτές τι μουκχάς ο δοκιμασίες τι λεν-αμέν ντουρ κατά Ιεχωβά ή αμαρέ πφραλένταρ ντα πφενίνταρ. Ντεν-τουμέν γκοντί ότι ο Ιεχωβά μπορίνελα τι σικλιαρέλ-αμέν κάνα συνεχίνασα τι υπηρετίνας-λες κο δυσκολίες. (Εβρ. 12:7) Μπορίνελα τι σικλιαρέλ-αμέν τι τζιτζίνας πο μπουτ ι γιαβερένγκε ντα τι συγχωρίνας-λεν ατζέ πο μπουτ σαρ κερέλα βοβ-ντα. (Εβρ. 12:11) Ο Ιεχωβά κα ευλογίνελ-αμέν για την υπομονή σο κεράσα σαρ ευλογιντάς τον Ιωσήφ-ντα.

ΒΕΝΙΑΜΙΝ

17. Σαρ νικίστιλι μπαγιά η προφητεία για τη φάρα του Βενιαμίν; (Γένεση 49:27) (Ντικχέν ο πλαίσιος-ντα)

¹⁷ Διαβάνεν Γένεση 49:27. Ο Ιακώβ βακερντάας ότι ο Βενιαμινίτες κα αβένας σαρ λύκος ντα κα αβένας λατσσέ πολεμιστές. (Κριτ. 20:15, 16· 1 Χρον. 12:2) Ο πρώτος βασιλιάς του Ισραήλ, ο Σαούλ, ισινέ κατά φάρα του Βενιαμίν. Ντα ο Σαούλ πολεμιντάς μπίνταρανες ι Φιλισταιόν. (1 Σαμ. 9:15-17, 21) Μπουτ μπρεσά πο σοράν η βασίλισσα Εσθήρ ντα ο Μαροδοχαίος, σο ισινέ κατά φάρα του Βενιαμίν, σωντέ ι Ισραηλιτέν.​—Εσθήρ 2:5-7· 8:3· 10:3.

18. Σαρ μπορίνασα τι σικαβάς ι ίδια αφοσίωση σαρ η φάρα του Βενιαμίν;

¹⁸ Σο σικλιάσα; Ο Βενιαμινίτες σίγουρα ισινέ μπουτ χαρούμενοι κάνα ο Σαούλ σο ισινέ λένγκε φαράταρ αβιλό βασιλιάς. Όμως, πο σοράν ο Ιεχωβά κερντάς ι Δαβιδίς βασιλιάς, σο ισινέ κατά φάρα του Ιούδα. Τελικά, αζομάν-ντα ο Βενιαμινίτες υποστηριντέ ι Δαβιδίς. (2 Σαμ. 3:17-19) Μπουτ μπρεσά πο σοράν, κάνα ο ντες φάρες γκιλέ κόντρα κι φάρα του Ιούδα, η φάρα του Βενιαμίν ατσσιλί αφοσιωμέ κι φάρα του Ιούδα ντα κο βασιλιάς σο ισινέ κατά φαμιλί ι Δαβιδίσκι. (1 Βασ. 11:31, 32· 12:19, 21) Σαρ η φάρα του Βενιαμίν, αμέν-ντα μπορίνασα τι ατσσάς αφοσιωμέ κο Ντεβέλ κάνα ατσσάσα αφοσιωμέ οντουλέντε σο τραμπιντάς ο Ιεχωβά για τι οδηγίνεν λέσκε λαός αντιβές.​—1 Θεσ. 5:12.

19. Σαρ μπορίνασα τι βοηθίντιβας κατά προφητεία σο βακερντάς ο Ιακώβ πριν τι μερέλ;

¹⁹ Η προφητεία σο βακερντάς ο Ιακώβ πριν τι μερέλ μπορίνελα τι βοηθίνελ-αμέν. Οντουλά σο σικλιάσα κατά προφητεία του Ιακώβ ντα κατά τρόπος σο νικίστιλι μπαγιά, κερένα-αμέν σίγουρους ότι κα νικιόν μπαγιά γιαβερά-ντα προφητείες σο βακερντάς ο Ιεχωβά πι Λαφίστε. Επίσης μπορίνασα τι αγαβάς πο λατσσές σαρ τι κεράς ι Ιεχωβάσκο γκι.