Hoske te kress o Biblakro Kurso dureda?

1. Hoske hi tuke kowa mishto, te kreh dureda?

Krajas kowa, hoi tu haiwal, tiro gamlepen ap i Jehoweste sorleda? Ko gamlepen well bareda, te kreh kanne dureda (1. Petro 2:2). Tiro patsepen atchella, tu te dikeh dureda an i bibla. Jaake nai weh i fededa maal o Dewlestar. — Dikh pala an Johanni 17:3; Juda 21.

Te well tiro gosewepen pral i Dewleste bareda, well tiro patsepen sorleda. Tu te patseh, dikell o Dewel latches ap tute (Hebrearja 11:1, 6). O patsepen krell, (1) gai khaitell tut tiro phuro djipen un (2) gai mukeh o tchilatcho drom pal tute. Jaake well tuke i fededa djipen. — Dikh pala an Bitchepangre 3:19.

2. Ha nai well i wawarenge kowa mishto, hoi tu pral i Dewleste djineh?

Pash ko bud djunglo kooma hoi della, sanell hakeneskro dji, te hunell jek i latcho lab. Brindjereh tu jekes, gai khamals i latcho lab te hunell? Tu te kreh dureda, nai haiweh tu, ha te sikeress dran i bibla tiro patsepen ap i Jehoweste un i latche laba. — Dikh pala an Mateo 28:19, 20.

Bud rakerenn glanstunes i familjaha un pengre maalentsa pral i latche laba. Ko hunte krass mer an latchepen un gamlepen. Kek khamell hunell, gai leskro patsepen i chocheno patsepen hi. Fededa hi, te ginah mer lenge dre, hoi o Dewel menge hallauter khamell te krell. Ma biste: Ninna te khamenn le tchi te hunell, nai dikenn le ap tiro djipen, hoi tu patseh. — Dikh pala an 2. Timoteo 2:24, 25.

3. Hoi nai weh tu i Jehowestar?

Te kreh tu kanne dureda, well tiro patsepen bareda. Jaake nai weh tu i tchatcho maal i Jehowestar. Ninna lell o Dewel tut an peskri familja pre. — Dikh pala an 2. Korintarja 6:18.

4. Ha nashte weh tu an tiro patsepen bareda?

Te kreh tu o Biblakro Kurso dureda, nai weh tu an tiro patsepen bareda (Hebrearja 5:13, 14). Putch jek i Jehoweskre Rakepangrendar, te dikell lo tuha ketene an ko libro Hoi sikerell i bibla menge? Te dikeh budeda an i bibla, well tiro djipen fededa. — Dikh pala an Josua 1:8; Jakobo 1:25.

I latche laba wenna i Jehowestar, job hi o bachtelo Dewel. Tu nai weh ninna i maal lestar, te weh tu i maal leskri familjatar (Hebrearja 10:24, 25). Te khameh tu kowa dureda te krell, hoi o Dewel tutar khamella, tapereh tu o tchatcho djipen – o djipen hake tsireske. Tchatchepaha, o fedestar, hoi nai kreh, hi: Tu te weh i maal o Dewlestar. — Dikh pala an 1. Timoteo 1:11; 6:19.