Hawo latcho lab dell i muhlenge?

1. Hoi hi o latcho lab i muhlenge?

Ha o Jesus an Betani wajas, ko foro his pash Jerusalem, his leskro maal, o Lazaro, star diwesa muhlo. O Jesus djas pash o muhlengro kher. Leha ketene djan i Martha un i Maria, i pehnja ko muhlo morshestar. Glan o muhlengro kher his ninna bud wawar manusha. Nashte dikeh tu glan tute, ha wan i Martha un i Maria dineles i bachtjatar, ha djangeras o Jesus i Lazares pre? — Dikh pala an Johanni 11:21-23, 38-44.

I Martha brindjeras o latcho lab i muhlenge, gai djangerell o Jehowah i muhlen pre, te djiwenn le pale ap i phub. — Dikh pala an Johanni 11:24.

2. Hoi haiwenn i muhle?

O Adam was i Dewlestar gerdo, dran tchik i phubjatar (1. Mose 2:7; 3:19). O Dewel phurderas peskro duchoa an leste, jaake las o Adam o djipen – job las kek djido ducho. An mende della kek djido ducho, hoi an maro mass, hoi an maro ratt djiwella. Jaake haiwah mer: Te merell jek, djiwell tchi mendar dureda. Maro shero haiwell un djinell ninna buda tchi. Doleske nai penas o Lazaro ninna tchi pral ko tsiro, gai job muhlo his. I muhle haiwenna buda tchi. — Dikh pala an Gilja 6:5, 6.

Khamell o Dewel, gai chatchah mer pal o merepen an i jaag? An i bibla hi tardo, gai haiwenn i muhle buda tchi. Jaake haiwah mer: Hoi wawar kangja penenna, gai chatchell jek pal o merepen an i jaag, wella gar dran i bibla. Mer dikah, gai hi kowa gar o tchatchepen. Te penell jek kowa, dell lo ninna o Dewleskro lab buchoste. Hoske? An i bibla hi tardo, gai i Dewles sawo kooma an kek tsiro an o dji wajas. — Dikh pala an Jeremijah 7:31.

Kate hatseh ninna o Video Hoi hi, te merell jek?

3. Nashte rakerenn i muhle mentsa?

Nashte rakerenn i muhle mentsa? Naa. I muhle haiwenna gar te rakerell un te hunell (Gilja 30:9, 10). Denna tchilatche bollepangre, gai rakerenn mentsa. Jon denn pen wri, ha te wans le jek mare muhlendar (2. Petro 2:4). O Jehowah das men traad, te ma mangass tchimoni i muhlendar! An leskre jakka hi kowa “bengeskro koowa”. — Dikh pala an Debleskro tsiro 21:8.

4. Koon lell o djipen papale?

Bud millione, gai muhlo hi, djangerell o Dewel pre, te lenn jon o djipen ap i phub papale. Koi mashkral hi sawe, gai brindjeran les gar. Ninna wenn sawe pre djangedo, gai tchilatcho koowa kran. — Dikh pala an Gilja 37:9; Bitchepangre 24:15.

Kola, gai djangeran pre, well o tchatchepen pral i Dewles sikedo. Jon nai tsikerenn pengro patsepen ap i Jeseste, te shunenn le ap leste (Debleskro tsiro 20:11-13). Te krenn le kowa, hoi latcho hi, nai djiwenn le hake tsireske ap i phub. — Dikh pala an Johanni 5:28, 29.

5. Hoi tsikerell menge kowa hallauter pral i Jehoweste?

O Dewel bitcheras i Jeses, te merell lo menge. Job gerdas ko drom, te nai djiwenn mare muhle pale. Jaake kras lo, an i tsiro, gai hams kowa gar moldo, i baro latchepen ap mende. Mer haiwah, gai gamell o Jehowah men. Te lenn i muhle o djipen papale, koones khamals tu o djiestar an i mussi te lell? — Dikh pala an Johanni 3:16; Remarja 6:23.