LEKTIONA 29
Hoi well pal o merepen?
Nashral tu ninna jekes an o merepen, koles tu o djiestar kamal? An koi bari duk putchenn pen bud: ‘Hoi well pal o merepen? Nai dikau me mire kamle mulen pale?’ Hawe latcha laba i bibla menge pral kowa penella, hatsah an kaja un an koi lektiona, hoi wella.
1. Hoi well pal o merepen?
O Jesus penas, o merepen hi jaake, har te sowell jek. Te sowell jek, djinell un haiwell lo tchi trul peste. An hawo koowa hi o merepen jaake har o sopen? Te meras jek, hi les buder kek duka. I bibla penell menge, “i mule djinenn buder tchi” (Dikenn pal an Sikepaskro 9:5).
2. Har nai well mange kowa mishto, te djinau o tchatchepen pral o merepen?
Buden hi traash glan o merepen — jon trashenn ninna glan i mulende. Te djal tuke ninna jaake: Hoi i bibla pral kowa penella, krell tiro dji pokones. O Jesus penas: “O tchatchepen krella, te han buder gar pandlo” (Johanni 8:32). Kowa, hoi i bibla pral o djipen penella, hi tchomone wawar har kowa, hoi bud religione penenn. An bud religione wella penlo, kai djiwell i djido ducho an i menshende, hoi pal o merepen dureder djiwella. I bibla penell kowa gar. Joi penella, kai djinenn i mule buder tchi. Te djinah kowa, haiwah ninna, kai nai krenn i mule menge tchi. Doleske mangah witar gar ap lende. Un kowa sikrell men pale: Jon te haiwenn tchi te krell, hunte well men ninna kek traash glan lende.
Kote denn menshe, kai penenn, jon nai rakrenn i mulentsa. Dran i bibla haiwam kanna, “i mule djinenn buder tchi”. Koneha rakrenn sawe menshe palle, te penenn le, jon haiwenn mare kamle, mule menshentsa te rakrell? Demone krenn, har te wans le mare mule. Doleske: Mer te djinah o tchatchepen pral i mule, palle rikrell men kowa krik i demonendar. O Jehowah dell men trad, te las kek kontakta i mulentsa pre. Job djinella, hoi i demone mentsa krenna, hi menge gar mishto (5. Mose 18:10-12).
RODAS DUREDER
Kanna dikeh, hoi i bibla gomme pral o merepen penella. Kowa krell tiro patsepen ap i latcho un kamlo Debleste sorleder.
3. O tchatchepen pral kowa, hoi i mulentsa hi
Ap i tseli phub patsenn i menshe tchomone wawar, te djala pral kowa, hoi pal o merepen wella. Jaake haiwah sik: Gar halauter, hoi i menshe patsenna, nai hi o tchatchepen.
Hoi patsenn tire menshe, hoi pal o merepen wella?
Te kameh te djinell, hoi i bibla penella, dikenn o VIDEO.
Dikenn pal an Sikepaskro 3:20, un rakrenn khetne pral:
Hoi penell ko verso, hoi kolentsa hi, kai meran?
Djiwell tchomone dureder, te merell jek?
I bibla penell, kai i maal i Jesestar, o Lazaro, meras. Tumer, te dikenn pal an Johanni 11:11-14, denn jak ap i Jeseskre laba, hoi job pral kowa penella, hoi i Lazareha hi. Palle rakrenn khetne pral:
Hoi penas o Jesus pral o merepen?
Hoi sikrenn kola laba pral kowa, hoi kolentsa hi, kai meran?
Har dikeh tu ap kowa, hoi i bibla pral o merepen penella?
4. O tchatchepen pral o merepen lell i traash mendar krik
Penan le ap tute ninna, ’O mulo wella’? His tut traash glan i mulende? Mer te djinah o tchatchepen pral kolende, kai meran, lell kowa i traash mendar krik. Dikenn pal an Sikepaskro 9:10, un rakrenn khetne pral:
Nai wenn mule tchilatcho ap mende?
O tchatchepen an i bibla krella, kai patsah ap kek chochepen. Doleske mangah gar ap i mulende un krah witar tchi, te dikenn le latches ap mende. Dikenn pal an Jesaja 8:19 un Debleskro Tsiro 4:11, un rakrenn khetne pral:
Hoi penals tu: Har hi i Jehoweske kowa, te mangell jek ap i mulende oder te kamell jek i mulendar, te wenn le leske koi?
O tchatchepen pral o merepen lell men krik ko tchilatcho koomastar, hoi o Jehowah gar kamella, te kras mer
5. O tchatchepen pral o merepen dell men i pokono dji
Bud menshenge was penlo, jon te kran tchilatcho koowa an o djipen, lenn le pal o merepen i phagi. Mer lah i pokono dji, te djinah, kai well pal o merepen buder kek phagedino — witar gar kola, kai tchilatcho koowa kran. Dikenn pal an Remarja 6:7, un rakrenn khetne pral:
Te penell i bibla, kai kowa, kai meras, buder gar ap o tchilatchepen pandemen hi, nai wah mer ko tchilatchepaske, hoi mer an maro djipen kram, pal o merepen phagedino?
Jaake feteder mer i Jehowes prindjrah, jaake budeder haiwah ninna, kai krals o Jehowah sawo tchilatcho koowa gar. Dikenn pal an 5. Mose 32:4 un 1. Johanni 4:8, un rakrenn khetne pral:
Te hi i Debles sawi shinia, har an kola verse penlo was, nai mukals lo kolen, kai meran, hake tsireske bare duka te haiwell?
Penals tu, o tchatchepen pral o merepen dell tut i pokono dji? Hoske peneh tu kowa jaake?
BUD PENENNA: “Man hi traash glan kowa, hoi pal o merepen wella.”
Hawe biblakre laba nai sikrals tu jekeske, te well les buder kek traash glan kowa, hoi pal o merepen wella?
HOI KATE PENLO WAS
Te merell jek, djiwell tchi lestar dureder. Kola, kai meran, haiwenn buder kek duka un nai krenn jekeske buder tchi.
Hoi penals tu?
Hoi well pal o merepen?
Har lell o tchatchepen pral o merepen i traash mendar krik?
Har dell men o tchatchepen pral o merepen i pokono dji?
BUDEDER
Kate nai drawereh, hoi ko labeha “Seele” an i bibla tchatchepah kharella.
Kate huneh: Mukell o Dewel i tchilatche menshen hake tsireske an i bengeskri jag te chatchell?
Kate drawereh budeder pral ko putchepen: Hunte well men traash glan i mulende?
I mule: Hin le menge koi oder hin le menge tchilatcho? Dell kote tchatchepah i mulo? (I brochura)
Kate hatseh, har i morsheske kowa his, har haiwas lo o tchatchepen pral kowa, hoi i mulentsa hi.
“An i bibla hatsum o tchatchepen — klar un logish” (O Gardeskro Kheer, Februar 1, 2015)