Hoi khamell o Dewel dran i phub te krell?

1. Hoske gerdas o Dewel i phub?

O Dewel gerdas i bollepangren, te djiwenn le an o bollepen (Juda 6). Pal kowa gerdas o Jehowah i Adames un i Ewat, te djiwenn le ap i phub. Jaake haiwah mer, gai kola dui manusha gar gerdes wajan, te djiwenn le an o bollepen. Ap i phub kras o Jehowah len i shukka baar. Ko baar kharas Eden. Kote tchiwas o Dewel i Adames dre (1. Mose 2:15-17). Job nashte djiwals, ketene peskre tsele tchawentsa, i djipen hake tsireske an i paradiso ap i phub. Kowa khamas o Jehowah o tselo tsiro (1. Mose 9:1, 2). — Dikh pala an Gilja 37:29.

I Adames un i Ewat was pendlo, te anenn le tchawen ap i phub, te well i phub lendar pherdo. Jon lan ninna koi buhti, te krenn le dran i tseli phub i paradiso (1. Mose 1:28). I phub djala an kek tsiro paash. Hake tsire ham mer ap late khere. — Dikh pala an Mateo 5:5.

Kate hatseh ninna o Video Hoske gerdas o Dewel mari phub?

2. Hoske hi i phub buda kek paradiso?

O Adam un i Ewa shunan gar ap i Dewleste. Doleske tradas o Jehowah len dran o baar win. Jaake djas o paradiso nashedo. Hoske nai was o paradiso gar i manushendar gerdo? I bibla penella, gai was i phub an o tchilatcheskro wast dino (1. Johanni 5:19). — Dikh pala an 1. Mose 3:23, 24.

O Jehowah khamas, gai djiwenn i manusha ap i phub an i paradiso. Khamell job kanne tchimoni wawar? Naa! I tseli soor hi an leste un job rikerell peskro lab (Gilja 37:9, 10). Ko djipen, hoi djas nashedo, anell job papale. — Dikh pala an Gilja 37:11, 34.

3. Ha well o paradiso papale?

Te well o Jesus o rai pral i phub, well o paradiso papale. An i baro khurepen, hoi Armageddon kharella, marell o Jesus, ketene i Dewleskre bollepangren, kola tsele, gai gar ap i Dewleskri rig tardo hi. Balle anell o Jesus i benges 1.000 bersha an o stillepen. Kola, gai ap i Dewleskri rig tardo hi, atchenn djido. O Jesus rikerell peskro wast pral lende. Job tsikerell len ninna o tchatcho drom, te nai djiwenn le hake tsireske an i paradiso, kate ap i phub. — Dikh pala an Debleskro tsiro 20:1-3; 21:3.

4. An hawo tsiro dell buda kek bibacht?

O Jesus rakeras pral “kooma”, te haiwass nashte, gai ko tsiro bude gar dur hi, gai job papale wella. Hallauter, hoi ap mari phub hi, tsikerell menge, gai djiwah mer tchatchepaha an ko pharo tsiro, pral hoi i bibla rakerella. — Dikh pala an Mateo 24:3, 7-14, 21, 22.

Te hi o Jesus an o bollepen 1.000 bersha o rai pral i phub, lell lo i tseli bibacht krik (Gilja 46:9, 10; Johanni 1:23). An ko tsiro hi job ninna maro baro rashaj an o bollepen. Hoske? Jaake nai lell job i tseli doosh kolendar krik, gai i Dewles gamenna. Dran i Jeseste lell o Dewel hako nasslepen, o phurepen, ninna o merepen krik. — Dikh pala an 1. Korintarja 15:54; Debleskro tsiro 21:4.

5. Koon djiwell an o paradiso?

Kola, gai krenn, hoi o Dewel khamella, nai djiwenn an o paradiso (1. Johanni 2:17). O Jesus bitcheras peskre bitchepangren, te rodenn le pal kolende, gai i gamlo dji hi. Job khamas, te well lende sikedo, hoi te krenn le, te dikell o Dewel latches ap lende. An mare diwesa sikerell o Jehowah kitse millione, ha te djiwenn le nashte an i paradiso ap i phub (Mateo 6:33). An o Jehoweskro Kher nai hunell i tseli familja laba, hoi lenge an o djipen mishto hi. Kote mangenn jon ketene i Dewles. — Dikh pala an Johanni 6:45.