LEKTIONA 07
Har hi o Jehowah?
Hoi hi o Dewel an tire jaka? Hi job jaake dur tutar krik, har i momlia ap o bolepen fothe moldo un baro job hi? Oder hi lo tuke har i bari soor, an koja kek dji della? Har hi o Jehowah tchatchepah? An leskro lab i bibla hatsah, hawi shinia les hi. Joi sikrell tuke ninna, kai hi les i baro dji tuke.
1. Hoske nai dikah o Debles gar?
“O Dewel […] hi i ducho” (Johanni 4:24). Leskro trupo hi gar dran mass un rat. Job hi i duchengro, kai djiwell an o bolepen. Kowa, hoi kote pral hi, nashte dikah gar.
2. Hawi shinia hi i Jehowes?
Ninna te nai dikah i Jehowes gar, well kamlepen an maro dji pre, te prindjrah les feteder, fothe shukar un latcho leskri shinia hi. Pral i Jehoweste hi an i bibla tchinlo, job “kamell o tchatchepen un mukell peskre menshen gar kokres” (Gilja 37:28). Les “hi i baro dji i menshenge un hi lenge latches”, gomme budeder kolenge, kai hi len bud bibacht ap pende (Jakobo 5:11). O Jehowah hi ninna “pash kolende, kai lengro dji phagedo hi. Un kolenge, kai dikenn buder kek momeli an pengro djipen, hi lo ap i rig tardo” (Gilja 34:18, 19). Djinal tu, kai nai tchiweh tu bacht un ninna duka an leskro dji? Tu te kreh bisemake tchilatcho koowa, dukrel leske kowa an o dji (Gilja 78:40, 41). Tu te kreh latcho koowa, kreh tu les bachteles (Dik pal an Gosewe Laba 27:11).
3. Har sikrell o Jehowah, kai kamell lo men?
I baresta shini i Jehowestar hi kamlepen. I bibla penell menge, kai hi job “pherdo djieskro kamlepen” (1. Johanni 4:8). O Jehoweskro kamlepen sikrell pes gar kokres dran i bibla. Mer haiwah leskro kamlepen ninna dran i natura (Dik pal an Bitchepangre 14:17). Kre tuke jek kopo i shero pral kowa: Mer nai dikah budeder har kales un parnes. Mer nai hunah shukar bashepen un nai chah latcho chapen. Job kamell, te hi maro djipen bachteles.
RODAS DUREDER
Kanna dikeh, hawo baro, shukar koowa o Jehowah krella. Palle haiweh, har job kowa krella un ap hoi pes peskri shukar shinia sikrella.
4. O swundo ducho — I Debleskri soor, hoi job lella, te well tchomone kerdo
Jaake, har mer mare wasta lah, te nai budras, lell o Jehowah peskro swundo ducho. I bibla sikrella, kai hi o Debleskro ducho kek djidi persona. I bibla penell, kai hi o Debleskro ducho peskri soor, hoi job lella, te well tchomone kerdo. Dikenn pal an Luka 11:13 un Bitchepangre 2:17, un rakrenn khetne pral:
O Dewel penella, kai tchiwell lo peskro ducho ap kolende, kai les mangenna. Hoi penals tu kanna: Nai well o Debleskro ducho i persona? Hoske peneh tu kowa jaake?
O Jehowah lell peskro swundo ducho, te well ko baro koowa kerdo, hoi job kamella. Dikenn pal an Gilja 33:6 un 2. Petro 1:20, 21, un rakrenn khetne pral:
Hoi kras o Jehowah peskro swundo ducheha?
5. I Jehoweskri shinia krella, kai kameh les feteder te prindjrell
Ninna, kai his o Moses i loyaltiko budepaskro o Deblestar, kamas job koles feteder te prindjrell, kai halauter kras. Job penas ap i Debleste: “Muk man tiro drom te djinell. Me kamau tut feteder te haiwell” (2. Mose 33:13). Hoi penas o Jehowah ap i Moseste? Dikenn pal an 2. Mose 34:4-6, un rakrenn khetne pral:
Hoi penas o Jehowah, har job hi?
Hoi hi tuke o shukester ap i Jehoweskri shinia?
6. O Jehowah hi menge koi
I Debleskre menshe, kol Hebrearja, hins pandle budepangre an o them Egiptia. Har djas i Jehoweske, har dikas lo lengri bibacht? Te hunan o AUDIO dran 2. Mose 3:1-10, rakrenn khetne pral:
Har hi i Jehoweske kowa, te hi bibacht ap leskre menshende (Dik pal an i verse 7 un 8)?
Hoi penals tu: Kamell o Jehowah peske menshenge koi te well un hi les koi soor, te nai well lo i menshenge tchatchepah koi? Hoske peneh tu kowa jaake?
7. I Jehoweskri shinia sikrell pes an i natura
Peskri shinia sikrell o Jehowah menge an kowa, hoi job kerdas. Te dikan o VIDEO, palle dikenn pal an Remarja 1:20, un rakrenn khetne pral:
Hawi shinia i Jehowestar nai dikeh tu an kowa, hoi lestar kerdo was?
BUD PENENNA: “O Dewel hi kek persona, job hi i soor, kai hi an halauter.”
Hoi penals tu?
Hoske peneh tu kowa jaake?
HOI KATE PENLO WAS
O Jehowah hi i duchengro. Mer nai dikah les gar. Leskri shukar, latchi shinia — glanstunes o kamlepen — krella, kai kamah les feteder te prindjrell.
Hoi penals tu?
Hoske nashte dikah i Jehowes gar?
Hoi hi o swundo ducho?
Har hi i Jehoweskri shinia?
BUDEDER
Kate nai drawereh pral kola 4 kotja an i Jehoweskri shinia, hoi krenn les wi.
Kate hatseh, hoske o Dewel gar an halauter nai hi.
Kate hi tchinlo, hoske an i bibla tardo hi, kai hi o Debleskro ducho jaake har leskre wasta.
Kate hi pral i korelo morsheste tchinlo, kai nai patsas gar, kai o Dewel les kamella. Hoi kras, kai djinell lo kowa kanna?
“Me hum wawarenge moldo” (O Gardeskro Kheer, Oktober 1, 2015)