LEKTIONA 47
Nai djah tu an i Panjeskri Ceremonia?
An tiro Biblakro Kurso wal tu jaake bud pral i Jehoweste sikedo. Te nai djiwess pal kowa, hoi tu haiwal, krajal tu an tiro djipen ninna bud wawartchandes. Hoi rikrell tut pale, te dess tiro djipen an i mangepen i Jehoweske, un te djas an i Panjeskri Ceremonia? Kanna djala pral koowa, hoi wawaren pale rikras, un hoi tu nai kreh, te hi kowa pash tute ninna jaake.
1. Har bud hunte djiness tu glan i Panjeskri Ceremonia?
Te nai mukess tut te taufrell, hunte haiwess tu mishto, hoi “leskro tchatchepen” hi (1. Timoteo 2:4). Kate wella gar penlo, kai hunte djinas mer halauter pral i bibla. Hoi li penella, wah mer ninna pal i Panjeskri Ceremonia sikedo (Kolossarja 1:9, 10). Hoi tu hunte djiness hi: Hoi i bibla pral koi patsepaskri basis penella. I Phurendar an i Versammlunga nai djineh tu, ob te djineh doha pral o biblakro tchatchepen.
2. Hoi hunte kress tu glan i Panjeskri Ceremonia?
Glan i Panjeskri Ceremonia hunte khaitell tuke tiri doosh, un hunte mukess tiro phuro djipen (Dik pal an Bitchepangre 3:19). Ko sikrell pes, (1) te dukell tuke ko koowa, hoi tu an tiro phuro djipen kral, (2) te kameh kowa o tselo djiestar buder gar te krell, (3) te kameh i djudjo djipen te djiwell, jaake har o Dewel kowa kamella, un (4) te mangeh i Jehowestar, te bistrell lo tiri doosh. Tu hunte djas ninna an o Khetnepen un hunte kress als gar-taufedo Rakepaskro i Debleskri Budi.
3. Hoske te mukess tut i trashatar gar pale te rikrell?
Bud darenn, kai nai rikrenn le pengro Sowel gar. Awa, doleske, kai hi i doosh ap mende, nai perah mer. Ninna patsle morsha un djuwja an i bibla kran koowa, hoi an i Debleskre jakka gar mishto his. Ma biste: O Jehowah kamell mendar gar, te was kanna perfekt (Dik pal an Gilja 103:13, 14). Job hi bachteles, tu te kreh tiro fetedester. Job djal tuke ninna ap o wast. Tchatchepah, o Jehowah penell menge, kai della tchi, hoi nai krella, te kamell lo men buder gar (Dik pal an Remarja 8:38, 39).
RODAS DUREDER
Kanna dikeh, har tuke kowa mishto hi, te prindjreh i Jehowes feteder, un kai djal lo tuke ninna ap wast.
4. Tu hunte prindjress i Jehowes feteder
Har mishto hunte prindjress tu i Jehowes glan i Panjeskri Ceremonia? Jaake mishto, te nai kamess les, un jaake mishto, te kamess, te dikell lo latches ap tute. An ko video kanna wenn kanna morsha und djuwja sikedo, pash kolende kowa jaake his. Te dikan o VIDEO, rakrenn khetne pral.
Hoi his kolenge dran ko video mishto, te nai mukan le pen te taufrell?
Dikenn pal an Remarja 12:2, un rakrenn khetne pral:
Patseh tu ap kowa, hoi i bibla penella? Un patseh tu, kai hi i Jehoweskre Rakepangren o tchatchepen?
Te peneh na-a, hoi nai krals tu kanna?
5. Te rikrell tut tchomone pale, hoi tuke phares hi
Te kamell jek peskro djipen i Jehowes te dell, un te kamell lo an i Panjeskri Ceremonia te djal, wenna probleme un pharo koowa, har ko video sikrella. Te dikan o VIDEO, rakrenn khetne pral:
Hoi hunte kras i Narangerel, te nai djiwell li i Jehoweske?
Har his lakro kamlepen ap i Jehoweste mishto, te nai krell lo kowa?
Dikenn pal an Gosewe Laba 29:25, un 2. Timoteo 1:7, un rakrenn khetne pral:
Hoi dell men koi soor, te nai djas pral kola probleme un ko pharo koowa?
6. Tu hunte patsess, kai hi o Jehowah tuke koi
O Jehowah hi tuke koi, te nai kress kowa, hoi an leskre jakka mishto hi. Te dikan o Video, rakrenn khetne pral:
Hoi rikras ko morshes i Panjeskri Ceremonjatar pale?
Hoi kras leskro patsepen ap i Jehoweste sorleder?
Dikenn pal an Jesaja 41:10, 13, un rakrenn khetne pral:
Hoske hunte well tuke kek traash, te nashte djiweh tu gar pal tiri Sowel?
7. Kre tiro parkepen ap o Jehoweskro kamlepen bareder
Jaake budeder tu haiweh, kai kamell o Jehowah tut, jaake bareder well tiro parkepen. Un kowa krella, kai kameh tu kokres leske te djiwell — hake tsireske. Dikenn pal an Gilja 40:5, 6, un rakrenn khetne pral:
Hawo prossepen i Jehowestar hi tuke o barester?
Dikenn pal an Daniel 9:19, un rakrenn khetne pral:
Hoske della tchi bareder, har te was jek i Jehoweskre Rakepangrendar?
Kamals tu, te wess boldo, te nai wess ninna jek i Jehoweskre Rakepangrendar?
Dell kote tchomone, hoi rikrell tut pale?
Hoi penals tu, hoi tu hunte kress, te nai mukess tut te bolell?
BUD PENENNA: “Man hi traash, te nashte rikrau miro lab gar dren, te dau me i Jehowes miri Sowel.”
Penals tu kowa ninna?
HOI KATE PENLO WAS
I Jehoweha un leskri sorjah hal tu sorleder har hako pharo koowa, hoi kamell tut i Panjeskri Ceremonijatar palpale te rikrell.
Hoi penals tu?
Hoi hunte djiness tu dran i bibla, te nai mukess tut te taufrell?
Hoi hunte krals tu wawartchandes an tiro djipen, te nai mukals tut te taufrell?
Hoske te well kek daar jaake baro, kai rikrell li tut palpale, te djas an i Panjeskri Ceremonia?
BUDEDER
Kate drawereh nai, hoi koi basis hunte wella, te kamell jek an i Panjeskri Ceremonia te djal.
“Hal tu jaake dur, te mukess tut te bolell?” (O Gardeskro Kheer, März 2020)
Kate well tuke sikedo, hoi te kress nai, te well pharo koowa ap tiro drom an i Panjeskri Ceremonia.
“Hoi rikrell man i Panjeskri Ceremonjatar palpale?” (O Gardeskro Kheer, März 2019)
Kate dikeh, har i morsh nai mukas pes te bolell, ninna kai was pharo koowa ap leste.
Kate huneh, hoske o Ataa pes glanstunes gar mukas te bolell, un hoske job palle an i Panjeskri Ceremonia djas.
Hum me tchatchepah moldo, te lap sawo baro prossepen? (7:21)