Лука
2 Андэ кодэя время о ӷлавно римско правителё* о А́вгусто приԥэндя тэ пэрэадинон лэ мирос* па вся лэстири ԥув*. 2 (Када пэрво разо линэ тэ пэрэадинон лэ мирос*, кала о Квири́ниё правияс пэ Си́рия.) 3 И кажно жыля андэ пэско форо, кала трэбуй сас тэ пэрэадинон лэ мирос. 4 О Ио́сифо тожэ жыля — анда Галиле́я, анда форо Назаре́то, андэ Иуде́я, андэ лэ Давидоско чачо форо Вифлее́мо, важ кода кай во сас анда лэ Давидоско колено. 5 Во жыля вместе ла Марияса, сави каринг кодэя время ашэля лэстири хулаи и ужэ трэбуй сас тэ анэн лэ бэятос. 6 Кала вонэ сас котэ, важ латэ поджыля и время тэ анэн лэ бэятос. 7 Вой андя лэ шавэс, пэстирэ пэрвонэ бэятос, запатярдя лэс и стодя андэ лэ скотостири кормушка*, важ кода кай важ лэндэ на сас ҭан андэ ӷостиница.
8 Пэ кодэва краё и пастухоря и рят сторожынас андэ мал пэстирэ стадоря. 9 Неожыдано англа лэндэ сыкаделя лэ Иеговаско* анӷело, и пэр лэндэ дядап о ярко свето лэ Иеговастиря бахтатар. И пастухоря фартэ пэрэдарайлэ, 10 но о анӷело ԥэндя лэнди: «На́ даран. Мэ авелэм тэ ԥэнав тумэнди новость, савятар всаворэ мануша лэна фартэ тэ лошавэн. 11 Адес андэ лэ Давидоско форо арақаделя кодэва, ко тумэн спасыя, — о Христос, о Баро Хулай. 12 Акэ сар тумэ лэс ӷатярэна: о бэято, саво авэла запатярдо андэ ԥарнэ, лэла тэ пашлёл андэ лэ скотостири кормушка». 13 Неожыдано паша анӷело появисайлэ фартэ бут небесни халавдэ, савэ ԥэнэнас лашо алав пала Дэл: 14 «Тэ авэл ашунгло о Дэл по небо, ай пэ ԥув тэ авэл мирно жызня лэ манушэнди, пэ савэ во здиқля!»
15 Кала и анӷелоря рисайлэ по небо, и пастухоря линэ тэ ԥэнэн ек еқэсти: «Жам ворта щас андо Вифлее́мо и диқам, сар ашэля кода, со амэнди ԥэндя о Иегова». 16 Вонэ грабисайлэ тэ жан интя и виарақлэ ла Мария, лэ Иосифос и лэ бэятос, саво пашлёлас андэ лэ скотостири кормушка. 17 Кала и пастухоря додиқлэ лэ бэятос, вонэ росԥэндэ, со ашундэ пала лэстэ лэ анӷелостар. 18 Всаворэ, ко лэн ашунэлас, удивинаспэ, 19 ай и Мария ритярэлас андо шэро всаворэ кадэла алава и гиндояс пала лэндэ*. 20 Потом и пастухоря жылэ палпалэ. Вонэ ԥэнэнас лашо алав пала Дэл и драго дэнас дума пала лэстэ важ вся, со ашундэ и диқлэ. Вся вижыля точно кадя, сар лэнди сас ԥэндо.
21 По восьмо дес лэ бэятос опшындэ и приԥэндэ лэсти Исусо — кадэва алав дя лэсти о анӷело инке жы каринг кода, сар и Мария ля тэ аштярэл бэятос*.
22 Кала авеля и время тэ анэн и жэртва, кай тэ ашэн вужэ, сар када трэбуй сас па лэ Маисеёско законо, и Мария и о Ио́сифо андэ́ лэ бэятос андо Иерусалимо, кай тэ сыкавэн лэс* лэ Иеговасти, 23 важ кода кай андэ лэ Иеговаско законо ԥэнэнпэ: «Кажно пэрво шаворо трэбуй тэ авэл отдино лэ Иеговасти». 24 И вонэ стердэ па лэ Иеговаско законо, андэ саво пистромэ, кай трэбуй тэ анэн андэ жэртва дуе ӷолубкэн или дуе тэрнэ ӷолубонэн.
25 Андо Иерусалимо жувэлас правильно мануш, савэс ақарэнас Симео́но, во даралас лэ Дэвлэстар*. Во аштярэлас кодэя время, кала о Дэл стерэла лэ Израилёсти май вушэро по ди, и лэстэ сас свынто зор. 26 Через о свынто зор о Дэл дя лэсти тэ ӷанэн, кай во на мэрэла, пока на диқэла Кодэлэс, ко авэла лэ Иеговаско Избрано*. 27 О свынто зор цырдя лэ Симеонос тэ жал андэ қандири. Кала и родителя андэ́ интя лэ цынёне Исусос, кай тэ стерэн вся, сар пистромэ андо законо, 28 о Симео́но ля лэс пэ вас, взвисайля лашэ алавэса каринг о Дэл и ԥэндя: 29 «Акана, Всаворя люмако Хулай, ту одмэкэс пэстирэ рабос па лащи время, сар и дян алав, 30 важ кода кай мэрнэ яқа диқлэ кодэлэс, через кастэ ту спасыса лэ мирос, 31 кодэлэс, кас ту бишалдян, кай лэс тэ диқэн всаворэ народоря. 32 Во — свето, и кадэва свето розӷоний и тэмнота, сави ушаравэл лэ народонэн, и лэстар марэл тирэ народостири, лэ Израилёстири бах». 33 Лэ Исусоско дад и дэй ашунэнас, со о Симео́но ԥэнэнас пала лэнго бэято, и удивинаспэ. 34 О Симео́но блаӷословисардя лэн и ԥэндя лэстиря дати ла Марияти: «Через кадэва бэято бут мануша андо Израилё дэнапэдап и бут мануша ваздэнапэ, и во ашэла чуда, пала сави* лэна тэ дэн дума вэрыцымаса. 35 Вся када авэла, кай тэ дицол бутэ манушэнго гиндо. Ай тути прижалапэ тэ пэрэандярэс бари бида*».
36 Кадяжэ котэ сас лэ Дэвлэстири особо манушни, сави сас ԥури. Ла ақарэнас А́на, вой сас лэ Фануилостири щей анда лэ Асироско колено. Кадэя манушни прожудя пэстирэ хуласа семь бэрш, ай потом во муля. 37 Акана лати сас 84 ӷода. И А́на никала на мэкэлас и қандири. О дес и рят вой терэлас котэ лэ Дэвлэстири дила: ритярэлас о посто и анда ди мангэласпэ. 38 Вой тожэ поджыля, ля тэ блаӷодарий лэ Дэвлэс и тэ росԥэнэн пала бэято всаворэнди, ко аштярэлас, кай о Дэл спасыя о Иерусалимо.
39 Кала о Ио́сифо и Мария стердэ вся, со трэбуй па лэ Иеговаско законо, вонэ рисайлэ андэ Галиле́я, андэ пэско форо Назаре́то. 40 Ай о бэято барёлас, ашэлас инке май зорало и май годявэрно, и о Дэл здиқэлас пэр лэстэ.
41 Лэ Исусостирэ родителя кажно бэрш ԥирэнас андо Иерусалимо пэ Патради. 42 Кала лэсти сас 12 бэрш, вонэ, сар обычно, жылэ пэ кадэва празнико. 43 Посли празнико вонэ жылэтар цэрэ, ай о Исусо ашэляпэ андо Иерусалимо. Но лэстирэ родителя када на додиқлэ. 44 Вонэ жанас вся о дес, важ кода кай гиндонас, кай во сас машкар кодэла, ко жыля лэнца андо дром, ай потом линэ тэ родэн лэс машкар о родо и машкар кодэла, кас ӷанэнас. 45 Кала вонэ лэс на виарақлэ, вонэ рисайлэ андо Иерусалимо и линэ тэ родэн лэс котэ. 46 Через трин дес вонэ виарақлэ лэс андэ қандири, во бэшэлас машкар и учителёря, ашунэлас лэн и задэлас лэнди вопросоря. 47 Всаворэ, ко лэс ашунэлас, удивинаспэ кодэлэсти, сар во дэлас дума и сар драго вся полэлас. 48 Кала и родителя додиқлэ лэс, вонэ нисо нащи полэнас. И Мария ԥэндя лэсти: «Сына, васо ту кадя тердян? Амэ тирэ дадэса фартэ пережывали, пока тут родасас». 49 Но во ԥэндя лэнди: «Васо тумэ ман родэнас? Хэба тумэ на ӷанэнас, кай мэ трэбуй тэ авав андэ мэрнэ Дадэско цэр?» 50 Но вонэ на полинэ, со во ԥэндя.
51 О Исусо рисайля лэ родителёнэнца андо Назаре́то и на парашэлас тэ кандэл лэн. И лэстири дэй ритярэлас всаворэ кадэла алава андэ пэско ди. 52 Ай о Исусо барёлас, ашэлас май годявэрно, и во чалёлас и лэ Дэвлэсти, и лэ мирости*.