Евреёря

10 О законо кати сар тень сыкавэл по лашымос, саво трэбуй тэ авэл англэ, но па чачимастэ о законо — када най кодэва лашымос. Важ када кодэла, ко полэл лэ Дэвлэс, не моӷут андэ вся тэ ашэн вужэ через и жэртвы, савэ па законо анэн кажно разо бэрш бэршэстар. 2 Хэба тоди трэбуй сас тэ на парашэн тэ сԥабарэн и жэртвы? Тэ ашэлоп лэ Дэвлэстирэ мануша вужэ важ еқварэс, вонэ будэр на ӷанглоп пала пэстэ и дош андо бэзэх. 3 Но кадэла жэртвы бэрш бэршэстар дэнас лэ манушэнди тэ сэрэн пала бэзэх, 4 важ кода кай лэ гурувэнго и лэ бузнэнго рат на злэл о бэзэх.

5 Важ када, кала во зажал андэ люма, во ԥэнэн: «„Ту на закамлян, кай важ тутэ варисо тэ анэн и тэ отдэн, но дян манди тила. 6 Тути на сас уӷодно, ни кай важ тутэ сԥабарэн, ни кай витинэн лэ бэзэхэстар“. 7 И мэ ԥэндэм: „Мэ авелэм (пала мандэ пистромэ андо лил), кай тэ терав кода, со тути уӷодно, мэрно Дэл“». 8 Спэрва во ԥэндя: «Ту на закамлян, кай важ тутэ варисо тэ отдэн, или тэ анэн, или тэ сԥабарэн, или тэ витинэн лэ бэзэхэстар, и вся када на сас тути уӷодно». (Када жэртвы, савэ анэн па законо.) 9 Посли када во ԥэнэн: «Мэ авелэм, кай тэ терав кода, со тути уӷодно». Во терэл, кай тэ оджал о пэрво и тэ зажал о дуйто. 10 Важ кода кай лэсти сас «уӷодно», амэ ашэлям свынти, кала о Исусо Христос андя пэстири тила сар жэртва еқвар и пэ вся и время.

11 Кажно рашай дес десэстар тердёл пэ пэско ҭан, кай тэ терэл и дила и кай упалэ и упалэ тэ анэн кодэла жэ жэртвы, савэ на злэн па мануш вся о бэзэх. 12 Но о Христос андясас ек жэртва, сави злэл о бэзэх пэ вся и вечность. Посли када во бэшля справа лэ Дэвлэстар 13 и кодэла времятар аштярэл, кала о Дэл стола лэстирэ вороӷонэн лэсти тала пэрнэ. 14 Во еқвар андясас и жэртва и поможысардя, кай пэ вся и время тэ ашэн идеальни кодэла, кас свынцосардэ. 15 Кадяжэ о свынто зор поможый амэнди май фартэ тэ патяс андэ када и через лэстэ амэ ашунас: 16 «„Акэ о доӷоворо, саво мэ стерава лэнца посли кодэя время, — ԥэнэн о Иегова*. — Мэ става мэрно законо лэнди андо ди и пистросарава лэс андэ лэндири годи“». 17 Потом во ԥэнэн: «И манди будэр на авэла по гиндо лэнго бэзэх и лэндири найлащи дила». 18 Ай кала о бэзэх простисардо, тоди ужэ на трэбуй тэ витинэн лэ бэзэхэстар.

19 Ԥрала, через лэ Исусоско рат амэ можэм би дарако тэ зажас андо свынто ҭан дромэса, 20 саво во ԥэрнадя амэнди. Во стердя када, кала прожыля через и шырма, сави сыкавэл лэстири тила. Када нэво дром, саво андярэл каринг и жызня. 21 Кадяжэ амэндэ исин ашунгло рашай, саво стодо тэ диқэл пала лэ Дэвлэско цэр. 22 Ни акэ, давайте тэ терас лэ Дэвлэстири дила анда вся ди и барэ патяимаса, ай важ када стераса вужо пэско ди, кай во тэ на цырдэлпэ каринг и вэрыто дила, и вихалаваса пэстири тила вужэ паеса. 23 Давайте вся и время и хваткаса тэ дас дума пала пэстири надия, важ кода кай исин патяимос кодэлэсти, ко дя алав. 24 Ласа тэ шас сама ек еқэс, кай май фартэ тэ любисарас и тэ терас май бут лащи дила. 25 На ласа тэ парашас тэ стидаспэ вместе*, сар дэсавэ присытелэ каринг када, но ласа тэ подритярас ек еқэс. И пристаса инке май бут зор андэ када, кала диқас, кай пашол кадэва дес.

26 Но если амэ, хоть и точно ӷанас о чачимос, всаек нарошно терас бэзэх, тоди нинай авэр жэртва, сави можно тэ анэн пала амаро бэзэх. 27 Амэнди ашэлпэ кати тэ аштярас о страшно сындо и лэ Дэвлэстири холи, сави марэл половняса. Кадэя холи сԥабарэла лэстирэ вороӷонэн. 28 Кодэлэс, ко ԥагля лэ Маисеёско законо, умарэн, если када потвердин дуй или трин мануша. Лэс на жалуин. 29 Сар тумэ гиндон, хэба на спушэна инке май фартэ кодэлэстар, ко вэрыцымаса отԥэнделя лэ Дэвлэстирэ Шавэстар, прижангля сар варисо обычно ла солахако свынто рат и дя дума найпативалэс пала свынто зор, через саво о Дэл здиқля пар мэндэ па пэско баро ковло ди? 30 Амэ ӷанас кодэлэс, ко ԥэндя: «Мэ спушава, мэ на приашавава када». И инке: «О Иегова лэла тэ сындой пэстирэ народос». 31 Дэ бари дар тэ попэрас андэ вас лэ жундэ Дэвлэсти!

32 На́ бистрэн пала кодэя время, кала тумэ, посли кода сар додиқлэ о свето, пэрэандярдэ и ԥари время, ай кадяжэ, хоть тумэнди сас ԥарэс тэ боринпэ, тумэ всаек виритярдэ. 33 Дэкала англа всаворэ тумэн акушэнас и тумэнца найманушыканэс обжанаспэ, ай дэкала тумэ пэрэандярэнас и ԥари время кодэлэнца, касти дорэсляпэ кацаво ԥаримос. 34 Тумэ лэ одеса полэнас кодэлэн, ко сас андо баруно, и тумэ всаек ашэнаспэ лошалэ, кала тумэндар одлэнас о мищимос, важ кода кай ӷанэнас, кай тумэнди дорэсэлапэ май лащи и вечно блаӷословения.

35 Важ када ашэнпэ смили, и тоди тумэнди дэна бут блаӷословении. 36 Тумэ трэбуй тэ ашэнпэ састэ андэ ԥари время, кай, кала тумэ уӷодина лэ Дэвлэсти, тумэнди тэ дорэсэлпэ кода, пала со дя во обещания. 37 Важ кода кай инке «совсем набут», и «кодэва, ко жал, авэла и на заритярдёла». 38 «Ай мэрно мануш, саво терэл правильно, лэла тэ жувэл, если на парашэл тэ патял», но «если во дэла палпалэ, во на авэла манди уӷодно». 39 Ай амэ най сар кодэла, ко дэл палпалэ и хындёл, но амэ сар кодэла, ко патял и фэрий пэстири жызня.