Цэнин и возможность тэ тэлён лэ Иеговасти андэ лэско духовно храмо

1. Со ԥэнэн о анӷело и со лэстирэ алава сыкавэн амэнди?

ЕСЛИ бы тумэнца тэ задиноп дума о анӷело, хэба тумэ на приашунделоп каринг лэстирэ алава? Имено када и терэлпэ андэ амарэ деса. О анӷело взвийпэ каринг «кажно нацыя, ери [и] народо». И со во ԥэнэн? «Даран лэ Дэвлэстар и отдэн лэсти и слава... Тэлён кодэлэсти, ко стердя о нэбо, и ԥув, и моря и лэ паестирэ источникоря!» (Отк. 14:6, 7). О Иегова — ек чачуно Дэл, и всаворэ трэбуй тэ тэлён кати лэсти. Амэ фартэ блаӷодарни лэ Иеговасти, кай во дя амэнди кацави бах — тэ служысарас лэсти андэ лэско баро духовно храмо!

2. Со када духовно лэ Иеговаско храмо? (Диқэн кадяжэ и рамка «Духовно храмо — када най...».)

² Со када о духовно храмо и кай амэ можэм тэ уӷанас пала лэстэ май бут? О духовно храмо — када най варисави здания. Када лэ Иеговаско порядко важ и поклонения, андэ саво ӷлавно — лэ Иисусости Христостири жэртва. Пала кадэва храмо о апостало Павло пистросардя лэ христианонэнди анда евреёря, савэ жувэнас андэ Иудеяb.

3, 4. Васо о Павло пэрэжывал пала христианоря андэ Иудея и сар во лэнди поможысардя?

³ Васо о Павло пистросардя о письмо лэ христианонэнди анда Иудея? Пэ када лэстэ моӷли тэ авэн дуй причины. Пэрво, во камэлас лэн тэ подритярэл. Бут андар лэндэ барелэ андэ иудейско вера, ай акана, кала вонэ ашэлэ христианоря, и барэ мануша андэ иудейско вера моӷли тэ приасанпэ лэндар. Васо? Важ кода кай лэ христианонэндэ на сас баро и шукарно храмо, жэртвенико и рашая. Через када лэ Христостирэ ученикоря моӷли тэ умэкэн и вас и лэндири вера моӷла тэ ашэл май слабо (Евр. 2:1; 3:12, 14). Варикастэ дажэ моӷли тэ авэн гиндоря тэ ринпэ андэ иудейско вера.

⁴ Дуйто, о Павло шутя лэ ԥралэндири и лэ ԥэяндири сама пэ кода, кай вонэ на стонас зор , кай тэ полэн о «састо хамос» анда лэ Дэвлэско Алав — када нэвэ библейски учении или кодэла, савэ найвушэро тэ полэн (Евр. 5:11—14). Па вся дицолас, кай дэсавэ анда кодэла христианоря инке ритярэнас лэ Маисеёско законо. Но о Павло росԥэндя, кай и жэртвы, савэ анэнас тала законо, нэ моӷли полностью тэ вивужарэн лэ манушэн лэ бэзэхэстар. Имено важ када о законо будэр на сас. Потом андэ пэско письмо о Павло пэрэжыля каринг и май ԥарэ учении. Во напомнил лэ христианонэнди пала май лащи надежда, сави ритярдёл пэ лэ Иисусостири жэртва и через сави вонэ па чачимастэ моӷут тэ авэн май пашэ каринг о Дэл (Евр. 7:18, 19).

5. Со амэ трэбуй тэ полас, кала адиносарас о Письмо лэ евреёнэнди, и васо?

⁵ О Павло сыкадя пэстирэ ԥралэнди анда евреёря, кай на трэбуй тэ ритярдён пала кода, со сас. Кода, сар вонэ тэлёнас лэ Дэвлэсти раньшэ, сас кати «тень кодэлэсти, со авэла англэ, ай о Христос исин акана» (Кол. 2:17). Па тень полэса кати саво када предмето. Точно кадя жэ лэ евреёнэндири поклонения раньшэ сас кати «тень» важ и май лащи поклонения, сави о Дэл камля тэ стерэл. Амэ трэбуй тэ полас, со о Иегова стердя важ кода, кай амарэ бэзэха тэ простинпэ и амэ тэ тэлювас лэсти кадя, сар во камэл. Давайте сыстосараса и «тень» (лэ евреёнэндири поклонения дэлмут) и «кода, со исин акана» (лэ христианонэндири поклонения). Блаӷодаря кадэлэсти амэ май драго поласа, со када о духовно храмо и сар во влияет пар мэндэ.

СВЫНТО КАТУНА

6. Сар использовали и свынто катуна?

⁶ Лэ евреёнэндири поклонения дэлмут. Кала о апостало Павло росԥэнэнас пала лэ Иеговаско храмо, во дэлас дума пала свынто катуна, сави о Маисеё стодя андо 1512 бэрш до н. э. (Диқэн и схема «Лэ евреёнэндири поклонения дэлмут. Лэ христианонэндири поклонения».) И израильтяноря ԥиравэнас кадэя катуна пэса, кала пэрэжанас ҭан ҭанэстар. Ла использовали варикай 500 бэрш жы каринг кода, сар андо Иерусалимо построисардэ о храмо (Исх. 25:8, 9; Чис. 9:22). Кадэя «катуна важ и собрания» сас ҭан, каринг и израильтяноря авэнас тэ тэлён лэ Дэвлэсти и тэ анэн лэсти жэртвы (Исх. 29:43—46). Но и свынто катуна кадяжэ сыкавэлас варисо май лашо, со трэбуй сас тэ появийпэ кай и христианоря.

7. Кала появисайля о духовно храмо?

⁷ Лэ христианонэндири поклонения. И дэлмутни свынто катуна сас «тень [кодэлэсти], со терэлпэ по нэбо». О Павло ԥэндя, кай вой «сыкавэл кода, со исин акана» — баро лэ Иеговаско духовно храмо (Евр. 8:5; 9:9). Ай када сыкавэл, кай кала о Павло пистрояс о Письмо лэ евреёнэнди, о духовно храмо ужэ сас. Во появисайля андо 29 бэрш н. э. Андэ кодэва бэрш о Иисусо болделя, о Дэл витидя лэс свынтонэ духоса и во ля тэ служый сар «ӷлавно рашай» андэ лэ Иеговаско духовно храмо (Евр. 4:14; Дила 10:37, 38)c.

ӶЛАВНО РАШАЙ

8, 9. Соса и израильски ӷлавни рашая на шонаспэ пэ само баро Ӷлавно рашай — о Иисус Христос? (Евреям 7:23—27).

⁸ Лэ евреёнэндири поклонения дэлмут. О ӷлавно рашай сас лэ народоско прецтавителё англа Дэл. Пэрво ӷлавно рашай андо Израилё сас о Аароно. О Иегова стодя лэс пэ кадэя служэния андэ кодэва жэ дес, кала важ и поклонения линэ тэ используют и свынто катуна. Но, сар росԥэндя о Павло, «лэ рашанди прижаласпэ тэ парудён ек аврэса, важ кода кай и смэрть на дэлас лэнди тэ служын дальшэ»d. (Проадинон Евреям 7:23—27.) Кодэла ӷлавни рашая сас найсовершэни, и важ када лэнди трэбуй сас тэ анэн жэртвы важ пэстирэ бэзэха. Андэ када и сас бари разница машкар ӷлавни рашая андо Израилё и машкар само баро Ӷлавно рашай, Иисус Христос.

⁹ Лэ христианонэндири поклонения. Амаро Ӷлавно рашай, о Иисус Христос, служый андэ «чачуни катуна, сави стодя о Иегова, ай най о мануш» (Евр. 8:1, 2). О Павло росԥэндя, кай о Иисусо «жувэл вечно, важ када лэса нико на трэбуй тэ парудёл». О апостало кадяжэ ԥэндя, кай о Иисусо «андэ вся вужо, отделимэ лэ ӷрешниконэндар» и кай «лэсти на трэбуй кажно дес тэ анэн и жэртвы» важ пэстирэ бэзэха, сар када терэнас и ӷлавни рашая андо Израилё. Ай акана шам сама, соса на шонпэ и жэртвы и жэртвеникоря кай и евреёря дэлмут и кай и христианоря адес.

ЖЭРТВЕНИКОРЯ И ЖЭРТВЫ

10. Со сыкавэнас и жэртвы, савэ и евреёря анэнас по харкумуно жэртвенико?

¹⁰ Лэ евреёнэндири поклонения дэлмут. По входо андэ свынто катуна сас харкумуно жэртвенико, пэ саво андэ жэртва лэ Иеговасти анэнас лэ жывотнонэн (Исх. 27:1, 2; 40:29). Но через кадэла жэртвы лэ народости най полностью простинаспэ и бэзэха (Евр. 10:1—4). И жэртвы, савэ вся и время анэнас андэ свынто катуна, сыкавэнас, кай англэ авэла отдини жэртва, сави полностью витинэна лэ манушэн лэ бэзэхэстар.

11. Пэ саво жэртвенико о Иисусо андя пэс андэ жэртва? (Евреям 10:5—7, 10).

¹¹ Лэ христианонэндири поклонения. О Иисусо ӷанэнас, кай о Иегова бишалдя лэс пэ ԥув, кай во тэ отдэл пэстири жызня сар выкупо важ и мануша (Матф. 20:28). Кала о Иисусо болделя, во сыкадя, кай ӷотово тэ стерэл кода, со камэл о Иегова (Иоан 6:38; Гал. 1:4). О жэртвенико, пэ саво, ԥэнэса, муля о Иисусо, — када лэ Дэвлэстири «воля». Вой сас андэ кода, кай лэско шаво тэ анэн андэ жэртва пэстири совершэно манушыкани жызня. О Иисусо отдя пэс «еқварэс и пэ вся и время», кай тэ витинэл лэ бэзэхэстар кажнонэс, ко андэр лэстэ патял. (Проадинон Евреям 10:5—7, 10.) Ай акана давайте диқаса, со сас андэ свынто катуна.

СВЫНТО И СВЫНТО МАЙ АНДА СВЫНТИ

12. Ко моӷ тэ зажал андэ комнаты андэ свынто катуна?

¹² Лэ евреёнэндири поклонения дэлмут. И свынто катуна и храморя, савэ потом построисардэ, фартэ шонаспэ кодэлэса, со сас андэр лэндэ. Андэр лэндэ сас дуй комнаты: Свынто и Свынто май анда свынти. Лэн розделияс и шырма (Евр. 9:2—5; Исх. 26:31—33). Андо Свынто сас сомнакуни лампа, жэртвенико, кай тэ ԥабарэн о фимиамо, и столо важ о свынто марно. Интя моӷли тэ зажан кати и «избрани рашая», кай тэ терэн и рашаицко дила (Чис. 3:3, 7, 10). Андэ Свынто май анда свынти тердёлас о ковчеӷо важ о доӷоворо, саво сыкавэлас, кай о Иегова котэ (Исх. 25:21, 22). Кордэ, пала шырма, моӷ тэ зажал кати о ӷлавно рашай. Во терэлас када еқвар андо бэрш андо Дес, кала витинэнас лэ бэзэхэстар (Лев. 16:2, 17). О ӷлавно рашай лэлас лэ жывотнонэнго рат, кай тэ витинэн пэс и всаворэ народос лэ бэзэхэстар. И кадя сас кажно бэрш. Сар прожыля время, о Иегова через пэско свынто духо росԥэндя пэстирэ служытелёнэнди, со сыкавэнас кадэла комнаты андэ свынто катуна (Евр. 9:6—8)e.

13. Со сыкавэн о Свынто и о Свынто май анда свынти?

¹³ Лэ христианонэндири поклонения. И 144 000 избрани лэ свынтонэ духоса лэ Христостирэ ученикоря лэна вмести лэса тэ служын по нэбо сар рашая (Отк. 1:6; 14:1). Кала вонэ инке жувэн пэ ԥув, о Дэл витидэл лэн пэстирэ духоса и прилэл сар шавэн. О Свынто сыкавэл пэ кадэла особи отношэния машкар лэндэ (Рим. 8:15—17). О Свынто май анда свынти сыкавэл о нэбо, кай жувэл о Иегова. И шырма, сави отделияс о Свынто и о Свынто май анда свынти, сыкавэл лэ Иисусостири манушыкани тила. Пока во сас мануш, во нэ моӷ тэ жал по нэбо. Кала во отдя пэстири манушыкани тила важ и мануша, о Иисусо вазгляпэ по нэбо и ԥэрнадя о дром каринг и жызня по нэбо важ всаворэ избрани христианоря. Кай тэ получин и небесно наӷрада, вонэ тожэ трэбуй тэ ашавэн пэстири манушыкани тила (Евр. 10:19, 20; 1 Кор. 15:50). Посли воскресения о Иисусо зажыля андо Свынто май анда свынти андо духовно храмо, кай через и время паша лэстэ авэна всаворэ избрани.

14. Васо о порядко важ и поклонения, саво адес уӷодно лэ Иеговасти, май лашо, чем кодэва, саво сас раньшэ? (Евреям 9:12, 24—26).

¹⁴ Амэ диқлям, саво порядко андэ вужи поклонения о Иегова камэл, кай адес тэ авэл. Андэр лэстэ ӷлавно лэ Иисусостири жэртва и лэстири рашаицко дила. Кадэва порядко пэ бутэстэ май лашо кодэлэстар, саво сас раньшэ. О ӷлавно рашай андо Израилё зажалас лэ жывотнонэстирэ ратэса андо Свынто май анда свынти андэ катуна, сави стердэ и мануша. Ай о Иисусо зажыля андо нэбо — андэ со май свынто ҭан анда всаворэ, кай тэ тердёл англа Иегова. Котэ во пэрэдя лэ Дэвлэсти пэско право пэ совершэно манушыкани жызня, кай тэ улэл о бэзэх. (Проадинон Евреям 9:12, 24—26.) Лэ Иисусостири жэртва пэ вся и время стрий о бэзэх. Май дур амэ уӷанаса, кай амэ всаворэ можэм тэ тэлювас лэ Иеговасти андэ лэско духовно храмо, кай бы амэ тэ на жувас, по нэбо или пэ ԥув.

ГРАДЫ

15. Ко служыяс андэ града кай и свынто катуна?

¹⁵ Лэ евреёнэндири поклонения дэлмут. Круӷом свынто катуна сас града — када заӷородимэ тиритория, кай и рашая терэнас пэстири рашаицко дила. Котэ сас баро харкумуно жэртвенико важ и жэртвы, ай кадяжэ харкумуно тазо лэ паеса. Кадэлэ паеса халадёнас и рашая англа кода, сар тэ лэн тэ терэн пэстири служэния (Исх. 30:17—20; 40:6—8). Андэ храморя, савэ строисардэ потом, сас кадяжэ внешнё града, каринг моӷли тэ авэн авэр мануша, кай тэ тэлён лэ Дэвлэсти.

16. Ко служый андэ внешнё и внутренё града андо духовно храмо?

¹⁶ Лэ христианонэндири поклонения. Англа кода, сар тэ жан по нэбо, кай котэ вмести лэ Иисусоса тэ служын рашанца, лэстирэ избрани ԥрала предано служын андэ внутренё града андо духовно храмо. О баро тазо лэ паеса напоминает лэнди кадя жэ, сар и всаворэ аврэ христианонэнди, кай трэбуй тэ ашэнпэ нравствено и духовно вужэ. Ай со можно тэ ԥэнас пала «фартэ бут мануша», савэ предано подритярэн лэ Христостирэ ԥралэн? Кай вонэ служын лэ Дэвлэсти? О апостало Иоано диқля, кай вонэ «тердён англа престоло». Када сыкавэл и внешнё града андо духовно храмо, кай вонэ «служын лэ Дэвлэсти о дес и рят» (Отк. 7:9, 13—15). Сар жэ амэ блаӷодарни лэ Иеговасти, кай во дя амэнди честь тэ тэлювас лэсти андэ лэско баро духовно храмо!

АМАРИ РАЙКАНИ ВОЗМОЖНОСТЬ ТЭ ТЭЛЮВАС ЛЭ ИЕГОВАСТИ

17. Савэ жэртвы амэ анас лэ Иеговасти?

¹⁷ Адес кай всаворэ христианоря исин райкани возможность тэ анэн лэ Иеговасти жэртвы. Када можэт тэ авэл амари время, зор и ловэ, савэ амэ отдас важ лэ Царствостири дила. Сар пистросардя о апостало Павло, амэ можэм «вся и время тэ анас лэ Дэвлэсти хвалебно жэртва, када плодо амаря шыбатар, кала росԥэнас аврэнди пала лэско алав» (Евр. 13:15). Амэ сыкаваса лэ Иеговасти, кай важ амэндэ куч и честь тэ тэлювас лэсти, если ласа тэ отдас лэсти со май лашо.

18. Пала со амэ трэбуй никала тэ на бистрас? (Евреям 10:22—25).

¹⁸ Проадинон Евреям 10:22—25. В концэ андэ пэско Письмо лэ евреёнэнди о апостало Павло пистросардя кода, пала со амэ никала на трэбуй тэ бистрас. Андэ када ужал и молитва, и проповедническо дила, и собрании и кай амэ трэбуй тэ подритярас ек еқэс. И кала амэ диқас, кай «пашол [лэ Иеговаско] дес», амэ трэбуй «тэ терас када инке май бут». Андэ послиднё часть андэ книжка Откровение лэ Иеговаско анӷело дувар ԥэнэн: «Тэлюв лэ Дэвлэсти!» (Отк. 19:10; 22:9). Кода, кай о анӷело ԥэндя кадэла алава дувар, сыкавэл, пэ скати дэ важно каринг лэндэ тэ приашундювас. Давайте всегда тэ сэрас о чачимос пала лэ Иеговаско баро духовно храмо и тэ цэнисарас и возможность тэ тэлювас амарэ райканэ Дэвлэсти!