Римо
1 Пистрой тумэнди о Павло, пэр кастэ хулай о Христос о Исусо*. Када во витидя ман тэ авав апостало и отделисардя, кай тэ росԥэнав лэ Дэвлэстири лащи новость. 2 Пала латэ во ԥэнэнас через пэстирэ особи мануша* андэ Свынти Лила. 3 Кадэя новость пала лэско Шаво, пала амаро Баро Хулай о Исусо Христос, саво сас анда лэ Давидоско колено. 4 Но во сас жундярдо через о свынто зор и прижангло лэ Дэвлэстирэ Шавэса. 5 Через лэстэ о Дэл здиқля пэр мандэ па пэско баро ковло ди, и мэ ашэлэм апостало, кай и мануша анда всаворэ народоря, если патян, тэ кандэн лэс и драго тэ дэн дума пала лэско алав. 6 О Дэл витидя и тумэн, кай тумэ тэ жан лэ Исусостирэ лэ Христостирэ дромэса. 7 Мэ пистросарав всаворэнди, ко андо Римо, — кодэлэнди, кас любий о Дэл и кас во витидя, кай вонэ тэ авэн свынти.
Мэк о Дэл, амаро Дад, и о Баро Хулай о Исусо Христос здиқэн пэр тумэндэ па пэско баро ковло ди и дэн мирно жызня.
8 Спэрва мэ блаӷодарисарав мэрнэ Дэвлэс через о Исусо Христос пала тумэндэ*, важ кода кай па вся и люма дэн дума пала кода, сар тумэ патян. 9 Мэ анда вся ди терав лэ Дэвлэстири дила, кай росԥэнав и лащи новость пала лэско Шаво, и о Дэл ӷанэн, кай мэ вся и время ԥэнав пала тумэндэ андэ пэстирэ молитвы. 10 Мэ мангав лэстар, кай мандэ тэ вижал тэ авав каринг тумэндэ, если лэсти авэла уӷодно. 11 Мэ фартэ камав тумэн тэ диқав, кай тэ пэрэдав тумэнди о лашымос лэ Дэвлэстар и тэ поможысарав тумэнди май састэс тэ патян, 12 или, май ӥто, кай амэ вместе тэ поможысарас ек еқэсти май састэс тэ патяс — тумэ манди, ай мэ тумэнди.
13 Ԥрала, камав, кай тумэ тэ ӷанэн: мэ най еқвар тидаваспэ тэ авав каринг тумэндэ, но кажно разо манди варисо на дэлас када тэ стерав. Мэ камавас, кай мэрня дилатар тэ авэл лашымос тумэнди, сар и аврэ народонэнди. 14 Мэ трэбуй тэ поможысарав* всаворэнди: лэ греконэнди и аврэ народонэнди, лэ годявэрнэнди и лэ найгодявэрнэнди*. 15 Важ када мэ фартэ камав тэ росԥэнав и лащи новость и тумэнди андо Ри́мо. 16 Мэ на лажав тэ росԥэнав и лащи новость, важ кода кай вой сыкавэл, саво зор кай о Дэл, и спасый всаворэн, ко патял: спэрва лэ евреёнэн, ай потом и лэ греконэн. 17 Через кадэя новость кодэла, ко патял, уӷанэн лэ Дэвлэско правильно законо, и када поможый лэнди инке май састэс тэ патян. Пала када сас пистромэ: «Ай кодэва, ко андярэл пэс правильно, лэла тэ жувэл, если на парашэл тэ патял».
18 О Дэл бишалэл па небо пэстири холи против вся о найлашымос и против лэ манушэндири вэрыто дила. Кадэла мануша на дэн аврэнди тэ уӷанэн о чачимос. 19 Кода, со можно тэ уӷанэн пала Дэл, най гарадо кацавэ манушэндар — о Дэл дя лэнди када тэ ӷанэн. 20 Кодэла времятар, сар появисайля и люма, драго дицол, саво кай о Дэл характеро, и амэндэ вижала тэ уӷанас лэс, если амэ шас сама пэ кода, со во стердя. Вся када сыкавэл, пэскати во дэ зорало*, и доԥэнэн, кай во сыно Дэл. Кочай, ко на шол сама пэ када, лэн о Дэл на простия. 21 Кацавэ мануша ӷанэн лэ Дэвлэс, но на терэн кадя, кай во тэ авэл ашунгло сар Дэл, и на блаӷодарин лэс. Вонэ парашэлэ здраво тэ гиндон, и лэнго найгодявэрно ди нисо нащи полэл*. 22 Кадэла мануша ԥэнэн, кай вонэ годявэрнэ, но па чачимастэ вонэ дилэ. 23 Вонэ терэн кадя, кай тэ авэл ашунгло най о Дэл, саво не можэт тэ мэрэл, ай лэ дэвлорэндирэ статуэтки, савэ шонпэ пэ обычни мануша, пэ чирикля, пэ штарэ пэрнэндирэ жывотни и пэ кодэла, ко ползыий па ԥув.
24 Важ када о Дэл домэкля лэнди тэ андярэн мэлали жызня, каринг сави цырдэлпэ лэнго ди, и тэ мэлярэн* пэстири тила. 25 Вонэ парудэ о чачимос пала Дэл по хохаимос и тэлён кодэлэсти, со сас стердо, ай най Кодэлэсти, ко вся стердя, савэсти прижал о ашунгло алав о вико вечно. Аминь. 26 Акэ васо о Дэл домэкля, кай лэнго шэро тэ авэл замардо кати лэ билажавардимаса, пала саво лэндэ здрал и цыпа. И жувля отԥэнделэ тэ авэн лэ муршэнца и линэ тэ андярэн кацави жызня, сави о Дэл на загиндосардя важ и жувля. 27 Точно кадя жэ и мурш отԥэнделэ тэ авэн лэ жувлянца и линэ тэ здран ек пала ек, мурш пала муршэстэ, и тэ терэн гряцымос. Важ лэнго бэзэх лэндар спушэна кадя, сар вонэ затердэ.
28 Важ лэндэ на сас важно тэ ӷанэн лэ Дэвлэс*, кочай во домэкля, кай пэр лэндэ тэ хулаий лэнго пэрэбандярдо гиндо и вонэ линэ тэ андярэн пэс кадя, сар на прижал. 29 Кацавэ мануша потасылэ андэ кода, кай андярэн пэс неправильно, терэн найлашымос, ашэн чорымастирэ, терэн вэрыто дила, завидуин, умарэн, скандалин, хохавэн, холявэн, шэпчинпэ пала авэр, 30 андярэн хохавни дума пэ авэр, вэрыцын лэ Дэвлэс, наӷло пэс андярэн, абурон*, путён, вигиндон тэ терэн вэрытимос, на кандэн лэ родителёнэн, 31 дилявэн, на ритярэн пэско алав, на любин лэ манушэн* и жэстоко обжанпэ аврэнца. 32 Вонэ драго ӷанэн, кай па лэ Дэвлэско законо кацавэ мануша ашэн тэ мэрэн, но вонэ най кати екжэнэ кадя терэн, но и драго дэн дума пала кодэла, ко терэл кадя жэ.