1 Пётро

3 Точно кадя жэ и тумэ, жувля, кандэн пэстирэ хулан, кай кодэлэн андар лэндэ, ко на приашундёл каринг о алав лэ Дэвлэстар, тумэ би алавэско тэ домардён пэстиря диласа, 2 кала вонэ диқэна, кай тумэ андярэн пэс достойно* и стон пэр лэндэ бари патив. 3 Мэк тумаро шукаримос авэл най кода, со упрал: заплетимэ бал, сомнак или барвали ӥда, 4 ай кода, со гарадо андрэ, андо ди, — када спокойно и ковло характеро, саво на римойпэ и саво фартэ куч лэ Дэвлэсти. 5 Акэ кадя и терэнас андэ дэлмутни время и свынти жувля, савэ надеинаспэ по Дэл. Вонэ кандэнас пэстирэ хулан, 6 кадя жэ сар и Сарра, сави кандэлас лэ Авраамос и ԥэнэнас пэр лэстэ хулай*. Тумэ латирэ щея, если терэн лашымос и на домэкэн, кай тумэн тэ шол андэ дар.

7 Точно кадя жэ и тумэ, мурша, старыинпэ тэ полэн пэстирэ хулаян. Стон пэр лэндэ патив и никала на́ бистрэн, кай вонэ май слаби тумэндар, сар сани ваза, важ кода кай о Дэл па пэско баро ковло ди дэл лэнди кацави жэ блаӷословено жызня, сар и тумэнди. Тоди о Дэл на парашэла тэ ашунэл тумарэ молитвы.

8 И акэ, старыинпэ тэ гиндон еқэндар, полэн, со по ди ек еқэстэ, жалуин анда вся ди, на́ андярэн пэс абуримаса и любин ек еқэс, сар ԥрала. 9 На́ терэн найлашымос кодэлэнди, ко стердя тумэнди вэрыто, и на́ дэн дума найпативалэс пала кодэла, ко найпативалэс дэл дума* пала тумэндэ. Но наоборот, терэн лашымос*, важ кода кай о Дэл ԥэндя тумэнди када тэ терэн. И тоди во тумэн блаӷословия.

10 Важ кода кай пистромэ: «Ко камэл тэ лошавэл ла жызняти и тэ жувэл бахталэс, мэк следий* пала пэстири шыб, кай тэ на стерэл найлашымос и тэ на хохавэл. 11 Мэк во фэрийпэ лэ вэрытимастар и терэл лашымос, старыийпэ тэ жувэл мирно аврэнца и вся важ када тэ терэл. 12 Важ кода кай о Иегова* диқэл пэ правильни мануша и во* ашунэл, кала вонэ ясвэнца взвинпэ каринг лэстэ, но о Иегова против кодэла, ко терэл найлашымос».

13 Да и ко стерэла тумэнди вэрыто, если тумэ пристона зор*, кай тэ терэн лашымос? 14 Но дажэ если тумэнди прижалпэ тэ пэрэандярэн о ԥаримос и бида важ и правильно дила, тумэ бахталэ. Ай кодэлэстар, состар лэн шол андэ дар, на́ даран* и ни пала со не пережывайте. 15 Полэн лэ Христос сар Барэ Хулас андэ пэско ди и вся и время авэн ӷотови тэ зашонпэ пала пэстири надия англа кажно, ко лэла тэ допушэл тумэндар пала када*. Но старыинпэ тэ терэн када ковлэс и баря пативаса.

16 Мэк тумэндэ авэл вужи совесть, кай кодэлэнди, ко дошалярэл тумэн, — со вонэ тэ на ԥэнэн против тумэндэ — тэ ашэл лажаво, важ кода кай тумэ андярэн пэс достойно сар лэ Христостирэ ученикоря. 17 Если о Дэл када домэкэл, фэдэр тэ пэрэандярэн о ԥаримос и бида важ и лащи дила, чем важ и вэрыто. 18 Важ кода кай и о Христос кати еқвар муля важ и бэзэха, о правильно мануш муля важ и найлашэ мануша, кай тэ пашарэл тумэн каринг о Дэл. Во сас умардо сар мануш, но жундердо сар анӷело. 19 И посли када во жыля тэ росԥэнэн пала сындо лэ анӷелонэнди, савэ андо баруно, 20 кай на канглэ лэ Дэвлэс, кала жувэлас о Ноё. Андэ кодэя время о Дэл тэрпияс и аштярэлас, пока строинас о ковчеӷо, андэ саво спасысайлэ восемь мануш, кала пэрэжудэ о потопо.

21 Кода, со тердяпэ андэ кодэла деса, шолпэ пэ крещения, сави акана спасый тумэн через кода, кай жунделя о Исусо Христос. (Кала тумэ болдён, када на схалавэл и мэл па тила, но кадя тумэ взвинпэ каринг о Дэл, кай и совесть тэ ашэл вужи.) 22 Кала во вазгляпэ по небо, во бэшля справа* лэ Дэвлэстар, саво стодя лэс май вучес лэ анӷелонэндар и кодэлэндар, кастэ исин право тэ хулаий и зор.