Сар тэ авэс ӷотово, кай тэ болдёс?

1, 2. Если ту инке най ӷотово тэ болдёс, васо тоди на трэбуй тэ умэкэс и вас? (Диқэн и картинка пэ обложка.)

КАМЭС ту тэ болдёс? Када розлащи цэль! Если ту гиндос, кай ту ӷотово каринг кадэва шаӷо, и если и барэдэр ԥрала тожэ кадя гиндон, тоди на цырдэ и время, кай тэ болдёс. Тут аштярэл бахтали и розлащи жызня андэ служэния лэ Иеговасти.

² Ай со если тути ԥэндэ, кай спэрва трэбуй тэ парудёс? Или ту екжэно када полэс? На умэк и вас. Тутэ вижала тэ парудёс и тэ стерэс кадэва шаӷо — и нэ важно скати тути бэрш.

«СО НА ДЭЛ МАНДИ ТЭ БОЛДЮВАВ?»

3. Со о эфиопско мануш пушля кай о Филипо и саво вопросо через када можэт тэ авэл?

³ Проадинон Деяния 8:36, 38. О баро мануш анда Эфиопия пушля кай о Филипо, саво росԥэнэнас лэсти пала Дэл: «Со на дэл манди тэ болдював?» Кадэва мануш фартэ камэлас тэ болдёл, но сас во ӷотово каринг када?

4. Сар о эфиопско мануш сыкадя, кай лэско ди цырдэл тэ сытёл?

⁴ О эфиопско мануш «авеля андо Иерусалимо, кай тэ тэлёл лэ Дэвлэсти» (Деян. 8:27). Наверно, во сас празелито, аврэ алавэнца приля иудейско вера. Канешно, во уӷангля пала Иегова анда Еврейски Писании. Но во камэлас тэ ӷанэн май бут. Сэрэс, со во терэлас, кала лэс додиқля о Филипо? Адинояс лэ Исаяско свитко! (Деян. 8:28). Када сас састэ гиндоря анда Свынто Писания. Кода, со ӷанэнас кадэва мануш, лэсти на хутилэлас. Оди цырдэлас лэс май бут тэ сытёл.

5. Со терэлас о мануш анда Эфиопия посли кода, сар уӷангля о чачимос?

⁵ Кадэва баро мануш служыяс андо дворцо кай и эфиопско царица. Во «диқэлас пала латирэ ловэ» (Деян. 8:27). Наверно лэстэ сас фартэ бут дила, но всаек во витидэлас время, кай тэ полэл лэ Иеговас. Кадэва мануш камэлас най кати тэ ӷанэн о чачимос, но и терэлас кадя, сар уӷангля. Важ када во пролагля баро дром анда Эфиопия и на жалуисардя пэ када бут время и ловэ. Дицолас, кай во фартэ камэлас тэ тэлёл лэ Иеговасти андо Иерусалимско храмо.

6, 7. Васо о баро мануш анда Эфиопия ля май фартэ тэ любий лэ Иеговас и со во закамля тэ терэл?

⁶ О Филипо росԥэндя лэ барэ манушэсти анда Эфиопия важно чачимос. Например, кай о Иисусо када Миси́я (Деян. 8:34, 35). Кадэва мануш сас фартэ радо тэ уӷанэн со стердя важ лэстэ о Иисусо. Каринг со лэс када побудисардя? Во моӷ нисо тэ на парувэл и тэ ашэлпэ барэ манушэса, саво приля иудейско вера. Но посли кода, сар о Филипо лэса дя дума, во ля инке май фартэ тэ любий лэ Иеговас и лэ Иисусос. Через када во приля важно ришэния, кай тэ болдёл и тэ ашэл лэ Иисусоско ученико. О Филипо поля, кай кадэва мануш сас ӷотово каринг кадэва шаӷо, и важ када во лэс болдя.

⁷ Если ту лэса тэ терэс кадяжэ, сар о баро мануш анда Эфиопия, ту авэса ӷотово тэ болдёс и сможэш анда вся оди тэ ԥэнэс: «Со на дэл манди тэ болдював?» Кодэва баро мануш на парашэлас тэ сытёл, прилэлас андэ жызня кода, со уӷангля, и пристолас зор, кай май фартэ тэ любий лэ Дэвлэс. Давайте подаса дума, сар о мануш, саво тидэлпэ тэ болдёл, можэт тэ терэл кадяжэ.

НА ПАРАШ ТЭ СЫТЁС

8. Каринг со тут побудин и алава анда Иоанна 17:3?

⁸ Проадинон Иоанна 17:3. Наверно, ту закамлян тэ сытёс па Библия посли кода, сар ашундян кадэла лэ Иисусостирэ алава. Но шув сама: кадэва жэ стихо сыкавэл, кай амэнди трэбуй тэ на парашас тэ сытювас. О мануш лэла вся и время «тэ уӷанэн... еқэ чачунэ Дэвлэс» (Эккл. 3:11). Амэ ласа тэ сытювас вся и вечность. Со май бут амэ уӷанаса, со май пашэ аваса каринг о Иегова (Пс. 73:28).

9. Со амэнди трэбуй тэ терас посли кода, сар уӷанглям и ӷлавни гиндоря анда Библия?

⁹ Понятно, кай кала о мануш лэл тэ пашол каринг о Иегова, спэрва во уӷанэн кати ӷлавни гиндоря анда Библия. О апостало Павло андо письмо лэ евреёнэнди ԥэндя кай када знании, савэ амэ «спэрва уӷанглям». Но кадэлэса во на сыкадя, кай вонэ най важни. Во сыстосардя лэн лэ ҭудэса, саво дэл зор лэ бэятости (Евр. 5:12; 6:1). Но кадяжэ во побудияс лэ христианонэн, кай вонэ тэ уӷанэн и састэ гиндоря анда лэ Дэвлэско алав. Ай тутэ исин жэлания тэ уӷанэс кадэла гиндоря? Камэс ту май бут тэ уӷанэс пала Иегова и пала кода, со во загиндосардя?

10. Васо дэсавэнди найвушэро тэ сытён?

¹⁰ Бут мануша гиндон, кай тэ сытён — када най важ лэндэ. Ай со ту гиндос? Сытелян ту андэ школа тэ адинос и тэ проандярэс иследования? Чалёлас тути тэ родэс атветоря пэ пэстирэ вопросоря и тэ уӷанэс май бут? Или тутэ сас гиндо, кай и книжки — када най важ тутэ? Бут мануша гиндон кадяжэ. Но о Иегова можэт тути тэ поможый. Во совершэно и само лашо Учителё.

11. Васо можно тэ ԥэнас, кай о Иегова — «Само Баро Учителё»?

¹¹ О Иегова ԥэнэн пэр пэстэ, кай во амаро «Само Баро Учителё» (Ис. 30:20, 21). Во терпеливо, добро, ай кадяжэ амэн полэл. О Дэл шол сама по лашымос, саво исин кай лэстирэ ученикоря (Пс. 130:3). О Иегова никала на аштярэл амэндар май бут, чем амэ можэм тэ стерас. Сэрэн, кай во создал амари годи, — када розлашо подарко (Пс. 139:14). И амэндэ исин жэлания тэ сытювас. Амаро Создателё камэл, кай амэ вся и вечность тэ уӷанас варисо нэво, и кай када тэ анэн амэнди радость. Важ када авелоп мудро тэ пристас о зор, кай амаро ди ужэ акана тэ цырдэлпэ каринг о чачимос анда Библия (1 Пет. 2:2). Стов цэли, савэ можэш тэ домардёс, адиносар и изучай и Библия па пэско ӷрафико (Иис. Н. 1:8). О Иегова подритярэла тут андэ када и тути май фартэ лэла тэ чалёл тэ адинос и тэ уӷанэс пала лэстэ.

12. Васо амэнди трэбуй тэ уӷанас май бут пала лэ Иисусостири жызня и служэния?

¹² Часто витидэ и время, кай тэ розмышляеш пала лэ Иисусостири жызня и служэния. Кай тэ тэлювас лэ Иеговасти амэ трэбуй май точно тэ жас па лэ Иисусостирэ слидоря, особено андэ кадэя ԥари время (1 Пет. 2:21). О Иисусо ворта ԥэнэнас пала ԥаримос, саво авэла кай лэстирэ ученикоря (Луки 14:27, 28). Но во сас уверено, кай и чачунэ христианоря смоӷут вся тэ виритярэн кадяжэ, сар виритярдя во (Иоан. 16:33). Уӷан май бут пала лэ Иисусостири жызня. Стов цэль тэ сытёс лэстар и тэ терэс кажно дес кадяжэ, сар во.

13. Пала со трэбуй тэ мангас лэ Иеговас и васо?

¹³ Но ек и знании на хутилэна. Через лэндэ амэ трэбуй тэ авас май пашэ каринг о Иегова, тэ любисарас лэс и тэ патяс андэр лэстэ (1 Кор. 8:1—3). Важ када манг лэ Дэвлэс, кай во тэ поможый тути тэ састярэс пэстири вера (Луки 17:5). Во анда вся оди атвечает пэ кацавэ молитвы. И чачуни вера ритярдёлпэ пэ точни знании пала Дэл, вой поможыя тэ прилэс андэ жызня кода, со ту уӷанглян (Иак. 2:26).

НА ПАРАШ ТЭ ПРИЛЭС АНДЭ ЖЫЗНЯ КОДА, СО УӶАНГЛЯН

14. Сар о апостало Пётро сыкадя, кай важно тэ прилас андэ жызня кода, со уӷанглям? (Диқэн кадяжэ и картинка.)

¹⁴ О апостало Пётро сыкадя, кай лэ христостирэ ученикоря трэбуй тэ жувэн кадя, сар вонэ уӷанглэ. Например, во шутя сама пэ кода, со андэ Библия сас пистромэ пала Ноё. О Иегова ԥэндя лэ Ноёсти, кай уничтожыт андо потопо лэ найлашэ манушэн. Кай о Ноё и лэско ери тэ спасынпэ, лэнди на хутилдоп просто тэ ӷанэн, кай авэла о потопо. Шон сама, сар о Пётро ԥэндя пэ кадэя время англа потопо: «О Дэл аштярэлас и на холявэлас, пока терэнас о ковчеӷо» (1 Пет. 3:20). О Ноё и лэско ери прилэнас андэ жызня кода, со уӷанглэ лэ Дэвлэстар, и строинас о ковчеӷо (Евр. 11:7). Тоди о Пётро сыстосардя лэ Ноёстири бути, кодэлэса, кала о мануш болдёл. Во ԥэндя, кай и крещения «шолпэ пэ кода, со фэрий тумэн акана» (1 Пет. 3:21). Вижал, тири подӷотовка каринг и крещения можно тэ сыстос кодэлэса, сар о Ноё и лэско ери строинас о ковчеӷо. Ай со имено трэбуй тэ терэс, кай тэ авэс ӷотово тэ болдёс?

15. Со када па чачимастэ тэ каиспэ?

¹⁵ Кай о мануш тэ болдёл, во трэбуй анда вся оди тэ каийпэ андэ пэстирэ бэзэха (Деян. 2:37, 38). Кала о мануш па чачимастэ каийпэ, во парудёлпэ. Ай тутэ ужэ вижыля тэ ашавэс любо дила, сави на чалёл лэ Иеговасти? Например, билажаварди жызня, цыӷарки или найлащи и ӷрубо дума (1 Кор. 6:9, 10; 2 Кор. 7:1; Эф. 4:29). Если ту инке када на стердян, на параш тэ парудёс. Манг помощь и родэ совето кодэлэстар, ко изучает туса и Библия, или лэ барэдэрэ ԥралэндар андэ собрания. Ай если ту тэрноро и жувэс лэ родителёнэнца, манг помощь лэндар. Вонэ поможына тути тэ улэс и найлашэ привычки, савэ на дэн тути тэ болдёс.

16. Со ужал андо лашо ӷрафико важ и дэвликони дила?

¹⁶ Кадяжэ важно тэ стерэс лашо ӷрафико важ и дэвликони дила и тэ приритярдёс лэсти. Андэ када ужал, кай тэ ԥирэс пэ христиански встречи и тэ участвуеш андар лэндэ (Евр. 10:24, 25). Если ту ужэ росԥэнэс важ о Дэл вмести ла собранияса, мэк када тожэ авэла андэ тиро ӷрафико. Со май бут ту лэса тэ проповедуеш, со май фартэ тути лэла када тэ чалёл (2 Тим. 4:5). Если ту инке тэрноро и жувэс лэ родителёнэнца, пуш пэстар: «Прижалпэ лэ дадэсти и ла дати вся и время манди тэ ԥэнэн, кай мэ тэ тидавпэ тэ жав пэ собрания или пэ служэния? Или пала када мэ екжэно сэрав?» Кала ԥирэс пэ собрания и росԥэнэс важ о Дэл, ту сыкавэс, кай патяс лэ Иеговасти, любис лэс и блаӷодарно лэсти. Када подаркоря, савэ ту можэш тэ отдэс лэ Иеговасти, — дила, сави сыкавэл, кай ту предано лэсти (Евр. 13:15; 2 Пет. 3:11). Ай кала варисо амэ отдас лэ Иеговасти анда вся оди, када радуий лэс (Диқэн 2 Коринфянам 9:7.) Вся када амэ терас, важ кода кай амэнди чалёл тэ отдас лэ Иеговасти вся, со май лашо.

НА ПАРАШ МАЙ ФАРТЭ ТЭ ЛЮБИС ЛЭ ИЕГОВАС

17, 18. Саво качество поможыя тути, кала тидэспэ тэ болдёс, и васо? (Притчи 3:3—6).

¹⁷ Кала камэс тэ болдёс, тутэ через када моӷут тэ авэн дэсавэ трудности. Савэ? Например, тутар моӷут тэ приасанпэ или дажэ тэ тасавэн пэр тутэ важ тири нэви вера (2 Тим. 3:12). Ай возможно, ту бориспэ, кай тэ улэс и найлащи привычка. Но дэкала ту на вицэлэс андэ кадэя борьба и андярэс пэс нэправильно. Или тути здэлпэ, кай никала на вижала тэ болдёс, и через када ту фартэ помэкэспэ и хасарэс и терпения. Со придэла тути зор вся када тэ виритярэс? Любовь каринг о Иегова.

¹⁸ Тири любовь каринг о Иегова — када со май лашо качество анда всаворэ, савэ тутэ исин. (Проадинон Притчи 3:3—6.) Кода, кай ту фартэ любис лэ Дэвлэс, поможыя тути тэ виритярэс о ԥаримос, саво исин андэ жызня. О Иегова екжэно сыкавэл примеро, сар тэ любисарас. Андэ Библия часто ԥэнэнпэ, кай о Иегова предано любий пэстирэ служытелёнэн. Када сыкавэл, кай нисо нэ можэт тэ одлэл амэндар лэстири любовь и во никала амэн на ашавэла (Пс. 100:5). О Иегова создал амэн кадя, кай амэ тэ шаспэ пэр лэстэ (Быт. 1:26). Сар ту можэш тэ сыкавэс кацави любовь?

19. Со ту можэш тэ стерэс, кай тэ авэс май блаӷодарно лэ Иеговасти пала вся, со во важ тутэ терэл? (Галатам 2:20).

¹⁹ Спэрва, тер вся, кай тэ авэс май блаӷодарно (1 Фес. 5:18). Кажно дес пуш пэстар: «Сар о Иегова сыкадя, кай любий ман?» Ай тоди, кала мангэспэ, на бистэр тэ ԥэнэс лэ Иеговасти «наис» пала кода, со во важ тутэ стердя. Тер кадя, сар о апостало Павло. Дик андэ лэ Дэвлэстири дила и любовь, сави во сыкавэл лично каринг тутэ. (Проадиносар Галатам 2:20.) Пуш пэстар: «Ай мэ камав тэ сыкавав лэ Иеговасти пэстири любовь?» Вой поможыя тути тэ пэрэандярэс разно ԥаримос и тэ на подэспэ лэ бэзэхэсти. Блаӷодаря лати, тутэ вижала кажно дес тэ жувэс па пэско лашо ӷрафико важ и дэвликони дила, и тэ сыкавэс лэ Дэвлэсти, кай любис лэс.

20. Со трэбуй тэ стерэс, кай тэ дэс алав тэ жувэс важ о Иегова, и пэ скати када важно ришэния?

²⁰ Через и время и любовь каринг о Иегова побудия тут тэ обратиспэ каринг лэстэ андэ особо молитва, андэ сави ту ԥэнэса, кай лэса тэ жувэс важ лэстэ. Сэр, кай посли када тутэ авэла райкани возможность, вся и вечность тэ авэс андэ лэско ери. Пэско алав важно тэ зритярэс андэ лащи и андэ найлащи время. Кадэя обещяния дэлпэ кати еқвар. Тэ отдэс пэстири жызня лэ Дэвлэсти — када серьёзно ришэния. Но погиндосар акэ пала со: андэ жызня тути прижалапэ тэ прилэс бут ришэнии. Дэсавэ андар лэндэ авэна лашэ, но ни ек на сыстояпэ кодэлэса, кай тэ отдэс пэстири жызня лэ Иеговасти (Пс. 50:14). О Сатана лэла тэ терэл вся, кай тири любовь каринг пэско небесно Дад тэ авэл май слабо. Во надеийпэ, кай ту парашэса тэ авэс предано лэсти. На домэк, кай о Сатана тэ вицэлэл! (Иов 27:5). Тири бари любовь каринг о Иегова поможыя тэ жувэс кадя, сар дян алав, и кай тири дружба лэ небеснонэ Дадэса, лэ Иеговаса, тэ авэл састи.

21. Васо амэ можэм тэ ԥэнас, кай и крещения када кати начало?

²¹ Посли кода, сар ту дэса лэ Иеговасти алав тэ жувэс важ лэстэ, подэ дума лэ барэдэрэ ԥралэнца андэ тири собрания, кай камэс тэ болдёс. Но сэр, кай и крещения, — када кати начало. Латар залэлпэ тири служэния пэ лэ Иеговаско дром, саво никала нэ закончица. Важ када стов цэли, савэ поможына дес десэстар май фартэ тэ любис пэстирэ небеснонэ Дадэс. Вся када побудия тут тэ болдёс. О дес, кала ту болдёса, важ тутэ авэла райкано. Но на тердюв кати пэ када. Мэк тири любовь каринг о Иегова и каринг лэско Шаво вся и вечность ашэл май бари и май бари!