СТАТЬЯ, КАЙ ТЭ СЫТЮВАС 10
Важ кода кай любис лэ Иеговас, ту закамэса тэ болдёс
«Со ритярэл ман тэ на болдював?» (ДЕЯНИЯ 8:36).
ДИЛИ 37 Служын лэ Иеговасти анда вся ди
ПАЛА СО УӶАНАСА АНДА СТАТЬЯ?a
1, 2. Васо, сар пистромэ андэ Деяния 8:27—31, 35—38, о баро мануш анда Эфиопия, закамля тэ болдёл?
КАМЭС ту тэ болдёс и тэ ашэс лэ Иисусоско ученико? Бут мануша, савэндэ исин любовь и блаӷодарность андо ди каринг о Дэл, ужэ стердэ кадэва шаго. Уӷанам пала ек баро мануш, саво служыяс кай и царица андэ Эфиопия.
2 Через кода, со уӷангля кадэва мануш анда Свынто Писания, во закамля йто варисо тэ стерэл. (Адиносар Деяния 8:27—31b, 35—38c.) Васо кадя? Во цэнияс лэ Дэвлэско Алав, и Писания. Када дицол анда кода, кай во адинояс лэ пророкостирэ алава анда книӷа Исаия, кала ладэлас андо вурдон. И кала лэса подя дума о Филиппо, во поля, со важ лэстэ стердя о Иисус Христос. Но васо кадэва эфиопско мануш ездияс андо Иерусалимо? Важ кода кай лэстэ андо ди ужэ сас любовь каринг о Иегова. Катар амэ када ӷанас? Во авэлас андо Иерусалимо, кай тэ тэлёл лэ Иеговасти. Дицол, кай во ашадя кода, сар полэнас лэ Дэвлэс лэстирэ папоря и ля тэ служый еқэ народоса, саво тэлёлас лэ чачунэ Дэвлэсти. Важ кода кай во любияс лэ Иеговас, во закамля тэ стерэл инке ек важно шаго, када тэ болдёл и тэ ашэл лэ Иисусоско ученико (Матфея 28:19).
3. Со амэн можэт тэ ритярэл тэ на болдювас? (Диқэн и рамка «Савя ԥувьяса можно тэ сыстос тиро ди?».)
3 Важ кода кай любис лэ Дэвлэс, ту можэш тэ закамэс тэ болдёс. Но и любовь можэт и тэ на домэкэл тэ болдёс. Амэ можэм кадя фартэ тэ любисарас лэ друӷонэн чи лэ родос, савэ на служын лэ Иеговасти, кай ласа тэ гиндосарас: «Кала мэ болдювава, вонэ мандар одбандёна» (Матфея 10:37). Ай можэт амэн ритярэн и привычки, савэ о Иегова вэрыцый, и амэнди ԥарэс тэ парудювас и тэ жувас кадя, сар чалёл лэ Иеговасти (Псалом 97:10). Можэт амэ инке жы бэятостар любисарас и празникоря и законоря, савэ жан ла хохавня вератар. Кала амэ пала лэндэ гиндосарас, амэнди драго по ди. Хоть амэ ӷанас, кай вонэ на чалён лэ Иеговасти, амэнди ԥарэс лэндар тэ отԥэндювас (1 Коринфянам 10:20, 21). Но трэбуй тэ витидас, со чи кас амэ любисарас май фартэ.
КАС ТРЭБУЙ ТЭ ЛЮБИС СО МАЙ ФАРТЭ?
4. Сави само ӷлавно причина трэбуй тэ авэл, кай ту тэ закамэс тэ болдёс?
4 Исин бут, васо тэ авэс блаӷодарно и тэ любис. Можэт, ту инке на диқлянаспэ лэ Иеговастирэ свидетелёнэнца, ай ужэ стосас патив пэ Библия. И ужэ любисас лэ Иисусос. Ай кала уӷанглян лэ Иеговастирэ свидетелёнэн, тути чалеля лэнца тэ дэс дума. Хоть тути када вся чалёлас, када на сыкавэл, кай ту закамэса тэ дэс алав лэ Иеговасти тэ жувэс важ лэстэ и тэ болдёс. Ӷлавно, васо ту трэбуй тэ закамэс тэ болдёс, када, кай любис лэ Иеговас. Если ту любис лэ Иеговас со май фартэ пэ люма, ту на домэкэса, кай варисо чи варико тэ на дэл тути тэ служыс лэсти. И любовь каринг о Иегова, када сар и вороты, савэ ԥэрнадён каринг о дром, кай тэ болдёс. Кадя жэ и любовь, сар о заборо, саво фэрий, кай тэ на змардёс па лэ Дэвлэско дром и тэ на парашэс тэ кандэс лэс.
5. Со амэ уӷанаса анда кадэя статья?
5 О Иисусо ԥэндя, кай амэ трэбуй тэ любисарас лэ Иеговас всаворэ одеса, всаворя жызняса, всаворя годяса и всаворэ зорэса (Марка 12:30). Сар тэ сытювас кадя тэ любисарас лэ Иеговас? Кала гиндосараса, сар фартэ амэн любий о Иегова, тоди амэ ласа лэс фартэ тэ любисарас (1 Иоанна 4:19). Анда кадэя статья амэ уӷанаса, со трэбуй тэ терас, кай тэ любисарас инке май фартэ лэ Иеговас и тэ болдювас.
6. Сар ту можэш тэ уӷанэс пала о Иегова, сар запистромэ андэ Римлянам 1:20?
6 Уӷан пала Иегова через кода, со во стердя. (Адиносар Римлянам 1:20d; Откровение 4:11.) Шув сама пэ жывотни, пэ кода, со барёл, и сытюв тэ диқэс и мудрость кодэлэсти, ко вся када годявэрнэс стердя. Май бут уӷан, сар дэ интересно создано о мануш (Псалом 139:14). Погиндосар, саво дэ баро зор кай о Қам, хоть во найбари черӷай, ек анда милиардоря (Исаия 40:26)e. Кала ту пала када гиндос, ту лэса тэ стос май бари патив по Иегова. Но тэ ӷанэс, кай о Иегова зорало и мудро, када най вся, со трэбуй, кай тэ авэл бари любовь каринг о Иегова и тэ ашэс лэстирэ друӷоса. Трэбуй инке май бут пала лэстэ тэ уӷанэс.
7. Андэр со трэбуй тэ патяс, кай май фартэ тэ любис лэ Иеговас?
7 Ту трэбуй тэ патяс, кай о Иегова любий тут. Ԥарэс тэ патяс, кай кодэва, ко стердя о нэбо и ԥув, ӷанэн тут и драго заботийпэ пала тутэ? Если кадя, сэр, кай о Иегова «найдур кажнонэстар амэндар» (Деяния 17:26—28). Во «роздиқэл, со кажнонэстэ андо ди», и ту кадяжэ можэш тэ прилэс каринг пэстэ и алава, савэ о Давидо ԥэндя пэстирэ шавэсти лэ Соломоности: «Сар ту лэса тэ родэс лэс [лэ Дэвлэс], во домэкэла, кай ту тэ виарақэс лэс» (1 Летопись 28:9). Ту лян тэ сытёс па Библия, важ кода кай кадя закамля о Иегова. Во ԥэндя: «Мэ ақардэм тут каринг пэстэ» (Иеремия 31:3, када пэрэандярдэ анда Библия па английско шыб, сави вимэклэ андо 2013 бэрш). Со май фартэ ту цэнис кода, со важ тутэ терэл о Иегова, со май фартэ ту лэса лэс тэ любис.
8. Сар тэ сыкавэс, кай цэнис лэ Иеговастири любовь?
8 Сар тэ сыкавэс, кай цэнис кода, кай тут любий о Иегова? Трэбуй тэ дэс дума лэса андэ молитва. Ту лэса тэ любис лэ Иеговас май фартэ, кала лэса тэ росԥэнэс лэсти, васо пэрэжываеш и тэ блаӷодарис лэс пала вся, со во важ тутэ терэл. Тири дружба лэ Иеговаса авэла май лащи, кала ту лэса тэ диқэс, кай во ашунэл тирэ молитвы (Псалом 116:1). Ту патяса, кай во тут полэл. Но кай тэ авэс май пашэ каринг о Иегова, кадяжэ трэбуй тэ полэс, сар во гиндой. И трэбуй тэ ӷанэс, со во тутар аштярэл. Вся када ту полэса кати тоди, кала сытёса па Библия.
Кала сытёс па Библия, када поможыя тэ дружыс лэ Иеговаса и тэ уӷанэс, со во тутар аштярэл (Диқэн о абзацо 9.)i
9. Сар тэ сыкавэс, кай важ тутэ куч и Библия?
9 Сытюв тэ цэнис лэ Дэвлэско Алав и Библия. Кати и Библия росԥэнэн о чачимос важ о Иегова и пала кода, со во камэл тэ стерэл важ и мануша. Сар тэ сыкавэс, кай важ тутэ куч и Библия? Адиносар ла кажно дес и ӷотовься каринг и изучения, сави туса проандярэл ек анда свидетеля. Тер кадя, сар уӷанглян (Псалом 119:97, 99; Иоанна 17:17). Тутэ исин ӷрафико, па саво адинос и Библия? Адинос ту пар лэстэ? Вижал тутэ кажно дес тэ адинос и Библия?
10. Соса и Библия на шолпэ ни пэ ек книӷа?
10 И Библия на шолпэ ни пэ ек книӷа, важ кода кай кати андэр латэ запистромэ думы лэ манушэндар, савэ диқлэ лэ Иисусос Христос. Када ек книӷа, савяти можно тэ патяс и андэ сави росԥэнэнпэ, со о Иисусо стердя важ и мануша. Кала лэса тэ адинос пала кода, со ԥэнэнас и терэлас о Иисусо, ту закамэса лэса тэ дружыс.
11. Сар тэ сытёс тэ любис лэ Иеговас?
11 Сытюв тэ любис лэ Иисусос, и ту май фартэ полюбиса лэ Иеговас. О Иисусо андэ вся шоласпэ пэ пэско Дад (Иоанна 14:9). И со май бут ту лэса тэ уӷанэс пала о Иисусо, со май драго полэса лэ Иеговас и май фартэ лэса лэс тэ любис. Погиндосар, сар о Иисусо полэлас лэ манушэн, савэн авэр вэрыцынас, важ кода кай вонэ сас чорорэ, насвалэ и би зорэско. Сгиндон пала кода, савэ во дэл советоря важ и жызня и пала кода, сар парудёл тири жызня андэ лащи риг, кала прилэс кадэла советоря (Матфея 5:1—11; 7:24—27).
12. Со ту закамэса тэ терэс, кала май бут уӷанэса пала Иисусо?
12 Ту лэса май фартэ тэ любис лэ Иисусос тоди, кала лэса май бут тэ гиндос, кай во отдя пэстири жызня важ тутэ, кай тэ витинэл тут. Кати блаӷодаря лэсти тирэ ӷрехоря простинпэ (Матфея 20:28). И кала ту када полэса и прилэса каринг оди, тоди ту закамэса тэ каиспэ и закамэса, кай о Иегова тэ простий тиро бэзэх (Деяния 3:19, 20; 1 Иоанна 1:9). Ай кала ту лэса тэ любис лэ Иеговас и лэ Иисусос, ту закамэса тэ проандярэс и время кодэлэнца, ко лэн любий.
13. Пала со о Иегова позаботисайля?
13 Сытюв тэ любис лэ Иеговастирэ ерес. Можэт тиро ери и тирэ друӷоря на полэн, васо ту камэс тэ болдёс. Вонэ дажэ моӷут тэ терэн вся, кай ту када тэ на стерэс. Но о Иегова позаботисайля, кай тутэ тэ авэл ери, саво патял туса андо ек Дэл. Сар тутэ лащи дружба лэ ԥралэнца и лэ ԥэянца анда собрания, тоди вонэ тут подритярэна, кала тутэ авэла ԥари время (Марка 10:29, 30; Евреям 10:24, 25). Прожала время и можэт тирэ чаче кадяжэ закамэна тэ служын лэ Иеговасти и тэ жувэн па лэстирэ законоря (1 Петра 2:12).
14. Со ту уӷанглян анда 1 Иоанна 5:3 пала лэ Иеговастирэ законоря?
14 Сытюв тэ стос патив пэ Иеговастирэ законоря и тэ жувэс пар лэндэ. Жы каринг кода, сар ту тэ уӷанэс лэ Иеговас, ту жувэсас кадя, сар тути чалёлас. Но акана ту полэс, пэ скати дэ драго тэ жувэс пэ Дэвлэстирэ законоря (Псалом 1:1—3; адиносар 1 Иоанна 5:3f). Погиндосар, савэ советоря андэ Библия пистромэ важ о хулай и хулаи, важ и дада и дэя, и бэяцэ (Эфесянам 5:22—6:4). Паруделя тиро ери андэ лащи риг, кала ту лян тэ прилэс и советоря анда Библия? Ашэлян ту май лашо, кала ту канглян лэ Иеговас и лян драго тэ витидэс лэ друӷонэн? Ашэлян ту май бахтало? (Притчи 13:20; 1 Коринфянам 15:33). Канешно, ту ԥэнэса «да».
15. Со дэла зор тути тэ жувэс па лэ Дэвлэстирэ принцыпоря?
15 Дэкала тути можэт тэ авэл ԥарэс тэ полэс, сар тэ жувэс па лэ Дэвлэстирэ принцыпоря. О Иегова када ӷанэн и важ када во дэл через пэстири арӷанизацыя библейско литература, видео и библейско литература андо интэрнэто. Када поможыя тэ полэс «со лашо, ай со най» (Евреям 5:13, 14). Кала ту лэса тэ адинос када вся, ту додиқэса, пэ скати вонэ лашэ и саво лашимос лэндар авэла. Тоди ту закамэса тэ авэс андэ лэ Иеговастири арӷанизацыя.
16. Со о Иегова стердя, кай драго тэ диқэн пала лэско народо?
16 Сытюв тэ любис и тэ кандэс кода, со ԥэнэн лэ Иеговастири арӷанизацыя. О Иегова стидя пэстирэ служытелёнэн андэ собрании. Ай пэстирэ Шавэс, лэ Иисусос стодя, кай во тэ авэл ӷлава пэ кадэла собрании (Эфесянам 1:22; 5:23). О Иисусо ԥэндя найбутэ манушэнди, лэ памазаниконэнди, тэ диқэн пала дила, сави трэбуй тэ терэн андэ амарэ деса. Во ԥэндя пэ кадэла мануша «годявэрно и кандино рабо». Кадэла ԥрала драго терэн пэстири дила. Вонэ дэн литература, андэ сави пистромэ важ о Дэл и фэрин тири дружба лэса (Матфея 24:45—47). О годявэрно и кандино рабо заботийпэ пала мануша андэ собрании, и када дицол, кай андэ собрании исин старейшыноря, савэ сытярэн и фэрин лэ манушэн (Исаия 32:1, 2; Евреям 13:17; 1 Петра 5:2, 3). Старейшыноря терэн вся, кай тэ подритярэн и поможын, кай ту тэ ашэс лэ Иеговаско друӷо. Но со май ӷлавно, вонэ поможын, кай ту тэ росԥэнэс лэ манушэнди пала о Иегова (Эфесянам 4:11—13).
17. Васо, сар пистромэ андэ Римлянам 10:10, 13, 14, ту росԥэнэс аврэнди важ о Иегова?
17 Сытяр аврэн тэ любин лэ Иеговас. О Иисусо ԥэндя, кай лэстирэ ученикоря трэбуй тэ росԥэнэн аврэнди пала Иегова (Матфея 28:19, 20). Ту можэш када тэ терэс, важ кода кай кадя трэбуй. Но сар лэса тэ любис лэ Иеговас май фартэ, тутэ авэла по ди кода, со сас кай и апостолоря Пётро и Иоанно. Вонэ ԥэндэ: «Амэ нэ можэм тэ парашас тэ росԥэнас пала кода, со диқлям и со ашундям» (Деяния 4:20). Нисо на сыстоса кодэла радостяса, сави по ди, кала поможыс лэ манушэсти тэ полюбий лэ Иеговас. Представь пэсти, сар радуияспэ о Филиппо, кала поможысардя лэ эфиопсконэ манушэсти тэ уӷанэн о чачимос важ о Дэл и тэ болдёл. Кала ту терэса, сар о Филиппо, кандэса лэ Иисусос и жаса тэ росԥэнэс важ о Дэл, тоди ту сыкавэса, кай камэс тэ ашэс лэ Иеговастирэ свидетелёса. (Адиносар Римлянам 10:10g, 13, 14h.) И тоди ту ԥэнэса, сар кодэва эфиопско мануш: «Со ритярэл ман тэ на болдював?» (Деяния 8:36).
18. Пала со уӷанаса анда авэр статья?
18 Тэ болдёс, када со май ӷлавно андэ тири жызня. Важ када драго погиндосар акэ пала со. Со сыкавэл, кала о мануш болдёл? Со трэбуй тэ терэс англа кода, сар тэ болдёс? Со трэбуй тэ терэс посли кода, сар болдёса? Пала кадэла вопросоря, уӷанаса анда авэр статья.
ДИЛИ 2 Тиро алав Иегова
a Дэсавэ мануша любин лэ Иеговас, но на ӷанэн, камэн вонэ тэ болдён и тэ ашэн лэ Иеговастирэ свидетеля чи най. Файма, и ту кадя гиндос. Андэ кадэя статья, амэ диқаса советоря, савэ поможына тути тэ стерэс кадэва важно шаго.
b Деяния 8:27—31: «Во ущеля и жыля. Котэ во додиқля эфиопсконэ манушэс, саво служыяс кай и эфиопско царица кандакия, и диқэлас пала латирэ ловэ. Во авеля андо Иерусалимо, кай тэ тэлёл лэ Дэвлэсти, ай акана ладэлас андо вурдон и адинояс кадя, кай тэ ашундёл, со пистросардя о пророко Исаия. О духо ԥэндя лэ Филиппости: „Доӷонисар кодэва вурдон“. И о Филиппо прастая. Кала во поднашля, ашундёлас, кай о эфиопско мануш адиной кода, со пистросардя о пророко Исаия, и о Филиппо пушля: „Ту полэс кода, со адинос?“ Кодэва ԥэндя: „Сар мэ полава, если манди нико на росԥэнэна?“ И во мангля, кай о Филиппо тэ бэшэл лэса андо вурдон».
c Деяния 8:35—38: «О Филиппо ля тэ дэл дума и, заля тэ росԥэнэн лэсти лащи весть важ о Иисусо. Через дэсави время вонэ подлаглэ каринг о паи, и о евнухо ԥэндя: „Акэ о паи, со ритярэл ман тэ на болдював?“ Во ԥэндя тэ тердярэл о вурдон, и вонэ лэдуй, о Филиппо и о евнухо, зажылэ андо паи, и во болдя лэс».
d Римлянам 1:20: «Лэстирэ качестворя, савэ и мануша нэ моӷут тэ диқэн, када лэско зор, саво вечно и кода, кай во Дэл. Вся када драго дицол кодэла времятар, сар во создал и люма, важ кода кай лэн ӷатярэн через кода, со во создал. Пэ када лэ манушэнди най со тэ ԥэнэн».
e Пала авэр примероря адинон андэ брашуры «Была ли жизнь создана?» и «У истоков жизни. Пять вопросов, которые требуют ответа».
f 1 Иоанна 5:3: «Важ кода любовь каринг о Дэл дицол андэ кода, кай амэ ритярас лэско законо и лэско законо найԥаро».
g Римлянам 10:10: «Важ кода кай, кала о мануш лэ одеса патял андо Дэл, во кандэл лэс, ай кала во росԥэнэн аврэнди кода, андэр со патял, во спасыяпэ».
h Римлянам 10:13, 14: «Кажно, ко ақарэл лэ Иеговас па алавэстэ, спасыяпэ. Но сар тэ ақарэн кодэлэс, андэр кастэ на патяе? Сар тэ патян андэ кодэва, пала кастэ на ашундэ? И сар тэ ашунэн би кодэлэско, ко росԥэнэн?».
i ПЭ КАРТИНКА. И ԥэй дэл буклето тэрня манушняти, сави битинэл по базаро.