1 Пётро

5 Кочай мэ взвисавав каринг и барэдэр ԥрала машкар тумэндэ — важ кода кай мэ тожэ барэдэр ԥрал, диқлэм лэ Христоско ԥаримос и бида и вместе тумэнца получисарава и блаӷословения, сави ӥто дицола, — и мангав: 2 пасын лэ Дэвлэско стадо, пала саво тумэнди дино тэ диқэн, и сар барэдэр ԥрала* терэн кадэя дила най кай варико заставий тумэн, ай анда вся ди, важ кода кай када уӷодно лэ Дэвлэсти. Но на́ старыинпэ тэ родэн важ пэстэ варисави выӷода, ай пристон вся о зор, 3 на́ хулаин пэ кодэла, ко прижал лэ Дэвлэсти*, ай подэн примеро лэ бакрэнди. 4 И кала сыкадёла о ӷлавно пастухо, тумэнди дорэсэлапэ вечно бахтали блаӷословения*.

5 Точно кадя жэ и тумэ, тэрнэ ԥрала, кандэн лэ муршэн, савэ май барэдэр тумэндар*. Ай всаворэ тумэ авэн найабуримастирэ ек еқэса, важ кода кай о Дэл дурёл кодэлэндар, ко путярдо, ай пэ кодэла, ко найабуримаско, здиқэл па пэско баро ковло ди.

6 Важ када тэлён тала лэ Дэвлэско зорало вас, кай во тэ ваздэл тумэн андэ пэстири время. 7 Пэрэшон* пэр лэстэ вся, пала со пережываете, важ кода кай во заботийпэ пала тумэндэ. 8 Старыинпэ здраво тэ гиндон, авэн осторожни*! Тумаро вороӷо, о Бэнг, ԥирэл сар о лево, саво рычий, и родэл, кас тэ астарэл*. 9 Ашэнпэ састэ андо патяимос, кай тэ боринпэ лэса, важ кода кай тумэ ӷанэн, кай кадя жэ мучинпэ всаворэ тумарэ ԥрала па вся и люма. 10 Ай о Дэл, савэстэ фартэ баро ковло ди, через о Христос ақардя тумэн тэ авэн ашунглэ вся и вечность. Посли кода сар тумэ набут пэрэандярэна о ԥаримос и бида, о Дэл екжэно поможыя тумэнди андэ вся тэ досытён. Во састярэла тумэн, придэла зор и поможыя тэ ашэнпэ састэ андэ ԥари время. 11 Мэк вся о зор прижал лэсти о вико вечно. Аминь.

12 Через кадэва найбаро письмо, саво манди поможысардя тэ пистросарав о Силуа́но*, кандино* ԥрал, мэ камлэм тэ подритярав тумэн и тэ придав тумэнди зор тэ патян, кай о Дэл чаче здиқля пэр тумэндэ па пэско баро ковло ди. Састэс ритярдён пала када. 13 Пэрэдэл тумэнди поклоно кодэя, сави андо Вавило́но и савя, сар и тумэн, витидя о Дэл, ай кадяжэ о Марко, мэрно шаво. 14 Анда ди чуминдэн ек еқэс, кала здоровкиинпэ.

Тэ авэл мирно жызня тумэнди, всаворэнди, кастэ ек гиндо лэ Христоса.