Родэ помощь
«Ек еқэс можэт тэ победий, ай дуйжэнэ смоӷут тэ одмардён» (Экклезиаст 4:12).
ТЭ ПОБЕДИС любонэ вороӷос май вушэро, кала тути поможын лашэ друӷоря. Кай тэ победис и цыӷарки, трэбуй помощь лэ ереско и лэ друӷонэнго или инке варикаско, ко анда ди и терпеливо тут подритярэла.
Уӷан, ко анда кодэла кас ту ӷанэс, ужэ мэкля кадэя привычка. Кацаво мануш най кати полэла тут, но и поможыя тути. «Мандэ на вижылоп тэ мэкав тэ цырдав, если бы авэр на подритярдоп ман» — ԥэнэн Торбено, христианино анда Дания. Ай акэ со ԥэнэн Эйбрахама анда Индия: «Манди придя зор кода, кай мэрно ери и друӷоря анда собрания подритярэнас ман анда вся оди». Но дэкала, дажэ кала тут подритярэл о ери и друӷоря, када всаек на хутилэл.
«Мэ цырдавас 27 бэрш,— ԥэнэн мурш, савэс ақарэн Бхагвандасо, — но кала уӷанглэм анда Библия, кай англа Дэл кадэя найлащи привычка када бэзэх, мэ ришыл тэ мэкав тэ цырдав. По набут мэ лэм тэ цырдав цыӷарки май мало, парудэм мэрно круӷо, каса проандяравас и время и родавас совето — но нисо на поможыяс. Но еқвар и рят, мэ росԥэндэм вся, со сас мандэ по ди, лэ Иеговасти андэ молитва и фартэ манглэм лэс тэ поможый манди. И мэ победисардэм кадэя привычка!»
Инке ек важно маменто — ту трэбуй тэ авэс ӷотово каринг и ԥарэ маменторя, савэ моӷут тэ авэн, кала ту лэса тэ мэкэс тэ цырдэс. Пала када дума жала андэ авэр статья.
[Рамка]
ТРЭБУЙ МАНДИ ДРАБА ЧИ АВЭР ЛЕКАРСТВА, САВЭ ПОМОЖЫН ТЭ МЭКЭН И ЦЫӶАРКИ?
Адес фартэ часто мануша тинэн кацавэ драба или авэр варисо, например, никотиново пластырё, кай тэ мэкэн и цыӷарки. Кодэлэнди, ко када битинэн када анэн фартэ барэ ловэ, бут милиардоря. Но всаек англа кода, сар тэ тинэс пэсти варисо кацаво, шув сама пэ вопросоря, савэ май тэлэ.
Сави польза лэндар? Часто гиндон, кай кацавэ средства поможын, кай лэ манушэсти тэ авэл май вушэро тэ пэрэжувэл кодэва маменто, кала во мэкэл цыӷарки. Но най всаворэ соӷласинпэ, кай када поможый пэ долӷонэстэ.
Саво вредо лэндар? Дэсавэ средства моӷут тэ анэн кацаво вредо, кай манушэс можэт тэ тошний, тэ появийпэ депресия и дажэ гиндоря тэ умарэл корко пэс. Кадяжэ трэбуй тэ полас, кай андэ средства, савэ заменяют о никотино, саво андэ цыӷарки, андэр лэндэ всаек исин о никотино, просто андэ авэр форма. Вижал, мануш всаек рискует пэстирэ зорэса и вижал лэстэ всаек ашэлпэ зависимость лэ никотиностар.
Сар па аврятэ тэ мэкэс тэ цырдэс? Кала пропушлэ бутэ манушэн, вижыля кай 88 процэнторя андар лэндэ парашэлэ тэ цырдэн резко и на прилэнас нисавэ драба чи авэр средства важ када.