Мэ ашадэм бут со, кай тэ жав пала Господо

СО СТЕРДЯПЭ, кай мэ трэбуй сас тэ витидав? Камав тэ росԥэнав тумэнди пала када. Мэ арақаделэмпэ 29 июля андо 1929 бэрш. Мэ вибарелэм андэ гавэстэ, саво сас андо Булакано (Филиппины). Андэ страна, кай амэ жувасас, андэ кодэя время, сас ԥарэс лэ ловэнца, важ када амэ жувасас просто. Кала мэ сымас бэятоса, японско армия зажыля андэ Филиппины и ля тэ жал война. Но амаро гаворо сас дур аврэ гавэндар, и важ када война на сас амэндэ. Пала война амэ уӷанасас аврэ манушэндар, важ кода кай амэндэ на сас радио, телевизоро и газеты.

Андо ери амэндэ сас восемь бэятонэн. Мэ сымас дуйто. Кала манди сас восемь бэрш, о папо и баба линэ ман каринг пэстэ тэ жував лэндэ. Амэ самас католикоря. Но мэрнэ папости чалёлас тэ дэл дума пала авэр веры и тэ лэл лэндири литература, сави лэсти дэнас лэстирэ другоря. Мэ сэрав, сар во сыкадя манди и брошюры «Защита», «Безопасность» и «Раскрытие» пэ тагальско шыбa, ай кадяжэ и Библия. Манди чалёлас тэ адиносарав ла, но май фартэ тэ адиносарав Евангелия. Важ када мэ и закамлэм тэ терав кадя, сар о Иисусо (Иоан. 10:27).

СЫТЮВАВ ТЭ ЖАВ ПАЛА ГОСПОДО

Андо 1945 бэрш японско армия жылятар анда Филиппины. Варикай андэ кадэя же время и родителя манглэ ман тэ рисавав цэрэ. И мэрно папо кадяжэ камэлас, кай мэ тэ рисавав, и мэ канглэм лэн.

Йто после када, андо декабрё андо 1945 бэрш, андэ амаро гав росԥэнэнас важ о Дэл лэ Иеговастирэ свидетеля, савэ сас анда форо Ангато. Каринг амэндэ авеля ԥуро мануш, лэ Иеговаско свидетелё, и росԥэндя, кай андэ Библия ԥэнэнпэ пала «послидни деса» (2 Тим. 3:1—5). Во ақардя амэн тэ сытювас анда Библия, и када прожалас андо пашутно гаворо. Мэрнэ родителя на закамлэ интя тэ авэн, ай мэ жылэм. Котэ стидэпэ 20 мануш, и дэсавэ пушэнас, со ԥэнэнпэ андэ Библия.

Мэ най фартэ полавас, пала со вонэ дэнас дума, и камавас тэ ужавтар. Но акэ, вонэ линэ тэ дилабэн дили важ о Дэл. Када манди кадя чалеля, кай мэ закамлэм тэ ашавпэ. После дили и после молитва всаворэн ақардэ пэ собрания пэ авэр курко андо форо Ангато.

Дэсавэнди прижыляпэ тэ жан пешком чуть най восемь километроря, кай тэ дожан каринг о цэр, кай жувэлас о ери Крусо, кай прожанас и христиански собрании. Котэ стидяпэ варикай 50 мануш. Манди фартэ чалеля, кай даже и бэятцэ ӷанэнас, со тэ ԥэнэн анда Библия, кала сас трэбуй када тэ терэн. После кода, сар мэ сымас най пэ ек собрания, ек ԥуро ԥрал Дамиано Сантосо, саво сас пионеро, ақардя ман каринг пэстэ, ай инке, кай тэ рятярав лэстэ. Амэ продям дума пала Библия чуть най вся рят.

Андэ кодэя время бут, ко лэлас тэ служий лэ Дэвлэсти, хоть и ӷанэнас кати кода, со главно андэ Библия. После кода, сар мэ най еқвар сымас пэ собрания, и ԥрала пушлэ мандар и пушлэ кай авэр мануша: «Камэн тумэ тэ болдён?» Мэ ԥэндэм: «Да». Мэ камавас тэ служисарав лэ Христости, сар о рабо пэстирэ хуласти (Кол. 3:24). 15 февраля андо 1946 бэрш, амэ жылям каринг и лэн, сави сас найдур и ек ԥрал болдя амэн.

Мэ полавас, кай кодэла, ко болделэ, трэбуй тэ на промэкэн тэ росԥэнэн пала Дэл, сар када терэлас о Иисусо. Када на чалеля мэрнэ дадэсти. Во ԥэндя: «Ту фартэ тэрноро сан, кай тэ росԥэнэс важ о Дэл. И кода, кай тут стодэ андо паи на дя тути, кай ту тэ росԥэнэс важ о Дэл». Мэ ԥэндэм лэсти, кай кадя камэл о Дэл. Во камэл, кай амэ тэ росԥэнас лащи весть пала лэско Царство (Матф. 24:14). Мэ ԥэндэм лэсти: «Мэ трэбуй тэ зритярав пэско алав, саво мэ дэм лэ Дэвлэсти». После када о дад ԥэндя алава, савэ сас пистромэ май упрэ, андэ кадэя статья. Во на домэкэлас, кай мэ тэ росԥэнав важ о Дэл. Када сас мандэ пэрво разо, тэ ашавав кода, со сас важ мандэ куч, кай тэ служисарав лэ Иеговасти.

О ери Крусо прилинэ ман андэ пэско цэр, андо форо Ангато. Вонэ бут со терэнас, кай мэ и лэндири щей Нора, тэ лас тэ служисарас пионеронэнца. Амэ лэдуй лям кадя тэ служисарас 1 ноября андэ 1947 бэрш. И Нора лаглятар тэ росԥэнэн важ о Дэл андэ авэр форо, ай мэ ашэлэмпэ тэ росԥэнав важ о Дэл андо Ангато.

МАНДИ ПРИЖЫЛЯПЭ ИНКЕ БУТ СО ТЭ АШАВАВ, НО МЭ КАМАВАС КАДА ТЭ ТЕРАВ

Еқвар Эрло Стьюарто, када о ԥрал анда филиало, вижыля тэ росԥэнэн речь англа всаворэ, андо форо Ангато. Котэ лэс ашунэнас май бут чем 500 мануша. Мэ андэ кодэя время сымас пионероса уже трито бэрш. О ԥрал Стьюарто дэлас дума пэ английско шыб, ай мэ пэрэандяравас лэстири речь пэ тагальско шыб. Мэ сытелэм андэ школа кати семь классоря. Но мэрнэ учителёря май бут дэнас дума пэ английско шыб. Инке, манди поможысардя тэ висытював английско шыб кода, кай библейско литература пэ тагальско шыб сас набут. Важ кода мэ бут адиносаравас пэ английско. И када поможысардя манди драго тэ полав и тэ дав дума пэ английско шыб, кай тэ пэрэандярав лэ ԥралэндирэ речи и речь лэ ԥралэсти Стьюартостири.

Андэ кодэва дес, кала мэ пэрэандяравас лэ Стьюартостири речь, во заля дума лэ ԥралэнца анда катутни собрания, кай трэбуй ек или дуй ԥрала пионероря тэ поможын андо Вефилё. Важ кода кай и миссионероря ладэнас по конгрессо «Рост теократии», кай прожалас андо 1950 бэрш андо форо Нью-Йорко (США). Машкар кодэла, кас ақардэ, сымас и мэ. Упалэ манди трэбуй сас тэ ашавав каринг со мэ сытелэм, кай тэ служисарав лэ Иеговасти андо Вефилё.

Мэ лэм тэ служисарав андо Вефилё 19 июня андо 1950 бэрш. О Вефилё андэ кодэя время сас андо пурано цэр, вокруг лэстэ слинэ барэ витки. Андэ лэ Вефилёстири града сас ек гектаро. Андо филиало терэнас дила варикай дэш ԥрала. Тэсара мэ поможысаравас пэ кухня, ай тоди, варикай после 9 часов, мэ гладисаравас и кирпы. И андэ авэр епаш дес мэ кадэлэса же залаваспэ. Даже, кала и миссионероря рисайлэ па международно конгрессо, мэ всаек служисаравас андо Вефилё. Мэ стидавас и журналоря, кай тэ бишалэн лэн пэ почта, теравас дила с подписками. Ай кадяжэ теравас дила андэ комната каринг авэнас и мануша, кай тэ диқэн о филиало. Любо дила, сави манди дэнас тэ терав, мэ теравас.

АШАВАВ ФИЛИППИНЫ, КАЙ ТЭ СЫТЮВАВ АНДЭ ШКОЛА ГАЛААД

Андэ 1952 бэрш ман и инке шовэн ԥралэн анда Филиппины ақардэ тэ сытювас андо 20 классо андэ Школа Галаад. Андэ США бут со сас нэво. Катэ бут со сас най кадя, каринг со мэ сытелэм андэ пэско гав.

Амэндэ, андэ цэра и андэ кухня, бут со на сас кацаво, со сас лэндэ. И амэнди прижыляпэ тэ сытювас кадэлэсти. Инке катэ сас авэр погода. Еқвар тэсара мэ вижылэм аврял, ай котэ сас вся парно! Кадя мэ пэрво разо диқлэм ив. Во сас фартэ шукарно. Ай инке мэ полэм, кай во шудро, фартэ шудро!

Кода, каринг со мэ на сытелэм андэ пэстири страна, на сас важ мандэ проблема, важ кода кай пэ пэрво ҭан мандэ сас тэ сытював андэ Школа Галаад. Манди фартэ чалёлас котэ тэ сытював. Кодэла, ко амэн сытярэнас, сас фартэ лашэ учителёря. Вонэ сытярэнас амэн, сар тэ сытювас и со тэ терас, кай май драго тэ полас, со уӷанас. Кода, кай мэ сытелэм андэ Школа Галаад поможысардя манди тэ авав май лашо лэ Иеговаско друго.

Сар мэ прожылэм Школа Галаад, ман стодэ тэ служисарав специальнонэ пионероса андо Бронксо, саво сас андо форо Нью-Йорко. Андо 1953 бэрш, кадяжэ андо Бронксо, мэ сымас по конгрессо «Общество нового мира». После о конгрессо ман бишалдэ палпалэ тэ служисарав андэ Филиппины.

АШПЭ, ЛАШО ФОРО!

Ԥрала андо филиало ԥэндэ манди: «Ту авэса районно надзирателё». Кадэя служения поможысардя манди инке май драго тэ терав кадя, сар о Иисусо, тэ ладав андэ дурутнэ фороря, форо форэстар, кай тэ поможысарав лэ Дэвлэстирэ манушэнди (1 Пет. 2:21). Мэрно районо сас по Лусоно. Во само баро острово андэ Филиппины. Андэ кадэва районо ужанас Булакано, Нуэва-Эсиха, Тарлако и Самбалесо. Кай тэ попэрав андэ дэсавэ фороря, манди сас трэбуй тэ прожав и плая Сьерра-Мадре, савэ анда бара. Кордэ на ладэнас нисавэ автобусоря, ни поездоря. Тоди мэ мангавас лэ водителёнэн, савэ ԥиравэнас и кашта, кай вонэ ман тэ подындярэн интя. Кала мэ ладавас, мэ бэшавас пэ кашта. Бут разоря вонэ лэнас ман, но када сас фартэ ԥарэс.

Котэ, кай мэ служисаравас и собрании слинэ найбарэ и нэвэ. Важ када и ԥрала сас благодарни, кай поможысаравас лэнди май драго тэ проандярэн и собрания и кай тэ жан кордэ, кай трэбуй сас тэ росԥэнэн важ о Дэл.

Прожыля время и манди динэ авэр районо, андэ саво ужалас вся Бикольско регионо. Кардэ авелэ специальни пионероря, савэ котэ линэ пэрви тэ росԥэнэн важ о Дэл. Катэ вонэ стидэ группы, савэ сас би ла собранияко. Кай тэ прожанпэ важ пэстэ, лэндэ сас кати яма, пэ сави пашлёнас дуй кашта. Мэ терделэм пэ кадэла дуй кашта, и вонэ пэлинэ андэ кадэя яма, ай пала лэндэ пэлэм и мэ! Манди сас трэбуй бут время, кай тэ вихаладював, кай тэ авав кордэ, кай всаворэ бэшэнас ханас.

Сар мэ служисаравас котэ, мэ лэм часто тэ гиндосарав пала Нора, савяса амэ лям тэ служисарас пионеронэнца. Акана вой уже сас специально пионеро андо форо Думагето. Мэ сымас латэ, кай тэ диқав ла. Тоди дэсави время амэ пистросарасас ек аврэсти. И акэ андо 1956 бэрш амэ женисайлям. После ябьяв, сар прожыля курко, амэ лаглям андэ собрания, сави сас по острово Рапо-Рапо. Амэ прожасас через и плая и бут ԥирасас пешком. Амэнди чалёлас тэ поможысарас амарэ ԥралэнди, савэ жувэнас дур.

УПАЛЭ АНДО ВЕФИЛЁ

Амэ прослужисардям андэ районно служения штар бэрш и тоди амэн ақардэ тэ служисарас андо филиало. Када сас андо 1960 бэрш. Амэ и акана катэ служисарас. Важ кадэя время мэ бут со сытелэм кай и ԥрала, савэ стонас вся пэско зор андэ кадэя служения. И Нора андо Вефилё терэлас разно дила и лати када чалёлас.

Мандэ сас бари благословения. Мэ диқлэм, кай вся май бут мануша андэ Филиппины лэн тэ служин лэ Иеговасти. Кала мэ авелэм кардэ, тэрно и най женато, андэ вся страна слинэ 10 000 возвещателёнэн. Ай акана катэ май бут чем 200 000 свидетелёнэн. Андо филиало терэн дила май бут, чем шэл ԥрала и ԥэя.

Важ кода кай андэ страна лэ свидетелёнэн ашэлас май бут, андо Вефилё трэбуй сас май бут тэ терэн дила. Тоди о Руководящё совето ԥэндя амэнди тэ родас и ԥув, кай тэ строисарас май баро филиало. О надзирателё типографии и мэ жылям цэр цэрэстар, кай жувэнас бут китайцоря, и пушасас, на камэн вонэ тэ битинэн и ԥув. Нико на камля. Ай ек мурш даже ԥэндя: «И китайцоря на битинэн, ай кати тинэн».

И акэ, каринг амэндэ авеля ек анда сосидоря. Во тидэласпэ тэ пэрэладэл андэ США и ԥэндя: «На камэн тумэ тэ тинэн мандэ ԥув». Инке ек сосидо закамля тэ битинэн пэстири ԥув. И во стердя кадя, кай и авэр закамлэ тэ битинэн. Вижыля кадя, тиндям кодэлэстар, ко ԥэнэнас, кай и китайцоря нисо на битинэн. Прожыля набут время и ԥув важ о Вефилё ашэля май бари триварэс, чем сас! Мэ патяв, кай тэ авэл кадя, камля о Иегова.

Андо 1950 бэрш андо Вефилё мэ сымас само тэрно. Ай акана амэ ла хулаяса само ԥурэ катэ. Мэ ни еқвар на гиндосардэм, кай евья теравас кадэя дила, сави дэлас манди о Иисусо. Мэрнэ родителя видарадэ ман цэрал. Но о Иегова дя манди барэ ерес, лэ ԥралэн и лэ ԥэян, кастэ кацави же вера, сар мандэ. Мэ фартэ патяв, кай о Иегова вся время фэрия и диқэла пала амэндэ, кай амэ тэ на служисарас. Мэ ла Нораса фартэ благодарни лэ Иеговасти пала лэско лашимос и ԥэнас аврэнди, кай и вонэ тэ диқэн, сар о Иегова фэрия и диқэла пала лэндэ (Мал. 3:10).

Еқвар о Иисусо ԥэндя лэ Матфеёсти лэ Левиёсти, саво стидэлас и налогоря: «Жа пала мандэ». Со во тердя? Андэ Библия ԥэнэнпэ: «Кодэва ашадя вся и жыля пала лэстэ» (Луки 5:27, 28). Мандэ сас бут кацаво, кала прижаласпэ бут со тэ ашавав, кай тэ жав пала Иисусо. И мэ анда вся оди ԥэнав тумэнди тэ терэн кадя же. Када дром, пэ саво тумэн аштярэл ек о лашимос.