Любовь, через сави па чачимастэ о мануш ашэл май бахтало

1. Соса амари время на шолпэ пэ кодэя, сави сас?

АМЭ жувас андэ время, сави инке никала на сас. Сар и сас дэлмут ԥэндо андэ Библия, андэ амарэ деса о Иегова стидэл фартэ бут манушэн, савэн нико нэ может тэ проадиной «анда всаворэ нации, еря, народоря и шыба». Андэ кадэва «зорало народо» бахталэ мануша и лэн май бут, чем восемь миллионоря. Вонэ «дес и рят терэн и свынто служения» лэ Иеговасти (Отк. 7:9, 15; Ис. 60:22). Инке никала на сас андэ жизня, кай тэ авэн скати мануша, савэ па чачимастэ любин лэ Дэвлэс и аврэн.

2. Сави любовь исин кай и мануша, савэндэ нинай дружба лэ Иеговаса? (Диқэн и картинка англа статья.)

² Андэ Свынто Книга кадяжэ сас ԥэндо, со трэбуй тэ авэл англэ. Кай лэ манушэндэ андэ амарэ деса, савэндэ нинай дружба лэ Дэвлэса, авэла най кацави любовь. О апостоло Павло пистрояс, кай андэ послидни деса «и мануша лэна «тэ любин кати корко пэс, тэ любин ловэ, тэ любин развлечении и тэ отцыён. Но на любина лэ Дэвлэс» (2 Тим. 3:1—4). Кацави любовь нисар на шолпэ пэ любовь, сави исин кай и христианоря. Варико гиндой, кала вся время терэн кода, со камэлпэ, кадэлэстар вонэ могут тэ авэн бахталэ. Но кадэлэса вонэ екжэнэ хохавэн пэс. Важ кода кай андэ кадэва миро гиндон ек важ пэстэ. Тэ жувэс андэ кацаво миро ашэл май ԥарэс.

3. Пала со амэ подаса дума андэ кадэя статья и васо?

³ О Павло полэлас, кай андо миро бут кацаво, состар трэбуй тэ фэрисавас. Када, кай и мануша любин кати пэс. И кацавэ манушэн ашэл вся май бут. Важ када во ԥэнэнас тэ ритярдюваспэ май дур кодэлэндар, кастэ исин кацави любовь (2 Тим. 3:5). На вижала кадя, кай тэ на диқаспэ и тэ на дас дума кацавэ манушэнца. Сар амэ тэ на пэрэлас кода, со терэн андэ кадэва миро и тэ радосарас лэ Иеговас, савэстар жал и любовь кодэлэса, сар амэ пэс андярас? Давайте диқаса, сави любовь о Иегова аштярэл пэстирэ народостар и соса вой на шолпэ пэ любовь, сави пистромэ андэ 2 Тимофею 3:2—4. Када поможыя амэнди тэ диқас, со трэбуй тэ парувас андэр пэстэ. Васо? Кай пэ дила тэ дицол и любовь, через сави о мануш па чачимастэ ашэл май бахтало.

ТЭ ЛЮБИСАРАС ЛЭ ДЭВЛЭС ЧИ КОРКО ПЭС?

4. Васо драго, кала о мануш любий корко пэс, но терэл када годяса?

⁴ «И мануша лэна тэ любин кати корко пэс». Ԥэнэнас о Павло, кай тэ любис корко пэс, када найдраго? Най, во кадя на ԥэндя. Када годявэрнэс, кала о мануш терэл кода, со лэсти трэбуй. И када драго, кала о мануш чалёл корко пэсти, важ кода кай кадя амэн создал о Иегова. О Иисусо ԥэндя: «Любисар аврэн, сар корко пэс» (Мар. 12:31). Кала амэ на любисарас пэс, амэ нэ можем тэ любисарас аврэн. Андэ Библия кадяжэ ԥэнэнпэ: «И хулая трэбуй тэ любин пэстирэ хулаян, сар пэстири тила. Кодэва, ко любий пэстиря хулая, любий корко пэс, важ кода кай нико на вэрыцый пэстири тила, но праварэл ла и жалуий ла» (Эф. 5:28, 29). Дицол, тэ любис трэбуй пэс, но годяса.

5. Сар тумэ ԥэндоп, саво када мануш, саво любий корко пэс?

⁵ Кала лэ манушэстэ исин любовь, пала сави амэ адиносарас андэ 2 Тимофея 3:2, пэр латэ на ԥэнэса, кай вой лащи, важ кода кай о мануш любий кати корко пэс. Кацаво мануш любий корко пэс май бут, чем трэбуй. (Адиносар Римлянам 12:3a). Кадэва мануш терэл важ пэстэ май бут, чем важ авэр. Кала варисо жал най кадя, во дошалярэл андэ када аврэн. Андэ ек книжка, сави пала Библия, росԥэнэнпэ, кай о мануш, саво любий кати корко пэс, шолпэ по ёжико, саво стидяпэ андо колобочко. Важ пэстэ лэстэ ковли шерсть, сави лэс татярэл. Ай важ авэр, во вистол и сувья, кай тэ пусавэл. Кацавэ мануша, савэ гиндон кати пала пэстэ, на авэна па чачимастэ бахталэ.

6. Саво лашимос анэн, кала любин лэ Дэвлэс?

⁶ Андэ послидни деса бут мануша найдраго пэс андярэн. Но васо о Павло спэрва ԥэндя, кай о мануш любий кати корко пэс? Акэ, со пала када ԥэнэн дэсавэ учёни, савэ полэн и Библия. Кала о мануш любий кати корко пэс, тоди во андэ вся андярэл пэс найдраго. Ай и мануша, савэ любин лэ Дэвлэс, андярэн пэс па аврятэ. Андэ Библия ԥэнэнпэ, кала о мануш любий кадя, сар чалёл лэ Дэвлэсти, во авэла радостно, на грабияпэ тэ холявэл, ӷанэна тэ аштярэл, терэла лашимос, и терэла лэс, даже кала пала када лэс на мангэн. Инке во патяла андо Дэл, лэско ди авэла ковло и во ӷанэна тэ ритярэл пэс андэ вас (Гал. 5:22, 23). Кодэва, ко пистросардя о Псалом, ԥэндя: «Бахтало миро, каско Дэл о Иегова!» (Пс. 144:15). О Иегова бахтало Дэл. И кодэла, ко служин лэсти, кадяжэ бахталэ. И мануша, савэ любин кати корко пэс, терэн варисо кати пэ пэско вас. Ай кай лэ Иеговастирэ служителя андо ди радость, кала аврэнди терэн лашимос (Деян. 20:35).

7. Со трэбуй тэ пушас пэстар, кай тэ полас, пэ скати амэ любисарас лэ Дэвлэс?

⁷ Сар тэ полас, кас амэ май фартэ любисарас, лэ Дэвлэс чи пэс? Погиндон пала алава, савэ запистромэ андэ Филиппийцам 2:3, 4: «Нисо на терэн анда кода, кала гиндон пала пэстэ бут или кала тумэнди вихан оди. На гиндон, кай тумэ май лашэ аврэндар, ай гиндон, кай авэр май лашэ тумэндар». Пуш пэстар: «Терав мэ кадя, сар пистромэ? Чаче, мэ став зор, кай тэ терав, со камэл о Дэл? Родав мэ андэр со тэ поможысарав лэ ԥралэнди и лэ ԥэянди андэ собрания, ай кадяжэ кодэлэнди, касти росԥэнав важ о Дэл?» Тэ терас кадя най вся время вушэро. Важ када дэкала, трэбуй бут пэр со тэ жас. Но, кала амэ кадя жувас, амэ радосарас лэ Дэвлэс, саво хулай понад вся люма. Хэба, может тэ авэл варисо май куч?

8. Со закамлэ тэ терэн дэсавэ христианоря, важ кода кай любин лэ Дэвлэс?

⁸ Важ кода кай и христианоря любин лэ Дэвлэс, дэсавэ андар лэндэ отԥэндэпэ ла бутятар, пэ сави вонэ могли тэ авэн барэ мануша. Васо? Важ кода кай тэ служин лэ Иеговасти. Эрика, сави врачо, жувэл андэ США. Вой могла тэ авэл бари манушни пэ пэстири бути. Но вой закамля тэ авэл пионеро. Пэстирэ хуласа и Эрика росԥэнэнас важ о Дэл андэ бут страны. Кала вой гиндой пала пэстири жизня, вой ԥэнэн: «Амэ поможысарас лэ манушэнди тэ полэн лэ Дэвлэс пэ лэндири шыб. Амэндэ ашэлэ бут другоря и кала росԥэнасас важ о Дэл, амэндэ бут со сас кода, со амэнди чалеля. Через када амэ бут со полям андэ жизня. Мэ кадяжэ врачо. Но май бут время и зор отдав, кай и мануша тэ полэн лэ Дэвлэс и поможысарав лэ ԥралэнди и лэ ԥэянди андэ собрания. Када па чачимастэ терэл, кай мэ тэ авав бахтали».

ТЭ СТИДАС О БАРВАЛИМОС ПО НЭБО ЧИ ПЭ ԤУВ?

9. Васо любовь каринг и ловэ на анэн бах?

⁹ О Павло пистросардя, кай и мануша авэна «тэ любин ловэ». Найбут бэрша палпалэ еқэ пионеростэ, саво андэ Ирландия, акэ со сас. Кала во дэлас дума лэ муршэса, кодэва дорэсля и тышыла, виля котар и ловэ и ԥэндя: «Акэ мэрно дэл!» Но хоть адес мало, ко кадя ворта ԥэнэн, вонэ всаек фартэ любин и ловэ и кода, со пэр лэндэ можно тэ тинэн. Но и Библия фэрий: «Кодэлэсти, ко любий о руп никала лэс на хутилэла, ай кодэва, ко любий о барвалимос на хутилэла кода, со лэстар авэла» (Эккл. 5:10). Скати бы ловэ тэ на авэн кай кадэла мануша, лэнди вонэ на хутилэна. Кала вонэ стидэн май бут и май бут, вонэ терэн, кай лэндэ тэ авэл «бут ԥаримос» (1 Тим. 6:9, 10).

10. Со андэ Библия ԥэнэнпэ пала чорымос и пала барвалимос?

¹⁰ Би ловэнго о мануш на обжалапэ. Андэ варисостэ вонэ амэн фэрин (Эккл. 7:12). Но может о мануш тэ авэл па чачимастэ бахтало, кала лэстэ авэла кати кода, со трэбуй важ и жизня? Да! (Адиносар Экклезиаст 5:12b). О Агуро, лэ Иакеяско шаво, мангэлас лэ Дэвлэс: «На дэ манди ни о чорымос, ни о барвалимос, но дэ манди пэ марнэстэ. Амэ полас, васо о Агуро на камэлас тэ авэл андо чорымос. Васо во ԥэндя кадя? Важ кода кай во мог тэ ашэл кодэва, ко чорэл и тэ шол чик пэ пэско Дэл. Но васо во на камля тэ авэл барвало? Во пистросардя: «Кай манди тэ на прихалпэ о барвалимос и тэ на отԥэндювавпэ тутар и тэ на ԥэнав: „Ко кацаво о Иегова?“» (Прит. 30:8, 9). Тумэ кадяжэ диқлэ кацавэ манушэн, савэ патян, кай лэнди поможый о барвалимос, ай най о Дэл.

11. Со о Иисусо ԥэндя пала ловэ?

¹¹ Кодэла, ко любин и ловэ, на радосарэн лэ Дэвлэс. О Иисусо ԥэндя: «Нико нэ может тэ авэл рабо кай дуй хулая, важ кода кай или еқэс лэла тэ вэрыцый, ай аврэс тэ любий, или еқэс на ашавэла, ай аврэс на лэла тэ шол сама. Тумэ нэ можете тэ авэн рабонэнца и лэ Дэвлэсти и лэ Барвалимасти». Во кадяжэ ԥэнэнас: «Парашэн тэ стидэн пэсти барвалимос пэ ԥув, кай и моль и ржавчина римон лэс и кай кодэла, ко чорэн, авэн чоралэс и чорэн. Ай стидэн пэсти барвалимос по нэбо, кай и моль и ржавчина на римон лэс и кай кодэла, ко чорэн, на авэн и на чорэн» (Матф. 6:19, 20, 24).

12. Сар и скромно жизня дэл май бут тэ служисарас? Росԥэнэн, со сас лэ ереса.

¹² Бут, кодэла, ко ля тэ жувэл май скромно, полинэ, кай ашэлэ май бахталэ. Лэндэ ашэля май бут время, кай тэ служин лэ Иеговасти. Кай о Джеко, саво жувэл андэ США, сас баро цэр и пэско бизнесо. Но во всаворэстар отԥэндяпэ, важ кода кай камэлас пэстиря хулаяса тэ авэн пионероря. Во росԥэнэн: «Сас ԥарэс тэ витидас, кай тэ битинас амаро шукарно цэр и о плано. Но через кода, кай сас проблемы пэ бути, мэ уже бут бэрша ававас цэрэ холинако и цыено. Ай мэрни хулаи, сави сас пионеро, вся время сас радостно. Вой ԥэнэнас: „Мандэ само лашо начальнико!“ И акана, мэ кадяжэ пионеро. И амэ лэдуй терас дила важ о Иегова».

13. Со поможыя тэ полас, со амэндэ андо ди каринг и ловэ?

¹³ Кай тэ полэн, со тумэндэ андо ди каринг и ловэ, ԥэнэн па чачимастэ пэ кадэла алава: «Патяв мэ андэ кода, со пала ловэ ԥэнэнпэ андэ Библия? Дицол када андэ мэрни жизня? Или вся мэрни жизня мэ кати затерав май бут ловэ? Со важ мандэ май куч, ловэ или дружба лэ Иеговаса и аврэ манушэнца? Чаче мэ патяв, кай о Иегова диқэла пала мандэ и фэрия?» Амэ трэбуй тэ патяс, кай во на ашавэла кодэлэн, ко андэр лэстэ патял (Матф. 6:33).

МАЙ ФАРТЭ ТЭ ЛЮБИСАРАС ЛЭ ИЕГОВАС ЧИ РАЗВЛЕЧЕНИИ И КАЙ ТЭ ОТЦЫЮВАС?

14. Со трэбуй тэ авэл андо ди каринг и развлечении?

¹⁴ О апостоло Павло ԥэндя, кай андэ послидни деса и мануша лэна «тэ любин развлечении и тэ отцыён». Сар уже сас ԥэндо, кала амэ любисарас корко пэс, ловэ и развлечении и тэ отцыювас, андэ када нисо нинай вэрыто. Но кати када трэбуй тэ терас годяса. О Иегова на камэл, кай амэ андэ вся пэс тэ зритярас и кай амэндэ тэ на авэн и развлечении и кай тэ отцыювас. Андэ Библия запистромэ алава каринг и мануша, савэ кандэн лэ Дэвлэс: «Жа ла радостяса, ха о марно и пи о вино» (Эккл. 9:7).

15. Пэр кастэ ԥэнэн, кай вонэ «любин развлечении и тэ отцыён»?

¹⁵ Андэ 2 Тимофея 3:4 ԥэнэнпэ, кала о мануш терэл вся, кай лэстэ тэ авэн кати и развлечении и кай тэ отцыёл, лэстэ на авэла ҭан, кай тэ любий лэ Дэвлэс. Андэ кадэва стихо на ԥэнэнпэ, кай и мануша лэна тэ любин и развлечении и кай тэ отцыён май бут, чем лэ Дэвлэс, кабута лэндэ авэла хоть набут любовь каринг о Дэл. Катэ ԥэнэнпэ, кай вонэ лэна «тэ любин и развлечении и тэ отцыён. Но на любина лэ Дэвлэс». Пала кадэла алава ек учёно, саво полэл и Библия, пистросардя: «Катэ на ԥэнэнпэ, кай кадэла мануша набут любина лэ Дэвлэс. Лэндэ даже набут на авэла любовь». Пэ кадэла алава трэбуй фартэ тэ шон сама кодэла, кас фартэ цырдэл каринг и развлечении и тэ отцыёл! Андэ Библия ԥэнэнпэ пала кацавэ мануша, кай вонэ «кати камэн... и развлечении и тэ отцыён» (Луки 8:14).

16, 17. Со сас кай о Иисусо андо ди каринг кода, кай тэ отцыёл и каринг и развлечении?

¹⁶ О Иисусо драго сыкадя, со трэбуй тэ авэл андо ди каринг и развлечении и кай тэ отцыювас. О Иисусо сас пэ барэ мисяйли (Луки 5:29; Иоан. 2:1—10). Еқвар лэ Иисусос ақардэ по ябьяв и котэ на ашэляпэ вино. Тоди о Иисусо стердя чуда. Во стердя анда паи вино. Пэ авэр разо и мануша линэ тэ сындон лэ Иисусос, кай во «хал и пэл». Во драго сыкадя лэнди, кай вонэ полэн най кадя, сар трэбуй (Луки 7:33—36).

¹⁷ Но о Иисусо жувэлас най кати, кай тэ отцыёл и кай лэстэ тэ авэн развлечении. Пэ пэрво ҭан андэ лэстири жизня сас о Иегова. Кадяжэ о Иисусо жалас бут пэр со, кай тэ терэл аврэнди лашимос. Кай тэ спасый лэ манушэн ла смэртятар, во закамля тэ отдэл пэстири жизня пала лэндэ. Лэс умардэ по столбо. Кала во дя дума кодэлэнца, ко камэлас тэ жал пала лэстэ, во ԥэндя: «Бахталэ тумэ, кала и мануша ԥэнэн пэр тумэндэ найлашэ алава и ӷонин тумэн и хохавэн пэр тумэндэ важ мандэ. Радосавэн и фартэ радосавэн, важ кода кай по нэбо баро лашимос авэла тумэндэ. Кадяжэ ӷонинас лэ пророконэн, савэ слинэ май англал тумэндар» (Матф. 5:11, 12).

18. Со трэбуй тэ пушас пэстар, кай тэ диқас, правильно амэндэ андо ди каринг и развлечении чи най?

¹⁸ Сар тэ полэс, со тутэ андо ди каринг и развлечении? Пуш пэстар: «Со важ мандэ май главно, и собрания, тэ росԥэнав важ о Дэл чи развлечении? Камав мэ пэс тэ зритярав андэ варисо, кай май бут тэ служисарав лэ Дэвлэсти? Кала мэ витидав развлечении, диқав мэ пэр лэндэ кадя, сар о Иегова?» Кала амэ па чачимастэ любисарас лэ Иеговас, амэ ласа тэ обжас най кати кода, со лэсти на чалёл, но и кода, через со лэстэ может найдраго тэ авэл по ди. (Адиносар Матфея 22:37, 38c).

ДРОМ, САВО АНДЯРЭЛ КАРИНГ И БАХ

19. Ко никала на авэла па чачимастэ бахтало?

¹⁹ Уже шов тысяч бэрш андэ лэ Сатанаско миро фартэ бут биды и ԥаримос. Амэ жувас андэ послидни деса. Пэ ԥув фартэ бут мануша, савэ гиндон кати пала ловэ, кай тэ авэн лэндэ развлечении и тэ отцыён, ай кадяжэ любин кати ек пэс. Паша амэндэ мануша, савэ камэн май бут тэ затерэн. Кода, со лэнди камэлпэ, ашэл важ лэндэ само главно. Вонэ никала на авэна па чачимастэ бахталэ. Кодэва, ко пистросардя о Псалом, ԥэндя: «Бахтало кодэва, касти поможый лэ Иаковоско Дэл, ко лэ Иеговастар, пэстирэ Дэвлэстар, аштярэл о лашимос» (Пс. 146:5).

20. Росԥэнэн, васо, кала амэ любисарас лэ Дэвлэс, амэ ашас май бахталэ?

²⁰ Лэ Иеговаско миро май фартэ любий лэс. Кажно бэрш лэ Иеговаско миро ашэл май бут. Када доԥэнэн, кай лэ Дэвлэско царство правий и англэ амэн аштярэл кацаво лашимос, саво инке никала на сас. Амэ радосарас лэ Иеговас, кала терас, со во амэндар аштярэл. Када анэн амэнди чачуни бах и вой авэла вечно! Анда авэр статья амэ уӷанаса, сар о мануш лэл пэс тэ андярэл, кала во любий кати корко пэс. И диқаса, сар када на шолпэ пэ кода, сар о Иегова камэл, кай тэ андярэн пэс лэстирэ служителя.