Кала драго прилэн ек еқэс, када анэн лошалимос!

1. Саво ԥаримос сас кай и христианоря андэ пэрво вико?

ВАРИКАЙ андэ 62 жы кай 64 бэрш лэ И. Х. о апостоло Пётро пистросардя пи́сьмо. Касти? Кодэлэнди, ко «най вся время жувэла андэ кадэва миро, ко жыля тэ жувэн андо Понто, андэ Галатия, Каппадокия, Азия и андэ Вифиния» (1 Пет. 1:1). Кадэлэ христианонэн, савэ жувэнас андэ Мало Азия и савэндэ сас разно нация, трэбуй сас тэ подритярэн и тэ ԥэнэн лашэ алава, савэндар ашэла май вушэро. Пэр лэндэ тасавэнас важ и вера и ԥэнэнас найлашэ алава. Вонэ жувэнас андэ фартэ ԥари время, лэн ӷонинас и марэнас. О Пётро пистросардя лэнди, кай йто парашэла кадэва миро. Май мало чем через дэш бэрш трэбуй сас тэ розмарэн о Иерасалимо. Со поможысардоп всаворэ христианонэнди тэ пэрэжувэн кадэя ԥари время? (1 Пет. 4:4, 7, 12).

2, 3. Васо о Пётро ԥэндя лэ христианонэнди, кай драго тэ прилэн ек еқэс? (Диқэн и картинка англа статья.)

² Инке о Пётро ԥэндя лэ христианонэнди: «Драго прилэн ек еқэс» (1 Пет. 4:9). Алава «драго прилэн» пэ ӷреческо шыб сыкавэн, «тэ любис кодэлэн, кас на ӷанэс (чи тэ терэс лашимос)». Но шон сама, касти о Пётро ԥэндя алава, «драго тэ прилэн ек еқэс»? Кадэла алава во ԥэндя лэ ԥралэнди и лэ ԥэянди, савэн вонэ ӷанэнас и савэнца вонэ проандярэнас и время. Васо лэнди трэбуй сас драго тэ прилэн ек еқэс?

³ Кадэлэстар вонэ ашэлоп май пашэ ек еқэстэ. Тумэ, файма, кадяжэ гиндон. Хэба тумэнди на чалёл, кала тумэн ақарэн каринг пэстэ тэ побэшэн? Тумэнди када фартэ чалёл и пэ долӷонэстэ ашэлпэ андо шэро. Кала амэ анда оди ақарас лэ ԥралэн и лэ ԥэян анда собрания, амари дружба ашэл май састи. Инке, кала амэ кадя диқаспэ, амэ май бут тэ уӷанас ек еқэс. Со май бут кай и пэрви христианоря сас ԥаримос, со май пашэ вонэ ашэнас ек еқэстэ. Када поджал и каринг и христианоря, савэ жувэн андэ «послидни деса» (2 Тим. 3:1).

4. Со амэ уӷанаса андэ кадэя статья?

⁴ Со амэ тэ терас, кай драго тэ прилас «ек еқэс»? Со на дэл амэнди анда оди тэ прилас аврэн и сар тэ улас кода, со на домэкэл тэ прилас аврэн? Сар тэ авас лашэ ӷостёря?

САР И КАЙ ДРАГО ТЭ ПРИЛАС ЕК ЕҚЭС?

5. Сар драго тэ прилэс аврэн пэ собрания?

⁵ Драго тэ прилас пэ собрания. Амэ шас сама лэ манушэн, савэ, сар и амэ, авелэ пэ собрания, кай тэ ашунэн пала Дэл. О Иегова, ай кадяжэ и мануша анда лэстири организация, анда вся оди драго прилэн амэн (Рим. 15:7). Ай кала андо зало, кай тидэнпэ лэ Иеговастирэ свидетеля, авэн нэвэ мануша, амэ кадяжэ анда оди лэн драго прилас. Шон сама, пэрви поджан лэндэ и на диқэн, сар вонэ утидэ (Иак. 2:1—4). Кала тумэ диқэн, кай о мануш авеля екжэно, ԥэнэн лэсти, кай во тэ бэшэл паша тумэндэ. Лэсти чалёла, кала тумэ поможына лэсти тэ полэн, со пала со жал. Кадяжэ лэсти чалёла, кала тумэ поможына тэ виарақэл и стихоря анда Библия, савэ трэбуй тэ адинон. Када лащи время, кай ту драго тэ прилэс аврэн (Рим. 12:13).

6. Кас спэрва трэбуй тэ ақарэс пэстэ?

⁶ Тэ ақарас, кай амэндэ тэ авэн тэ побэшэн. Андэ библейско время о мануш, саво драго прилэлас аврэн, анда оди столас хамос важ и ӷостёря (Быт. 18:1—8; Суд. 13:15; Луки 24:28—30). Кала о мануш ақарэлас аврэ манушэс, кай во лэса тэ хал, во сыкавэлас, кай камэл тэ ладин и тэ полэн ек еқэс. Ай кас амэ тэ ақарас? Спэрва лэ ԥралэн и лэ ԥэян анда амари собрания. Кала авэла ԥари время, амэ фартэ аваса трэбуй ек еқэсти. Важ када амэнди трэбуй тэ терас вся, кай амэ драго тэ ладисарас и тэ полас ек еқэс. Андо 2011 бэрш о Руководящё совето стердя акэ со. Во пэрэандярдя и время, кай о вефильско ери тэ сытёл па «Сторожево башня» най андэ 18 часов 45 минут, ай андэ 18 часов 15 минут. Васо? Сар и вефильцоря лэна тэ розжанпэ па собрания май рано, тоди лэндэ авэла май бут время, кай тэ ԥирэн ек еқэстэ тэ побэшэн. Кадя ԥэнэнаспэ андэ объявления. Авэр филиалоря линэ тэ терэн кадяжэ. Кадэлэстар и вефильски еря ашэлэ инке май пашэ ек еқэстэ.

7, 8. Сар амэ драго тэ прилас кодэлэн, ко авэн анда лэ Иеговастири орӷанизация?

⁷ Исин лащи время драго тэ прилас аврэн. Кала када? Кала амэндэ авэн и ԥрала анда авэр собрания, кай тэ ԥэнэн речь чи авэн и районни надзирателя. Кадяжэ, кала авэл о ԥрал анда Вефилё. (Адиносар 3 Иоанна 5—8a). Амэ можем тэ ақарас кацавэ манушэн пэстэ и тэ стас варисо тэ хан. Драго, кала амэ на умэкас кадэя время, кала вонэ авэн и драго прилас лэн пэстэ.

⁸ Акэ, со сэрэл ек ԥэй анда США: «Най ек бэрш амэ лэ хуласа приласас пэстэ лэ ԥралэн, савэ авэнас тэ ԥэнэн и речь и лэндирэ хулаян. Кажно разо, кала амэ када терасас, амэ самас фартэ лошалэ. Кадэя время прожалас драго. Но со май важно сас, када кай амари вера ашэлас май састи. Амэндэ никала на сас андо шэро, кай када евья».

9, 10. а) Савэ ԥралэнди и ԥэянди трэбуй тэ поможын? б) Моӷут тэ поможын кодэла, кастэ найбаро цэр чи квартира? Росԥэнэн, со стердя ек ери.

⁹ Тэ ақарас пэстэ лэ ԥралэн и лэ ԥэян, савэнди трэбуй варикай тэ жувэн дэсави время. Андэ дэлмутни время о хулай лэ цэрэско най еқвар ԥэнэнас лэ ӷостёнэнди, кай вонэ тэ ашэнпэ лэстэ тэ рятярэн (Иов 31:32; Флм. 22). Андэ амари время дэкала лэ ԥралэнди и лэ ԥэянди, кадяжэ трэбуй варикай тэ рятярэн. Када, кала и районни надзирателя авэн андэ собрания. Вонэ най еқвар ашэнпэ кай и ԥрала и ԥэя тэ жувэн пэ кадэя время. Кадяжэ трэбуй ҭана, кай тэ жувэн кодэлэнди, ко авэл тэ сытёл андэ теократически школы и важ и добровольцоря, савэ авэн тэ строин. Дэсавэ ԥрала и ԥэя попэлинэ андо ураӷано, землетрясения или инке андэ варисави бида. Вонэ ашэлэпэ би цэрэнго и лэнди кадяжэ трэбуй, кай лэн варико тэ лэл пэстэ тэ жувэн, дэкин лэндирэ цэра на стерэна. Но на трэбуй тэ гиндос, кай тэ поможын лэна кати кодэла, кастэ баро цэр. Файма, вонэ уже най еқвар поможынас кацавэ манушэнди. Ай ту прилэса пэстэ кацавэ манушэн, даже кала тутэ найбаро цэр чи квартира?

¹⁰ Ек ԥрал анда Южно Корея сэрэл, сар вонэ ла хулаяса прилэнас пэстэ лэ ԥралэн и лэ ԥэян, савэ авэнас тэ сытён андэ теократически школы. Во пистрой: «Спэрва мэ на камавас тэ прилав пэстэ лэ ԥралэн и лэ ԥэян. Васо? Важ кода кай амэ кати женисайлям и жувасас андо найбаро цэр. Но амэ всаек прилям лэн пэстэ и кадэлэстар амэ самас фартэ лошалэ. Амэ найдэлмут женисайлям, но уже диқлям, скати бах андо ери, кала лэдуй служин лэ Иеговасти и камэн тэ терэн дила важ о Иегова па лэско дром».

11. Васо трэбуй драго тэ прилэс кодэлэн, ко нэво андэ собрания?

¹¹ Тэ ақарас пэстэ нэвэн ԥралэн и ԥэян анда собрания. Дэсавэ ԥрала и ԥэя, ай кадяжэ еря, пэрэлаглэ каринг тумэндэ анда авэр собрании. Файма, вонэ пэрэлаглэ, кай тэ поможын андэ тумари собрания. Дэсавэ андар лэндэ пионероря, савэн бишалдэ тумэндэ. Всаворэнди лэнди трэбуй тэ присытён каринг о нэво ҭан и каринг и нэви собрания. Инке, файма, лэнди трэбуй тэ присытён каринг и нэви шыб и каринг авэр жизня. Кала тумэ ақарэн лэн пэстэ тэ хан чи тэ жан варикаринг, чи тэ хан пэ природа, тоди тумэ поможына лэнди. Андэр со? Тэ авэн лэндэ друӷоря и вонэ тэ присытён кай о нэво ҭан.

12. Росԥэнэн, со сыкавэл, кай драго тэ прилэс лэ манушэн на трэбуй фартэ бут со тэ терэс?

¹² Кай драго тэ прилэс лэ манушэс, на трэбуй фартэ бут со тэ терэс. (Адиносар Луки 10:41, 42b). Акэ со сэрэл ек ԥрал, кала вонэ ла хулаяса линэ тэ служин миссионеронэнца: «Амэ самас тэрнэ, бут со на ӷанасас. Инке амэ фартэ скучисарасас пала цэр. Еқвар, вэчэром и хулаи фартэ скучияс пала ҭана, кай амэ жувасас и мэ на ӷанавас, со тэ терав, кай лати тэ авэл май вушэро по ди. И акэ, варикай полвосьмова вэчэром, варико ля тэ стучий андэ двэри. По пороӷо тердёлас манушни, сави сытёлас па Библия. Вой авеля тэ уӷанэн амэн, сар лэ нэвэ миссионеронэн и андя амэнди трин апельсиноря. Амэ ақардям ла андо цэр и дям лати тахтаё паи. Тоди амэ стодям чаё и ԥабардо шоколадо. Амэ инке на дасас дума пэ шыб суахили, ай вой на ӷанэнас и английско шыб. Но кадэлэстар, со сас, заляпэ састи дружба катутнэ ԥралэнца и ԥэянца».

СО НА ДЭЛ АМЭНДИ ТЭ ПРИЛАС АВРЭН?

13. Саво лашимос анэн, кала драго прилэс лэ манушэн?

¹³ Ай тути вушэро драго тэ прилэс аврэн пэстэ цэрэ? Сар када кадя, тоди ту на промэкэса, кай драго тэ проандярэс и время. Инке, кай тэ виарақэс лашэ друӷонэн, савэнца тутэ авэла састи дружба. Кала драго прилэс аврэн, када само лашо драб кодэлэстар, кай тэ на гиндос, кай ту екжэно. Тоди васо дэсавэнди найвушэро драго тэ прилэн лэ манушэн? Исин бут со.

14. Со тэ терэс, кала здэлпэ, кай нинай время и зор тэ жас лэ манушэндэ тэ побэшэс или тэ ақарэс пэстэ ӷостёнэн?

¹⁴ На хутилэл время и зор. Лэ Иеговастирэ мануша терэн бут дилы. Важ када дэсавэнди здэлпэ, кай важ и ӷостёря лэндэ на ашэлпэ ни время, ни зор. Сар тумэ кадяжэ гиндон, тоди тумэнди трэбуй тэ полэн, каринг жал тумаро зор и время. Тоди тумэндэ авэла май бут время и зор, кай тэ ԥирэн тэ побэшэн и тэ ақарэн пэстэ манушэн. Андэ Библия ԥэнэнпэ, кай и христианоря драго тэ прилэн аврэн (Евр. 13:2). Трэбуй тэ терэн кадя, кай тэ витидэн пэ када время. Но важ када тумэнди прижалапэ тэ отстон и дила, сави най фартэ трэбуй.

15. Пала со о мануш фартэ загиндойпэ, кала камэл драго тэ прилэл аврэн?

¹⁵ Ту гиндос, кай на вижала драго тэ прилэс лэ манушэн. Ай со тэ терэс, кала ту камэс тэ ақарэс пэстэ лэ манушэн, но дарас када тэ стерэс? Дэсавэ фартэ лажан и фартэ загиндонпэ, кай най пала со авэла тэ дэн дума и кай лэ манушэнди авэла найвэсэло. Ай кодэва, ко найбарвалэс жувэл, дарал, кай на стола по скамин кода, со стон авэр ԥрала и ԥэя анда собрания. Сэрэн, трэбуй най о барвалимос, ай о вужымос, порядко и кай када тэ авэл анда оди.

16, 17. Со трэбуй тэ терэс, кала нащи виарақэс пэсти ҭан, важ кода кай аштярэс лэ ӷостёнэн?

¹⁶ Бут мануша фартэ загиндонпэ, кала лэндэ трэбуй тэ авэн ӷостёря. Акэ, со росԥэнэн ек старейшина анда Великобритания: «Дэкала нащи виарақэс пэсти ҭан, кала терэс варисо, кай тэ прилэс пэстэ лэ ӷостёнэн. Кацаво же, кала амэ жас тэ росԥэнас важ о Иегова. После кода, сар авас па служения, и радость май бари, чем кала инке на жылям. Манди чалёл тэ бэшав и тэ дав дума лэ ԥралэнца и лэ ԥэянца пала чашка кофе». На бистрэн, кай трэбуй анда оди тэ камэн тэ уӷанэн лэ манушэс (Флп. 2:4). Дэкасти чалёл тэ росԥэнэн, со сас андэ лэндири жизня. И кала амэ вса́ворэ стидаспэ, амэ бут со уӷанас пала ԥрала и ԥэя анда собрания. Акэ, со пистросардя инке ек старейшина: «Кала мэ ақарав лэ ԥралэн и лэ ԥэян тэ побэшэн мандэ, мэ май драго лав тэ уӷанав и тэ полав лэн. Со май фартэ манди чалёл, када тэ уӷанав, сар вонэ уӷанглэ о чачимос анда Библия». Кала анда оди шон сама аврэн, тоди всаворэнди чалёла тумэндэ тэ побэшэн.

¹⁷ Акэ, со росԥэнэн ек ԥэй, сави служий пионероса. Вой най еқвар прилэлас пэстэ лэ ԥралэн и лэ ԥэян, савэ сытён андэ теократически школы. Вой ԥэнэн: «Спэрва мэ нащи виарақавас пэсти ҭан, кай мандэ найбарвало цэр и кай мандэ пурани мебель. И хулаи, савяко хулай сытярэл пэ школа, подритярдя ман. Вой ԥэндя, кай кала вонэ лэ хуласа служин, сар районни, лэнди фартэ чалёл тэ жувэн кай и ԥрала и ԥэя, савэ най фартэ барвалэ, но и вера лэндэ састи. Кадэла ԥрала и ԥэя, сар и вонэ, служин лэ Иеговасти и жувэн просто. Мэ сэрав, сар и дэй най еқвар ԥэнэнас и алава анда Библия: „Фэдэр о хамос анда овощи и каринг када любовь“» (Прит. 15:17). Кала тумэндэ исин любовь, тоди на авэла пала со фартэ тэ загиндонпэ.

18, 19. Сар кода, кай амэ драго прилас аврэн, парувэл амаро гиндо пала лэндэ?

¹⁸ Кода, со тумэндэ андо ди каринг авэр. Ай тутэ исин андэ собрания кодэва, ко тумэнди най фартэ чалёл? Сар када кадя и ту нисо на терэс, кадэва найлашимос на ужала анда оди. Может через кода, кай о ԥрал чи и ԥэй анда собрания тути на чалёл, ту на камэс лэс тэ ақарэс пэстэ. Инке, када может тэ авэл через кода, кай варикала машкар тумэндэ сас холи.

¹⁹ Сар ԥэнэнпэ андэ Библия, кала драго прилэс лэ манушэс, када анэн лашимос. Саво? Лащи дружба любонэ манушэса и даже лэ вороӷоса. (Адиносар Притчи 25:21, 22c). Кала о мануш прилэл аврэс анда оди, када может тэ улэл, кай на дополэн ек аврэс и кай ритярдён ек аврэстар май дур. Кадя во додиқэла кодэва лашимос, саво о Иегова додиқля андэ кодэва мануш, кала дя лэсти тэ полэл пэско чачимос (Иоан. 6:44). Кала анда оди ақарэс пэстэ лэ манушэн, кай тэ побэшэн, кадэлэстар тутэ может тэ залэлпэ састи дружба. Сар ту камэс када тэ терэс, важ кода кай па чачимастэ любис, тер сар запистромэ андэ Филиппийцам 2:3: «На заваздэн о шэро, гиндон пала авэр, кай во май лашо тумэндар». Амэнди трэбуй тэ гиндосарас, кай лэ ԥралэндэ и лэ ԥэяндэ анда собрания бут со вижал май драго амэндар. Ту бутэсти сытёса кай лэндири састи вера. (Кадяжэ сытёса, сар вонэ драго виритярэн о ԥаримос, кай вонэ на даран и инке бут состэ). Тоди ту па чачимастэ лэса тэ любис лэн и андэ тиро цэр лэна вся время тэ авэн ԥрала и ԥэя.

САР ТЭ АВАС ЛАШЭ ӶОСТЁРЯ?

20. Кала ԥэндям, кай аваса тэ побэшас, сар амэ сыкаваса, кай амэнди када куч? Васо када трэбуй?

²⁰ О Давидо ек анда кодэла, ко пистросардя о Псалом. Во пистросардя: «Иегова, ко авэла ӷостё андэ тири бари катуна?» (Пс. 15:1). Тоди о Давидо ԥэндя, савэ ӷостёс о Иегова камлоп тэ диқэл. Када ӷостё, саво ритярэл пэско алав. О Давидо пистросардя пала кацаво мануш: «Кала дя солах и кадэлэса стердя пэсти вэрыто, во всаек на отԥэндёл кадэлэ алавэстар» (Пс. 15:4). Со тэ терас, кала амэ ԥэндям, кай аваса лэ манушэндэ тэ побэшас, но на авелям? На трэбуй кадя тэ терас, сар нинай фартэ бари дила, васо тэ на авас. И хулая лэ цэрэско, файма, линэ бут со тэ терэн, кай тэ прилэн лэ ӷостёнэн и вся, со вонэ терэн авэла евья, сар и ӷостёря на авэна (Матф. 5:37). Сас кацаво, кала варико отԥэнделя тэ авэл варикастэ важ кода, кай камля кордэ, кай лэсти май фартэ камэлпэ. Хэба ԥэнэса, кай во любий лэ ԥралэн и лэ ԥэян анда собрания и стол пэр лэндэ патив, кала кадя стердя? Амэ трэбуй тэ авас блаӷодарни лэнди, важ кода кай вонэ ақарэн амэн и тэ на диқас барвалэ вонэ чи най (Луки 10:7). Но кала прижалпэ тэ отԥэндён, важ кода кай варисо паруделя, тоди авелоп драго тэ ԥэнэн пала када май англал лэ манушэнди, савэ тумэн ақардэ.

21. Пэр со трэбуй тэ шас сама, кай тэ авас лашэ ӷостёря?

²¹ Кадяжэ трэбуй тэ шос сама пэ кода, сар терэлпэ лэ манушэндэ. Дэсавэ мануша лошалэ, кала лэндэ авэн ӷостёря, савэн вонэ на аштярэнас. Аврэндэ, кай тэ авэс тэ побэшэс, трэбуй май англал тэ доԥэндёс. Андэ дэсавэ ҭана и мануша стон со май лашо хамос лэ ӷостёнэнди. Варикай, лэ ӷостёнэнди стон кацаво же хамос, сар и всаворэ́ ерести. Андэ дэсавэ ҭана и ӷостёря трэбуй тэ анэн варисо пэса. Ай андэ авэр ҭана и хулая лэ цэрэско на камэн, кай и ӷостёря варисо тэ анэн. Андэ дэсавэ ҭана и мануша, савэн ақарэн тэ побэшэн, трэбуй най еқвар ковлэс тэ ԥэнэн, кай на авэна, ай тоди тэ авэн. Ай андэ авэр ҭана найдраго кадя тэ терэн. Терам вся, кай кодэла, ко амэн ақардэ тэ побэшас, тэ авэн лошалэ.

22. Васо фартэ трэбуй драго тэ прилас ек еқэс?

²² О Пётро пистросардя, кай йто парашэла кадэва миро (1 Пет. 4:7). Акана кадэя время ашэля май пашэ. Амэ тердювас по пороӷо англа кода, кала авэла фартэ бари бида, сави инке никала на сас. И, со май фартэ кадэва миро ашэл май вэрыто, инке май фартэ амэ трэбуй тэ любисарас амарэ ԥралэн и ԥэян анда собрания. Андэ кадэя время лэ христианонэнди, сар никала, трэбуй тэ терэн кода, со ԥэндя о Пётро: «Драго прилэн ек еқэс» (1 Пет. 4:9). Фартэ драго тэ терэн кадя, сар катэ ԥэнэнпэ. Када трэбуй акана и трэбуй авэла пэ вся вечность.