Дром каринг и чачуни бах
«Сар о шаво одмэкэла тумэн, во тумэн па чачимастэ одмэкэла» (ИОАН. 8:36).
1, 2. а) Со и мануша терэн, кай тэ жувэн кадя, сар вонэ камэн? б) Каринг со када вся анэн?
АДЕС нико на камэл, кай лэнди варико тэ ԥэнэн, со и сар тэ терэн. Андэ бут страны и мануша камэн, кай будэр тэ на авэл кода, кай дэко обжалпэ аврэнца кадя, сар вонэ на затердэ. Кадяжэ камэн, кай и мануша тэ парашэн тэ гиндон пала авэр найдраго, важ кода кай вонэ най кацавэ, сар авэр, и кай тэ на авэл чорымос. Ай андэ авэр страны и мануша камэн тэ витидэн, тэ дэн дума и тэ жувэн кадя, сар вонэ камэн. Дицол, кай всаворэ камэн тэ жувэн, сар лэнди чалёл.
2 Кай лэ манушэндэ тэ авэл вся када, вонэ тидэнпэ и дэн дума против барэ мануша, савэ правин, кай вонэ тэ дэн кода, со и мануша камэн. Кадяжэ и мануша тидэнпэ, кай тэ сшон кацавэ барэ манушэн. Но вижал кадэлэстар кода, со вонэ камэн? Най. Кадэлэстар вижал, кай лэ манушэнди ашэл май ԥарэс. И кадяжэ, када анэн каринг и смэрть. И када дицол анда лэ Дэвлэстирэ алава, савэ во ԥэндя через о царё Соломоно: «Сар о мануш хулай пэ авэр мануш, када на анэн лэсти лашимос» (Эккл. 8:9).
3. Со тэ терэс, кай тэ авэл чачуни бах?
3 Лэ Христоско ученико о Иаково пистросардя, андэр со и чачуни бах: «Ко придиқэлпэ каринг о совершенно законо, саво одмэкэл анда рабство и ашэлпэ андэ кадэва законо... авэла бахтало, сар терэл кадя» (Иак. 1:25). Кадэва «совершенно законо» дя амэнди о Иегова. Кати о Иегова ӷанэн, со трэбуй лэ манушэнди, кай тэ авэн андэ вся бахталэ. О Иегова дя лэ Адамости и ла Евати вся, кай вонэ тэ авэн па чачимастэ бахталэ.
КАЛА И МАНУША СЛИНЭ ПА ЧАЧИМАСТЭ БАХТАЛЭ?
4. Сави жизня сас кай о Адамо и Ева? (Диқэн и картинка англа статья.)
4 Кала адиносардям пэрво и дуйто ӷлавы андэ книӷа Бытие, амэ уӷанглям, кай о Иегова дя лэ Адамости и ла Евати жизня, андэ сави на сас рабство. Када жизня, сави камэн и мануша андэ амарэ деса. Лэндэ сас вся, со лэнди трэбуй. Вонэ никастар и нисостар на даранас и нико пэр лэндэ на тасавэлас. Лэнди на трэбуй сас тэ загиндонпэ, со тэ хан, пала бути, пала зор и пала кода, кай авэла время, кала вонэ мэрэна (Быт. 1:27—29; 2:8, 9, 15). Но сас варисо, со лэнди нащи сас тэ терэн? Уӷанаса.
5. Состар па чачимастэ и мануша авэна бахталэ?
5 Бут мануша гиндон, кай и чачуни бах кати тоди, кала вонэ терэн, со камэн и на загиндонпэ, со кадэлэстар авэла. Андэ энциклопедия «Уорлд бук» ԥэнэнпэ, «кай и чачуни бах, када кала о мануш екжэно витидэл, со тэ терэл и терэл кадя». Но котэ инке исин кацавэ алава: «И мануша бахталэ кати тоди, кала и барэ мануша на стон и законоря, через савэ и мануша обжанпэ аврэнца найгодявэрнэс, и сар вонэ на затердэ». Вижал, и законоря трэбуй, важ кода кай вонэ всаек анэн лашимос. Тоди, кастэ исин право тэ витидэл, саво законо лашо, саво трэбуй, и саво законо годявэрно?
6. а) Васо кати о Иегова может тэ терэл вся, со камэл? б) Исин кода, со лэ манушэнди нащи тэ терэн и васо?
6 Амэнди трэбуй тэ сэрас, кай кати о Иегова может тэ терэл вся, со камэл. Васо? Важ кода кай лэстэ само баро зор и во вся создал (1 Тим. 1:17; Отк. 4:11). Саво кай о Иегова ҭан, дицол анда шукарни лэ Давидостири дума. (Адиносар 1 Летопись 29:11, 12a). Кай вся, со создал о Иегова, исин кода, со лэнди нащи тэ терэн. О Дэл Иегова камэл, кай амэ тэ полас, кай кати лэстэ исин право тэ витидэл, саво законо лашо, саво трэбуй, и саво законо годявэрно. Кацавэ законоря о Иегова стодя, кала создал лэ манушэн.
7. Со амэ трэбуй тэ терас кажно дес, кай тэ авас лошалэ?
7 О Адамо и Ева терэнас най вся, со лэнди камэласпэ. Вонэ полэнас, важ кода кай тэ жувэн, лэнди прижалпэ тэ ԥурдэн, тэ хан, тэ совэн и инке бут со. Но хэба кадэлэстар лэнди сас ԥарэс? Най, важ кода кай кадя лэн создал о Иегова. О Иегова стердя, кай кода, со о мануш трэбуй тэ терэл кажно дес, кадэлэстар во ашэл лошало и бахтало (Пс. 104:14, 15; Эккл. 3:12, 13). Всаворэнди амэнди чалёл тэ ԥурдас лашэ воздухоса, тэ чалювас лашэ хамастар и тэ прошаспэ, кала драго висутямпэ. Никасти и андо шэро на дэла, кай када важ амэндэ ԥаримос. Лэ Адамости и ла Евати када кадяжэ на дэлас андо шэро.
8. Со ԥэндя о Дэл лэ Адамости и ла Евати и васо?
8 О Иегова ԥэндя лэ Адамости и ла Евати, кай лэндэ тэ авэн бэятцэ и вонэ тэ розжанпэ па вся ԥув. Кадяжэ, кай вонэ тэ диқэн пала ԥув (Быт. 1:28). Када со, одля лэндар и бах? Най. Через кода, со ԥэндя лэнди о Дэл, вонэ терэнас, со во загиндосардя. Вонэ стердоп, кай пэ вся ԥув тэ авэл раё, андэ саво вонэ жудоп (Ис. 45:18). Андэ амарэ деса, сар о шаво на камэл тэ женийпэ чи и щей тэ жал миростэ, андэ када нисо нинай. Инке, сар о шаво камэл тэ женийпэ чи и щей тэ жал миростэ, но на камэн, кай тэ авэн бэятцэ, кадэлэса, вонэ на жан против Дэл. Но када чаче, кала лэндэ арақадёнпэ бэятцэ, кадэлэстар лэнди дэкала авэла ԥарэс. Но всаек бут, ко женинпэ и лэндэ арақадёнпэ бэятцэ (1 Кор. 7:36—38). Важ кода кай кажно гиндой, кай авэла бахтало андо ери (Пс. 127:3). Тэ канглоп о Адамо и Ева лэ Иеговас, тоди жудоп вонэ пэстирэ ереса роздраго и вся вечность.
САР И МАНУША ХАСАРДЭ ЧАЧУНИ БАХ?
9. Васо пала законо анда Бытие 2:17 нащи тэ ԥэнас, кай во сас найлашо, сас на трэбуй, чи найгодявэрно?
9 О Иегова дя законо лэ Адамости и ла Евати, и во лэс драго росԥэндя. Кадяжэ о Иегова ԥэндя лэнди, со авэла, сар вонэ лэс на кандэна. О Иегова ԥэндя: «Кати на ха па витка, сави сыкавэл, со лашимос, ай со найлашимос. Важ кода кай андо дес, кала ту хаса пар латэ, мэрэса» (Быт. 2:17). Кадэва законо сас найлашо, сас на трэбуй, чи найгодявэрно? Одля кадэлэса о Иегова и бах? Най. Бут мануша, савэ драго полэн и Библия, гиндон, кай лэ Дэвлэско законо трэбуй сас, и кадэва законо сас годявэрно. Акэ, со пистрой ек анда кадэла мануша: «Андэ лэ Дэвлэско законо, саво [запистромэ андэ Бытие 2:16, 17] ԥэнэнпэ, кай кати о Дэл ӷанэн, со важ и мануша „лашимос“... ай со най. Кай тэ диқэн, саво лашимос када анэн, и мануша трэбуй тэ патян лэ Дэвлэсти и тэ кандэн лэс. Сар вонэ лэс на кандэн, лэнди прижалапэ екжэнэнди тэ витидэн, со „лашимос“... ай со най». Но када най па лэ манушэнго зор.
Кода, со витидэ о Адамо ла Еваса андя каринг и бида (Диқэн и абзацоря 9—12.)
10. Васо када най ек, кала о мануш витидэл, со тэ терэл, ай со най, и кала о мануш екжэно витидэл, со лашимос, ай со най?
10 Варисавэ мануша гиндон, кай о Дэл на дэлас лэ Адамости тэ терэл, со во камэл. Но кацавэ мануша стидэн андэ ек акэ со. О Дэл мэкля, кай о мануш екжэно тэ витидэл, со тэ терэл, ай со най. Но о Дэл на мэкля, кай о мануш екжэно тэ витидэл, со лашимос, ай со най. О Адамо ла Еваса моӷли екжэнэ тэ витидэн, тэ кандэн лэ Дэвлэс чи най. Но кати о Иегова витидэл, со лашимос, ай со най. Важ када андо Эдемско садо барёлас «витка, сави сыкавэл, со лашимос, ай со найлашимос» (Быт. 2:9). Трэбуй тэ полас, кай амэ най вся время ӷанас, каринг со анэна кода, со амэ витидас. Кадяжэ амэ на гиндосарас, кай кода, со амэ витидас, анэна амэнди кати о лашимос. Акэ васо, кала и мануша камэн тэ терэн варисо лашо, лэндэ дэкала вижал ԥаримос и биды (Прит. 14:12). И мануша най вся моӷут тэ терэн. Кадэлэ законоса о Иегова камля тэ сытярэл лэ Адамос ла Еваса, кай вонэ тэ кандэн лэс и кадэлэстар па чачимастэ тэ авэн бахталэ. Со о Адамо и Ева витидэ?
11, 12. Васо кода, со витидэ о Адамо и Ева, андя каринг и бида? Росԥэнэн пала пилото.
11 О Адамо и Ева витидэ тэ на кандэн лэ Иеговас. Вонэ патяе андэ хохавнэ лэ Сатанастирэ алава: «Тумарэ яқа ԥэрнадёнапэ и тумэ ашэна сар о Дэл, и лэна тэ ӷанэн, со лашимос и со найлашимос». И Ева кангля лэ Сатанас (Быт. 3:5). О Адамо ла Еваса ашэлэ май бахталэ? Най. Вонэ на канглэ лэ Иеговас, тердэ па пэстирятэ и лэнди на дорэсляпэ кода, со ԥэндя лэнди о Сатана. Йто вонэ полинэ, кай када андя бида (Быт. 3:16—19). Важ кода кай о Иегова на дя лэ манушэнди тэ витидэн, со лашимос, ай со най. (Адиносар Притчи 20:24b; Иеремии 10:23c).
12 Подаса дума акэ пала со. Кай о самолёто драго тэ довурял кордэ каринг трэбуй, о пилото ашунэл, со лэсти ԥэнэн о диспетчеро, када о мануш, саво подԥэнэн каринг тэ вурял. Ай инке о пилото диқэл по навиӷатаро. Но сар о пилото на ашунэл, со лэсти ԥэнэн о диспетчеро и на диқэл по навиӷатаро, о самолёто может тэ розмардёл. О Адамо и Ева, сар кадэва пилото. Вонэ на канглэ лэ Дэвлэс и тердэ па пэстирятэ. Каринг со када андя? Каринг и бида! Вонэ и кодэла, ко лэндар жылэ, ашэлэ лэ бэзэхэстирэ раборя и линэ тэ мэрэн (Рим. 5:12). О Адамо и Ева на ашэлэ май бахталэ, кала линэ тэ витидэн, со лашо, ай со най. Важ када вонэ хасардэ и чачуни бах, сави дя лэнди о Иегова.
СО ТЭ ТЕРЭН, КАЙ ПА ЧАЧИМАСТЭ ТЭ НА АВЭН РАБОРЯ?
13, 14. Со тэ терас, кай па чачимастэ тэ на авас раборя?
13 И мануша гиндон, сар вонэ тэ терэн кода, со камэн, и лэнди нико ни андэр со тэ на заԥэнэн, кадя авелоп фэдэр. Но чаче авелоп фэдэр? Погиндон, саво авелоп о миро, сар всаворэ тэ тердоп кода, со вонэ камэн. Андэ энциклопедия: «Уорлд бук» ԥэнэнпэ, кай «Андэ кажно страна бут законоря, савэ найвушэро тэ полэн и пар лэндэ найвушэро тэ жувэн. Еқа ригатар и законоря трэбуй, кай тэ фэрин лэ манушэн, ай авря ригатар, кай тэ на дэн лэ манушэнди тэ терэн вся, со вонэ камэн». Важ када кадя бут адвокаторя и сындомаря, савэ розлэнпэ андэ кадэла законоря, кай тэ полэн и тэ росԥэнэн, сар пар лэндэ тэ жувэн.
14 О Иисусо росԥэндя, сар амэнди па чачимастэ тэ на авас раборя. Во ԥэндя: «Сар тумэ ритярдёнпэ мэрнэ алавэсти, тоди тумэ па чачимастэ мэрнэ ученикоря. Тумэ уӷанэна о чачимос и о чачимос одмэкэла тумэн анда рабство» (Иоан. 8:31, 32). Кай па чачимастэ тэ на авас андо рабство, акэ со трэбуй. Пэрво, о мануш трэбуй тэ прилэл о чачимос, пала саво росԥэнэнас о Иисусо. Дуйто, о мануш трэбуй тэ ашэл лэско ученико. Када и исин дром, саво виандярэл анда рабство. Тэ виандярэл анда саво рабство? Виандярэл анда лэ бэзэхэско рабство. О Иисусо ԥэндя: «Кажно, ко терэл бэзэх, во лэ бэзэхэско рабо. ...Сар о шаво одмэкэла тумэн, во тумэн па чачимастэ одмэкэла» (Иоан. 8:34, 36).
15. Васо кати о Иисусо па чачимастэ одмэкэл амэн?
15 О Иисусо дя алав, кай одмэкэла пэстирэ учениконэн. И кода, состар во лэн одмэкэла, пэ бутэстэ фэдэр чем кода, андар со бут мануша камэн адес тэ вижан. О Иисусо ԥэндя кацавэ алава: «Сар о шаво одмэкэла тумэн, во тумэн па чачимастэ одмэкэла». Пала со жал и дума? Во ԥэнэнас, кай одмэкэла анда само ԥаро рабство, саво сас варикала кай и мануша, анда рабство лэ бэзэхэстар. О бэзэх цырдэл лэ манушэс тэ терэл варисо найлашо и на домэкэл тэ терэл лашимос, саво па лэско зор. Через када лэсти ԥарэс по ди, во пэрэандярэл ԥаримос и, сар прожал время, во мэрэл (Рим. 6:23). Кадяжэ сас андо ди кай о апостоло Павло. (Адиносар Римлянам 7:21—25d). Када сыкавэл, кай о мануш лэ бэзэхэско рабо. Инке через када о мануш фартэ загиндойпэ, кай лэстэ андэ жизня на вижал кода, со во камэл. Кала амэндар о Иисусо улэла вся о бэзэх, кати тоди амэ аваса па чачимастэ най раборя, сар варикала слинэ о Адамо ла Еваса.
16. Со амэ тэ терас, кай па чачимастэ тэ на авас андо рабство?
16 Со сыкавэн кадэла лэ Иисусостирэ алава: «Сар тумэ ритярдёнпэ мэрнэ алавэсти»? Вонэ сыкавэн, кай кала тумэ ашэлэ христианоря, тумэ отԥэнделэпэ пэстар, и закамлэ тэ жувэн кадя, сар сытярэл о Иисусо (Матф. 16:24). Амэ сэрас, кай о Иисусо дя алав, кай амэ па чачимастэ аваса най андо рабство. Кала? Тоди, кала амэндэ авэла вся о лашимос, через кода кай о Иисусо отдя пала амэндэ пэстири жизня.
17. а) Со поможыя амэнди па чачимастэ тэ авас бахталэ и лошалэ? б) Пала со амэ подаса дума андэ авэр статья?
17 Кай тэ авас па чачимастэ бахталэ и лошалэ, амэ трэбуй тэ кандас лэ Иисусос, сар лэстирэ ученикоря. Када отԥэрнавэл о дром анда рабство лэ бэзэхэстар и ла смэртятар. (Адиносар Римлянам 8:1, 2e, 20, 21f). Андэ авэр статья амэ падаса дума, сар годявэрнэс тэ витидас кода, со камас, кай вся вечность тэ хвалисарас лэ Иеговас, савэстэ нинай рабство.
a 1 Летопись 29:11, 12: «Иегова, ту фартэ баро и фартэ зорало. Вся, со тутэ исин, фартэ шукарно, тутэ слава и достоинство, важ кода кай вся, со по нэбо и пэ ԥув, вся када тиро. Иегова, о царство тиро, и ту хулай пэ всаворэ барэдэра. Тутар барвалимос и слава, и ту хулай пэ вся. Андо тиро вас зор и фартэ баро зор, и тиро вас дэл май бари власть. И ту терэс кадя, кай всаворэ тэ авэн састэстэ».
b Притчи 20:24: «Каринг о мануш тэ жал, сыкавэл о Иегова. Сар о мануш тэ полэл пэско дром?».
c Иеремии 10:23: «Мэ драго ӷанав, кай о мануш най хулай важ пэско дром. Най андэ лэ манушэстирэ вас тэ сыкавэл пэсти каринг тэ жал».
d Римлянам 7:21—25: «И акэ, диқав кадэва законо андэр мандэ. Кала мэ камав тэ терав лашимос, андэр мандэ уже исин о найлашимос. Мэрнэ одести чалёл лэ Дэвлэско законо. Но андэ мэрни тила диқав авэр законо, саво жал против законо, саво андэ мэрнэ гиндоря. Кадэва законо терэл ман рабоса лэ бэзэхэстирэ законости, саво исин андэ мэрни тила. Бибахтало мэ мануш! Ко улэла мандар мэрни тила, сави анэн и смэрть? Блаӷодарисарас лэ Дэвлэс через о Иисус Христос, саво амаро Ӷосподо! Да, екжэно мэ лэ гиндонэнца рабо лэ Дэвлэстирэ законости, ай и тила рабо лэ бэзэхэстирэ законости».
e Римлянам 8:1, 2: «Важ када кодэлэн, ко гиндой, сар о Иисус Христос, лэн на сындон. Лэ духоско законо, саво дэл жизня, кадяжэ лэ Христоса. Лэ духоско законо одмэкля тут лэ бэзэхэстирэ и ла смэртятирэ законостар».
f Римлянам 8:20, 21: «И кода, со создал о Дэл, ля тэ жувэл евья, най важ кода кай камэлас, ай через кодэва, ко када стердя, и тэ аштярэл о лашимос, кай кода, со создал о Дэл, лэс одмэкэна анда рабство, андэ саво тернён, лэсти дэна райкани жизня, андэ сави нинай рабство, сави исин кай лэ Дэвлэстирэ бэятцэ».