Патян амарэ учителёсти, лэ Христости
«Тумэндэ ек учителё, о Христос» (МАТФЕЯ 23:10).
1, 2. Сави найвушэро дила трэбуй сас тэ стерэл о Иисусо Навино, кала муля о Моисеё?
О ИЕГОВА ԥэндя лэ Навиности: «О Моисеё, мэрно служытелё муля. И акэ, ущи и всаворэ́ кадэлэ народоса пэрэжа через кадэя лэн, через о Иордано. Жа пэ ԥув, сави мэ дав лэнди» (Иисус Навин 1:1, 2). Варикай 40 бэрш о Навино поможыяс лэ Моисеёсти, ай акана во трэбуй сас тэ залэл лэско ҭан.
2 Файма, о Иисусо Навино фартэ загиндояспэ, сар пэ када диқэна и израильтяноря, важ кода кай о Моисеё бут время диқэлас пала лэндэ (Второзаконие 34:8, 10 жы кай 12). Акэ со пистромэ андэ ек книжка пала алава анда Иисус Навин 1:1, 2: «Сар дэлмут, кадя и адес ԥарэс важ и мануша, савэ жувэн андэ страна, кала андэр латэ парудёнпэ и барэ мануша».
3, 4. Васо ԥэнаса, кай о Иисусо Навино най евья патяя лэ Иеговасти? Со дэкала амэнди камэлпэ тэ пушас?
3 Кай о Иисусо Навино сас, васо фартэ тэ загиндойпэ. Но во патяя лэ Иеговасти и йто стердя вся, со во ԥэндя лэсти (Иисус Навин 1:9 жы кай 11). О Иисусо Навино патяя лэ Иеговасти и о Иегова дя лэсти важ када лашимос. Андэ Библия пистромэ, кай о Дэл сытярэлас и андярэлас лэ израильтянонэн через о анӷело. Кадэва анӷело сас лэ Иеговаско шаво, савэс во создал пэрвонэс. Инке пала лэстэ андэ Библия пистромэ, кай во «алав» (Исход 23:20 жы кай 23; Иоанна 1:1).
4 О Иегова поможысардя лэ израильтянонэнди, кай вонэ тэ присытён, кай акана диқэла пала лэндэ о Иисусо Навино. Адес андэ лэ Иеговастири орӷанизацыя кадяжэ бут со парудёл. Кала амэ када диқас, амэ пушас пэстар: «Исин мандэ, васо тэ патяв амарэ учителёсти, лэ Христости?» (Адиносар Матфея 23:10a). Кай тэ полас када, амэ подаса дума, сар о Иегова диқэлас пала пэско народо андэ время, кала варисо парудёлас.
КО АНДЯРЭЛАС ЛЭ НАРОДОС ПЭ ԤУВ, ПАЛА САВИ ВО ДЯ АЛАВ, КАЙ АВЭЛА ЛЭНДИРИ?
5. Кас о Навино диқля паша Иерихоно? (Диқэн и картинка англа статья.)
5 Прожыля набут время, сар и израильтяноря пэрэжылэ о Иордано. О Иисусо Навино паша Иерихоно додиқля манушэс, савэс во на ӷанэнас. Кодэлэ манушэстэ андо вас сас мечо. О Иисусо Навино пушля: «Ту пала амэндэ чи пала амарэ вороӷоря?» О Иисусо Навино дя наздив, кала о мануш ԥэндя лэсти, кай во «кодэва, ко диқэл пала лэ Иеговастирэ воиноря» и авеля тэ фэрий лэ Дэвлэско народо! (Адиносар Иисус Навин 5:13 жы кай 15b). Андэ авэр стихоря анда Библия пистромэ, кай лэ Навиноса дэлас дума о Иегова. Но о Дэл дэлас дума лэса через о анӷело, сар во най еқвар терэлас када и андэ дэлмутни время (Исход 3:2 жы кай 4; Иисус Навин 4:1, 15; 5:2, 9; Деяния 7:38; Галатам 3:19).
6—8. а) Васо дэсо, со о Иегова ԥэндя тэ терэн, здэласпэ найгодявэрнэс? б) Васо кода, со о Иегова ԥэндя тэ терэн, сас годявэрнэс и андэ кодэя время, андэ сави трэбуй? (Диқэн и сноска.)
6 О анӷело ԥэндя лэ Навиности, со тэ терэл, кай тэ захутилэл о Иерихоно. Во ԥэндя, кай о Иисусо Навино тэ терэл обрезания всаворэ́ воинонэнди. Када сыкавэл, кай лэ воинонэндэ на вижала тэ марэнпэ дэсавэ деса. Хэба, трэбуй сас тэ терэн обрезания ворта андэ кадэя время? (Бытие 34:24, 25; Иисус Навин 5:2, 8).
7 И воиноря пушэнас пэстар: «Сар амэ ласа тэ фэрисарас амарэ еря, кала и вороӷоря дэна пар мэндэ?» Но тоди па лаӷерё жыля дума, кай о Иерихоно «састэс заԥандадо, важ кода кай и мануша даран лэ израилёстирэ шавэндар» (Иисус Навин 6:1). Када инке май фартэ дя лэнди тэ полэн, кай лэ Иеговасти трэбуй тэ патян.
8 Кадяжэ лэ Иеговаско анӷело ԥэндя лэ Навиности, кай вонэ тэ на дэн по Иерихоно. Во ԥэндя, кай лэнди трэбуй сас еқвар андо дес тэ обжан круӷом о форо. Лэнди трэбуй сас кадя тэ обжан о Иерихоно шов дес, ай андо седьмо дес тэ обжан лэс семь разоря. Дэсавэ воиноря, файма, гиндонас: «Кадя амэ кати хасарас и время и о зор!» Но кодэва, ко диқэлас пала Израилё, драго ӷанэнас, со терэл. И израильтяноря канглэ лэс и через када лэндири вера ашэля май састи. Кадяжэ лэнди на прижыляпэ тэ марэнпэ лэ воинонэнца анда Иерихоно (Иисус Навин 6:2 жы кай 5; Евреям 11:30)c.
9. Васо амэнди трэбуй тэ терас, со амэнди ԥэнэн и ԥрала анда лэ Иеговастири орӷанизацыя? Росԥэнэн.
9 Сости амэ сытювас анда када? Дэкала амэ на полас, васо лэ Иеговастири орӷанизацыя терэл варисо нэво. Ԥэнаса, амэ най вся и время поласас, состэ трэбуй и телефоноря, планшэторя и компьютероря, кала екжэнэ сытювас па Библия, кала росԥэнас пала Дэл и кала ԥирас пэ собрания. Но акана амэ диқас, саво лашимос анэн, кала амэ лэнца терас дила. И тоди диқас, саво лашимос анэн кода, со парудёл андэ орӷанизацыя. Кадя амари вера ашэл май састи и амэ ашас инке май фартэ ек пала еқэстэ лэ ԥралэнца и лэ ԥэянца анда собрания.
О ХРИСТОС ДИҚЭЛАС ПАЛА СОБРАНИИ АНДЭ ПЭРВО ВИКО
10. Ко стердя, кай и ԥрала анда руководящё совето, тэ подԥэнэн, кай андэ собрания андо Иерусалимо тэ на споринпэ пала обрезания?
10 Кала прожылэ 13 бэрш, сар о Корнилиё ашэля христианино, дэсавэ христианоря анда евреёря всаек гиндонас, кай трэбуй тэ терэн обрезания (Деяния 15:1, 2). Андэ Антиохия и ԥрала споринаспэ пала када. Важ када и старейшыноря доԥэнделэпэ, кай о Павло жала каринг и ԥрала анда руководящё совето андо Иерусалимо и мангэла, кай вонэ лэнди тэ подԥэнэн. Но ко через лэндэ подԥэнэнас? Па лэ Павлостирэ алава во жыля кордэ, «важ кода кай лэсти сас откровения». Чаче, када о Христос терэлас вся кадя, кай и ԥрала анда руководящё совето тэ стерэн, кай и ԥрала тэ парашэн тэ споринпэ (Галатам 2:1 жы кай 3).
О Христос диқэлас пала христианоря андэ собрании андэ пэрво вико (Диқэн и абзацоря 10, 11.)
11. а) Со дэсавэ христианоря, савэ сас евреёря, на парашэнас тэ гиндон пала обрезания? б) Сар о Павло сыкадя, кай на заваздэл о шэро и кандэл лэ старейшынонэн андо Иерусалимо? (Диқэн кадяжэ и сноска.)
11 О Иисусо ԥэндя через и ԥрала анда руководящё совето, кай и христианоря, савэ най евреёря на трэбуй тэ терэн обрезания (Деяния 15:19, 20)d. Но дажэ, сар прожылэ бэрша и христианоря, савэ сас евреёря, всаек терэнас обрезания пэстирэ шавэнди. Тоди и старейшыноря анда Иерусалимо ашундэ, кай, ԥэнэса, о Павло на ритярэл лэ Моисеёско законо. Вонэ манглэ лэс тэ терэл акэ со. Во трэбуй сас тэ лэл пэса андо храмо штарэ манушэн, кай тэ сыкавэл всаворэнди, кай ритярэл о законо. О Павло ԥэндоп: «Када найгодявэрнэс! Васо тумэ мангэн ман када тэ стерав? И еврейски христианоря най кадя полэн пала обрезания». Но о Павло поля, кай и старейшыноря камэн, кай машкар всаворэ христианоря тэ авэл ладо и важ када на завазгля о шэро и кангля лэн. Но васо о Иисусо кадя дэ бут время на розлэлас кадэя дила, хоть и посли кода, сар во муля, лэ Моисеёско законо будэр на трэбуй сас? (Колоссянам 2:13, 14).
12. Васо о Христос домэкэлас, кай инке дэсави время тэ терэн обрезания?
12 Кай тэ терас кода, со акана нэво, трэбуй авэла время. Кадя сас лэ христианонэнца, савэ сас евреёря (Иоанна 16:12). Вонэ присытелэ тэ гиндон, кай через и обрезания лэндэ вижала май драго тэ полэн лэ Дэвлэс, сар кодэлэс, каса ладин, хан и пэн (Бытие 17:9 жы кай 12). Ай варико на камэлас, кай пэр лэстэ авэр евреёря фартэ тэ шон сама и даралас, кай лэс лэна тэ ӷонин важ и вера (Галатам 6:12). Но прожыля время и о Христос через лэ Павлостирэ письморя пэрэԥэндя, со лэнди трэбуй тэ терэн акана (Римлянам 2:28, 29; Галатам 3:23 жы кай 25).
О ХРИСТОС ДИҚЭЛ ПАЛА СОБРАНИИ АДЕС
13. Со поможыя амэнди тэ терас вся кадя, сар ԥэнэн о Христос?
13 Дэкала адес амэ на дополас, васо андэ лэ Иеговастири орӷанизацыя варисо паруделя. Тоди погиндосарам, сар андэ дэлмутни время о Христос диқэлас пала лэ Дэвлэско народо. Андэ лэ Навиности время и андэ пэрво вико, о Христос пэрэдэлас годявэрнэ гиндоря, савэ поможынас тэ полэн, со тэ терэн. Када фэрияс лэ Иеговастирэ служытелёнэн сар народос. Кадэлэстар лэндэ сас и вера май састи и вонэ май фартэ сас ек пала еқэстэ (Евреям 13:8).
14—16. Сар кода, со ԥэнэн тэ терас и ԥрала анда «верно и блаӷоразумно рабо» сыкавэл, кай о Христос бут со дэл, кай амари вера тэ ашэл май састи?
14 О Иисусо бут со дэл, кай амари вера тэ авэл састи, важ кода кай любий амэн. Во через о «верно и блаӷоразумно рабо», андэ сави амэнди трэбуй время, годявэрнэс подԥэнэн, со тэ терас (Матфея 24:45). О Марко, савэстэ штар бэятцэ, ԥэнэн: «О Сатана тасавэл пэ еря и кадэлэса терэл, кай всаворэндэ андэ собрания тэ авэл найсасти вера. Ай акана амэндэ кажно курко исин вэчэро, андэ саво амэ лэ ереса сытювас па Библия. И хулая полэн, кай лэнди трэбуй тэ фэрин пэско ери».
15 Кала амэ диқас, кай о Иисусо диқэл пала амэндэ, амэ полас, кай во камэл, кай амари вера тэ ашэл инке май састи. Акэ со ԥэнэн ек старейшына, савэс ақарэн Патрико: «Спэрва дэсавэ умэклэ и вас, сар уӷанглэ, кай амэ андэ выходни деса, ласа тэ стидаспэ найбутэ манушэнца, кай тэ сытювас тэ росԥэнас пала Дэл. Но када сыкавэлас, кай о Иисусо гиндой пала ԥрала и ԥэя, савэ лажавнэ и савэ набут росԥэнэн пала Дэл. Вонэ полинэ, кай лэн цэнин и, кай лэндэ бут, со вижала тэ терэн андэ лэ Дэвлэстири дила. Тоди лэндири вера ашэля май састи».
16 О Христос най кати бут со дэл, кай амэндэ и вера тэ ашэл май састи. Кадяжэ во поможый амэнди тэ стас пэ пэрво ҭан, кай тэ росԥэнас лащи весть. Кадэя дила адес, со май трэбуй. (Адиносар Марка 13:10e). Лэ Андрэс найдэлмут стодэ старейшынаса. Во вся и время терэл кода, со нэво терэлпэ андэ лэ Иеговастири орӷанизацыя. Во ԥэнэн: «И ԥрала ԥэндэ дэсавэ ԥралэнди и ԥэянди, савэ служын андо вефилё, кай вонэ тэ ашавэн пэстири служэния. Када сыкавэл, кай йто кадэлэ мирос на авэла и важ када амэнди трэбуй тэ стас май бут зор, кай тэ росԥэнас пала Дэл».
СО ТЭ ТЕРАС, КАЙ ТЭ СЫКАВАС, КАЙ КАНДАС АМАРЭ УЧИТЕЛЁС, ЛЭ ХРИСТОС?
17, 18. Васо трэбуй тэ погиндосарас пала лашимос, саво андя амэнди кода, со найдэлмут паруделя андэ лэ Иеговастири орӷанизацыя?
17 Кода, со ԥэнэн тэ терас о Иисус Христос, амаро царё, вся и время анэн амэнди лашимос. Важ када амэнди трэбуй тэ погиндосарас, саво амэнди андя лашимос, со найдэлмут паруделя. Кала сытён па Библия лэ ереса подэн дума, сар поможысардя тумарэ ерести кода нэво, со паруделя андэ собрания чи, сар росԥэнас пала Дэл?
Ай тумэ поможын пэстирэ ерести и аврэ христианонэнди тэ терэн, сар ԥэнэн и ԥрала анда лэ Иеговастири орӷанизацыя? (Диқэн и абзацоря 17, 18.)
18 Амэ полас, васо и ԥрала анда лэ Иеговастири орӷанизацыя ԥэнэн, со нэво тэ терас и саво лашимос када анэн амэнди. И тоди амэнди май фартэ камэлпэ тэ терас кадя. Ԥэнаса, акана амэ вимэкас май набут литература, и важ када амэндэ жан май набут ловэ. Кадяжэ кода, кай амэндэ нэви техника, дэл амэнди тэ росԥэнас пала царство май бутэ манушэнди. Вижал амэндэ тэ сыкавас и литература, аудио и видео па амаро сайто? Кала амэ кадя терас, амэ сыкавас, кай кандас лэ Христос, саво камэл, кай и ԥрала андэ лэ Иеговастири орӷанизацыя тэ тратин и ловэ годяса.
19. Васо амэнди трэбуй тэ терас кадя, сар ԥэнэн амаро учителё, о Христос?
19 Кала амэ терас кадя, сар ԥэнэн о Христос, амаро учителё, амэ поможысарас лэ ԥралэнди и ԥэянди, кай лэндэ тэ авэл май састи вера. Кадяжэ, амэ ашас май фартэ ек пала еқэстэ. Акэ со ԥэнэн о Андрэ пала кодэла, ко парашэля тэ служый андо вефилё: «Мэ диқлэм, сар кодэла, ко служынас андо вефилё йто присытелэ каринг кода, со паруделя. Мэ лэм тэ став пэр лэндэ май бари патив и лэм инке май фартэ тэ патяв лэ Христости. Вонэ терэн вся, сар сытярэн и ԥрала анда лэ Иеговастири орӷанизацыя и лошалэ тэ терэн любо дила, сави лэнди дэн».
ТЕРЭН ВСЯ, КАЙ И ВЕРА ТЭ АШЭЛПЭ САСТИ И ПАТЯН АМАРЭ УЧИТЕЛЁСТИ, ЛЭ ХРИСТОСТИ
20, 21. а) Васо амэ патяс амарэ учителёсти, лэ Христости? б) Пала со амэ уӷанаса, кала адиносараса авэр статья?
20 Йто амаро учителё, о Иисус Христос победия и сыкавэла пэстири дила, савятар и мануша здарана (Псалом 45:4; Откровение 6:2). Ай акана во сытярэл амэн, кай амэ тэ лас тэ сытярас всаворэсти кодэлэн, ко рияпэ каринг и жызня и тэ терас, кай и ԥув тэ ашэл раё.
21 Амаро царё анэна амэн андо нэво миро. Кай када тэ авэл, амэнди трэбуй андэ вся тэ патяс лэсти, со бы тэ на терэлпэ. (Адиносар Псалом 46:1 жы кай 3f). Но дэкала, кала амэ на аштярас, андэ амари жызня варисо парудёл. Тоди амэнди ашэл ԥарэс тэ присытювас каринг када. Кала кадя терэлпэ, со поможыя, кай амэндэ андо ди тэ авэл лашимос и кай амари вера андо Иегова тэ ашэлпэ састи? Пала када амэ уӷанаса, кала адиносараса авэр статья.
a Матфея 23:10: «И на ԥэнэн ни пэр кастэ учителё, важ кода кай тумэндэ ек учителё, о Христос».
b Иисус Навин 5:13 жы кай 15: «Кала о Иисусо сас паша Иерихоно, во вазгля и яқа и додиқля, кай англа лэстэ тердёл мануш ԥэрнадэ мечоса андо вас. О Иисусо поджыля каринг лэстэ и ԥэндя: „Ту пала амэндэ чи пала амарэ вороӷоря?“ Кодэва ԥэндя: „Ни кода, ни авэр. Мэ авелэм кардэ, сар кодэва, ко диқэл пала лэ Иеговастирэ воиноря.“ Сар о Иисусо ашундя када, во пэля пэ чанга, тэлеля лэ моса жы кай и ԥув и ԥэндя: „Со ԥэнэна мэрно ӷосподино пэстирэ слуӷости?“ Кодэва, ко диқэл пала лэ Иеговастирэ воиноря, ԥэндя лэ Навиности: „Излэ па пэрнэ, важ кода кай о ҭан, пэ саво ту тердёс, свынто.“ О Иисусо йто када стердя».
c Андо Иерихоно, а́ндэ розмардэ бара и учони виарақлэ бут зэрно, савэ и мануша стидэнас, но на ханас. Када сыкавэл, кай о форо сас захутилдо пала найбари время. О Иегова на домэкля, кай и израильтяноря тэ хан о зэрно анда Иерихоно. Тоди, со вонэ ханас? О Дэл витидя и время, кай тэ захутилэн кадэя ԥув тоди, кала пэ маля сас бут зэрно (Иисус Навин 5:10 жы кай 12).
d Диқэн и рамка «Павел смиренно принимает испытание» андэ «Сторожэво башня» лэ 15 мартостар 2003 бэршэстар, страница 24.
e Марка 13:10: «И всаворэ́ манушэнди, май англал трэбуй тэ авэл росԥэнди и лащи весть».
f Псалом 46:1 жы кай 3: «О Дэл важ амэндэ кодэва, кастэ амэ гарадювас и амаро зор. Во поможый йто, кала амэндэ ԥаримос и биды. Важ када амэ на пэрэдараса дажэ тоди, сар и ԥув парудёла и плая сжана андэ ла морятири ӷлыбина. Дажэ тоди, кала о паи андэ моря лэла фартэ тэ марэлпэ и тэ пенийпэ. Дажэ кала и плая затинонапэ лэстиря холятар».