Помощь кодэлэнди, каса нахально тердэ билажавардимос (штарто анда штар части)

1, 2. а) Па саво примеро дицол, кай амэн всаворэн трэбуй тэ подритярэн и амэ можэм тэ подритярас аврэн? б) Со прижыляпэ тэ пэрэжувэн дэсавэ бэятонэнди?

ВСАВОРЭНДИ амэнди трэбуй, кай амэн тэ подритярэн, и кажно андар мэндэ можэт тэ подритярэл аврэн. Кала о бэято пэрэл и розмарэл и чангоры, во ровэл и прастэл кай пэстири дэй или кай о дад. И родителя нэ моӷут тэ стерэн кадя, кай и чанг сразу тэ зажувэл, но вонэ моӷут тэ подритярэн лэ бэятос. Вонэ роспушэн, со тердяпэ, виқосэн лэсти и ясва, облэн лэс и жалуин. Кадяжэ вонэ ԥэнэн лэсти лашэ алава, мақэн драб и заԥандэн и чангоры. О бэято ужэ на ровэл и упалэ прастэл тэ цэлэлпэ. Прожал время и чангоры зажувэл и нисо на ашэлпэ.

² Но исин май ԥари дук. Дэсавэ бэятонэнца нахально терэн билажавардимос. Када можэт тэ авэл еқварэс, но дэкала и бэятцэ пэрэандярэн кацаво ԥаримос бэршэнца. Сар бы тэ на авэл, андо ди кадэлэстар фартэ ԥарэс. Андэ дэсавэ случаёря пала када уӷанэн и лэ нахальникос бэшарэн андо баруно. Ай андэ авэр случаёря лэстэ вижал тэ на бэшэл андо баруно. Но дажэ кала лэ нахальникос сразу бэшарэн, о ԥаримос, саво пэрэжудя о бэято, во можэт тэ сэрэл, дажэ кала вибареля.

3. Со, сар пистромэ андэ 2 Коринфянам 1:3, 4, камэл о Иегова? Пала савэ вопросоря амэ подаса дума?

³ Сави помощь трэбуй лэ христианонэнди, савэнца нахально тердэ билажавардимос, кала вонэ сас бэятцэ, и савэнди идоси ԥарэс, кала вонэ када вспоминают? (Адиносар 2 Коринфянам 1:3, 4b.) Лэ Иеговасти куч лэстирэ служытеля и во камэл, кай вонэ тэ полэн, кай лэн любин и заботинпэ пала лэндэ. Давайте подаса дума пала трин вопросоря. Пэрво, васо дэсавэнди анда кодэла, каса нахально тердэ билажавардимос трэбуй, кай лэн тэ подритярэн? Дуйто, ко лэнди можэт тэ поможый? Трито, сар лэн тэ подритярас?

ВАСО ЛЭН ТРЭБУЙ ТЭ ПОДРИТЯРАС?

4, 5. а) Васо трэбуй тэ сэрас, кай и бэятцэ пэрэандярэн о нахальство най кадя, сар и взросли? б) Васо о бэято парашэл тэ патял всаворэнди через кода, кай лэса нахально тердэ билажавардимос?

⁴ Дэкала кодэлэнди, каса нахально тердэ билажавардимос, кала вонэ слинэ бэятцэ, кадяжэ трэбуй, кай лэн тэ подритярэн дажэ, кала прожылэ бут бэрша. Кай тэ полас васо, трэбуй тэ сэрас, кай и бэятцэ най кадя, сар и взросли пэрэандярэн кацаво ԥаримос. Акэ дэсавэ причины.

⁵ Лэ бэятонэнди трэбуй, кай тэ авэл лащи дружба и тэ патян кодэлэнди, ко лэн барярэл. Кадя вонэ на даран и сытён тэ патян лэ манушэнди, савэ лэн любин. Жалко, но май часто лэ бэятонэнца терэн нахально билажавардимос цэрэ. Нахальникоса можэт тэ авэл варико пашутно анда родо или кодэва, ко дружый лэ ереса. Через када о бэято парашэл пэ вся и время тэ патял лэ манушэнди.

6. Саво ԥаримос анэн лэ бэятонэнди, кала лэнца нахально терэн билажавардимос?

⁶ И бэятцэ на ӷанэн екжэнэ тэ защитинпэ. Кала терэн нахально билажавардимос лэ бэятонэнца, када анэн лэнди бари дук. Кодэла, ко терэл лэ бэятонэнца кацаво билажавардимос, кала вонэ инке на вибарелэ и на полэн, кай када терэлпэ кати андо брако, када анэн лэнди бут ԥаримос. Через када и бэятцэ, кала вибарён моӷут нэправильно тэ гиндон пала кода, со трэбуй тэ авэл кати андо брако, и бэятцэ моӷут тэ гиндон пала пэстэ, кай вонэ нисо на ашэн и парашэн тэ патян лэ манушэнди.

7. а) Васо лэ нахальниконэнди вушэро тэ дилярэн лэ бэятонэн и со вонэ терэн? б) Каринг со можэт тэ анэн лэнго хохаимос?

⁷ И бэятцэ нэ моӷут, сар и взросли, драго тэ полэн, со терэлпэ и сар трэбуй тэ фэринпэ (1 Коринфянам 13:11). Важ када лэ нахальниконэнди вушэро лэн тэ дилярэн. Вонэ замарэн лэ бэятонэнди о шэро, кай и бэятцэ екжэнэ андэ вся дошалэ, кай када лэнго секрето, кай лэнди нико на патяла и на поможыя. Кадяжэ вонэ ԥэнэн, кай када нармально машкар бэято и взросло и сыкавэн, кай кадэлэса вонэ любин лэс. Моӷут тэ прожан бут бэрша, кай о бэято тэ полэл, кай вся, со ԥэнэнас о нахальнико, када хохаимос. Через кода, со тердяпэ, лэ бэятости, кала вибарёл, ашэл пэстар гряца, во гиндой, кай най кацаво, сар всаворэ и кай во на ашэл, кай лэс тэ любин и тэ жалуин.

8. Васо амэ патяс, кай о Иегова можэт тэ подритярэл кодэлэн, касти ԥарэс?

⁸ Найудивительно, кай кала лэ бэятонэнца нахально терэн билажавардимос, када анэн ԥаримос пэ бут время. Кацаво терэлпэ лэ бэятонэнца па вся и ԥув. Када инке еқварэс сыкавэл, кай амэ жувас андэ послидни деса, кала и мануша «на лэна тэ полэн пэстирэ родос», «ай найлашэ и хохавнэ мануша терэна май найдраго и найдраго» (2 Тимофею 3:1—5, 13). О Сатана загиндосардя ек о найлашимос и ԥарэс тэ диқэс, кай и мануша терэн кода, со лэсти чалёл. Но о Иегова пэ бутэстэ май зорало чем о Сатана и лэстирэ помошникоря. Во диқэл вся, со терэл о Сатана. Можно тэ патяс, кай о Иегова полэл, сар амэнди ԥарэс и можэт тэ подритярэл амэн. Амэ фартэ лошалэ, кай служысарас лэ Дэвлэсти, «саво терэл май вушэро по ди, саво подритярэл амэн андэ вся амаро ԥаримос, кай и амэ тэ подритярас аврэн андэ лэндири любо бида кадя жэ, сар о Дэл подритярэл амэн» (2 Коринфянам 1:3, 4). Через кастэ о Иегова можэт тэ подритярэл кодэлэн, касти трэбуй помощь?

КО МОЖЭТ ЛЭН ТЭ ПОДРИТЯРЭЛ?

9. Сар анда Псалом 27:10 дицол, кай о Иегова заботийпэ пала кодэла, кас на фэрисардэ и родителя, кала лэнца нахально тердэ билажавардимос?

⁹ Тэ подритярас май фартэ трэбуй кодэлэн, кас и родителя на фэрисардэ лэ нахальнонэ билажавардимастар или кала лэнца када тердя варико анда чаче. О псалмопевцо о Давидо ӷанэнас, кай кати о Иегова можэт тэ подритярэл, сар нико авэр. (Адиносар Псалом 27:10c.) О Давидо патялас, кай о Иегова ашэла дад важ кодэла, каса обжылэпэ жэстоко андо ери. Сар во лэн подритярэл? Через пэстирэ служытеля, савэ на парашэн лэс тэ кандэн. И ԥрала и ԥэя, савэнца амэ патяс андэ ек Дэл, када амаро ери. О Иисусо еқварэс ԥэндя: «Ко кандэл мэрнэ Дадэс, саво по нэбо, кодэва манди и ԥрал, и ԥэй, и дэй» (Матфея 12:48—50).

10. Со о апостоло Павло пистросардя пала пэстири служэния сар старейшына?

¹⁰ Погиндосарам, сар и христианско собрания шолпэ по ери. О апостоло Павло кандэлас лэ Дэвлэс и терэлас бут со, сар старейшына. Во сыкавэлас аврэнди лашо примеро и о Дэл дажэ ԥэндя лэсти тэ пистрой лэ христианонэнди: «Терэн сар мэ, важ кода кай мэ терав сар о Христос» (1 Коринфянам 11:1). Шон сама, со о Павло пистросардя пала пэстири служэния сар старейшына: «Амэ жалуисарасас тумэн, сар и дэй жалуий пэстирэ ԥарнэстирэ бэятос» (1 Фессалоникийцам 2:7). Андэ амарэ деса и старейшыноря, сар дэй, жалуин и подритярэн лашэ алавэнца анда Библия кодэлэн, касти када фартэ трэбуй.

11. Васо тэ подритярэн кодэлэн, каса нахально тердэ билажавардимос, моӷут най кати и старейшыноря?

¹¹ Тэ подритярэн кодэлэн, каса нахально тердэ билажавардимос, моӷут най кати и старейшыноря. Када трэбуй тэ терэн всаворэ (1 Фессалоникийцам 4:18). И христианки, савэндэ састи вера, моӷут драго тэ подритярэн лэ ԥэян, савэнди фартэ трэбуй помощь. О Иегова ԥэндя, кай во, сар дэй, сави подритярэл, пэстирэ шавэс (Исаия 66:13). Андэ Библия пистромэ пала жувля, савэ подритярэнас кодэлэн, ко сас андэ бида (Иов 42:11). Сар жэ лошавэл о Иегова, кала диқэл, кай и христианки подритярэн лэ ԥэян, савэндэ по ди ԥаримос! Андэ дэсавэ случаёря и старейшыноря моӷут тэ мангэн ла христианка, савятэ састи вера, кай вой тэ поможый ла ԥэяти, савяти фартэ трэбуй помощьd.

САР ЛЭНДИ ТЭ ПОМОЖЫСАРАС?

12. Андэр со амэнди трэбуй тэ авас осторожни?

¹² Амэнди трэбуй тэ авас осторожни, кай тэ на залас тэ роспушас лэ манушэс пала кода, пала со во на камэл тэ дэл дума (1 Фессалоникийцам 4:11). И всаек амэ можэм тэ подритярас кодэлэн, касти трэбуй помощь. Сар? Роздиқам панч советоря анда Библия.

13. Со, сар пистромэ андэ 1 Царей 19:5—8, стердя лэ Иеговаско анӷело важ о Илья и сар амэ можэм тэ сытювас лэстар?

¹³ Сыкавэн пэ дила, кай заботинпэ. Кала о пророко Илья нашэлас кодэлэндар, ко камэлас лэс тэ умарэл, лэсти сас кадя ԥарэс, кай во камэлас тэ мэрэл. О Иегова бишалдя каринг лэстэ фартэ зоралэ анӷелос и кодэва стердя важ о пророко кода, со лэсти сас трэбуй. О анӷело стердя важ о Илья ԥабардо хамос и ақардя лэс тэ хал. (Адиносар 1 Царей 19:5—8e.) Кадэва случаё сытярэл амэн, кай дажэ найбари, но лащи дила, можэт тэ авэл важ о мануш фартэ бут. Можно тэ гитос лэсти тэ хал, тэ подарис найбаро подарко или тэ пистрос открытка. Вся када сыкавэла лэ ԥралэсти или ла ԥэяти, савэндэ ԥаримос, кай амэ лэн любисарас и заботисавас пала лэндэ. Если амэнди лажаво тэ дас дума лэнца пала кода, со лэндэ по ди, амэ всаек можэм пэ дила тэ заботисавас пала лэндэ.

14. Сости амэн сытярэл кода, со сас лэ Ильяса?

¹⁴ Поможын, кай лэндэ по ди тэ авэл спокойно и кай вонэ нисостар тэ на даран. Кода, со сас лэ Ильяса можэт амэн тэ сытярэл инке акэ сости. О Иегова стердя чуда и поможысардя, кай во тэ прожал баро дром жы каринг о плай Хориво. Можэт, андэ кодэва дурутно ҭан, кай варикала о Иегова стердя о доӷоворо пэстирэ народоса, о Илья парашэля тэ дарал, важ кода кай во сас дур лэ вороӷонэндар. Сости када амэн сытярэл? Если амэ камас тэ подритярас кодэлэс, каса нахально тердэ билажавардимос, спэрва амэнди трэбуй тэ стерас кадя, кай лэндэ по ди тэ авэл спокойно и кай вонэ нисостар тэ на даран. Например, лэ старейшынонэнди трэбуй тэ сэрэн, кай варикасти авэла май драго лэнца тэ дэн дума цэрэ, ай най андо зало, кай тидэнпэ лэ Иеговастирэ свидетеля. Ай варикасти наоборот.

15, 16. Сар тэ сыкавэс лэ манушэсти, кай ту драго лэс ашунэс?

¹⁵ Драго лэн виашунэн. Андэ Библия пистромэ: «Кажно мануш трэбуй май йто тэ ашунэл, чем тэ дэл дума» (Иакова 1:19). Ӷанэс ту драго тэ ашунэс? Можэт тути здэлпэ, кай важ када бут на трэбуй. Хутилэл просто тэ бэшэс паша мануш, тэ диқэс пэр лэстэ, тэ ашэс мулком и тэ ашунэс. Но па чачимастэ трэбуй май бут. Например, о Иегова драго виашундя лэ Ильяс, кала во росԥэнэнас, со лэстэ по ди. О Иегова полэлас, кай о Илья дарал, гиндой, кай во екжэно и кай лэстири служэния евья. О Дэл с любовью поможысардя лэсти тэ улэл кадэла гиндоря. Во сыкадя, кай поля лэ Ильяс (1 Царей 19:9—11, 15—18).

¹⁶ Сар тэ сыкавэс, кай ту полэс кодэлэс, ко росԥэнэн, со лэстэ по ди? Дэкала важ када трэбуй набут лашэ алава. Можно тэ ԥэнэс: «Кадя ԥарэс када тэ ашунав! Страшно, кай када терэлпэ лэ бэятонэнца!» Ай дэкала авелоп драго тэ задэс найбут вопросоря, кай тэ уӷанэс, правильно ту лэс полэс чи най. Например, можно тэ пушэс: «Если найԥарэс, мангав тут, росԥэн, со ту камэс тэ ԥэнэс?» или «Мэ правильно тут полэм, кай?..» Кацавэ алава моӷут тэ сыкавэн лэ манушэсти, кай ту драго лэс ашунэс и старыиспэ лэс тэ полэс (1 Коринфянам 13:4, 7).

17. Васо трэбуй драго тэ виашунэс и тэ на пэрэмарэс лэ манушэс, савэса нахально тердэ билажавардимос?

¹⁷ На пэрэмар лэ манушэстири дума, кай варисо тэ подԥэнэс или тэ ԥэнэс, кай во нэправильно гиндой. На грабисав и виашун! Кала о Илья росԥэнэнас лэ Иеговасти, со лэстэ по ди, лэ Ильясти сас фартэ ԥарэс. Прожыля время и кала о Иегова подритярдя лэ Ильяс, кай лэстири вера тэ авэл май састи, во упалэ, кодэлэ жэ алавэнца росԥэндя лэ Дэвлэсти пала ԥаримос, саво лэстэ сас (1 Царей 19:9, 10, 13, 14). Сости када амэн сытярэл? Если о мануш най еқварэс росԥэнэн амэнди пала кода, со лэстэ по ди, амэ трэбуй тэ терас сар о Иегова и драго лэс тэ виашунас. На трэбуй тэ ԥэнэс, со во тэ терэл, кай тэ улэл кадэва ԥаримос. Фэдэр авэла тэ сыкавэс, кай ту полэс лэс и жалуис (1 Петра 3:8).

18. Сар тирэ молитвы моӷут тэ подритярэн кодэлэн, касти ԥарэс?

¹⁸ Мангэнпэ лэнца. Кала лэ манушэсти фартэ ԥарэс, лэсти дэкала найвушэро тэ мангэлпэ. Лэсти можэт тэ здэлпэ, кай во на ашэл кода, кай тэ дэл дума лэ Иеговаса. Кай тэ подритярэс кацавэ манушэс, можно тэ ԥэнэс, кай тэ мангэспэ лэса. Авелоп драго андэ молитва тэ ԥэнэс лэско алав. Можно тэ ԥэнэс лэ Иеговасти, сар ту любис кадэлэ манушэс и сар лэс любин всаворэ андэ собрания. Кадяжэ можно тэ мангэс лэ Иеговас, кай тэ поможый лэсти тэ пэрэандярэл о ԥаримос и тэ подритярэл пэстирэ кучутнэ служытелёс. Кацавэ молитвы моӷут тэ улэн лэстири дук (Иакова 5:16).

19. Сар тэ подтидэс алава, савэ подритярэна лэ манушэс?

¹⁹ Подтидэн алава, савэ моӷут лэн тэ подритярэн. Гиндосар англа кода, сар варисо тэ ԥэнэс. Кала на гиндос, со дэс дума, када шынэл, сар шуряса. Ай и годявэрнэ алава дэн зор (Притчи 12:18). Важ када манг лэ Иеговас, кай во тэ поможый тути тэ виарақэс лашэ алава, кай тэ подритярэс. На бистэр, кай нинай май зоралэ алава, чем кодэла, савэ ԥэндя о Иегова. Кадэла алава запистромэ андэ Библия (Евреям 4:12).

20. Сар гиндон пала пэстэ дэсавэ мануша, савэнца нахально тердэ билажавардимос и сар лэнди можно тэ поможысарас?

²⁰ Кодэлэнди, каса нахально тердэ билажавардимос ашэл пэстар гряца. Вонэ гиндон, кай нисо на ашэн, кай лэн нико на любий и кай лэн най васо тэ любин. Саво жэ када хохаимос! Поможысар лэнди алавэнца анда Библия тэ полэн, сар фартэ лэн любий о Иегова. (Диқэн и рамка «Подритярэн алавэнца анда Писания».) Погиндосар пала кода, сар лэ Дэвлэско анӷело подритярдя лэ пророкос Даниилос, кала лэсти сас ԥарэс и во сас би зорэско. О Иегова камэлас, кай о Даниило тэ ӷанэн, сар во лэсти сас куч (Даниил 10:2, 11, 19). И ԥрала и ԥэя, савэндэ ԥарэс по ди, кадяжэ куч лэ Иеговасти!

21. Со аштярэл всаворэн, ко на каийпэ, и со амэ можэм тэ терас, пока на авеля кадэя время?

²¹ Кала амэ подритярас лэ ԥралэн и лэ ԥэян, кадэлэса амэ сыкавас, кай о Дэл лэн любий. Ай инке, амэнди на трэбуй тэ бистрас, кай о Иегова, када Дэл, саво сындой справедливо. Ни ек нахальство на угаравэна лэ Иеговастар. Во диқэл вся и спушэла кажнонэстар, ко на каийпэ (Числа 14:18). Ай акана амэнди трэбуй и май дур тэ подритярас кодэлэн, каса нахально тердэ билажавардимос. Сар дэ драго тэ ӷанас, кай о Иегова еқвар и пэ вся и время улэла о ԥаримос кодэлэндар, касти о Сатана и лэско миро стердэ вэрыто! Ужэ фартэ йто амаро ди и годи на лэна тэ сэрэн кода, со анэнас о ԥаримос (Исаия 65:17).