Терэн вся, кай май фартэ тэ дружын андэ послидни деса

1, 2. Со, сар пистромэ андэ 1 Петра 4:7, 8, поможыя амэнди тэ пэрэандярас о ԥаримос?

СО МАЙ пашэ о конец ла люмако, савяса правий о Сатана, со май драго полас, кай амэндэ авэла ԥаримос (2 Тимофею 3:1). Например, андэ ек западноафриканско страна посли кода, сар сас и выборы, заляпэ война. Май бут чем епаш бэрш амарэ ԥрала и ԥэя нэ моӷли вольно тэ ԥирэн па вулицы, важ кода кай жалас и война. Со поможысардя лэнди тэ пэрэжувэн кадэя ԥари время? Дэсавэ гарадёнас андэ цэра кай и ԥрала и ԥэя, савэ жувэнас котэ, кай сас май спокойно. Ек ԥрал росԥэндя: «Сар мэ сымас лошало, кай паша мандэ и друӷоря! Амэ моӷли тэ подритярас ек аврэс».

² Кала авэла и «само бари бида», амэ на обжасапэ би кодэлэско, кай амэн тэ подритярэн и друӷоря, савэ амэн любин (Откровение 7:14). Важ када акана трэбуй тэ терас вся, кай май драго тэ дружысарас аврэнца. (Адиносар 1 Петра 4:7, 8b.) Амэ можэм бут сости тэ сытювас кай о Иеремия. Лэстирэ друӷоря поможысардэ лэсти тэ вижувэл англа кода, сар розмардэ о Иерусалимоc. Роздиқам май драго кадэва примеро.

СЫТЮВАМ КАЙ О ИЕРЕМИЯ

3. а) Через со о Иеремия моӷ тэ на дэл дума никаса? б) Пала со росԥэнэнас о Иеремия пэстирэ секретарёсти лэ Варухости и каринг со када андя?

³ Май бут чем 40 бэрш паша Иеремия сас хохавнэ мануша. Машкар лэндэ сас и сосидоря и, файма, дэко анда родо, савэ жувэнас лэса андэ ек форо Анафофо (Иеремия 11:21; 12:6). Но во на ритярэлас вся андэр пэстэ. Во росԥэндя, со лэстэ по ди, пэстирэ секретарёсти лэ Варухости, саво лэс на ашавэлас. Ай кадяжэ росԥэндя и амэнди, важ кода кай амэ адес адиносарас андэ Библия важ лэско ԥаримос (Иеремия 8:21; 9:1; 20:14—18; 45:1). Кати погиндон, сар фартэ дружынас о Иеремия и о Варухо и сар вонэ стонас патив ек пэ ек аврэстэ, пока о Варухо пистрояс важ вся, со терэласпэ андэ лэ Иеремиясти жызня! (Иеремия 20:1, 2; 26:7—11).

4. Со о Иегова мангля, кай тэ стерэл о Иеремия и сар через кадэя дила о Иеремия и о Варухо линэ май драго тэ дружын?

⁴ Бут бэрша о Иеремия би дарако ԥэнэнас лэ израильтянонэнди, со авэла лэ Иерусалимоса (Иеремия 25:3). О Иегова камэлас, кай о народо тэ каийпэ, важ када во мангля лэ Иеремияс, кай во тэ запистрой кадэла алава андо свитко (Иеремия 36:1—4). Пока о Иеремия о и Варухо терэнас кадэя дила, файма, най ек шон, вся кадэя время вонэ бут дэнас дума ек еқэса и подритярэнас ек еқэс, кай май фартэ тэ патян лэ Иеговасти.

5. Васо можно тэ ԥэнас, кай о Варухо сас лашо друӷо важ о Иеремия?

⁵ Кала допистросардэ о свитко, о Иеремия дя лэ Варухости тэ проадиной лэс лэ народости (Иеремия 36:5, 6). О Варухо смило стердя кадэя опасно дила. О Иеремия фартэ абурояс кодэлэса, кай о Варухо смило зажыля андэ лэ храмости града и проадиносардя англа всаворэ лэ Иеговастирэ алава (Иеремия 36:8—10). Иудейски князёря ашундэ, со стердя о Варухо и ԥэндэ, кай во лэнди кадяжэ тэ проадиной кадэва свитко (Иеремия 36:14, 15). Вонэ закамлэ тэ росԥэнэн, со сас пистромэ андо свитко лэ царёсти лэ Иакимости, но англа када приԥэндэ лэ Варухости: «Жан загарадён, ту и о Иеремия, кай нико тэ на ӷанэн, кай тумэ» (Иеремия 36:16—19). И када сас най евья!

6. Сар андярдэ пэс о Иеремия и о Варухо, кала приԥэндэ лэн тэ астарэн?

⁶ Кала о царё Иоакимо ашундя алава, савэ запистросардя о Иеремия, о царё фартэ холяйля, кай сԥабардя о свитко и приԥэндя тэ астарэн лэ Иеремияс и лэ Варухос. Но Иеремия кадэлэстар на пэрэдарайля. Во ля авэр свитко, дя лэс лэ Варухости и упалэ ԥэндя тэ пистрой и алава, савэ пэрэдя лэсти о Иегова. Ай о Варухо запистросардя «всаворэ алава анда книӷа, сави о царё Иоакимо анда Иуда сԥабардя андэ яг» (Иеремия 36:26—28, 32).

7. Сар через кода, кай о Иеремия и о Варухо терэнас еқэҭанэ и дила, линэ тэ дружын май драго?

⁷ Мануша, савэ еқэҭанэ пэрэандярэн о ԥаримос, ашэн май пашэ ек аврэсти. Пока о Иеремия и о Варухо запистронас нэво свитко, вместо кодэва, саво сԥабардя о царё Иоакимо, вонэ май драго уӷанглэ ек еқэс и линэ май драго тэ дружын. Сости амэн сытярэл кода, со сас кадэлэ дуе служытелёнэнца, савэ на парашэнас тэ кандэн лэ Дэвлэс?

РОСԤЭНЭН, СО ТУМЭНДЭ ПО ДИ

8. Со можэт тэ на домэкэл амэн тэ дружысарас и со трэбуй тэ терас?

⁸ Можэт амэнди найвушэро тэ росԥэнас аврэнди, со амэндэ по ди, важ кода кай варикала кадэлэстар амэнди сас фартэ ԥарэс (Притчи 18:19, 24). Или можэт амэнди здэлпэ, кай амэндэ нинай время и зор варикаса тэ дружысарас. На гиндосар кадя. Если амэ камас, кай амарэ ԥрала анда собрания тэ подритярэн амэн, кала авэла ԥарэс, амэнди трэбуй ужэ акана тэ сытювас тэ патяс лэнди андэ вся и тэ росԥэнас, со амэндэ по ди и со гиндосарас. Када фартэ важно, кай тэ авэл чачуни дружба (1 Петра 1:22).

9. а) Андар со дицол, кай о Иисусо патялас пэстирэ друӷонэнди? б) Сар кода, кай тумэ лэна тэ дэн дума аврэнца анда оди, поможыя тэ виарақэн лашэ друӷонэн?

⁹ О Иисусо фартэ патялас пэстирэ друӷонэнди, и када дицол анда кода, кай во нисо лэндар на гаравэлас (Иоанна 15:15). Амэ можэм тэ терас сар во, тэ росԥэнас аврэнди, сости амэ лошавас, со за амэндэ ԥаримос и пала со амэ пэрэжываем. Драго виашунэн кодэлэн, ко паша тумэндэ, и тумэ диқэна, кай тумэ лэнца бут андэр со шонпэ. Лэндэ кацавэ жэ гиндоря, кацаво жэ по ди и кацави жэ дила. Акэ со сас ла Синдияса, савяти 29 бэрш. Латиря подружкати ла Мария-Луизати 67 бэрш и вой служый пианероса. И Синди и Мари-Луиза кажно четверӷо тэсара дэн дума аврэнца важ о Дэл и ек еқати росԥэнэн важ и вся, со исин по ди. И Синди росԥэнэн: «Манди чалёл тэ дав дума лэ друӷонэнца пала важни вопросоря, кадя мэ фэдэр уӷанав и полав лэ друӷонэн». Амэ май фартэ ласа тэ дружысарас, кала росԥэнас, со амэндэ по ди и пала со гиндосарас. Если тумэ, сар и Синди, лэна тэ дэн дума аврэнца анда оди, тоди тумэ авэна май пашэ каринг лэндэ (Притчи 27:9).

ТЕРЭН ДИЛА ЕК АВРЭСА

10. Сар через кода, кай амэ терас еқэҭанэ дила лэ ԥралэнца и лэ ԥэянца, сар пистромэ андэ Притчи 27:17, амэ уӷанас лэн май драго?

¹⁰ Кала о Иеремия и о Варухо терэнас дила еқэҭанэ, вонэ драго уӷанглэ ек еқэс. Кадяжэ и амэ, кала терас дила амарэ ԥралэнца и ԥэянца, можэм тэ диқас лэндирэ лашэ качестворя. Амэ лэндар можэм бутэсти тэ сытювас и тэ авас май пашэ. (Адиносар Притчи 27:17d.) Со тумэндэ по ди, кала андэ служэния ашунэн, сар о ԥрал чи ԥэй би дарако дэл дума пала кода, андэр со патял? Чи со тумэ гиндон, кала вонэ анда оди росԥэнэн аврэнди пала о Иегова и пала кода, со о Дэл загиндосардя? Кадэлэстар кадэва мануш ашэл тумэнди инке май куч.

11, 12. Росԥэнэн, сар и служэния терэл, кай тэ авэн лашэ друӷоря?

¹¹ Роздиқам дуй примероря, савэ сыкавэн, сар через кода, кай и мануша служын еқэҭанэ, вонэ ашэн май пашэ ек еқэсти. И Адлина, савяти 23 бэрш, ақардя пэстиря подружка ла Кандиса тэ ладэл ласа тэ росԥэнэн важ о Дэл кордэ, кай на вижал часто тэ служын. Вой росԥэнэн: «Амэ камлям тэ служысарас, кай тэ авэл май бут радость. Амэнди лэ дуенди сас трэбуй тэ лас зор, кай тэ на парашас тэ служысарас лэ Иеговасти». Со када лэнди дя? И Адлина ԥэнэн: «Кажно вэчэро амэ росԥэнасас ек еқати, со диқлям, сар драго дям дума лэ манушэнца и росԥэнасас, сар диқасас лэ Иеговаско вас андэ служэния. Амэнди фартэ чалёлас пала када тэ дас дума, и амэ май драго уӷанглям ек авря».

¹² И Лаила и Марианна, дуй ԥэя анда Франция, савэ най миростэ, пэ панч курте лаглэ андэ Банги, када ӷлавно форо андэ Центральноафриканско Республика, кай тэ росԥэнэн важ о Дэл. И Лаила росԥэнэн: «Кала амэ кордэ лаглям, амэндэ сас бут ԥаримос, но через кода, кай амэ вся росԥэнасас ек еқати и анда оди любисарасас, амэ ашэлям инке май пашэ. Кала мэ диқавас, сар и Марианна старыийпэ тэ жувэл па аврятэ, и сар вой сыкавэл, кай любий лэ манушэн, савэ катэ жувэн, и фартэ камэл тэ росԥэнэн важ о Дэл, вой манди инке май фартэ ля тэ чалёл». На трэбуй тэ ладэс андэ авэр страна, кай тэ диқэс кацаво. Кажно разо, кала тумэ росԥэнэн важ о Дэл лэ ԥралэса чи ла ԥэяса андэ тиритория кай тумари собрания, тумэ кадяжэ можэте тэ уӷанэн ек еқэс май драго и тэ авэн лашэ друӷоря.

ДИҚЭН ЕК О ЛАШИМОС И ПРОСТИН

13. Со уӷанас, кала бут время терас дила лэ ԥралэнца и лэ ԥэянца?

¹³ Кала бут время терас дила лэ ԥралэнца и лэ ԥэянца, амэ уӷанас най кати ек и лашэ качестворя, ай инке и кода, со вонэ терэн най кадя. Со тоди трэбуй тэ терас? Диқам, со терэлас о Иеремия. Со поможысардя лэсти тэ диқэл кати о лашимос андэ авэр и тэ на шол сама пэ лэндирэ ошыбки?

14. Со о Иеремия уӷангля важ о Иегова, и со во закамля важ када тэ терэл?

¹⁴ О Иеремия пистросардя книӷа, сави называется лэстирэ алавэса и, файма, кадяжэ во пистросардя и Пэрво и Дуйто книӷа царей. Кала во пистрояс лэн, во инке май фартэ диқля, сар о Иегова полэл и жалуий анда оди лэ найсовершэнонэ манушэн. Например, во уӷангля, сар о Иегова диқэлас по царё Ахаво, саво каисайля андэ пэстири найлащи дила. О Дэл на дя лэсти тэ диқэл, сар муля вся лэско ери (1 Царей 21:27—29). Кадяжэ о Иеремия моӷ тэ гиндой пала кода, кай о царё Манасия май фартэ холярдя лэ Иеговас, чем о Ахаво. Но о Иегова всаек простисардя лэ Манасияс, важ кода кай во каисайля (2 Царей 21:16, 17; 2 Летопись 33:10—13). Через кода, со лэнца сас, о Иеремия, закамля тэ сытёл кай о Иегова, кай тэ тэрпий и тэ жалуий анда оди пэстирэ друӷонэн (Псалом 103:8, 9).

15. Сар о Иеремия, кала дружыяс лэ Варухоса, терэлас, сар о Иегова, и тэрпияс анда оди?

¹⁵ Роздиқам, сар о Иеремия диқэлас по Варухо, кала кодэва варисави время на терэлас и дила, сави дя лэсти о Дэл. О Иеремия на парашэля тэ патял, кай о Варухо парудёла. Во поможысардя лэсти, кала пэрэдя лэ Дэвлэско совето, саво сас ԥэндо ворта и анда оди (Иеремия 45:1—5). Сости амэн када сытярэл?

16. Со, сар пистромэ андэ Притчи 17:9, поможыя амэнди тэ фэрисарас и дружба?

¹⁶ Амэ нэ можэм тэ аштярас лэ ԥралэндар и лэ ԥэяндар, кай вонэ тэ авэн совершэни. Важ када, кала амэ ужэ дружысарас варикаса, амэ трэбуй тэ фэрисарас кадэя дружба. Если амаро друӷо стердя варисо най кадя, можэт амэнди прижалапэ ковлэс, но ворта тэ ԥэнас лэсти па Библия, со во тердя най кадя (Псалом 141:5). Ай если во амэн холярдя, трэбуй лэс тэ простисарас. Кала амэ лэс простисардям, амэ ужэ на ваздаса кодэя дума. (Адиносар Притчи 17:9e.) Андэ кадэя ԥари время, амэнди фартэ важно тэ шас сама пэ лашэ качестворя, савэ исин кай и ԥрала и ԥэя, и тэ на шас сама пэ кода, со вонэ терэн най кадя! Кадэлэстар амэндэ авэла лэнца май лащи дружба. Ай кала авэла и само бари бида, амэнди фартэ трэбуй авэна лашэ друӷоря.

СЫКАВЭН И ЧАЧУНИ ЛЮБОВЬ

17. Со сыкадя, кай о Иеремия сас чачуно друӷо?

¹⁷ О пророко Иеремия вся и время сас лашо друӷо, дажэ андо ԥаримос. Акэ ек примеро. Еқварэс о Авдемелехо, саво служыяс кай о царё, спасысардя лэ Иеремияс ла смэртятар, кала вицырдя лэс анда хаинг, андэ сави сас ԥэрдо чик. Кала о Иеремия уӷангля, кай о Авдемелехо даралас лэ князёнэндар, во на ля тэ гиндой, кай о друӷо варисар екжэно када пэрэандярэла. Хоть о Иеремия андэ кодэя время сас андо баруно, во виарақля, сар тэ пэрэдэл лэ Авдемелехости лэ Иеговастирэ алава, кай во лэс на ашавэла (Иеремия 38:7—13; 39:15—18).

18. Со, сар пистромэ андэ Притчи 17:17, трэбуй тэ терас, кала кай и ԥрала или кай и ԥэя терэлпэ бида?

¹⁸ Адес кай амарэ ԥрала и ԥэя исин бут ԥаримос. Бутэндэ ԥаримос кодэлэстар, кала варисо терэлпэ андэ природа или ла войнатар. Кала терэлпэ бида, дэко андар мэндэ можэт тэ ақарэл пэстэ тэ жувэн кацавэн ԥралэн и ԥэян. Ай авэр моӷут тэ поможын лэ ловэнца. Но всаворэ амэ можэм тэ мангас лэ Иеговас, кай во тэ поможый кодэлэнди, кастэ бида. Дэкала на ӷанэс, со тэ ԥэнэс или со тэ стерэс кодэлэсти, касти ԥарэс. Но амэндэ всаворэндэ исин, соса тэ поможысарас. Например, амэ можэм тэ побэшас лэнца. Кадяжэ анда оди можэм тэ виашунас лэн. Или тэ проадиносарас лэнца амарэ любими стихоря анда Библия, савэ подритярэн амэн (Исаия 50:4). Само ӷлавно, када тэ авас паша лэндэ, кала амэ лэнди фартэ трэбуй. (Адиносар Притчи 17:17f.)

19. Васо ужэ акана трэбуй тэ авэл лащи дружба лэ ԥралэнца и лэ ԥэянца?

¹⁹ Давайте акана май драго тэ уӷанас амарэ ԥралэн и ԥэян и тэ подритярас лэнца лащи дружба. Васо када кадя важно? Амарэ вороӷоря лэна тэ терэн вся через о хохаимос, кай тэ на дружысарас. Вонэ закамэна тэ подваздэн амэн, кай амэ тэ авас против ек еқэстэ. Но лэндэ нисо на вижала. Лэндэ на вижала тэ розмарэн амари любовь. Со бы тэ на терэн и вороӷоря, лэндэ на вижала тэ розмарэн и дружба, сави амэндэ исин. Амари дружба авэла най просто до конца люмати, савяса правий о Сатана, ай пэ вся и вечность!