Источникоря важ и тетрадка, кай тэ сытювас «Дром и служэния»
3—9 АВГУСТА
СОМНАК АНДА БИБЛИЯ | ИСХОД 13, 14
«Тердён и диқэн, сар о Иегова спасыя тумэн»
(Исход 14:13, 14) Тоди о Моисеё ԥэндя лэ манушэнди: «На даран. Тердён и диқэн, сар о Иегова спасыя тумэн адес. Важ кода кай лэ египтянонэн, савэн тумэ диқэн адес, будэр никала на диқэна. 14 О Иегова екжэно авэла тэ марэлпэ пала тумэндэ, ай тумэ лэна тэ тердён спокойно».
Кай о Моисеё састи вера
О Моисеё, наверно, дажэ на ӷанэнас пала кода, кай о Дэл камэл тэ розделий о паи андэ Лоли моря, кай тэ спасый лэ израильтянонэн. Но во фартэ патялас, кай о Дэл точно варисо стерэла, кай тэ спасый пэстирэ народос. И о Моисеё кадяжэ старыияспэ тэ поможый аврэ израильтянонэнди, кай вонэ тэ патян андэ када. Андэ Библия пистромэ: «О Моисеё ԥэндя лэ манушэнди: „На даран. Тердён и диқэн, сар о Иегова спасыя тумэн адес“» (Исход 14:13). Вижыля лэ Моисеёстэ тэ поможый лэ израильтянонэнди, кай лэндири вера тэ ашэл май састи? Да, лэстэ када вижыля и андэ Библия пала Моисеё и пала всаворэ израильтяноря пистромэ: «Важ кода кай патянас, вонэ пэрэжылэ и Лоли моря, сар па шуки ԥув» (Евреям 11:29). Лэ Моисеёстири вера спасысардя най кати лэс, но и кодэлэн, ко сар и во патяя андо Иегова.
(Исход 14:21, 22) О Моисеё процырдя о вас пэ моря, и о Иегова бишалдя бари балвал па востоко, сави ӷонияс и моря вся и рят, кай о паи тэ тердёл пэ дуй рига и тэ вишутярэл лако дно. 22 И акэ, лэ Израилёстирэ шавэ жылэ машкар моря па ԥув, сави ашэля шуки, ай о паи тердёлас па ек и па авэр риг лэндар.
О Иегова, саво всемоӷущё, полэл и шол сама лэ манушэн
13 Адиносар Исход 14:19—22. Погиндосар, кай ту котэ, лэ израильтянонэнца, и тумэнди най каринг тэ жан. Палал о фараоно и лэстирэ мануша, ай и англал и лоли моря. И катэ о Иегова зашолпэ пала тумэндэ. О столбо анда туча пэрэжыля и терделя машкар тумэндэ и машкар и египтяноря. Кай и египтяноря тэмнота, ай тумэндэ фартэ светло! И акэ, ту диқэс, сар о Моисеё процырдэл о вас пэ моря, залэл тэ ԥурдэл бари балвал, сави стердя, кай о паи терделя па дуй рига. Ту, тиро ери и тиро хабэ прожан кадя, сар жан бут воиноря, прожан па ԥув, сави сас тала моря. И катэ ту полэс, кай тирэ пэрнэ на тасон андэ чик и на склизнон, важ кода кай и ԥув шуки и састи. Тэ жас пар латэ найԥарэс. И кодэлэндэ, ко най йто жал, всаек вижал тэ дожан па авэр ла моряти риг.
(Исход 14:26—28) И акэ, о Иегова ԥэндя лэ Моисеёсти: «Процырдэ о вас пэ моря, кай о паи тэ рийпэ и тэ ушаравэл лэ египтянонэн, лэндирэ вурдона важ и война и лэ всадниконэн». 27 О Моисеё катэ жэ процырдя о вас пэ моря и каринг и тэсара о паи рисайля пэ пэско ҭан. И египтяноря нашэнастар лэ паестар, но о Иегова шутя лэн андэ моря. 28 О паи рияспэ и заушарадя и вурдона важ и война и лэ всадниконэн и лэ фараоноско войско, савэ жылэ андэ моря пала израильтяноря. Ни ек андар лэндэ на ашэляпэ.
w09 15/3 7, абз. 2, 3
Ту на трэбуй тэ забистрэс лэ Иеговас
Пока и египтяноря терэнас пэстирэ колесницы, савэ ԥадилэ, всаворэ израильтяноря дожылэ жы кай о восточно бэрэӷо. О Моисеё процырдя о вас понад Лоли моря. Тоди о Иегова стердя кадя, кай о паи андэ моря, саво тердёлас, дя палпалэ. Фартэ бут паи дя по фараоно и по лэско войско. Нико анда вороӷоря на ашэлэпэ жундэ. Израильтяноря вижылэ анда рабство! (Исход 14:26—28; Псалом 136:13—15).
Кала и мануша, савэ жувэнас паша лэндэ, уӷанглэ пала када, вонэ линэ тэ даран (Исход 15:14—16). Через сорок бэрш и Раав, сави жувэлас андо Иерихоно, ԥэндя дуе израильтянонэнди: «Амэ лям тэ дарас тумэндар... амэ ашундям, кай о Иегова вишутярдя англа тумэндэ и Лоли моря, кала тумэ вижылэ анда Египто» (Иисус Навин 2:9, 10). Дажэ и народоря, савэ на служынас лэ Иеговасти, на бистрэнас, сар во освободисардя пэстирэ народос. Тоди лэ израильтянонэнди трэбуй сас инке май фартэ тэ сэрэн пала пэско Дэл.
Виарақас сомнак анда Библия
(Исход 13:17) Кала о фараоно одмэкля лэ израильтянонэн, о Дэл на андярдя лэн па скурто дром, саво жалас па лэ филистимлянонэндири ԥув. О Дэл ԥэндя: «Если лэ манушэнди прижалапэ воевать, вонэ моӷут тэ пэрэдумают и тэ ринпэ андо Египто».
it «Дорога», абз. 2
Дром
Анда дэлмутни время и дрома, ай кадя жэ авэр важни дрома, па савэ жанас и торӷовцоря, сԥандэнас и фороря и страны андэ Палестина и и ԥувья, савэ слинэ паша латэ (Числа 20:17—19; 21:21, 22; 22:5, 21—23; Иисус Навин 2:22; Судей 21:19; 1 Самуила 6:9, 12; 13:17, 18; дик ЦАРСКАЯ ДОРОГА). О дром, саво сар гиндон сас ӷлавно, жалас анда Египто каринг и филистимски фороря Газа и Аскалоно. Кадэва дром полокорэс бандёлас по северо востоко андэ риг, кай о Мегиддо. Во жалас каринг о Асоро, саво по северо ла Галилейскона морятар, ай кадя жэ каринг о Дамаско. Инке во жалас через и Филистия и кадэва дром сас май скурто. Во андярэлас анда Египто каринг и Обетованно ԥув. Но важ кода, кай о Иегова любияс лэ израильтянонэн во андярдя лэн аврэ дромэса, кай вонэ тэ на даран, кай пэр лэндэ дэна и филистимляноря. (Исход 13:17).
(Исход 14:2) «Ԥэн лэ израильтянонэнди, кай вонэ тэ ринпэ и тэ стон катуны англа Пи-Хахиро́то, машкар Мигдоло и моря, паша Баа́л-Цефо́но. Стон катуны паша моря англа Баа́л-Цефо́но.
it «Исход из Египта», абз. 42, 43
Вижылэ анда Египто
Андэ саво ҭан сас розделимэ о паи андэ Лоли моря?
Шам сама, кай посли кода, сар израильтяноря стердэ дуйто остановка андо дром, о Дэл приԥэндя лэ Моисеёсти андо Ефамо, саво тердёл по краё пустыня, кай во тэ ԥэнэн лэнди «тэ ринпэ и тэ стон катуны англа Пи-Хахиро́то» паша моря. Через када о фараоно гиндосардоп, кай и израильтяноря заблудисайлэ (Исход 13:20; 14:1—3). И учони, савэ гиндон, кай о дром Эль-Хадж май лашо, ԥэнэн, кай и израильтяноря банделэ палпалэ. Вонэ гиндон, кай кала и израильтяноря дожылэ каринг о северо кай о Суэцко заливо, вонэ витидэ тэ жан аврэ дромэса и жылэ пэ восточно риг каринг и плая Джебель-Атака, савэ май пэ западно риг лэ заливостар. И вижыля кадя, кай вонэ попэлинэ андэ кацаво ҭан, кай бутэ манушэнди (ай лэ израильтянонэн сас фартэ бут) най каринг авелоп тэ терэнпэ. Если бы пэр лэндэ тэ диноп и враӷоря па северно риг, тоди вонэ попэлиноп андэ ловушка, важ кода кай англа лэндэ сас моря.
Сар и сас принято тэ гиндон кай иудеёря андэ 1 вико лэ И. Х., кадя вся и сас (Дик ПИ-ГАХИРОФ.) Но со интересно, кода сар вся сас, сжалпэ кодэлэса, со пистромэ андэ Библия, ай най кодэлэса, со гиндонас разни учони (Исход 14:9—16). Дицол, кай лэнди тэ пэрэжан через и моря, вонэ трэбуй сас када тэ терэн фартэ дур лэ бэрэӷостар па северно риг лэ Суэцконэ заливостар (западно заливо кай и Лоли моря). Сар на авелоп када кадя, тоди о фараоно и лэско войско моӷли тэ обжан кадэва заливо и тэ дэн пэ израильтяноря пэ авэр бэрэӷо (Исход 14:22, 23).
10—16 АВГУСТА
СОМНАК АНДА БИБЛИЯ | ИСХОД 15, 16
«Хвалисар лэ Иеговас андэ диля»
(Исход 15:1, 2) Тоди о Моисеё и израильтяноря линэ тэ дилабэн хвалебно дили лэ Иеговасти: «Лава тэ дилабав лэ Иеговасти, важ кода кай во ашэля ашунгло. Андэ моря во шутя лэ грастэс и лэ всадникос. 2 О Иегова мэрно зор, во ашэля мэрно спасителё. Во мэрно Дэл, лава лэс тэ хвалисарав, Мэрнэ дадэско Дэл, лава лэс тэ слависарав.
w95 15/10 11, абз. 11
Васо трэбуй тэ дарас лэ чачунэ Дэвлэстар?
11 Кала о Иегова уничтожыл о египецко войско, во ашэля май ашунгло англа кодэла, ко лэсти тэлёнас и англа авэр народоря па вся и ԥув (Иисус Навин 2:9, 10; 4:23, 24). Да, лэ Дэвлэско алав ашэля май ашунгло андо Египто, чем всаворэ лэндирэ хохавнэ дэвла, савэндэ на сас зор и вонэ нэ моӷли тэ спасын кодэлэн, ко лэнди тэлёнас. Кодэлэстар кай и египтяноря надеинаспэ пэ пэстирэ дэвла, пэ мануша и пэ военно зор, лэнди ашэля фартэ ԥарэс (Псалом 145:3). Через када и израильтяноря закамлэ тэ дилабэн хвалебни диля, андэ савэ дицолас, кай вонэ даран лэ жундэ Дэвлэстар, саво барэ зорэса спасый!
(Исход 15:11) Иегова, савэ дэвла туса сыстонапэ? Ко сар ту фартэ свынто? Кати тутар трэбуй тэ дарас, и тути тэ дилабас хвалебни диля, Создателё, саво терэл чудеса.
(Исход 15:18) О Иегова лэла тэ правий вечно.
w95 15/10 11—12, абз. 15, 16
Васо трэбуй тэ дарас лэ чачунэ Дэвлэстар?
15 Если бы амэ тэ авелоп лэ Моисеёса посли кода сар лэн спасысардя о Дэл, амэ тожэ линоп тэ дилабас: «Иегова, савэ дэвла туса сыстонапэ? Ко сар ту фартэ свынто? Кати тутар трэбуй тэ дарас, и тути тэ дилабас хвалебни диля, Создателё, саво терэл чудеса» (Исход 15:11). Посли, кацавэ чуства слинэ кай и мануша андэ всаворэ викоря. Андэ Библия андэ послиднё книӷа о апостоло Иоанно росԥэнэн пала памазаникоря, савэ на парашэнас тэ служын лэ Дэвлэсти: «[Вонэ] дилабэнас лэ Дэвлэстирэ рабостири лэ Моисеёстири дили и лэ бакрорэстири дили» Со за жэ када дили? «Всемоӷущё Дэл Иегова, фартэ шукарни и бари вся тири дила. Царё ла времяко, пэ тирэ дрома кати чачимос и лашимос. Ко на лэла тэ дарал тутар, Иегова, и на прославия тиро алав? Важ кода кай ту ек, ко преданно пэстирэ народости!» (Откровение 15:2—4).
16 Адес тожэ исин мануша, савэ тэлён лэ Дэвлэсти и цэнин най кати кода, со во создал, но и лэстирэ законоря. И мануша анда всаворэ народоря, савэ прижанэн и праведни лэ Дэвлэстирэ законоря и жувэн пар лэндэ, ашавэн и хохавнэ веры и ашэн май дур кадэлэ найлашэ миростар. Кажно бэрш тысячи мануша отԥэндён кодэлэстар, сости сытярэл кадэва найлашо миро и авэн андэ лэ Иеговастири арӷанизацыя, кай исин праведность и вужимос. Йто о Дэл сындоя и хохавнэ веры и о найлашо миро, тоди и мануша, савэ ритярэн лэ Дэвлэско законо смоӷут тэ жувэн вечно андо раё пэ ԥув.
(Исход 15:20, 21) Тоди и пророчица Мариам, лэ Аароностири ԥэй, ля о бубно и всаворэ жувля вижылэ пала латэ лэ бубнонэнца и линэ тэ цэлэн. 21 И Мариам ля тэ дилабэл каринг лэ муршэндири дили: «Дилабэн лэ Иеговасти, важ кода кай во прославил пэс. Андэ моря во шутя лэ грастэс и лэ всадникос».
it «Музыка», абз. 21
Музыка
Кала андо Израилё дилабэнас вмести диля, возможно када часто сас андэ антифонново стилё, када кала о хоро делийпэ по епаш и вонэ дилабэн по очереди разни строчки андо тексто. Или спэрва дилабэл ек мануш, ай потом каринг лэстэ о хоро. Можэт именно пала када ԥэнэнпэ андэ Библия, кала пистромэ, кай «и Мариам ля тэ дилабэл каринг лэ муршэндири дили», и кай и жувля дилабэнас «по очереди» (Исход 15:21; 1 Самуила 18:6, 7). Кода, сар слинэ пистромэ дэсавэ псалмы, сыкавэл, кай вонэ дилабэнас кадя жэ, например сар пистромэ о 136 Псалом. Инке, андэ лэ Неемиястири время, кала отстроисардэ и стины андо Иерусалимо, и дуй барэ хвалебни хороря, дилабэнас кадя жэ. (Неемия 12:31, 38, 40—42; дик ПЕСНЯ).
it «Пророчица», абз. 2
Пророчица
Пэрво жувли, пала кастэ андэ Библия ԥэнэнпэ, кай вой пророчица, када и Мариам. Дицол, кай через латэ о Дэл пэрэдэлас весть или дэсавэ вести, и, возможно, када сас андэ диля, савэ вой дилабэлас лэ Дэвлэстар (Исход 15:20, 21). Кадя, андэ Писания пистромэ, кай и Мариам и о Аароно ԥэндэ лэ Моисеёсти: «Хэба во [о Иегова] на дэл дума и через амэндэ?» (Числа 12:2). Через о пророко Михеё о Иегова екжэно ԥэндя, кай кала во виандярэлас лэ израильтянонэн анда Египто, во бишалдя англа лэндэ лэ Моисеёс, лэ Ааронос и ла Мариама (Михей 6:4). Хоть ла Мариамати дорэсляпэ кацави бари патив, тэ пэрэдэл и весть лэ Дэвлэстар, латири задания на сас кацави дэ бари, сар кай о лако ԥрал Моисеё. Кала вой ля май бут пэр пэстэ и вижыля пала лэ Дэвлэско законо, о Дэл строӷо ла наказал (Числа 12:1—15).
Виарақас сомнак анда Библия
(Исход 16:13) Вэчэром привуряйлэ и перепёлки и ушарадэ о лаӷерё, ай тэсара круӷом лаӷерё випэля дросын.
w11 1/9 14
Ту ӷанэс?
Васо о Дэл лэ израильтянонэнди бишалдя андэ пустыня лэ перепёлкэн?
Посли кода сар израильтяноря вижылэ анда Египто, о Дэл дувар дя лэнди фартэ бут мас, кала бишалдя лэ перепёлкэн (Исход 16:13; Числа 11:31).
Перепёлка, када най бари чирикли лунгимаса варикай 18 сантиметров, ай о весо варикай 100 грамм. Кадэла перелётни чирикля терэн ӷнёздоря андэ Западно Азия и Европа, ай йвэндэ андэ северно Африка и Аравия. Кала и чирикля пэрэвурян андэ авэр ҭан, вонэ провурян понад восточно бэрэӷо и Средиземно моря, ай кадяжэ понад Синайско полуострово.
Андо ек библейско справочнико ԥэнэнпэ, кай и перепёлки «йто вурян и используют и попутно балвал. Но если и балвал лэл тэ ԥурдэл андэ авэр риг или кала и чирикля цыён, кай долӷо вурянас, тоди вся и бари стая можэт тэ пэрэл пэ ԥув. И вонэ пашлён сар примардэ» (The New Westminster Dictionary of the Bible). И кай упалэ тэ лэн тэ вурян, лэ чириклянди трэбуй дес или дуй, кай тэ лэн зор. Кала кацаво терэлпэ, лэн фартэ вушэро тэ стидэс. Андо 20 вико, о Египто кажно бэрш битинэлас андэ авэр страны варикай трин милионоря перепёлки.
Андэ лэдуй случаёря, кала паша израильски катуны пэрэнас и перепёлки, када сас весна. Хоть андэ кодэя время и перепёлки обычно провурян понад Синайско полуострово, именно о Иегова вазгля и балвал, сави андярдя лэн каринг израильски катуны (Числа 11:31).
(Исход 16:32—34) О Моисеё ԥэндя: «Акэ со приԥэндя о Иегова: „Стидэн гомо́ро манна и фэрин ла важ всаворэ поколении, кай тумарэ потомкоря тэ диқэн о марно, савэса мэ праваравас тумэн андэ пустыня, кала виандяравас анда Египто“». 33 И о Моисеё ԥэндя лэ Аароности: «Лэ о сосудо, стов андэр лэстэ ԥэрдо гоморо манна и стов лэс англа Иегова, кай лэс тэ фэрин всаворэ поколении». 34 О Аароно стодя лэс англа Свидетельство, кай тэ фэрин лэс, сар о Иегова приԥэндя лэ Моисеёсти.
w06 15/1 31, абз. 3
Пушэн кодэла, ко адинон
Йто посли кода, сар и израильтяноря вижылэ анда Египто, лэнди парашэля тэ чалёл о хамос и вонэ линэ тэ холявэн. Важ када о Иегова ля тэ дэл лэнди и манна (Исход 12:17, 18; 16:1—5). Андэ кодэя время о Моисеё ԥэндя лэ Аароности: «Лэ о сосудо, стов андэр лэстэ ԥэрдо гоморо манна и стов лэс англа Иегова, кай лэс тэ фэрин всаворэ поколении». Май дур ԥэнэнпэ: «О Аароно стодя лэс англа Свидетельство [ящико важ и важни лила], кай тэ фэрин лэс, сар о Иегова приԥэндя лэ Моисеёсти» (Исход 16:33, 34). Кала о Аароно стидя и манна андо сосудо, о ковчеӷо завета, андо саво слинэ и скрижали инке на сас.
17—23 АВГУСТА
СОМНАК АНДА БИБЛИЯ | ИСХОД 17, 18
«Сэжо мануш ӷотово тэ пэрэдэл и дила и тэ сытярэл аврэн»
(Исход 18:17, 18) Пэ када лэ Моисеёско састро ԥэндя лэсти: «Ту най кадя терэс. 18 Ту вицыёса, ту и и мануша, савэ туса, важ кода кай и дила кадэя фартэ ԥари важ тутэ. Ту на стерэса када екжэно.
О Моисеё фартэ любияс
О Моисеё любияс лэ израильтянонэн. Вонэ полэнас, кай о Иегова стодя лэс, кай во тэ диқэл пала народо и вонэ жанас каринг о Моисеё, кай тэ росԥэнэн пэстирэ проблемы и о ԥаримос. Андэ Библия пистромэ: «И мануша тердёнас англа Моисеё с утра жы кай о вэчэро» (Исход 18:13—16). Кати прецтавь, сар када тэ виашунэс часонэнца лэ манушэн, савэ авэн тэ росԥэнэн, со лэнди трэбуй и со лэнди на чалёл! Но о Моисеё анда оди поможыяс лэнди, важ кода кай любияс лэн.
(Исход 18:21, 22) Витидэ анда народо муршэн, савэ драго ӷанэн тэ терэн дила и надёжни, савэ даран лэ Дэвлэстар и нэнавидят и хохавни прибыль. Стов лэн барэдэрэнца понад тысячи, понад сотни, понад полусотни и понад десятки. 22 Мэк вонэ сындон о народо, кала када трэбуй. Всавори ԥари дила вонэ лэна тэ пэрэдэн тути, ай андэ всавори просто дила вонэ лэна тэ розлэнпэ екжэнэ. Стер тиро ԥаримос май вушэро, и мэк вонэ андярэн лэс туса.
w03 1/11 6, абз. 1
Бах на авэла, кала на патяс
Кай кадэла мурша ужэ слинэ качестворя, савэ чалёнас лэ Дэвлэсти инке жы каринг кода, сар лэн тэ стон тэ диқэн пала народо. Вонэ сыкавэнас пэ дила, кай даран лэ Дэвлэстар, стонас патив по Создателё, и кай даран, лэсти тэ на уӷодин. Всаворэ диқэнас, кай кадэла мурша терэнас вся со па лэнго зор, кай тэ ритярэн лэ Дэвлэстирэ законоря. Вонэ нэнавидели и хохавни прибыль, и када сыкавэлас, кай вонэ слинэ лашэ мануша. Вижал, кай и власть лэн на римосардоп. И вонэ на линоп пользоваться кодэлэса, кай и мануша лэнди патян, важ пэстири выӷода, важ пэско родо и друӷоря.
(Исход 18:24, 25) О Моисеё кангля пэстирэ састрэс и сразу стердя вся кадя, сар кодэва ԥэндя. 25 О Моисеё витидя анда вся Израилё муршэн, савэ драго ӷанэнас тэ терэн и дила и стодя лэн барэдэрэнца понад тысячи, понад сотни, понад полусотни и понад десятки.
w02 15/5 25—26, абз. 6
О сэжо можэт тэ авэл вужо англа Дэл
О Моисеё кадя жэ сас сэжо и лэстэ сас ковло ди. Кала во вимарделя анда зор, сар дэлас помощь лэ израильтянонэнди, лэско састро о Иофоро дя лэсти лашо совето. Во ԥэндя, кай Моисеё тэ пэрэдэл дэсави дила лэ муршэнди, савэ драго ӷанэнас ла тэ терэн. О Моисеё прижанэнас, кай во найсовершэно, важ када во тердя мудро и приля о совето (Исход 18:17—26; Числа 12:3). Лэ сэжонэ манушэсти най ԥарэс тэ пэрэдэл дэсави дила кодэлэнди, ко ӷанэн ла тэ терэл и кацаво мануш на дарал, кай через када во хасарэла и власть (Числа 11:16, 17, 26—29). Наоборот, во лэла тэ поможый аврэнди, кай лэндири дружба лэ Иеговаса тэ авэл май састи (1 Тимофею 4:15). Хэба на трэбуй и амэ кадя тэ терас?
Виарақас сомнак анда Библия
(Исход 17:11—13) И кала о Моисеё ваздэлас и вас, вицэлэнас и израильтяноря, ай кала умэкэлас и вас, вицэлэнас и амаликитя́норя. 12 Кала кай о Моисеё цыелэ и вас, о Аароно и о Хуро линэ бар и стодэ лэс паша лэстэ. Во бэшля, ай вонэ подритярэнас лэстирэ вас. Еқа ригатар о Аароно, ай авря ригатар о Хуро, и лэстирэ вас на умэкэнаспэ пока на зажыля о қам. 13 Кадя о Иисусо умардя лэ мечоса лэ амаликитянонэн.
w16.09 6, абз. 14
На умэкэн и вас
14 О Аароно и о Хуро подритярэнас лэ Моисеёстирэ вас, кала и израильтяноря марэнаспэ. Амэ кадя жэ можэм тэ терас вся, кай тэ подритярас аврэн и тэ поможысарас лэнди андэ кода, со трэбуй. Касти трэбуй тэ поможысарас? Например кодэлэнди, кастэ ԥарэс лэ зорэса, ко ԥуро, кодэлэнди, пэр кастэ тасавэл о ери важ лэндири вера, кастэ муля варико анда чаче, ай кадяжэ кодэлэнди, ко чуствует пэс одиноко. Инке амэ можэм тэ подритярас лэ тэрнэ христианонэн, важ кода кай о миро тасавэл пэр лэндэ, кай вонэ тэ стерэн бэзэх или тэ домардён тэ авэн «бахталэ» андэ кадэва миро, кай лэндэ тэ авэл бари образования, лащи бути и барвалимос (1 Фессалоникийцам 3:1—3; 5:11, 14). Погиндон, сар бы тумэ моӷли анда оди тэ шон сама аврэн, кала общаетесь пэ собрания или па телефоно, или кала росԥэнэн важ о Дэл чи вмести хан.
(Исход 17:14) О Иегова ԥэндя лэ Моисеёсти: «Запистросар када андэ книӷа, кай пала када тэ сэрэн, и ԥэн када упалэ лэ Иисусости: „Мэ стерава кадя, кай пала амаликитяноря полностью забистрэна“».
it «Канон», абз. 4
Каноно
Кода со запистросардя о Моисеё андэ пэстирэ книӷи, доԥэнэн, кай када лэ Дэвлэстар и кай вонэ ужан андо каноно, андэ лэ Дэвлэско Алав. Ай кадяжэ кай андэр лэндэ ԥэнэнпэ, сар правильно тэ тэлён лэ Дэвлэсти. О Моисеё ашэля барэдэрэса по израильско народо най корко пэстар, спэрва во дажэ отԥэнделя кадэлэстар (Исход 3:10, 11; 4:10—14). Лэ Моисеёс стодя о Дэл и во дя лэсти кацаво зор, кай во моӷ тэ терэл чудеса, кай дажэ и жрецоря, савэ калдуинас прижанглэ, кай кадэла чудеса лэ Дэвлэстар (Исход 4:1—9; 8:16—19). Вижал, кай о Моисеё драго дэлас дума и пистрояс, када на кодэлэстар, кай во када корко домарделя. Кала о Моисеё кангля лэ Дэвлэс и пэр лэстэ сжыля о свынто духо во запистросардя и алава, савэ потом ужылэ андэ Библия (Исход 17:14).
24—30 АВГУСТА
СОМНАК АНДА БИБЛИЯ | ИСХОД 19, 20
«Сости ту сытёс анда Дэш заповеди»
(Исход 20:3—7) Тутэ на трэбуй тэ авэн авэр дэвла, ай кати мэ. 4 На тер пэсти нисавэн хохавнэ дэвлэн, и на рисуй кода, со по нэбо упрэ чи пэ ԥув тэлэ, чи андо паи май тэлэ чем и ԥув. 5 На тэлю и на служысар лэнди, важ кода кай мэ, тиро Дэл Иегова, Дэл, саво камэл, кай ек лэсти тэ тэлён. Важ лэ дадэнго бэзэх, савэ вэрыцын ман, мэ спушава лэ шавэндар андо трито и андо штарто поколения. 6 Ай кодэлэн, ко любий ман и ритярэл мэрнэ законоря, мэ на ашавава и андэ тысячно поколения, важ кода кай любисарав лэн. 7 На ԥэн о алав лэ Иеговаско, тирэ Дэвлэско би пативалэс, важ кода кай о Иегова спушэла кодэлэстар, ко ԥэнэн лэско алав най пативалэс.
w90 15/4 5, абз. 6
Со значат важ тутэ и дэш заповеди?
Пэрви штар заповеди, сыкавэн, со амэндар аштярэл о Иегова. Пэрво заповедь. Во Дэл, саво камэл, кай кати лэсти тэ тэлён (Матфея 4:10). Дуйто заповедь. Лэ Дэвлэсти нащи тэ тэлён через изображэнии (1 Иоанна 5:21). Трито заповедь. Амэ всегда трэбуй пативалэс тэ ԥэнас лэ Дэвлэско алав (Иоанна 17:26; Римлянам 10:13). Штарто заповедь. Сыкавэл, кай андэ амари жызня ӷлавно трэбуй тэ авэл лэ Дэвлэстири дила, ай най пэстири. Када поможый тэ на надеисавас кати пэр пэстэ (Евреям 4:9, 10).
(Исход 20:8—11) На бистэр, кай и суббота трэбуй тэ авэл свынто дес. 9 Тер бути и вся пэстирэ дила шов дес, 10 ай о седьмо дес, када и суббота, о дес, важ о Иегова. На тер нисави бути ни ту екжэно, ни тиро шаво, ни тири щей, ни тиро рабо, ни тири рабыня, ни тирэ жывотни, ни о мануш, саво авеля анда авэр ҭан и жувэл андэ тиро форо. 11 Важ кода кай пала шов дес о Иегова создал о нэбо, и ԥув, и моря, и вся, со исин андэр лэндэ, ай андэ седьмо дес во ля тэ отцыёл. Важ када о Иегова блаӷословисардя о седьмо дес и стердя, кай во тэ авэл свынто.
(Исход 20:12—17) Полэ лэ дадэс и ла да, кай долӷо тэ жувэс пэ ԥув, сави дэл тути тиро Дэл о Иегова. 13 На умар. 14 На тер билажавардо бэзэх. 15 На чор. 16 На ԥэн хохаимос по сындо против кодэва, ко паша тутэ. 17 На кам о цэр, кодэлэско, ко паша тутэ. На кам ла хулая, кодэлэстиря ко паша тутэ, лэстирэ рабос, лэстири рабыня, лэстирэ гурувэс, лэстирэ ишакос или варисо анда кода, со лэско».
w90 15/4 6, абз. 1, 2
Со значат важ тутэ и дэш заповеди?
Панчто заповедь. Кала и бэяцэ кандэн пэстирэ родителёнэн, андо ери авэла мирно и о Иегова блаӷословия. И када пэрво заповедь, кай исин обещяния, сави дэл тэ аштярас о лашимос! Андэр латэ ԥэнэнпэ най кати кай «тути авэла драго» но и кай ту сможэш «долӷо тэ жувэс пэ ԥув» (Эфесянам 6:1—3). Кода кай и тэрнэ мануша кандэн лэ Дэвлэс андэ кадэла «послидни деса», дэл лэнди возможность никала тэ на мэрэн (2 Тимофею 3:1; Иоанна 11:26).
И любовь поможый лэ манушэсти, тэ на терэл вэрыто кодэлэнди, ко паша лэстэ. Например, тэ на умарэл (шовто заповедь), тэ на терэл билажавардо бэзэх о хулай, чи и хулаи (седьмо заповедь), тэ на чорэл (восьмо заповедь), или тэ на ԥэнэн хохаимос против кодэва, ко паша лэстэ (девято заповедь) (1 Иоанна 3:10–12; Евреям 13:4; Эфесянам 4:28; Матфея 5:37; Притчи 6:16–19). Ай со можно тэ ԥэнас пала амаро ди? Андэ Десято заповедь, ԥэнэнпэ, кай о мануш нащи тэ камэл кода, со най лэско. Када дэл амэнди тэ сэрас, кай амэндэ трэбуй тэ авэл вужо ди англа Иегова (Притчи 21:2).
Виарақас сомнак анда Библия
(Исход 19:5, 6) И акэ, если тумэ лэна андэ вся ман тэ кандэн и тэ жувэн па мэрно доӷоворо, тоди тумэ ашэна мэрно особо народо машкар всаворэ народоря, важ кода кай вся и ԥув мэрни. 6 Тумэ ашэна важ мандэ рашая, савэ авэна и царёнэнца, свынто народо“. Кадэла алава ту ԥэнэса лэ израильтянонэнди».
it «Священник», абз. 30, 31
Рашай
Христиански рашая. О Иегова дя алав, кай если израильтяноря лэна тэ жувэн па лэско доӷоворо, тоди вонэ авэна важ лэстэ «рашая, савэ авэна и царёнэнца, свынто народо» (Исход 19:6). Лэ Аароностири священическо линия сыкавэлас, кай авэла о май баро рашай. Кацавэ рашая трэбуй сас тэ служын, жы кай кодэя время, пока на авэла о май баро рашай (Евреям 8:4, 5). Кадэва доӷоворо анда Законо, трэбуй сас тэ ритярэн, пока на авэла нэво доӷоворо (Евреям 7:11—14; 8:6, 7, 13). Спэрва тэ ашэн рашанца и тэ служын андэ лэ Дэвлэско Царство, пала саво во дя алав, моӷли кати и израильтяноря, ай потом и мануша анда авэр народоря (Деяния 10:34, 35; 15:14; Римлянам 10:21).
Кати набут иудеёря прилинэ лэ Христос. Вижал кай анда израильско народо на сас скати манушэн, скати трэбуй, кай тэ авэн и чачунэ царёря и рашая, о свынто народо (Римлянам 11:7, 20). Важ бут бэрша палпалэ О Дэл ԥэндя лэ найкандинэ израильтянонэнди через о пророко Осия: «Мэрно народо авэла уничтожэно важ кода, кай на ӷанэн ман. Важ кода кай ту отԥэнделян тэ ӷанэс, то и мэ отԥэндюва тутар, и ту на авэса тэ служыс манди рашаса. И важ кода кай ту забистэрдян тирэ Дэвлэско законо, то и мэ забистрава тирэ шавэн» (Осия 4:6). Кадя о Иисусо ԥэндя лэ барэдэрэнди анда израильско народо: «Лэ Дэвлэско Царство залэна тумэндар и отдэна аврэ народости, саво анэн лэ Царствостирэ плодоря» (Матфея 21:43). И всаек о Иисусо, кала жувэлас пэ ԥув, ритярэлас кадэва Законо, и прижанэнас лэ рашан, савэ жылэ лэ Аароностар. Кала о Иисусо исцэлисардя лэ манушэн, савэ слинэ прокажонни, во ԥэндя кай вонэ тэ жан кай о рашай и тэ анэн и жэртва (Матфея 8:4; Марка 1:44; Луки 17:14).
(Исход 20:4, 5) На тер пэсти нисавэн хохавнэ дэвлэн, и на рисуй кода, со по нэбо упрэ чи пэ ԥув тэлэ, чи андо паи май тэлэ чем и ԥув. 5 На тэлю и на служысар лэнди, важ кода кай мэ, тиро Дэл Иегова, Дэл, саво камэл, кай ек лэсти тэ тэлён. Важ лэ дадэнго бэзэх, савэ вэрыцын ман, мэ спушава лэ шавэндар андо трито и андо штарто поколения.
w04 15/3 27, абз. 1
Интересни гиндоря анда книӷа Исход
20:5. Сар тэ полас кай о Иегова наказывает лэ потомконэн «важ лэ дадэнго бэзэх»? Кала о мануш ашэл взросло, о Дэл лэс сындой па кода, со во терэл и со лэстэ андо ди. Но кала и израильтяноря тэлёнас лэ хохавнэ дэвлэнди о найлашимос кадэлэстар дорэсэлас и лэндирэ потомконэн. И кадэлэстар лэ израильтянонэнди, савэ на парашэнас тэ кандэн лэ чачунэ Дэвлэс, сас май ԥарэс тэ тэлён лэсти, важ кода кай вся о народо тэлёлас аврэ дэвлэнди.
31 АВГУСТА — 6 СЕНТЯБРЯ
СОМНАК АНДА БИБЛИЯ | ИСХОД 21, 22
«Цэнисар и жызня, сар о Иегова»
(Исход 21:20) Если о мануш дэладап каштэса варикас анда пэстирэ раборя и лэско рабо или рабыня сразу мэрэла, тоди пала лэндэ трэбуй тэ рин.
it «Бить, побои», абз. 2
Тэ марэн, помардо
О евреё моӷ тэ марэл пэстирэ рабос или ла рабыня каштэса, важ кода кай вонэ на кандэн. Если о рабо мэрэлас кодэлэстар, кай лэс мардэ, тоди лэстирэ ӷосподинос наказывали. Но если о ӷосподино мардя лэ рабос, ай кодэва жувдя инке дес или дуй, тоди када сыкавэлас кай во на камэлас лэс тэ умарэл. Лэстэ сас право тэ марэл лэ рабос, важ кода кай во сас лэско имущество. О мануш на линоп тэ римой пэско кучутно имущество, важ кода кай во кадя хасардоп и ловэ. Кадяжэ если о рабо мэрэлас, через о дес, посли кода сар лэс мардэ, нэ возможно сас точно тэ ԥэнэн, кай во муля кадэлэстар или варисостар аврэстар. Важ када если о рабо инке жувэлас дес или дуй лэстирэ хулас нэ наказывали (Исход 21:20, 21).
(Исход 21:22, 23) Если и мурша марэнпэ и дэндап ла жувля, сави аштярэл бэятос и во арақадёл латэ май рано, чем трэбуй, но ашэлпэ жундо, тоди о дошало трэбуй тэ потинэл ловэ. Во трэбуй тэ потинэл скати, скати мангэла о хулай кадэла манушняко, и тэ отдэл када через сындомаря. 23 Но если варико мэрэла, тоди трэбуй тэ отдэн и жызня важ и жызня.
lvs 95, абз. 16
Цэнисар и жызня, важ кода кай вой подарко лэ Дэвлэстар
16 Важ о Иегова куч и жызня кажнонэ манушэстири. Важ лэстэ куч и жызня дажэ лэ бэятостири, саво инке на арақаделя. Сар пистромэ андэ лэ Моисеёско законо, если о мануш дядап ла жувля, сави аштярэл бэятос и через када муля вой или о бэято, тоди о мануш сас дошало андэ кода кай умардя манушэс. Хоть кадэва мануш на камля тэ умарэл, важ жызня во трэбуй сас тэ отдэл пэстири жызня. (Адиносар Исход 21:22, 23.) Важ о Иегова о бэято, саво инке на арақаделя, када жундо мануш. Тоди, сар о Дэл диқэл по аборто? Со лэстэ по ди, кала во диқэл, кай умарэн кажно бэрш милионоря бэятонэн?
(Исход 21:28, 29) Если о гурув замарэла на смэрть муршэс или жувля, тоди лэ гурувэс трэбуй тэ помарэн барэнца и лэско мас тэ на хан. Ай лэ гурувэстирэ хулас на трэбуй тэ наказывают. 29 Но если о гурув марэласпэ и лэстирэ хуласти ԥэнэнас пала када, ай о хулай на диқэлас пала лэстэ, и о гурув умардя муршэс или жувля, тоди трэбуй тэ помарэн барэнца лэ гурувэс и тэ умарэн лэстирэ хулас.
w10 15/4 29, абз. 4
О Иегова камэл, кай ту тэ на бистрэс тэ фэрис и жызня
Кадяжэ андо Законо сас пистромэ пала наказания, кала о домашнё жывотно марэлас лэ манушэс. Если о гурув умардя манушэс, тоди о хулай трэбуй сас тэ умарэл кадэлэ гурувэс, кай тэ фэрий аврэ манушэн. О мас кадэлэ гурувэско нащи сас тэ хан или тэ битинэн, важ када о хулай хасарэлас барэ ловэ. Но со если о хулай на диқэлас пала пэско гурув, саво умардя манушэс? Если кадэва гурув умардя инке варикас, тоди трэбуй сас тэ умарэн и лэ гурувэс и лэстирэ хулас. Кадэва законо дэлас тэ полэн, кай трэбуй тэ авэн май внимательни кодэлэнди, ко на диқэлас пала пэско ското (Исход. 21:28, 29).
Виарақас сомнак анда Библия
(Исход 21:5, 6) Но если о рабо ԥэнэна: „Мэ любисарав мэрнэ ӷосподинос, мэрня хулая, лэ шавэн и на камав тэ ашав свободно“, 6 тоди о ӷосподино трэбуй тэ подындярэл лэс каринг и вудара или каринг о косяко, и англа чачуно Дэл тэ пропусавэл лэсти о кан яряса. Тоди кадэва мануш ашэлапэ пэ вся и жызня лэстирэ рабоса.
w10 15/1 4, абз. 4, 5
Васо трэбуй тэ дэс алав, кай жувэса важ Иегова?
4 Кала о христианино дэл алав, кай жувэла важ о Дэл, када баро шаго. Када май бут чем просто обязанность. Саво лашимос амэнди анэн, кода кай амэ дям алав лэ Дэвлэсти? Кай тэ полас када, роздиқам саво лашимос анэн и обязательства андэ отношения лэ манушэнца, например, каринг амарэ друӷоря. Кай тутэ тэ авэл друӷо, ту трэбуй екжэно тэ авэс лашэ друӷоса. Ту андярэс отвецтвенность важ друӷо, кай тэ заботиспэ пала лэстэ. Ек лашо примеро важ и дружба, саво запистромэ андэ Библия, када пала Давидо и Ионафано. Вонэ дажэ динэ ек еқэсти алав и солахадэ, кай авэна тэ дружын. (Адиносар 1 Самуила 17:57; 18:1, 3.) Хоть кацави преданность ридко, и дружба ашэл май састи, кала и друӷоря андярэн отвецтвенность ек пала еқэстэ (Притчи 17:17; 18:24).
5 Андо Законо, саво о Дэл дя лэ израильтянонэнди, запистромэ и пала авэр отношения, андэ савэ и обязательства анэнас лэ манушэнди лашимос. Если о рабо камэлас тэ ашэлпэ кай пэско лашо ӷосподино и тэ на ашэл свободно, во моӷ тэ стерэл лэса доӷоворо, савэстар нащи сас тэ отԥэндёнпэ. Андо законо ԥэнэнпэ: «Если о рабо ԥэнэна: „Мэ любисарав мэрнэ ӷосподинос, мэрня хулая, лэ шавэн и на камав тэ ашав свободно“, тоди о ӷосподино трэбуй тэ подындярэл лэс каринг и вудара или каринг о косяко, и англа чачуно Дэл тэ пропусавэл лэсти о кан яряса. Тоди кадэва мануш ашэлапэ пэ вся и жызня лэстирэ рабоса» (Исход 21:5, 6).
(Исход 21:14) Ай если о мануш фартэ росхолявэла по мануш, саво паша лэстэ и спецыально умарэла лэс, тоди дажэ мэрнэ жэртвенникостар трэбуй тэ залэс лэс и тэ умарэс.
it «Рог», абз. 10
Роӷо
Кода со запистромэ андо Исход 12:14 сыкавэл, кай если варико спецыально умарэла манушэс, дажэ если када тердоп о рашай, то лэс тожэ трэбуй тэ умарэн или если кодэва, ко умардя, хутилделя пала роӷоря кай о жэртвеннико, всаек лэс трэбуй тэ умарэн (Дик 1 Царей 2:28—34.)