Ай ту лэса тэ аштярэс лэ Иеговас?

1, 2. Со амэ уӷанаса андэ кадэя статья?

ПРЕЦТАВЬ пэсти, кай тути трэбуй тэ авэл посылка андэ кодэва дес, саво ту аштярэс, но ла долӷо нинай. Ту ужэ лэс тэ пэрэжываеш пала када. Но тути ашэл май вушэро, кала ту уӷанэс, васо вой тутэ пока на авеля. И най евья андэ Притчи 13:12 ԥэнэнпэ: «Кала долӷо аштярэс, лэл тэ дуқал оди».

² Андэ кадэя статья амэ уӷанаса пала дэсавэ советоря анда Библия, савэ поможына, кай амэ тэ аштярас лэ Дэвлэс (Мих. 7:7). Кадяжэ амэ уӷанаса, кала амэнди трэбуй тэ на парашас тэ аштярас лэ Иеговас. И инке амэ подаса дума пала лашимос, саво авэла кодэлэндэ, ко камэл тэ аштярэл лэ Иеговаско дес.

И СОВЕТОРЯ АНДА БИБЛИЯ ПОМОЖЫНА ТЭ АШТЯРАС ЛЭ ИЕГОВАС

3. Сар тэ полас и алава анда Притчи 13:11?

³ Амэнди важно тэ авас терпеливи и пала када ԥэнэнпэ андэ Притчи 13:11: «О барвалимос, саво вушэро затерэлпэ ӥто тратийпэ, ай кодэва, ко по набут стидэл и ловэ ашэла инке май барвало». Анда кадэла алава дицол, кай о мудро мануш терэл вся спокойно и по набут.

4. Сар тэ полас и алава анда Притчи 4:18?

⁴ Андэ Притчи 4:18 ԥэнэнпэ: «Ай лэ праведнонэ манушэнго дром шолпэ по свето тэсара, саво ашэл май ярко и май ярко, пока на ваздэлапэ о қам». Амэ всегда поласас кадэла алава, кай о Иегова по набут дэл тэ уӷанас амэнди, со во загиндосардя важ и ԥув. Но кадэла алава можно кадяжэ тэ полас па аврятэ. Кала о мануш лэл тэ уӷанэн лэ Иеговас, лэстири дружба лэса по набут ашэл май лащи. И важ о мануш нико нэ сможэт тэ стерэл, кай во май ӥто тэ болдёл и тэ ашэл лэ Иеговаско друӷо. Пэ када трэбуй время. Если амэ приашундювас каринг и советоря, савэ дэл амэнди о Иегова через и Библия, каринг лэстири арӷанизацыя, и прилас кадэла советоря каринг пэстэ, тоди амэ лас май фартэ тэ шаспэ по Иисусо. Кадяжэ амэ по набут май драго уӷанас лэ Иеговас. Уӷанаса, сар кадэва гиндо росԥэндя о Иисусо.

5. Пэр со шолпэ лэ манушэстири дружба лэ Иеговаса, сар ԥэндя о Иисусо?

⁵ О Иисусо ԥэндя, кай о чачимос пала лэ Дэвлэско Царство, сар зэрно по набут барёл андо ди кай о лашо мануш. Акэ лэстирэ алава: «О зэрно виӷульдя и барёл, но во [кодэва, ко сеий] на ӷанэн сар. И ԥув екжэни по набут анэн плодо, спэрва о росточко, потом о колосо, ай тоди спило зэрно андо колосо» (Мар. 4:27, 28). Со о Иисусо камля тэ ԥэнэн кадэлэ алавэнца? Кадяжэ, сар по набут барёл и растения, кадя и лэ манушэстэ, саво изучает и Библия, по набут ашэл и дружба лэ Иеговаса май лащи. И со май лащи дружба лэ Иеговаса лэстэ авэла, со май фартэ дицола, кай во парудёл андэ лащи риг (Эф. 4:22—24). Но важно тэ сэрас, кай кадэва «зэрно» андо ди кай о изучающё барярэл о Иегова (1 Кор. 3:7).

6, 7. Сости амэ сытювас анда кода, сар о Иегова создавал и ԥув?

⁶ Кала о Иегова лэл тэ терэл варисави дила, во на грабий ла май ӥто тэ дотерэл, и лэстэ жал пэ када время скати трэбуй. Во терэл када, кай пэр лэстэ тэ стон патив и кай аврэнди тэ авэл драго. Када дицолас тоди, кала о Иегова по набут и на грабияс тэ терэл и ԥув важ и мануша.

⁷ Андэ Библия ԥэнэнпэ, кай кала о Иегова ля тэ терэл и ԥув, во стодя, кай вой тэ тердёл састэс и стердя кадя, кай вой тэ авэл круӷло (Иов 38:5, 6; Пс. 104:5). И кажно разо, кала о Иегова терэлас варисо, во витидэлас время, кай потом тэ диқэл, сар во стердя кадэя дила (Быт. 1:10, 12). Прецтавь пэсти, сар лошавэнас и анӷелоря, кала диқэнас, сар пэ ԥув и по нэбо по набут ашэлас вся май шукарнэс. Лэнди фартэ чалёлас, сар о Иегова када терэлас и вонэ всаворэ ӷромко хвалинас лэс (Иов 38:7). Амэ ӷанас, кай кала о Иегова создавал и ԥув, пэ када лэстэ ужыля тысячи бэрша. Но кала во дотердя кадэя дила, тоди во ԥэндя, кай када «фартэ драго» (Быт. 1:31).

8. Пала со амэ щяс подаса дума?

⁸ Амэ полям, кай андэ Библия исин бут советоря, савэ поможын тэ полас, кай фартэ важно тэ авас терпеливи и тэ аштярас. Ай акана амэ подаса дума пала дуй маменторя, кала амэнди трэбуй тэ аштярас лэ Иеговас, кала во лэла варисо тэ терэл.

КАЛА АМЭНДИ ТРЭБУЙ ТЭ АШТЯРАС ЛЭ ИЕГОВАС?

9. Кала амэнди трэбуй тэ аштярас лэ Иеговас?

⁹ Времяса амэ трэбуй тэ аштярас, кала о Иегова дэла атвето пэ амари молитва. Дэкала амэ мангас лэс, кай во амэнди тэ дэл зор, кай амэ тэ виритярас о ԥаримос или тэ на подаспэ кодэлэсти, со камэл амари ӷрешно тила. Ай амэнди здэлпэ, кай о Иегова идоси на дэл атвето пэ молитва. Тоди амэ лас тэ гиндосарас, васо о Иегова на дэл атвето сразу пэ молитва?

10. Васо амэнди трэбуй тэ аштярас, кала о Иегова дэла атвето пэ амарэ молитвы?

¹⁰ Кала амэ мангаспэ, о Иегова драго амэн ашунэл (Пс. 65:2). Кадя амэ сыкавас, кай патяс андэр лэстэ (Евр. 11:6). Амэ мангас, кай о Иегова тэ поможый, кай амэ тэ уӷодисарас лэсти. Но во инке камэл тэ диқэл, кай амэ чаче пристас пэ када зор (1 Иоан. 3:22). Например, амэ можэм тэ мангас лэс, кай во тэ поможый амэнди тэ на терас кода, со камэл амари ӷрешно тила или тэ мэкас и найлашэ привычки. Тоди амэнди трэбуй тэ полас, кай амэндэ най сразу када вижала. Амэ трэбуй тэ пристас пэ када бут зор. Пала кода, кай о Иегова най сразу дэл атвето пэ всаворэ амарэ молитвы, ԥэндя о Иисусо: «На парашэн тэ мангэн и тумэнди дэла о Дэл, на парашэн тэ родэн и арақэна, на парашэн тэ марэн андэ вудара и тумэнди ԥэрнавэна. Важ кода кай ко мангэл, лэсти дэна, ко родэл, виарақэла и ко стучий, лэсти ԥэрнавэна» (Матф. 7:7, 8). Если амэ терас, сар ԥэндя о Иисусо и на парашас тэ мангаспэ, тоди о Иегова ашунэна амарэ молитвы и дэла пэр лэндэ атвето (Кол. 4:2).

11. Сар амэнди моӷут тэ поможын и алава анда Евреям 4:16, если амэнди здэлпэ, кай о Иегова най сразу дэл атвето пэ амари молитва?

¹¹ Амэнди можэт тэ сдэлпэ, кай о Иегова на ашунэн амарэ молитвы. Но па чачимастэ во дэл атвето андэ кодэя время, кала када трэбуй. (Адиносар Евреям 4:16.) Важ када на трэбуй тэ дошалярас лэ Иеговас, кай во на дя кода, со мангасас. Например, бут мануша мангэнпэ, кай тэ авэл лэ Дэвлэско Царство и тэ улэл кадэя най лащи люма. О Иисусо ԥэндя, кай пала када трэбуй тэ мангаспэ (Матф. 6:10). И авэла найгодявэрнэс тэ парашас тэ патяс лэ Иеговасти, важ кода кай и мануша аштярэнас, кай о раё пэ ԥув ужэ авэла, ай лэс инке нинай! (Авв. 2:3; Матф. 24:44). Авэла годявэрнэс, если амэ на парашаса тэ мангаспэ лэ Иеговасти пала када и тэ патяс, кай во дэла атвето и кадэла люмати авэла конец андэ кодэя время, дес и часо, андэ саво стодя о Иегова. И трэбуй тэ сэрас, кай о Иегова витидя важ када именно кодэя время, сави поджала всаворэ манушэнди, савэ лэс любин (Матф. 24:36; 2 Пет. 3:15).

12. Кала инке найвушэро тэ аштярас лэ Иеговас?

¹² Дэкала амэнди прижалпэ тэ аштярас, кала о Иегова стерэла, кай тэ авэл справедливость. Бут мануша андэ кадэя люма найдраго андярэн пэс и на стон патив пэ мануша анда авэр нацыя и культура. Ай инке вонэ нэсправедливо обжанпэ кодэлэнца кастэ найлашо зор или ко ковло по шэро. Кадя жэ и мануша андярэн пэс нэсправедливо лэ Иеговастирэ служытелёнэнца. И кала амэнца кадя обжанпэ, амэнди кадэлэстар фартэ ԥарэс. Но трэбуй тэ сэрас лэ Иисусостирэ алава: «Ко виритярэла до конца, кодэва спасыяпэ» (Матф. 24:13). Ай дэкала можэт тэ авэл кацаво, кай ту уӷанглян, кай варико анда собрания стердя бэзэх и и старейшыноря ужэ ӷанэн пала када. Тоди тути трэбуй тэ аштярэс, сави ришэния вонэ прилэна. Тути авэла май вушэро тэ аштярэс, кала полэс, кай вонэ розлэна кадэя дила кадя, сар лэндар аштярэл када о Иегова.

13. Со о Иегова аштярэл лэ старейшынонэндар, кала вонэ розлэн и дила, кай варико андэ собрания стердя бэзэх?

¹³ Кала и старейшыноря уӷанэн, кай андэ собрания варико стердя бэзэх, вонэ лэн тэ мангэн лэ Иеговастар мудрость, кай тэ прилэн правильно ришэния и тэ диқэн пэ када лэ Иеговастирэ яқэнца (Иак. 3:17). И старейшыноря камэн тэ поможын лэ манушэсти, кай во тэ рийпэ каринг о Иегова (Иак. 5:19, 20). Кадяжэ вонэ терэн вся, кай тэ фэрин и тэ подритярэн лэ ԥралэн и лэ ԥэян андэ собрания, кай лэнди ԥарэс кодэлэстар, кай варико андэ собрания стердя бэзэх (2 Кор. 1:3, 4). Кала и старейшыноря розлэн кацави дила вонэ трэбуй спэрва драго пала вся тэ уӷанэн. Ай пэ када можэт тэ ужал бут время. Тоди вонэ мангэнпэ, подтидэн лашэ стихоря, савэ поможына лэ манушэсти, саво стердя бэзэх, и тоди дэн совето па Библия, кай во тэ парудёл (Иер. 30:11). И старейшыноря на цырдэн время, кай тэ прилэн и ришэния. Но вонэ и на грабин андэ када. Кала вонэ терэн кадя сар сытярэл лэн о Иегова, тоди када анэн лашимос всаворэнди андэ собрания. Но всаек кала о мануш терэл бэзэх, кадэлэстар можэт тэ авэл ԥарэс инке долӷо кодэлэнди, ко када вся пэрэжудя. Ай тумэндэ сас кацаво по ди? Если сас, тоди со поможыя, кай по ди тэ авэл май вушэро?

14. Кастар ту можэш тэ сытёс, кала туса варико анда собрания обжыляпэ нэсправедливо?

¹⁴ Ай тумэндэ сас кацаво, кай тумэнца нэсправедливо андярдэ пэс и ԥрала и ԥэя андэ собрания? Тоди тумэ бут сости можэте тэ сытён лэ манушэндар, пала савэ пистромэ андэ Библия и савэ на парашэнас тэ аштярэн, пока о Иегова стерэла кадя сар трэбуй. Сгиндосарам пала Иосифо. Лэса нэсправедливо андярдэ пэс лэстирэ чаче ԥрала. Но через када во на ашэля жэстоко. Во вся пэско зор отдэлас андэ служэния лэ Иеговасти. О Иегова лэс блаӷословисардя, важ кода кай во аштярэлас, кала во зашолапэ пала лэстэ и пэрэандярэлас о ԥаримос андэ пэстири жызня (Быт. 39:21). Прожыля время и о Иосифо простисардя пэстирэ ԥралэн, савэ стердэ, кай лэстири жызня тэ авэл фартэ ԥари. И во поля, кай о Иегова вся и время диқэлас пала лэстэ и поможыяс лэсти (Быт. 45:5). И амэнди, сар и лэ Иосифости, авэла май вушэро по ди, кала амэ вся отдаса андэ лэ Иеговастири вас, кай во тэ стерэл тэ авэл справедливость (Пс. 7:17; 73:28).

15. Со поможысардя ла Оксанати, кала ласа андярдэ пэс нэсправедливо?

¹⁵ Можэт най всаворэнди прижыляпэ тэ пэрэжувэн кода, со пэрэжудя о Иосифо. Но кала амэнца нэсправедливо обжанпэ, кадэлэстар можэт тэ авэл фартэ ԥарэс. И нэ важно служый кадэва мануш лэ Иеговасти чи най, амэнди фартэ поможына и советоря анда Библия (Флп. 2:3, 4). Уӷанаса пала ԥэй Оксанаb. Вой уӷангля, кай ек манушни пэ бути найдраго дэлас дума пала латэ и вся и время дошалярэлас ла. Ла Оксанати сас фартэ ԥарэс, но вой всаек на ля тэ терэл варисо анда холи кодэла манушняти. Лати поможысардя лэ Иисусоско примеро. Пэр лэстэ тожэ на еқвар ԥэнэнас найлашэ алава, но во никала на рияс пала пэстэ (1 Пет. 2:21, 23). Важ када и Оксана на шутя сама, со пала латэ дэнас дума. Но потом вой уӷангля, кай кодэла манушнятэ сас найлашо зор и вой важ када фартэ пэрэжывала. И и Оксана поля, кай вой андярэлас пэс ласа кадя най нарошно. Амаря ԥьяти сас драго по ди, кай андэ кодэва маменто вой андярдя пэс спокойно и на ля тэ одрий пала пэстэ.

16. Савэ гиндоря тути придэна зор, кала туса варико обжыляпэ нэсправедливо? (1 Петра 3:12).

¹⁶ Если и тути ԥарэс кодэлэстар, кай туса обжылэпэ нэсправедливо или авэр варисаво ԥаримос, тоди трэбуй тэ сэрэс, кай «о Иегова паша кодэва, ко бидаса умардо, и фэрий кодэлэс, касти ԥарэс по ди» (Пс. 34:18). О Иегова любий тут, важ кода кай ту аштярэс и патяс, кай во улэла тутар о ԥаримос (Пс. 55:22). Во справедливо Дэл и диқэл вся. (Адиносар 1 Петра 3:12.) Важ када если тутэ ԥаро маменто андэ жызня и ту на ӷанэс, со тэ терэс, на бистэр, кай важно тэ на парашэс тэ аштярэс лэ Иеговас.

БУТ БЛАӶОСЛОВЕНИИ АВЭНА КОДЭЛЭНДЭ, КО АШТЯРЭЛ ЛЭ ИЕГОВАС

17. Пала со дя алав о Иегова, сар ԥэнэнпэ андэ Исаия 30:18?

¹⁷ Ӥто лэ Дэвлэско Царство стерэла вся пала со о Дэл дя алав. Андэ Исаия 30:18 ԥэнэнпэ: «О Иегова аштярэл, кай тэ дэл тумэнди пэстирэ блаӷословении, во лэла тэ терэл лашимос, кай тэ сыкавэл кай полэл и жалуий тумэн. Важ кода кай о Иегова справедливо Дэл. Бахталэ всаворэ, ко надеийпэ пэр лэстэ» (Ис. 30:18). Чаче всаворэндэ, ко надеинпэ по Иегова и аштярэн лэс, авэна бут блаӷословении акана, ай кадяжэ андо раё пэ ԥув!

18. Савэ блаӷословении амэн аштярэн?

¹⁸ Андо раё пэ ԥув, кай лэ Иеговастирэ служытеля на авэла нисаво ԥаримос и пэрэжывания. На авэла нэсправедливость (Отк. 21:4). Никастэ на авэла ԥарэс по ди. Нико на авэла тэ пэрэжывает, со тэ хан и со тэ пэн, важ кода кай круӷом авэла бут хамос (Пс. 72:16; Ис. 54:13). Када авэла райкани жызня, андэ сави авэна бут блаӷословении!

19. Андэр со о Иегова поможый амэнди ужэ акана?

¹⁹ Но пока на авеля кадэя время, о Иегова поможыя амэнди, кай амэ ужэ акана тэ андярас пэс кадя, кабута амэ ужэ андо раё пэ ԥув. Во поможый амэнди тэ улас пэстар и найлашэ привычки, тэ парудювас андэ лащи риг, кай тэ авас уӷодни лэсти. Амэн англэ аштярэл фартэ лащи жызня. Важ када трэбуй тэ на парашас тэ патяс и тэ аштярас лэ Иеговас пока во на стерэла вся, пала со дя алав!