Со тэ терэс, кай тэ ашэс лэ Дэвлэско друӷо?

1, 2. Пэр кастэ анда мануша о Иегова ԥэнэнас, кай вонэ лэстирэ друӷоря?

КАСА амэ дружысардоп? Кодэлэнца, кас амэ любисарас и каса амэнди драго. Обычно амэнди фартэ чалён кодэла друӷоря, кастэ лашэ качестворя и каса амэнди чалёл тэ ладисарас.

² Кай о Иегова исин друӷоря машкар и мануша. О Дэл ԥэнэнас по Авраамо, кай во лэско друӷо (Исаия 41:8; Иакова 2:23). Кадяжэ во любияс лэ Давидос и ԥэндя пэр лэстэ «мануш, саво манди па оди» (Деяния 13:22). Ай по пророко Даниило, о Иегова ԥэнэнас «мануш, саво важ мандэ куч» (Даниил 9:23).

3. Васо о Иегова ԥэндя по Авраамо, по Давидо и по Даниило, кай вонэ лэстирэ друӷоря?

³ Васо о Иегова ԥэнэнас по Авраамо, по Давидо и по Даниило, кай вонэ лэстирэ друӷоря? Важ кода кай вонэ на заваздэнас о шэро и кандэнас лэс. Акэ, со о Иегова ԥэндя лэ Авраамости: «Ту канглян ман» (Бытие 22:18). Лэ Дэвлэса можэт тэ дружый дажэ цыло народо. О Иегова ԥэндя лэ израильсконэ народости: «Терэн кода, со мэ ԥэнав и мэ ашава тумарэ Дэвлэса, ай тумэ ашэна мэрнэ народоса» (Иеремия 7:23). Если ту камэс тэ авэс лэ Иеговаско друӷо, тути кадяжэ трэбуй лэс тэ кандэс.

О ИЕГОВА ФЭРИЙ ПЭСТИРЭ ДРУӶОНЭН

4, 5. Сар о Иегова фэрий пэстирэ друӷонэн?

⁴ Фартэ зорало вороӷо камэл, кай амэ тэ на ашас друӷоря лэ Дэвлэсти. Но о Иегова камэл амэн тэ фэрий лэстар. (Адиносар Псалом 55:22.) Андэ Библия пистромэ, о Иегова камэл «тэ сыкавэл пэско зор, кай тэ авэл драго кодэлэнди, ко всаворэ одеса лэса» (2 Летопись 16:9). Андо Псалом 32:8 о Иегова кадяжэ дэл алав пэстирэ друӷонэнди: «Дава тути тэ полэс, сытярава тут тэ жас па дром, па саво тути трэбуй тэ жас. Подԥэнава тути и лава тэ диқав пала тутэ».

⁵ Сар друӷоря лэ Иеговасти, амэ трэбуй тэ служысарас лэсти анда вся оди. Амэ трэбуй тэ на парашас лэс тэ кандас, дажэ кала ԥарэс. Тоди амэ можэм тэ патяс кадя жэ, сар о Давидо. Во пистросардя: «Мэ на парашава тэ патяв, важ кода кай во [Иегова] па право вас мандар» (Псалом 16:8; 63:8). Амэ патяс, кай о Иегова амэн фэрия. Но о Сатана камэл, кай амэ тэ на авас лэ Дэвлэсти друӷоря. Сар во када терэл?

О САТАНА ХОХАВЭЛ ПЭ МАНУША

6. Со о Сатана ԥэндя пала мануша?

⁶ Анда 11 ӷлава амэ уӷанглям, кай о Сатана жыля против о Иегова. Во ԥэндя пэр лэстэ, кай во хохавно и дошалярдя лэс, кай во найсправедливо. Во ԥэндя, кай о Иегова сас трэбуй тэ мэкэл лэ Адамос и ла Ева, кай вонэ екжэнэ тэ витидэн, со лашимос, ай со най. Но о Сатана дошалярдя най кати лэ Дэвлэс, но и всаворэн лэ Дэвлэстирэ друӷонэн. Андэр со? Андэ кода, кай вонэ дружын лэ Дэвлэса кати важ кода, кай варисо лэстар камэн, ай най важ кода кай любин лэс. О Сатана дажэ ԥэндя, кай лэстэ вижала любонэс тэ одмарэл лэ Дэвлэстар, кай тэ парашэн тэ дружын лэ Дэвлэса. Пала када пистромэ андэ Библия андэ книӷа Иов. Уӷанам, ко сас о Иово и сости амэ можэм лэстар тэ сытювас?

7, 8. а) Сар о Иегова полэлас лэ Иовос? б) Со о Сатана ԥэндя важ о Иово?

⁷ О Иово сас лашо мануш. Во жувэлас бут бэрша палпалэ. О Иегова ԥэндя важ лэстэ, кай пэ ԥув будэр нинай кацаво мануш. О Иово столас патив по Дэл и вэрыцыяс о найлашимос (Иов 1:8). О Иегова полэлас лэс сар пэстирэ друӷос.

⁸ О Сатана ԥэндя, кай о Иово дружый лэ Дэвлэса, важ кода кай лэ Иовости варисо трэбуй сас лэ Иеговастар. О Сатана ԥэндя: «Хэба... Най ту фэрис лэс всаворэ ригэндар, лэско цэр и вся, со лэстэ исин? Ту блаӷословисардян и дила андэ лэстирэ вас, и лэстирэ стадоря розжылэпэ па вся и ԥув. Но процырдэ о вас, мангав тут, и залэ вся, со лэстэ исин, на лэла во тут тэ дэл амрая андэ яқа?» (Иов 1:10, 11).

9. Со о Иегова домэкля тэ терэл о Сатана?

⁹ О Сатана ԥэндя, кай о Иово служый лэ Иеговасти, ек важ кода кай во лэсти варисо тэ дэл. Во доԥэнэнас, кай лэстэ вижала тэ заставий лэ Иовос тэ парашэл тэ служый лэ Дэвлэсти. О Иегова на гиндояс кадя сар о Сатана. Но Иегова домэкля лэ Сатанас тэ диқэл, чаче о Иово служый лэ Иеговасти, важ кода кай любий лэс.

О САТАНА ЖЫЛЯ ПО ИОВО БИДАСА

10. Саво ԥаримос пэрэандярдя о Иово и со во тердя?

¹⁰ Май англал о Сатана одля кай о Иово всаворэ́с скотос. Дэсавэс скотос чордэ, ай авэр попастосайлэ. Потом во умардя лэ Иовостирэн слуӷонэн. О Иово почти вся хасардя. Но о Сатана пэ када на терделя. Во умардя лэстирэн дэшэн бэятонэн. Но о Иово всаек на парашэля тэ кандэл лэ Иеговас. Андэ Библия пистромэ: «Андэ вся када о Иово на тердя бэзэх и на дошалярдя лэ Дэвлэс андэ кода, кай во варисо стердя най кадя» (Иов 1:12—19, 22).

11. а) Саво инке ԥаримос сас кай о Иово? б) Со стердя о Иово?

¹¹ Лэ Сатанасти када на хутилдя. Во ԥэндя лэ Иеговасти: «Лэпэ каринг лэстирэ кокаля и каринг лэстири тила, на лэла во тут тэ дэл амрая андэ яқа?» И о Сатана бишалдя по Иово фартэ ԥаро насвалимос (Иов 2:5, 7). Но о Иово всаек на парашэл тэ кандэл лэ Иеговас. Во ԥэнэн: «Пока мэ на мэрава, ашавапэ вужо англа Дэл!» (Иов 27:5).

12. Сар о Иово доԥэндя, кай о Сатана хохадя?

¹² О Иово на ӷанэнас, васо лэстэ всаворэ кадэла биды, и кай о Сатана дошалярэл лэс англа Дэл. Во гиндояс, кай вся када лэ Иеговастар (Иов 6:4; 16:11—14). Но о Иово всаек на ашадя лэ Иеговас. Акана ля тэ дицол, кай о Иово дружыяс лэ Дэвлэса най, важ кода кай варисо о Дэл лэсти тэ дэл, ай важ кода кай во любияс лэ Дэвлэс. Вся, со ԥэнэнас о Сатана важ о Иово, сас хохаимос.

13. Со доԥэндя о Иово, кай на ашадя лэ Иеговас?

¹³ Хоть о Иово на ӷанэнас, со дя дума о Сатана лэ Дэвлэса, во всаек на ашадя лэ Иеговас и кадэлэса доԥэндя, кай о Сатана хохавно. Важ кода кай о Иово на ашадя лэ Иеговас, во дя лэ Иовости бут лашимос (Иов 42:12—17).

АНДЭР СО АМЭН ДОШАЛЯРЭЛ О САТАНА?

14, 15. Со о Сатана ԥэнэн важ кажнонэс андар мэндэ?

¹⁴ Сости амэ сытювас анда кода, со сас росԥэндо андэ Библия важ о Иово? О Сатана доԥэнэн, кай всаворэ амэ, кодэла, ко служын лэ Иеговасти, служысарас лэсти, важ кода кай лэстар варисо тэ лас. О Найвужо ԥэндя, кай «важ пэстири жызня о мануш отдэла вся, со лэстэ исин» (Иов 2:4). Кала о Сатана ԥэндя важ о «мануш», во камля тэ ԥэнэн, най кати важ о Иово, но и важ всаворэ лэ Дэвлэстирэ служытеля. Инке, кай и мануша служын лэ Дэвлэсти, важ кода кай камэн варисо лэстар. Дажэ кала прожылэ бут бэрша посли лэ Иовости смэрть, о Сатана на парашэлас тэ дошалярэл лэ Иеговас и тэ доԥэнэн, кай лэстирэ служытеля любин кати ек пэс. Акэ, васо о Иегова ԥэндя: «Ав годявэрно мэрно шаво и радосар мэрно ди, кай мандэ тэ авэл, со тэ ԥэнав кодэлэсти, ко найдраго дэл дума пала мандэ» (Притчи 27:11).

¹⁵ Кала ту закамэса тэ ашэс лэ Иеговаско друӷо и андэ вся тэ кандэс лэс, тоди тутэ вижала тэ доԥэнэс, кай о Сатана хохавно. Хоть тути авэла трэбуй бут со тэ парувэс андэ тири жызня, ту никала на жалуиса, кай витидян тэ ашэс лэ Иеговаско друӷо! Васо каринг када трэбуй тэ поджас серьёзно? Важ кода кай о Сатана ԥэндя, кай именно ту на лэса тэ кандэс лэ Дэвлэс, кала тутэ авэла ԥаримос. О Сатана терэл вся, кай амэ тэ придас лэ Дэвлэс. Сар во када терэл?

16. а) Со терэл о Сатана, кай тэ на домэкэл лэ манушэн тэ служын лэ Иеговасти? б) Со во можэт тэ терэл, кай тут тэ на домэкэл тэ служыс лэ Дэвлэсти?

¹⁶ Кай тэ розмарэл амари дружба лэ Иеговаса, о Сатана старыийпэ по разному. Например, сар пистромэ андэ Библия, во жал «сар о лево, саво рычий и родэл, кас тэ похал» (1 Петра 5:8). Сар када можэт тэ дицол, кай во жал пар мэндэ? Када дицол тоди, кала тирэ друӷоря или родо, или инке варико на камэн, кай ту тэ терэс кадя, сар камэл о Иегова, и на мэкэн тэ сытёс па Библия (Иоанна 15:19, 20)a. О Найвужо амэн обхохавэл. Во можэт тэ притерэлпэ сар «лашо анӷело» (2 Коринфянам 11:14). Ай инке во камэл тэ доԥэнэн амэнди, кай амэ на ашас кода, кай тэ служысарас лэ Иеговасти (Притчи 24:10).

КАНДЭ ЛЭ ИЕГОВАС

17. Васо амэ кандас лэ Иеговас?

¹⁷ Кала амэ кандас лэ Иеговас, кадэлэса амэ сыкавас, кай о Сатана хохавно. Со поможыя амэнди тэ кандас лэ Дэвлэс? Андэ Библия пистромэ: «Любисар пэстирэ Дэвлэс лэ Иеговас всаворэ одеса, всаворя жызняса и анда вся зор» (Второзаконие 6:5). Амэ кандас лэ Иеговас, важ кода кай любисарас лэс. Со май бут амэ любисарас лэс, со май фартэ амэ камас тэ кандас лэс. О апостоло Иоанно пистрояс: «Важ кода любовь каринг о Дэл дицол андэ кода, кай амэ ритярас лэско законо и лэско законо найԥаро» (1 Иоанна 5:3).

18, 19. а) Савэ дилы вэрыцый о Иегова? б) Катар амэ ӷанас, кай о Иегова на мангэл амэн тэ терас кода, со най па амаро зор?

¹⁸ Исин дилы, савэ о Иегова вэрыцый. Пала дэсавэ андар лэндэ ту можэш тэ проадинос андэ рамка «Вэрыцын кода, со вэрыцый о Иегова». Можэт варисавэ дилы тути здэлапэ найфартэ вэрыти. Но кала ту погиндоса пала библеский стихоря, савэ андэ кадэя рамка, ту диқэса, васо авэла годявэрнэс тэ кандэс лэ Иеговас. Можэт ту полэса, кай тути трэбуй варисо тэ парувэс андэ пэстири жызня. Тэ парудёс авэла найвушэро. Но кала ту стерэса када, тутэ авэла радость и драго по ди, важ кода кай ту тердян, сар чачуно лэ Дэвлэско друӷо (Исаия 48:17, 18). Васо можно тэ патяс, кай тэ парувэс пэстири жызня можно?

¹⁹ О Иегова никала на мангэл амэн тэ терас кода, со най па амаро зор (Второзаконие 30:11—14). Во ӷанэн, со андар мэндэ лашо и со найлашо (Псалом 103:14). О апостоло Павло ԥэндя: «Но о Дэл на ашавэл, и во на домэкэла ԥаримос, саво май бут тумарэ зорэстар, но, кала авэла ԥарэс, дэла помощь, кай тумэ тэ виритярэн» (1 Коринфянам 10:13). О Иегова вся и время поможыя амэнди тэ терас кадя, сар во камэл. Во дэл алав, кай дэла амэнди «о зор, саво май баро обычнонэстар», кай амэ тэ пэрэандярас любо ԥаримос (2 Коринфянам 4:7). Апостоло Павло пистросардя: «Пэ вся мандэ исин зор, важ кода кай исин кодэва, ко лэс манди дэл» (Филиппийцам 4:13). Васо о Павло кадя патялас? Важ кода кай, кала лэсти андэ жызня сас ԥарэс, о Иегова вся и время поможыяс.

ЛЮБИН КОДА, СО ЛЮБИЙ О ИЕГОВА

20. Савэ качестворя трэбуй тэ сытювас кай о Иегова и васо?

²⁰ Кай тэ авэс лэ Иеговаско друӷо, тути трэбуй най кати тэ парашэс тэ терэс кода, со вэрыцый о Иегова, но тэ любис кода, со и во любий (Римлянам 12:9). Со за о Иегова камэл тэ авэн лэстирэ друӷоря, пала када запистромэ андо Псалом 15:1—5. (Адиносар.) Лэ Дэвлэстирэ друӷоря сытён лэстар, кай лэндэ тэ авэн кацавэ жэ лашэ качестворя. Вонэ сыкавэн пэстири «любовь, радость, на грабинпэ тэ холявэн и ӷанэн тэ аштярэн, терэн лашимос, и терэн лэс, дажэ кала пала када на мангэн. Вонэ патян андо Дэл, лэнго ди ковло и вонэ ӷанэн тэ ритярэн пэс андэ вас» (Галатам 5:22, 23).

21. Сар ту можэш тэ сыкавэс кодэла качестворя, савэ чалён лэ Иеговасти?

²¹ Со поможыя тути пэ дила тэ сыкавэс кадэла качестворя? Трэбуй вся и время тэ адинос и тэ сытёс па Библия (Исаия 30:20, 21). Кадя тири любовь каринг о Иегова авэла май бари и ту закамэса лэс тэ кандэс инке май фартэ.

22. Васо ашэл тэ кандэс лэ Иеговас?

²² Кала ту бут со парувэс андэ пэстири жызня, ту, ԥэнэса, злэс пар пэстэ пурани йда и лэс пэр пэстэ нэви. Андэ Библия пистромэ, кай тути трэбуй тэ парувэс пэс и тэ ашэс нэвэ манушэса (Колоссянам 3:9, 10). Када можэт тэ авэл найвушэро. Но кала ту кандэс лэ Иеговас и парувэс пэстири жызня и кода, со ту варикала сытелянас, о Иегова дэла тути «кучутни наӷрада» (Псалом 19:11). Акана, кандэ лэ Иеговас. Служысар лэсти, важ кода кай любис лэс, ай най важ кода кай варисо лэстар тэ лэс. Кала доԥэнэса, кай о Сатана хохавно, тоди ту па чачимастэ ашэса лэ Дэвлэско друӷо!