О Авраамо и Сарра кандэнас лэ Иеговас

Найдур лэ Вавилоностар сас о форо Уро. Кодэла, ко жувэнас андэ кадэва форо, тэлёнас бутэ дэвлэнди. Но андо Уро жувэлас мануш, саво кандэлас кати лэ Иеговас. Лэс ақарэнас Авраамо.

О Иегова ԥэндя лэ Авраамости: «Ашав пэско цэр и пэстирэ родос, и жа кордэ, каринг мэ ԥэнава». После када о Дэл дя алав: «Тутар жала баро народо, и важ тутэ мэ стерава бут лашимос важ фартэ бут мануша».

О Авраамо на ӷанэнас каринг лэсти трэбуй сас тэ жал. Но во фартэ патялас лэ Дэвлэсти. Важ када о Авраамо, лэсти хулаи и Сарра, лэско дад о Фарра и лэско плиминико о Лото стидэ пэско хабэ и жылэ андо баро дром.

Лэ Авраамости сас 75 бэрш, кала во пэстирэ ереса авеля андэ кодэя ԥув, пала сави ԥэндя о Иегова. Пэ кадэя ԥув ԥэнэнас Ханаано. Котэ о Иегова задя дума лэ Авраамоса и дя алав: «Вся кадэя ԥув, сави ту диқэс, мэ дава тирэ бэятонэнди». Но о Авраамо и Сарра уже сас ԥурэ и лэндэ на слинэ бэятцэ. Сар о Иегова зритярэла пэско алав?