О Иегова дэл дума лэ Самуилоса

Кай само баро рашай кай о И́лий, слинэ дуй шавэ, Офни и Финеесо. Вонэ служинас рашанца андэ бари свынто катуна. Вонэ на ритярэнас лэ Иеговаско законо и найдраго обжанаспэ аврэ манушэнца. Кала израильтяноря анэнас жертвы лэ Иеговасти, о Офни и о Финеесо лэнас пэсти со май лашэ котора лэ масэстар. И́лий ӷанэнас када, но нисо лэнди на терэлас. Сар ту гиндос, лэ Иеговасти када чалёлас?

Хоть о Самуило сас пэ бутэстэ май цыкно лэ Илиястирэ шавэндар, во на сытёлас лэндар. Важ када о Иегова любияс лэ Самуилос. Еқвар и рят о Самуило прошутяпэ кодэлэстар, кай варико лэс ақарэлас пэ алавэстэ. Во ущеля, прастая каринг о И́лий и ԥэндя: «Мэ катэ!» Но о И́лий ԥэндя: «Мэ на ақардэм тут. Жа пэр сов, мэрно шаво». О Самуило пэля тэ совэл, но лэс варико упалэ ақардя. Кала о Самуило ашундя о ӷолосо до тривар, во припрастая каринг о И́лий. Тоди о И́лий поля, кай када о Иегова ақарэл лэ шаворэс. Тоди о И́лий ԥэндя: «Кала упалэ ашунэса о ӷолосо, ԥэн: „Иегова, дэ дума. Тиро слуӷо ашунэн“».

О Самуило упалэ жыля тэ совэл. Тоди во ашундя: «Самуило! Самуило!» О шаворо ԥэндя: «Тиро слуӷо ашунэн, дэ дума». О Иегова ԥэндя: «Пэрэдэ лэ Илиясти, кай мэ спушава лэстар и лэстирэ ерестар. Во ӷанэн, со терэн лэстирэ шавэ андэ мэрни бари свынто катуна, но во нисо лэнди на терэл». Пэ авэр тэсара о Самуило, сар во када терэл кажно дес, ԥэрнадя и двэри андэ бари свынто катуна. Во даралас тэ росԥэнэн лэ Илиясти, со лэсти ԥэндя о Иегова. Но И́лий ақардя лэ шаворэс и пушля: «Мэрно шаво, со тути ԥэндя о Иегова? Нисо на гарав мандар». И о Самуило вся росԥэндя.

О Самуило барёлас и о Иегова вся время сас лэса. Всаворэ ӷанэнас, кай о Иегова витидя лэ Самуилос, кай во тэ авэл сындомари и о пророко.