О Иегова, саво всемоӷущё, полэл и шол сама лэ манушэн
«О Иегова драго ӷанэн андар со амэ, во сэрэл, кай амэ прахо» (ПСАЛОМ 103:14).
1, 2. а) Соса на шонпэ о Иегова и мануша, савэндэ исин власть андэ кадэва миро? б) Со амэ уӷанаса, кала адиносараса кадэя статья?
САР лэ манушэстэ исин власть пэ авэр мануша, кадэлэстар лэ манушэнди дэкала ԥарэс (Экклезиаст 8:9; Матфея 20:25). Но о Иегова никала кадя на терэл! Хоть во и само зорало па вся и люма, во фартэ шол сама манушэн, савэ бэзэхэса и шылинпэ. Во терэл лашимос и полэл, со амэндэ андо ди и со амэнди трэбуй. О Иегова «сэрэл, кай амэ прахо», важ када во никала на ԥэнэн амэнди тэ терас, со най па амаро зор (Псалом 103:13, 14).
2 Андэ Библия най еқвар запистромэ, сар о Иегова полэлас и шолас сама пэстирэ манушэн. Подам дума пала када. Пэрво. О Иегова дя зор лэ тэрнорэ Самуилости тэ пэрэдэл о сындо, саво лэ Иеговаско, само барэ рашасти лэ Илиёсти. Дуйто. О Моисеё, трэбуй сас тэ ашэл барэдэрэса пэ израильтяноря, но гиндояс, кай лэстэ када на вижала. О Моисеё дэлас дума пала када лэ Иеговаса. О Иегова виашунэлас лэс и на холявэлас пэр лэстэ. Трито. О Иегова фартэ шолас сама лэ израильтянонэн, кала виандярэлас лэн анда Египто. Со анда када амэ уӷанас пала Иегова и сар тэ терас кадя, сар во?
О ИЕГОВА ФАРТЭ ШОЛ САМА ЛЭ ТЭРНОРЭ БЭЯТОС
3. Со сас лэ тэрнорэ Самуилоса и пала со камас тэ пушас? (Диқэн и картинка англа статья.)
3 О Самуило ля тэ служый лэ Иеговасти андэ свынто катуна, кала сас инке бэято (1 Самуила 3:1). Еқвар и рят, кала о Самуило пэля тэ совэл, стердяпэ, состар о Самуило дя наздивa. (Адиносар 1 Самуила 3:2 жы кай 10b). Во ашундя, кай варико ақарэл лэс. О Самуило гиндосардя, кай када о само баро рашай о И́лиё ақарэл лэс. О Самуило йто прастая каринг лэстэ и ԥэндя: «Мэ катэ. Ту ақардян ман?» О И́лий ԥэндя: «Най». Кала када тердяпэ до дуйто, тоди о И́лий поля, кай лэ Самуилос ақарэл о Дэл. Во ԥэндя лэ бэятости, со тэ ԥэнэн и кодэва кангля лэс. Васо о Иегова, саво дэлас дума через о анӷело, пэрво разо на росԥэндя лэ Самуилости, кай лэс ақарэл во? Андэ Библия важ када на росԥэнэнпэ. О Иегова, файма, на росԥэндя, важ кода кай поля и шутя сама лэ Самуилос.
4, 5. а) Со стердя о Самуило, кала о Иегова ԥэндя лэсти тэ пэрэдэл лэстирэ алава и со сас тэсара? б) Со амэ уӷанас важ о Иегова анда кода, со сас?
4 Адиносар 1 Самуила 3:11 жы кай 18c. Андэ лэ Дэвлэско законо пистромэ, кай и бэятцэ трэбуй тэ стон патив пэ ԥурэ мануша, и май фартэ пэ кодэла, кастэ власть (Исход 22:28; Левит 19:32). Погиндон, сар дэ ԥарэс сас лэ Самуилости тэ пашол тэсара каринг о ԥуро И́лий и тэ пэрэдэл лэсти лэ Иеговаско сындо. Андэ Библия пистромэ, кай о Самуило «даралас тэ росԥэнэн лэ Илиёсти пала видения». Но Иегова ворта сыкадя лэ Илиёсти, кай лэ Самуилос ақардя во. Важ када о И́лий екжэно пушля кай о Самуило, со лэсти ԥэндя о Иегова. Во мангля лэ бэятос: «Нисо́ на гарав мандар». О Самуило кангля лэс и «пэрэԥэндя лэсти всаворэ алава».
5 Кода, со ԥэндя о Самуило лэ Илиёсти, на сас важ лэстэ нэво. Пала лэ Дэвлэско сындо лэ Илиёсти ужэ ԥэнэнас «лэ Дэвлэско мануш», савэско алав андэ Библия най запистромэ (1 Самуила 2:27 жы кай 36). Кода, со сас лэ Самуилоса и Илиёса сыкавэл, сар о Иегова полэл и шол сама манушэн и, саво во мудро Дэл.
6. Со амэ уӷанас пала Иегова, кала во поможысардя лэ тэрнэ Самуилости?
6 Тэрнэ ԥрала и ԥэя, кода, со сас лэ Самуилоса сыкавэл, кай о Иегова полэл, саво ԥаримос тумэндэ исин и со кадэлэстар тумэндэ по ди. Файма, ту лажавно и тути ԥарэс тэ поджас кодэлэстэ, ко барэдэр тутар и тэ росԥэнэс лэсти и весть важ о царство. Чи тутэ андо ди, кай ту най кацаво, савэнца ту еқэ бэршэнца. Патян, о Иегова камэл тэ поможый тумэнди. Важ када, кала мангэнпэ «росԥэнэн лэсти вся, со тумэндэ по ди» (Псалом 62:8). Гиндон пала Самуило и пала авэр тэрнэ лэ Иеговастирэ мануша, пала савэ пистромэ андэ Библия. Дэн дума аврэ христианонэнца, лэ тэрнэнца и лэ ԥурэнца. Файма, лэндэ исин, со тэ росԥэнэн пала время, кала о Иегова поможысардя лэнди кадя, сар вонэ и на аштярэнас.
ПОЛЯ И ШУТЯ САМА ЛЭ МОИСЕЁС
7, 8. Сар о Иегова сыкадя, кай во полэл и шол сама лэ Моисеёс?
7 Кала лэ Моисеёсти сас 80 бэрш, о Иегова дя лэсти тэ терэл найвушэро дила. Во трэбуй сас тэ виандярэл лэ израильтянонэн анда египетско рабство (Исход 3:10). О Моисеё сас пастухо пэ ԥув Мадиамо 40 бэрш и важ када и дила, сави дя лэсти о Иегова, сас важ лэстэ ԥари. О Моисеё ԥэндя: «Ко мэ кацаво, кай тэ жав каринг о фараоно и тэ виандярав лэ израильтянонэн анда Египто?» О Дэл дя лэсти алав: «Мэ авава туса» (Исход 3:11, 12). О Дэл кадяжэ дя алав, кай и барэдэра андо Израилё патяна лэсти. Но о Моисеё всаек на допатялас: «Ай со, сар вонэ... на кандэна мэрно ӷолосо» (Исход 3:18; 4:1). Вижал, о Моисеё спорияспэ лэ Дэвлэса! Но о Иегова на грябисайля тэ холявэл. Инке, о Иегова дя лэ Моисеёсти зор тэ терэл чудеса. О Моисеё сас пэрво мануш, пала саво запистромэ андэ Библия, кастэ сас кацаво зор (Исход 4:2 жы кай 9, 21).
8 О Моисеё упалэ ля тэ отԥэндёлпэ кадэла дилатар. Кадэва разо во ԥэндя, кай лэстэ на вижал шукарнэс тэ дэл дума. Пэр лэстирэ алава о Иегова ԥэндя лэсти: «Мэ екжэно авава паша тутэ, кала ту лэса тэ дэс дума и сытярава, со тэ ԥэнэс». Патяя о Моисеё када разо чи най? Най. Во мангля, кай о Иегова тэ бишалэл най лэс, ай варикас аврэс. Тоди о Иегова холяйля, но всаек во на парашэля тэ полэл и тэ шол сама лэ Моисеёс. Важ када о Иегова бишалдя лэ Ааронос тэ дэл дума важ пэско ԥрал (Исход 4:10 жы кай 16).
9. О Иегова на грабияспэ тэ холявэл по Моисеё и полэлас лэс. Сар када дя зор лэ Моисеёсти тэ стерэл, со ԥэндя о Дэл?
9 Сости амэн сытярэл пала Иегова кода, со сас лэ Моисеёса? Кай о Иегова, савэстэ фартэ баро зор, вижылоп тэ пэрэдаравэл лэ Моисеёс, кай во всаек тэ стерэл, со во камэл. Но о Иегова кадя на тердя. О Иегова на грабияспэ тэ холявэл и би холяко ԥэндя лэ Моисеёсти, саво сас сэжо и на заваздэлас о шэро, кай авэла паша лэстэ. Со ля тэ терэл о Моисеё? О Моисеё ашэля барэдэрэса, саво фартэ драго диқэлас пала Иеговастирэ мануша. О Моисеё терэлас вся, кай тэ полэл лэ манушэн и тэ шол сама лэн, сар о Иегова (Числа 12:3).
Сытён тумэ кай о Иегова, сар тэ обжанпэ аврэнца? (Диқэн о абзацо 10.)
10. Саво лашимос амэндэ авэла, кала амэ, сар о Иегова, полас и шас сама аврэн?
10 Хула́я, дада и дэя́, старейшыноря, сости тумэ сытелэ лэ Иеговастар? О Дэл дя тумэнди власть. Авелоп драго, кай тумэ тэ терэн кадя, сар о Иегова. Тэ полэн, тэ шон сама и тэ на грабинпэ тэ холявэн пэ хулаи, пэ бэятцэ и пэ кодэла, ко андэ собрания (Колоссянам 3:19 жы кай 21; 1 Петра 5:1 жы кай 3). Сытён лэ Иеговастар и лэ Иисусостар Христостар. Тоди лэ ԥралэнди и лэ ԥэянди, савэнца тумэ патян андо ек Дэл, авэла май вушэро тэ мангэн тумэн пала помощь. Када поможыя, кай лэндэ тэ авэл май вушэро по ди (Матфея 11:28, 29). Кадяжэ и мануша закамэна тэ сытён тумэндар (Евреям 13:7).
ЗОРАЛО СПАСИТЕЛЁ ПОЛЭЛ И ШОЛ САМА
11, 12. Со стердя о Иегова, кай и мануша, савэ вижанас анда Египто, тэ на даран и тэ полэн, кай лэн фэрин?
11 Кала израильтяноря вижылэ анда Египто андо 1513 бэрш жы кай о И. Х, лэн сас май бут чем трин миллионоря. Андэ лэндирэ еря слинэ ԥурэ и тэрнэ, зоралэ и насвалэ. Сас фартэ бут миро и лэнди трэбуй сас кодэва, ко пала лэндэ диқэла, полэла и шола сама лэн. О Иегова сас кодэва, ко через о Моисеё када стердя. Важ када израильтяноря би дарако вижанас анда Египто, саво сас важ лэндэ, сар цэр (Псалом 78:52, 53).
12 Со стердя о Иегова, кай и мануша тэ на даран и тэ полэн, кай лэн фэрин? Пэрво, и израильтяноря вижылэ анда Египто кадя, сар жан ек пала ек бут воиноря (Исход 13:18). Кай вонэ кадя вижылэ сыкадя, кай о Иегова ӷанэн, со терэл. Дуйто, о Иегова сыкадя пэстирэ манушэнди, кай во лэнца, кала «андярэлас лэн ла тучаса десэ и вся и рят лэ вудудэса ла ягатар» (Псалом 78:14). Кадэлэса, о Иегова ԥэнэнас лэнди: «На даран, мэ тумэнца, кай тэ андярав тумэн и тэ фэрисарав». Кадэла алава фартэ йто динэ зор лэнди.
Сар о Дэл фэрисардя лэ израильтянонэн паша лоли моря? (Диқэн о абзацо 13.)
13, 14. а) Сар о Иегова фэрисардя лэ израильтянонэн паша лоли моря? б) Сар о Иегова сыкадя лэ египтянонэнди пэско зор?
13 Адиносар Исход 14:19 жы кай 22d. Погиндосар, кай ту котэ, лэ израильтянонэнца, и тумэнди най каринг тэ жан. Палал о фараоно и лэстирэ мануша, ай и англал и лоли моря. И катэ о Иегова зашолпэ пала тумэндэ. О столбо анда туча пэрэжыля и терделя машкар тумэндэ и машкар и египтяноря. Кай и египтяноря тэмнота, ай тумэндэ фартэ свитло! И акэ, ту дикэс, сар о Моисеё процырдэл о вас пэ моря, залэл тэ ԥурдэл бари балвал, сави стердя, кай о паи терделя па дуй рига. Ту, тиро ери и тиро хабэ прожан кадя, сар жан бут воиноря, прожан па ԥув, сави сас тала моря. И катэ ту полэс, кай тирэ пэрнэ на тасон андэ чик и на склизнон, важ кода кай и ԥув шуки и састи. Тэ жас пар латэ найԥарэс. И кодэлэндэ, ко най йто жал, всаек вижал тэ дожан па авэр ла моряти риг.
14 Адиносар Исход 14:23e, 26 жы кай 30f. Андэ кадэя время о фараоно, саво гиндой кати пала пэстэ, нашэл пала тумэндэ. О Моисеё упалэ процырдэл о вас пэ моря и лэдунэ ригэндар пэ египтяноря пэрэл вся о паи. О фараоно и лэстирэ мануша тасон! (Исход 15:8 жы кай 10).
15. Сости када амэн сытярэл пала Иегова?
15 Анда вся када дицол, кай о Иегова о Дэл, саво любий, кай тэ авэл порядко. Када дэл амэнди тэ на дарас (1 Коринфянам 14:33). О Иегова сыкадя пэ дила, кай во пастухо, саво любий пэстирэ бакрорэн. Кала о Иегова паша амэндэ, амэ на дарас нисавэ вороӷонэндар. Кадэва найлашо миро йто на авэла. Кала амэ гиндосарас, сар о Иегова фэрий пэстирэ манушэн, када дэл зор тэ виритярас о ԥаримос, саво исин адес (Притчи 1:33).
16. Васо амэнди трэбуй тэ сэрас, сар о Иегова фэрисардя лэ израильтянонэн лэ фараоностар?
16 Адес о Иегова диқэл пала пэстирэ мануша. Во поможый лэнди, кай лэндири вера тэ авэл састи и дэл вся, со лэнди трэбуй важ и жызня. Во терэла када и тоди, кала авэла и бари бида, сави никала на сас, ай вой и най кадя дур (Откровение 7:9, 10). Важ када ни и ԥурэ, ни и тэрнэ, ни и зоралэ, ни и насвалэ, на пэрэдаранаg, кала авэла и бари бида, сави никала на сас. Вонэ сэрэна лэ Иисусостирэ алава: «Вивортонпэ и ваздэн и шэрэ, важ кода кай пашол и время, андэ сави тумэн фэрина» (Луки 21:28). О Гого, када коалицыя нацый, сави май зорали лэ фараоностирэ войскостар. Дажэ, кала о Гого дэла пэ Иеговастирэ мануша, вонэ на парашэна тэ патян, кай о Иегова фэрия лэн (Иезекииль 38:2, 14 жы кай 16). Васо лэ Дэвлэстирэ мануша кадя лэсти патян? Вонэ ӷанэн, кай о Дэл на парудёл. О Дэл упалэ доԥэнэна, кай во кодэва, ко фэрий, саво полэл и шол сама (Исаия 26:3, 20).
17. а) Саво лашимос анэна амэнди, кала ласа тэ гиндосарас, сар о Иегова полэлас и шолас сама пэстирэ манушэн? б) Пала со амэ подаса дума, кала адиносараса авэр статья?
17 Андэ кадэя статья амэ подям дума, сар о Иегова сыкавэл пэ дила, кай во диқэл, полэл и шол сама пэстирэ манушэн. Инке, кай во сытярэл, со тэ терэн и фэрий лэн. Но када най вся. Кала тумэ гиндон пала кода, со проадиносардэ, шон сама, сар о Иегова пэс шукарнэс андярэл и стон зор, кай тэ полэн лэс май драго. Через када тумари вера ашэла инке май састи и тумэ лэна май драго лэс тэ полэн, ай во тумэн. Андэ авэр статья амэ подаса дума, сар тэ полас и тэ шас сама манушэн, сар о Иегова, андо ери, андэ собрания и кала росԥэнас важ о Дэл.
a О историко о Иосифо Флавиё росԥэндя, кай лэ Самуилости андэ кодэя время сас 12 бэрш.
b 1 Самуила 3:2 жы кай 10: «Еқвар о И́лий совэлас пэстэ, лэстирэ яқа парашэлэ тэ диқэн и во на диқэлас. О светильнико лэ Дэвлэско инке на мударделя и о Самуило совэлас андэ лэ Иеговаско храмо, кай тердёл и лэ Дэвлэско ковчеӷо. О Иегова ақардя лэ Самуилос. О Самуило ԥэндя: „Мэ катэ“, и поднашля каринг о И́лий. Во ԥэндя: „Мэ катэ. Ту ман ақардян?“ О И́лий ԥэндя: „Най на ақардэм. Жа пэр.“ О Самуило жыля и пэля. О Иегова упалэ ақардя: „Самуило“. О Самуило вщеля, жыля каринг о И́лий и ԥэндя: „Мэ катэ. Ту жэ ақарэс ман?“ Но о И́лий ԥэндя: „На ақардэм, мэрно шаво. Жа пэр“. (О Самуило инке на ӷанэнас лэ Иеговас и о Иегова инке никала на дэлас дума лэса). О Иегова ақардя лэс до трито: „Самуило!“ Во вщеля, жыля каринг о И́лий и ԥэндя: „Да, мэ катэ. Ту жэ ақарэс ман“. Тоди о И́лий поля, кай када о Иегова ақарэл лэ бэятос и ԥэндя лэсти: „Жа пэр, кала во ақарэла тут, ԥэн „Дэ дума Иегова, тиро слуӷо ашунэл“. О Самуило жыля пэстэ и пэля. И кала о Иегова авеля и ля тэ ақарэл лэс, сар тоди: „Самуило! Самуило!“, о Самуило ԥэндя: „Дэ дума, тиро слуӷо ашунэл“».
c 1 Самуила 3:11 жы кай 18: «Тоди о Иегова ԥэндя лэ Самуилости: „Ӷан, мэ стерава андо Израилё кацаво, состар кажнонэстэ, ко ашунэла када, лэла тэ ӷудий андэ кан. Андэ кодэва дес мэ стерава вся, со ԥэнавас пала И́лий и лэско цэр. Ԥэн лэсти, кай мэ пэ викоря сындосарава лэско цэр важ кадэва бэзэх. Во ӷанэн, кай лэстирэ шавэ дэн амрая лэ Дэвлэс, ай во на спушэл лэндар. Важ када мэ солахав лэ Илиёстирэ цэрэсти, кай ни и жэртва, ни и дароря никала на зритярэна ман, кай мэ тэ спушав лэстар важ лэско бэзэх“. О Самуило совэлас жы каринг и тэсара, ай тоди ԥэрнадя и двэри андэ лэ Иеговаско цэр. Во даралас тэ росԥэнэн лэ Илиёсти пала видения. О И́лий ақардя лэ Самуилос: „Самуило, мэрно шаво!“ Во ԥэндя: „Мэ катэ“. О И́лий пушля: „Со во тути ԥэндя? Мангав, нисо на гарав мандар. Мэк кода и кода стерэл манди о Иегова, и инке достола, сар ту гаравэса мандар хоть ек алав анда вся, со во ԥэндя тути“. И о Самуило пэрэԥэндя лэсти всаворэ алава, нисо на угарадя. Тоди кодэва ԥэндя: „Кадя камэл о Иегова. Мэк терэл кода, со трэбуй андэ лэстирэ яқа“».
d Исход 14:19 жы кай 22: «Тоди лэ чачунэ Дэвлэско анӷело, саво жалас англа лэ израилёско лаӷерё, пэрэжыля и терделя пала лэндэ. О столбо анда туча, саво сас англа лэндэ, пэрэжыля и терделя пала лэндэ. Во терделя машкар египетско и израильско лаӷерё. О Моисеё процырдя о вас пэ моря, и о Иегова баря восточнона балваляса вся и рят ля тэ ӷоний и моря, кай тэ вишутярэл и ԥув, сави сас тала паи. И о паи терделя па дуй рига. И акэ, лэ израилёстирэ шавэ жылэ машкар моря па ԥув, сави ашэля шуки, ай о паи тердёлас па ек и па авэр риг лэндар».
e Исход 14:23: «И египтяноря нашлэ пала лэндэ. Всаворэ лэ фараоностирэ граста, лэстирэ вурдона важ и война и кодэла, ко бэшэнас пэ грас, жылэ пала лэндэ андэ моря».
f Исход 14:26 жы кай 30: «И акэ, о Иегова ԥэндя лэ Моисеёсти: „Процырдэ о вас пэ моря, кай о паи тэ рийпэ и тэ ушаравэл лэ египтянонэн и лэндирэ вурдона важ и война“. О Моисеё катэ жэ процырдя о вас пэ моря и каринг и тэсара о паи рисайля пэ пэско ҭан. И египтяноря нашэнастар лэ паестар, но о Иегова шутя лэн андэ моря. О паи рияспэ и заушарадя и вурдона важ и война и лэ фараоностирэ манушэн, кай бэшэнас пэ грас, савэ жылэ андэ моря пала израильтяноря. Ни ек андар лэндэ на ашэляпэ. Ай лэ израилёстирэ шавэ прожылэ па шуки ԥув, сави сас тала моря, ай и пая тердёнас стинаса па ек и па авэр риг лэндар. Андэ кодэва дес о Иегова фэрисардя лэ Израилёс лэ египтянонэндирэ вастэндар. И израильтяноря додиқлэ мулэн лэ египтянонэн пэ ла моряко бэрэӷо».
g Годявэрнэс тэ гиндосарас, кай машкар и мануша, савэ пэрэжувэна о Армагеддоно, авэна и насвалэ. Кала о Иисусо жувэлас пэ ԥув, во улэлас «любо насвалимос и любо дук» (Матфея 9:35). Кадэлэса во сыкадя, со стерэла англэ важ кодэла, ко пэрэжувэла о Армагеддоно. И мануша, савэ ринапэ каринг и жызня ужэ авэна зоралэ.