Вонэ на тэлелэ

Прожыля время, сар лэ царёсти лэ Навуходоносорости снисайля о суно. Тоди во стердя фартэ бари, сомнакони статуя, кай и мануша тэ тэлён лати. О царё стодя ла андо Деиро пэ ровно ҭан и ақардя кордэ само барэ и ашунглэ манушэн, савэ слинэ андэ лэско царство. Машкар кадэла мануша сас о Седрахо, о Мисахо и о Авденаго. О Навуходоносоро приԥэндя: «Сар кати задилабэла и дили и ашундёла о звуко анда труба, арфа и волынка, всаворэ трэбуй тэ тэлён ла статуяти! О мануш, саво на тэлёла, лэс шона андо бов, саво ԥабол». Ай со терэна кодэла трин тэрнэ евреёря, тэлёна вонэ ла статуяти, парашэна вонэ тэ кандэн лэ Иеговас чи най?

Тоди о царё ԥэндя, кай тэ дилабэл и дили. Всаворэ мануша пэлинэ пэ чанга и тэлелэ ла статуяти, ай о Седрахо, о Мисахо и о Авденаго тердёнас. Дэсавэ мануша диқлэ када и ԥэндэ лэ царёсти: «Кадэла трин евреёря на тэлелэ тиря ла статуяти». О Навуходоносоро ԥэндя, кай тэ анэн лэн каринг лэстэ и ԥэндя лэнди: «Мэ дав тумэнди инке еқвар, кай тумэ тэ тэлён ла статуяти. Сар тумэ на тэлёна, тоди тумэн шона андо бов, саво ԥабол. И тоди нисаво Дэл тумэн на фэрия». И тэрнэ мануша ԥэндэ: «Амэ на паруваса пэско гиндо. Амаро Дэл фэрия амэн. Но сар во амэн и на фэрия, амэ всаек на тэлюваса ла статуяти».

О Навуходоносоро фартэ росхоляйля. Во приԥэндя пэстирэ слуӷонэнди: «Росԥабарэн о бов семь разоря май фартэ, чем сас!» Кадяжэ во ԥэндя лэнди: «Сԥандэн кадэлэ евреёнэн и шон андо бов!» И яг андо бов сас кацави бари, кай и мануша, савэ шонас лэн андо бов, сԥабелэ. Ай и трин евреёря пэлинэ андэ яг. Но кала о Навуходоносоро диқля андо бов, во додиқля, кай вонэ на мулинэ, ай ԥирэнас андэ яг. Инке лэн сас най трин, ай штар. О царё пэрэдарайля и ԥэндя пэстирэ слуӷонэнди: «Амэ же шутям андо бов кати тринэн манушэн! Ай акана котэ лэн штар и ек андар лэндэ шолпэ по анӷело!»

О Навуходоносоро поджыля каринг о бов и зацыписайля: «Тумэ, савэ кандэн лэ Дэвлэс, саво Всевышнё, поджан кардэ!» Тоди о Седрахо, о Мисахо и о Авденаго вижылэ анда бов, и всаворэ динэ наздив, кала диқлэ, кай лэнца нисо на стердяпэ. И яг на сԥабардя ни лэндири тила, ни и бал, ай лэндиря йдатар даже на қандэлас ҭув.

О Навуходоносоро ԥэндя: «О Дэл лэ Седрахоско, лэ Мисахоско и лэ Авденагоско, баро Дэл!» Во бишалдя пэстирэ анӷелос и фэрисардя лэн. Ни ек дэл нинай кацаво, сар лэнго Дэл».

Кала тутэ авэла ԥаримос, кандэса ту лэ Иеговас кадя, сар кадэнас трин евреёря?