Со тэ терэс, кай и истина тэ лэл лэ одестар лэ родос, саво на патял амэнца андо ек Дэл?

О Иисусо ԥэндя лэ манушэсти, саво закамля тэ ашэл лэско ученико: «Жа цэрэ кай пэстирэ чаче и росԥэн лэнди пала вся, со важ тутэ стердя о Иегова, и кай во анда оди тут жалуисардя» (Мар. 5:19). Када сас варикай андо форо Гада́ро (по юӷо-востоко ла Галилейскона морятар). Лэ Иисусостирэ алава сыкавэн, кай во полэлас, кай о мануш создано кадя, кай камэл тэ росԥэнэн пэстирэ родости пала варисо интересно и важно.

Адес и мануша кадяжэ камэн тэ росԥэнэн пэстирэ родости кода, со уӷанглэ. И андэ дэсавэ культуры када май часто терэлпэ, ай андэ дэсавэ най. Важ када, кала о мануш лэл тэ служый лэ чачунэ Дэвлэсти лэ Иеговасти, лэсти камэлпэ тэ росԥэнэн лэ родости пала пэстири нэви вера. Но сар када тэ стерас? Сар тэ стерас кадя, кай о чачимос тэ лэл лэ одестар амарэ родос, савэстэ авэр вера или саво вообще на патял андо Дэл? Андэ Библия исин бут лашэ советоря, савэ поможын.

«АМЭ ВИАРАҚЛЯМ ЛЭ ХРИСТОС»

Андо пэрво вико о Андреё сас машкар кодэла, ко пэрво уӷангля, кай о Иисусо, када о Христос. Касти во сразу жэ пала када росԥэндя? «[Спэрва] во [о Андреё] ӥто виарақля пэстирэ чаче ԥралэс лэ Симонос и ԥэндя лэсти: „Амэ виарақлям лэ Христос“» (пэ еврейско шыб «Мессия»). О Андреё андя лэ Петрос каринг о Иисусо и кадя поможысардя лэсти, кай во тэ ашэл лэ Христоско ученико (Иоан. 1:35—42).

Варикай через шов бэрш, кала о Пётро сас андэ Иоппия, лэс манглэ тэ жал по северо андэ Кесария каринг о сотнико Корнилиё. Кас о Пётро котэ додиқля? «О Корнилиё ақардя лэ родос и пашутнэ друӷонэн, и аштярэлас лэн [лэ Петрос и кодэлэн, ко сас лэса]». Кадя о Корнилиё поможысардя лэ родости тэ ашунэн лэ Петрос и потом екжэнэ тэ прилэн ришэния (Деян. 10:22—33).

Сости амэ сытювас анда кода, сар о Андреё и о Корнилиё андярдэ пэс лэ родоса?

Ни о Андреё, ни о Корнилиё на аштярэнас, кай лэнго родо екжэно варисар уӷанэна пала Дэл. Например, о Андреё екжэно познакомил лэ Петрос лэ Иисусоса, ай о Корнилиё стердя вся, кай о родо тэ ашунэн лэ Петростири дума. Но ни о Андреё, ни о Корнилиё на тасавэнас по родо и на терэнас нисо, кай хохаимаса тэ заставин лэн тэ ашэн лэ Христостирэ ученикоря. Сости амэ анда када можэм тэ сытювас? Амэнди трэбуй тэ терас кадя жэ. Амэ можэм тэ росԥэнас варисавэ гиндоря лэ родости или тэ стерас кадя, кай вонэ тэ уӷанэн о чачимос анда Библия и амарэ ԥралэн и ԥэян, савэнца амэ патяс андэ ек Дэл. Но амэ стас патив, кай вонэ екжэнэ моӷут тэ ришын и на тасавас пэр лэндэ. О примеро еқэ ереско анда Германия, савэн ақарэн Йю́ргено и Пе́тра, поможый амэнди тэ полас, сар тэ поможысарас лэ родости.

И Пе́тра изучала и Библия и через дэсави время болделя. Лако хулай о Йю́ргено сас офицэро андэ халавдия. Спэрва лэсти на чалёлас, кай лэстири хулаи ашэля лэ Иеговаско свидетелё. Но прожыля время и во поля, кай лэ Иеговастирэ свидетеля росԥэнэн о чачимос анда Библия. Во тожэ болделя и адес служый лэ Иеговасти, сар старейшына. Саво совето во дэл кодэлэнди, ко терэл вся, кай о чачимос тэ лэл лэ одестар амарэ родос, савэстэ авэр вера?

О Йю́ргено ԥэнэн: «На трэбуй тэ вихас оди лэ родости и тэ росԥэнэс фартэ бут инфармацыя пала Дэл. Када лэн можэт тэ одмарэл и вонэ на закамэна нисо тэ уӷанэн. Фэдэр по набут через дэсави время ковлэс тэ росԥэнэс лэнди и интересни гиндоря. Кадяжэ можно тэ познакомиш лэ родос лэ ԥралэнца и лэ ԥэянца анда собрания, савэндэ кацаво жэ возрасто, сар лэндэ, и савэнди чалёл кода жэ, со и лэнди. Када можэт тэ анэн бут лашимос».

О апостоло Пётро и лэ Корнилиёско родо ӥто прилинэ о чачимос анда Библия. Ай аврэ манушэнди, савэ андо пэрво вико уӷанглэ о чачимос, трэбуй сас май бут время, кай тэ полэн, тэ прилэн о чачимос анда Библия чи най.

АЙ САР ЖЭ ЛЭ ИИСУСОСТИРЭ ԤРАЛА?

Дэсаво лэ Иисусоско родо патяя лэсти, кала во служыяс пэ ԥув. Машкар лэндэ и апостолоря Иаково и Иоанно, лэ Иисусостирэ двоюродни ԥрала, ай кадяжэ и Саломия, лэндири дэй. Вой, файма, сас лэ Иисусостири биби. Файма, вой сас машкар бут авэр манушня, савэ служынас лэ Иисусости и лэ апостолонэнди, кала дэнас лэнди кода, со лэндэ сас (Луки 8:1—3).

Но най всаворэ анда Иисусоско родо сразу патяе лэсти. Например, сар прожыля варикай бэрш посли кода, сар во болделя, кай тэ ашунэн лэс, стидэпэ бут мануша андэ ек цэр. «Кала лэско родо ашундэ пала када, вонэ жылэ тэ залэн лэс и ԥэндэ: „Во сжыля па годятэ“». Ай кала через дэсави время лэ Иисусостирэ чаче ԥрала пушлэ пала кода, со во англэ камэл тэ терэл, о Иисусо ворта на ԥэндя пала када. Васо? Важ кода кай «па чачимастэ лэстирэ ԥрала на патянас лэсти» (Мар. 3:21; Иоан. 7:5).

Сости амэн сытярэл кода, сар о Иисусо андярэлас пэс лэ родоса? Во на холявэлас, кала варико андар лэндэ ԥэнэнас, кай во сжыля па годятэ. Дажэ посли кода, сар о Иисусо муля и воскрес, во авеля каринг пэско чачо ԥрал Иаково. Кадя во сыкадя, кай о родо лэсти най всаек. Через када най кати о Иаково, но и авэр лэ Иисусостирэ чаче ԥрала полинэ, кай во па чачимастэ о Христос. Важ када вонэ сас вмести аврэ апостолонэнца андэ упруни комната андо Иерусалимо и пэр лэндэ тожэ сжыля о свынто духо. Прожыля время, о Иаково и о Иуда, ай кадяжэ авэр лэ Иисусоско чачо ԥрал, линэ тэ терэн особо дила (Деян. 1:12—14; 2:1—4; 1 Кор. 15:7).

ВАРИКАСТИ ТРЭБУЙ БУТ ВРЕМЯ

Сар и андо пэрво вико, дэсавэ манушэнди трэбуй бут время, кай тэ лэн тэ жувэн кадя, сар сытярэл о Дэл. И Росвита сас каталичка, кала андо 1978 бэрш лако хулай ашэля лэ Иеговаско свидетелё. Спэрва и Росвита гиндояс, кай вой право и одмарэлас лэ хулас лэ Дэвлэстар. Но прожылэ бэрша, вой паруделяпэ и поля, кай лэ Иеговастирэ свидетеля росԥэнэн пала чачимос. Андо 2003 бэрш вой болделя. Васо вой када стердя? Лако хулай на холявэлас пэ кода, со вой терэлас. Во дэлас лати возможность, кай вой тэ парувэл пэстири мнения. Саво совето вой дэл? Вой ԥэнэн: «Ту можэш бут тэ домардёс, если тутэ исин терпения, терпения и инке еқвар терпения».

И Мо́ника болделя андо 1974 бэрш, ай латирэ дуй шавэ ашэлэ лэ Иеговастирэ свидетеля варикай через дэш бэрш. Лако хулай о Ха́нсо никала на сас против лэндири вера, но во болделя кати андо 2006 бэрш. Саво совето дэл кадэва ери? Вонэ ԥэнэн: «Никала на ашавэн лэ Иеговас и на отԥэндён кодэлэстар, андэр со патян». Канешно, бут лашимос андя кода, кай и Мо́ника лэ шавэнца вся и время сыкавэнас, кай вонэ любин лэ Хансос. И вонэ никала на парашэнас тэ патян, кай авэла время и во прилэла о чачимос анда Библия.

О ЧАЧИМОС АНДА БИБЛИЯ АНЭН ЛАШИМОС

Еқварэс о Иисусо ԥэндя, кай о чачимос анда Библия, сар паи, саво дэл жызня (Иоан. 4:13, 14). Амэ камас, кай о чачимос анда Библия, саво сар паи, тэ анэн бут лашимос амарэ родости. Канешно, амэ на камас, кай амаро родо тэ отԥэндёл тэ уӷанэн о чачимос через кода, кай амэ часто и фартэ бут пала када дас дума. Анэна лэнди лашимос о чачимос анда Библия чи най, авэла зависить кодэлэстар, сар амэ росԥэнас лэнди пала пэстири вера. Андэ Библия ԥэнэнпэ, кай о праведно мануш обгиндой кода, со камэл тэ ԥэнэн. Кадяжэ андэ Библия пистромэ, кай «о мануш, кастэ годявэрно ди, дэл дума кадя, кай лэс тэ полэн и лэстирэ алавэнди патян». Сар поможын кадэла советоря? (Прит. 15:28; 16:23).

Ԥэнаса, и хулаи камэл тэ росԥэнэн пэстирэ хуласти андэр со вой патял. Если вой обгиндоя кода, со камэл тэ ԥэнэн, тоди вой лэла драго тэ подтидэл и алава и на грабия тэ дэл дума. Лати на трэбуй тэ ԥутёл кодэлэса, кай вой праведно и тэ диқэл завазглэ шэрэса по пэско хулай. Латирэ алава, савэ вой драго подтидя, моӷут тэ стерэн кадя, кай андо ери тэ авэл драго и мирно. Кала май фэдэр тэ подэл дума лэ хуласа? Пала со лэсти чалёл тэ дэл дума и тэ адиной? Чалёл лэсти и наука, и политика или о спорто? Сар тэ стерэл кадя, кай лэсти тэ авэл интересно и Библия, но и тэ стол патив пэ лэстирэ чуства и мнения? Кала вой пала када погиндоя, када поможыя лати тэ андярэл пэс годявэрнэс.

Кай о чачимос тэ лэл лэ одестар амарэ родос, савэ най лэ Иеговастирэ свидетеля, на хутилэла кати по набут тэ росԥэнас, андэр со амэ патяс. Амарэ алава трэбуй тэ сжанпэ кодэлэса, сар амэ пэс андярас.

ВСЯ И ВРЕМЯ АНДЯР ПЭС ДРАГО

О Йю́ргено ԥэнэн: «Вся и время жув па библейски принцыпоря. Када фартэ поможый, кай о родо тэ закамэл тэ уӷанэн о чачимос анда Библия, дажэ если на прижандёл андэ када». О Хансо, саво болделя через 30 бэрш, посли кода, сар болделя лэстири хулаи, ԥэнэн: «Тэ андярас пэс кадя, сар сытярэл о Иегова, када важно. Важ кода кай блаӷодаря кадэлэсти о родо диқэл, кай о чачимос анда Библия драго влияет пэ амари жызня». Амаро родо трэбуй тэ диқэл, кай машкар амэндэ и мануша, савэ на полэн амарэ Дэвлэс, исин разница важ кода кай кода, андэр со амэ патяс, анэн лашимос и поможый, кай амэн тэ на вэрыцын.

Лэ хулаянди, кастирэ хулая на патян лэнца андо ек Дэл, о апостоло Пётро дя лашо совето. Во пистросардя: «Кандэн пэстирэ хулан, кай кодэла, ко на терэн па лэ Дэвлэско алав, би алавэнго тэ патян андэр лэстэ, через кода, кай тумэ драго андярэн пэс и кандэн лэн. Мэк тумэн вурявэл най кода, со дицол, када заплетимэ бал, сомнака или ӥда, ай кода, со андо ди, нарядо, саво на римойпэ, када, кай тэ авэн пативалэ и всаворэнца драго тэ обжанпэ. Кадэва нарядо фартэ куч важ о Дэл» (1 Пет. 3:1—4).

О Пётро пистросардя, кай о хулай можэт би алавэнго тэ лэл тэ патял андо Дэл, блаӷодаря кодэлэсти, кай и хулаи драго пэс андярэл. Ек ԥэй, савя ақарэн Кри́ста, старыийпэ тэ жувэл па кадэла алава, кай о чачимос тэ лэл лэ одестар латирэ хулас. Вой када терэл кодэла времятар, кала болделя андо 1972 бэрш. Хоть латирэ хуласа дэсави время и изучали и Библия лэ Иеговастирэ свидетеля, пока инке во на ашэля лэ Иеговаско служытелё. Во най еқварэс сас пэ собрания и бутэ ԥралэнца и ԥэянца во ладий. Ай вонэ стон патив пэ лэстири ришэния. Со терэл и Криста, кай о чачимос тэ лэл лэ одестар латирэ хулас?

Вой ԥэнэн: «Мэ ришыла важ пэстэ, кай со бы тэ на терэлпэ, мэ вся и время лава тэ уӷодисарав лэ Иеговасти. Андэ кодэя жэ время мэ старысавав драго пэс тэ андярав и би алавэнго тэ стерав вся, кай о хулай тэ прилэл о чачимос. Если во камэл, кай мэ тэ терав кода, со на жал против библейски принцыпоря, то мэ старысавас тэ терав кадя, сар камэл во. И канешно, мэ став патив пэ кода, кай лэстэ исин право тэ витидэл и отдав вся андэ лэ Иеговастирэ вас».

И Кри́ста сыкавэл лашо примеро, пэ скати дэ важно тэ уӷодис лэ Дэвлэсти и тэ шос сама лэ хулас. Латэ исин дила, сави вой трэбуй тэ терэл важ о Дэл. Када тэ ԥирэл пэ собрании и пэ служэния, и кадэлэстар вой лэл зор. Кадяжэ вой полэл, кай лати трэбуй тэ шол сама пэстирэ хуласти, тэ сыкавэл, кай цэний лэс, и тэ проандярэл лэса и время. Всаворэ, кастэ исин родо, саво на патял лэнца андо ек Дэл, трэбуй тэ шон сама лэ родос и тэ полэн лэс. Андэ Библия пистромэ: «Всаворэсти исин пэсти время». И када поджал каринг и время, сави амэ проандярас пэстирэ ереса, особенно лэ хуласа или ла хулаяса, савэ на патян амэнца андо ек Дэл. Кала амэ еқэҭанэ проандярас и время, када поможый, кай тэ авэл лащи общения. Сар сыкавэн бут случаёря, кацави общения поможый, кай лэ манушэстэ тэ на авэл ревность и тэ на авэл по ди кацаво, кай во екжэно и кай во никасти на трэбуй (Эккл. 3:1).

НА ПАРАШЭН ТЭ АШТЯРЭН

О Хо́льгеро, саво болделя через 20 бэрш посли кода, сар болделэ авэр андэ лэско ери, ԥэнэн: «Трэбуй тэ сыкавас лэ родости, саво на патял амэнца андо ек Дэл, кай амэ любисарас лэс и мангаспэ пала лэстэ». Ай и Кри́ста ԥэнэн, кай «никала на парашэла тэ аштярэл, кай лако хулай прилэла о чачимос анда Библия и лэла тэ служый лэ Иеговасти». Амэнди трэбуй вся и время драго тэ диқас по родо, саво на патял амэнца андо ек Дэл, и тэ на парашас тэ аштярас, кай варикала во авэла лэ Иеговаско служытелё.

Амари цэль, када тэ на парашас тэ ладисарас амарэ родоса, тэ поможысарас лэнди тэ уӷанэн о чачимос и тэ стерас кадя, кай о чачимос анда Библия тэ лэл лэс лэ одестар. И амэ трэбуй вся и время тэ терас када «ковлэ одеса и важ кода, кай стас пэр лэндэ патив» (1 Пет. 3:15).