Терэн кадя, сар о Иегова, саво жалуий анда вся оди и сындой па чачимастэ

1, 2. а) Со гиндояс о Иисусо пала лэ Дэвлэско Законо? б) Сар и книжникоря и фарисеёря пэрэбандярэнас о Законо па пэстирятэ?

О ИИСУСО любияс лэ Моисеёско Законо. И амэ када полас, важ кода кай кадэва Законо лэстирэ Дадэстар, лэ Иеговастар, саво по нэбо. О Иегова сас фартэ куч важ о Иисусо. Андо Псалом 40:8 ԥэнэнпэ, кай о Иисусо всаворэ одеса любия лэ Дэвлэско законо. Акэ со андэр лэстэ пистромэ: «Чалёл манди тэ ритярав тиро законо, мэрно Дэл, и тиро законо мандэ андо ди». Кодэлэса, со о Иисусо ԥэнэнас и терэлас, во доԥэнэнас, кай о Законо андэ вся сас лашо, и кай о Дэл дя лэс лэ манушэнди, кай во тэ анэн лашимос и вся, сар котэ пистромэ, кадя и авэла (Матф. 5:17—19).

² Лэ Иисусости сас фартэ ԥарэс тэ диқэл, кай и книжникоря и фарисеёря сытярэнас аврэн, кай вонэ трэбуй тэ ритярэн лэ Дэвлэско Законо най па лэ Дэвлэстирятэ, ай па лэндирятэ. Вонэ терэнас па Законо жы кай кажно алав. О Иисусо диқэлас када. Во даже ԥэндя: «Тумэ дэн десято часть ла мятатар, лэ укрупостар и лэ тминостар». Но тоди, со вонэ стердэ най кадя? Па лэ Иисусостирэ алава дицол, кай вонэ «отшутэ кода, со сас само важно андо Законо. Када, кай трэбуй сас тэ сындон па чачимастэ, тэ жалуин анда вся оди и тэ на ашавэн» (Матф. 23:23). И фарисеёря на полэнас, со сас само важно андо Законо и гиндонас, кай вонэ май лашэ аврэндар. Но о Иисусо фартэ драго полэлас када. Во диқэлас, сар андярэлас пэс о Иегова андэ кажно законо.

3. Со амэ роздиқаса андэ кадэя статья?

³ И христианоря на трэбуй тэ терэн кадя, сар ԥэнэнпэ андэ лэ Моисеёско Законо (Рим. 7:6). Но о Иегова всаек ашадя кадэва Законо андэ пэско Алав, андэ Библия. Во лэс ашадя най важ кода, кай амэ фартэ тэ сытювас всаворэсти андар лэстэ. О Дэл камля, кай амэ май драго тэ полас, «со май важно», пэр со ритярдёлпэ лэ Дэвлэско Законо и тэ терас када. Ай сости амэн сытярэл о законо пала фороря, кай фэринпэ? Андэ статья, сави сас англа кадэя, амэ уӷанглям, со трэбуй тэ терэл кодэва, ко нашлятар андо форо, кай фэринпэ. Кадяжэ подям дума, сости амэн када сытярэл. О законо пала фороря, кай фэринпэ кадяжэ поможый амэнди бут со тэ уӷанас пала Иегова и пала кода, сар амэ можем лэстар тэ сытювас. Андэ кадэя статья амэ уӷанаса Васо анда законо пала фороря, кай фэринпэ, дицол, кай о Иегова жалуий анда вся оди лэ манушэн? Со амэ уӷанглям пала кода, сар о Иегова диқэл пэ жизня? Сар анда кадэва законо дицол, кай во вся время сындой па чачимастэ? Кала амэ ласа тэ роздиқас када, полэн, андэр со тумэ можете тэ сытён амарэ Дадэстар, саво по нэбо. (Адиносар Эфесянам 5:1a).

САР РОСТОДЭ И ФОРОРЯ, КАЙ ФЭРИНПЭ?

4, 5. а) Васо о Иегова камля, кай андэ фороря, кай фэринпэ тэ авэл вушэро тэ донашэн и со важ када стердэ? б) Сости када сытярэл амэн важ о Иегова?

⁴ Кай тэ авэс андо форо, кай фэринпэ, сас найԥарэс. О Иегова приԥэндя, кай андо Израилё кадэла фороря тэ авэн шов. Вонэ трэбуй сас тэ авэн пэ трин кажнона ригатар ла лэнатар, пэ сави ԥэнэнас Иордан. Пэр со када сас трэбуй? Кай о мануш, саво на камля тэ умарэл, но умардя, мог йто и вушэро тэ донашэл каринг о форо, кай фэринпэ, саво сас май пашэ каринг лэстэ (Чис. 35:11—14). Пала дрома, савэ андярэнас каринг кадэла фороря диқэнас, кай вонэ тэ авэн лашэ (Втор. 19:3). Кала росԥэнэнас, сар терэласпэ кай и иудеёря, дицол, кай пэ дрома тердёнас знакоря, савэ сыкавэнас лэ манушэнди, сар тэ донашэн андо форо, кай фэринпэ. Если тэ на авелоп кадэла фороря, тоди кодэлэсти, ко на камля тэ умарэл, но умардя, прижылоп тэ нашэл андэ авэр страна, кай во будэр на линоп тэ тэлёл лэ Иеговасти.

⁵ Кати погиндон, о Иегова, саво приԥэндя, кай тэ умарэн кодэлэс, ко камля тэ умарэл и умардя, фэрияс кодэлэс, ко на камля тэ умарэл, но умардя! Через када вонэ могли тэ аштярэн, кай о Дэл жалуия анда вся оди и фэрия лэн. Акэ, со ԥэнэн ек ученно: «Вся кадя драго стердэ, кай сас вушэро вся тэ полэс. Када сыкавэл, кай о Дэл па чачимастэ жалуий анда вся оди лэ манушэн». О Иегова най кодэва, кастэ нинай оди, саво кати и аштярэл, кай тэ спушэл пэстирэ служителёнэндар. Ай во «Дэл, саво вся время родэл, кай тэ жалуий анда вся оди» (Эф. 2:4).

6. Можно тэ ԥэнэс, кай и фарисеёря сытёнас кай о Иегова, кай тэ жалуин анда вся оди? Росԥэнэн.

⁶ Кай и фарисеёря на сас кода, кай вонэ тэ жалуин анда вся оди лэ манушэн. Кала росԥэнэнас, сар терэласпэ кай и иудеёря, дицол, кай вонэ на простинас лэ манушэс, саво най кадя тердя май бут, чем трин разоря. О Иисусо сындосардя лэн пала када, кала росԥэндя дума пала фарисеёря и пала кодэла, ко стидэнас и налогоря. О фарисеё мангэласпэ: «Дэвла, наис тути, кай мэ най кацаво, сар авэр мануша, савэ вимарэн и ловэ, найдраго обжанпэ аврэнца и ко терэл кода, со может тэ авэл кати машкар ром и ромни, или сар кодэва, ко стидэл и налогоря». Ай андэ кадэя же время кодэва, ко стидэлас и налогоря на гиндояс пала пэстэ фартэ бут и мангэласпэ лэ Дэвлэсти, кай во лэс тэ жалуий анда вся оди. Васо и фарисеёря никас на жалуинас анда вся оди? Важ кода кай вонэ, сар ԥэнэнпэ андэ Библия, «никас англа пэстэ на стонас, сар манушэн» (Луки 18:9—14).

7, 8. а) Сар ту можешь тэ сытёс лэ Иеговастар, кала варико обжыляпэ туса найдраго? б) Кала простисарас, васо амэнди на трэбуй тэ гиндосарас пала пэстэ фартэ бут?

⁷ Сытён лэ Иеговастар, ай най лэ фарисеёнэндар. Полэн и жалуий аврэн. (Адиносар Колоссянам 3:13b). Погиндон пала кодэла, ко камэн тэ мангэн тумэндар прощения (Луки 17:3, 4). Пушэн пэстар: «Простисарав мэ аврэн йто и вушэро, даже если вонэ най еқвар обжанпэ манца найдраго? Пэ скати манди камэлпэ тэ простисарав лэн?»

⁸ Кай тэ простисарас, амэ на трэбуй тэ гиндосарас пала пэстэ фартэ бут. И фарисеёря гиндонас, кай вонэ май лашэ аврэндар, важ кода вонэ на камэнас тэ простин аврэн. Но и христианоря на трэбуй тэ гиндон пала пэстэ фартэ бут, ай тэ гиндон пала авэр, кай вонэ «май лашэ лэндар» и анда вся оди тэ простин лэн (Флп. 2:3). Лэна тумэ тэ сытён лэ Иеговастар? Если амэ на гиндосарас пала пэстэ фартэ бут, тоди аврэнди авэла май вушэро тэ мангэн амэндар прощения. Ай кадяжэ амэнди авэла вушэро тэ простисарас лэн. На грабинпэ тэ холявэн и сар можно май йто простин лэн (Эккл. 7:8, 9).

ЦЕНИН ЛЭ МАНУШЭСТИ ЖИЗНЯ

9. Сар о Иегова поможыяс лэ израильтянонэнди тэ полэн, пэ скати дэ куч лэ манушэстири жизня?

⁹ И фороря, кай фэринпэ, слинэ важ кода, кай израильтяноря тэ на авэн дошалэ, сар умардэ варикас (Втор. 19:10). О Иегова фартэ цений лэ манушэстири жизня и нащи диқэл пэ «вас, савэ умарэн лэ найдошалэс, кай тэ питял лэско рат» (Прит. 6:16, 17). Во вужо Дэл и обжалпэ аврэнца драго, важ када во на ԥандавэлас и яқа, даже кала о мануш на камля тэ умарэл, но умардя. Хоть кадэлэ манушэс и жалуинас анда вся оди, лэсти всаек трэбуй сас тэ росԥэнэн пала кода, со стердяпэ лэ старейшинонэнди. Если и старейшиноря полинэ, кай во на камля тэ умарэл, лэсти трэбуй сас тэ ашэлпэ андо форо, кай фэринпэ, пока на мэрэла о само баро рашай. И во мог котэ тэ ашэлпэ пэ вся пэстири жизня. Кода, кай лэ манушэсти на ашавэнас када вся кадя, поможыяс лэ израильтянонэнди тэ полэн, пэ скати трэбуй тэ ценин лэ манушэстири жизня. Если вонэ полэнас, кай о Дэл дя всаворэнди жизня, вонэ трэбуй сас тэ терэн вся, кай нисо вэрыто тэ на терэлпэ лэ манушэстиря жизняса.

10. Сар о Иисусо сындосардя лэ книжниконэн и лэ фарисеёнэн, важ савэ лэ манушэндири жизня сас нисо?

¹⁰ И фарисеёря на терэнас кадя, сар о Иегова. Вонэ андярэнас пэс кадя, кабута лэ манушэндири жизня важ лэндэ нисо. Андэр со када дицолас? «О Иисусо ԥэндя лэнди: „Тумэ залинэ и тия, кай и мануша тэ на полэн. Тумэ на зажылэ и тердярэн кодэлэн, ко камля тэ зажал!“» (Луки 11:52). Кадэла мануша трэбуй сас тэ росԥэнэн кода, со ԥэнэнпэ андэ лэ Дэвлэско Алав и тэ поможын аврэнди тэ жан па дром, саво андярэл каринг и вечно жизня. Ай вонэ одындярэнас лэ манушэн лэ Иисусостар, саво «Хулай понад и жизня» (Деян. 3:15). О дром, саво вонэ сыкавэнас, андярэлас каринг и смэрть, после сави о Иегова на рия каринг и жизня. И книжникоря и фарисеёря, савэ заваздэнас о шэро, гиндонас кати пала пэстэ, ай пала жизня и пала кода, кай аврэндэ тэ авэл вся драго, вонэ на гиндонас. Сар дэ найдраго вонэ терэнас, кабута лэндэ на сас оди!

11. а) Сар о апостоло Павло терэлас кадя, сар о Иегова, саво цений и жизня? б) Со дэла помощь тути тэ росԥэнэс важ о Дэл кадяжэ бут анда вся оди, сар о Павло?

¹¹ Сар амэнди тэ терас кадя, сар о Иегова и тэ на шаспэ пэ книжникоря и пэ фарисеёря? Трэбуй фартэ тэ ценисарас лэ манушэндири жизня и тэ терас кадя, сар о апостоло Павло, саво анда вся оди росԥэнэнас важ о Дэл. Важ када во мог тэ ԥэнэн: «Мэ вужо всаворэндирэ ратэстар». (Адиносар Деяния 20:26, 27c). Но о Павло росԥэнэнас важ о Дэл, най важ кода кай кадя сас трэбуй или кай када приԥэндя о Иегова. Во любияс лэ манушэн и гиндояс, кай лэндири жизня фартэ куч (1 Кор. 9:19—23). Амэ кадяжэ трэбуй тэ гиндосарас пала жизня, сар о Иегова, саво камэл «кай всаворэ тэ каинпэ пала кода, со най кадя стердэ» (2 Пет. 3:9). Ай камэс ту, кай и мануша тэ каинпэ? Кала росԥэнэс важ о Дэл, тер вся, кай тэ жалуис анда вся оди лэ манушэн анда вся оди. Тоди тути закамэлапэ инке май бут тэ росԥэнэс важ о Дэл анда вся оди. И када анэна тути бари радость.

12. Васо лэ Дэвлэстирэ служителя трэбуй тэ фэрин пэстири жизня и жизня аврэ манушэнди, кай ласа нисо тэ на авэл вэрыто?

¹² Кадяжэ, если амэ ценисарас лэ манушэндири жизня кадя, сар ла цений о Иегова, тоди амэ всаворэ одеса поласа, кай трэбуй тэ фэрисарас амари жизня и жизня аврэ манушэнди, кай ласа нисо тэ на авэл вэрыто. Амэ трэбуй тэ ездисарас пэ машина кадя, сар трэбуй. Ай кала терас бути, трэбуй тэ фэрисарас и жизня, кай ласа нисо вэрыто тэ на авэл. Тэ сэрэн пала када трэбуй, кала ладэн пэ собрания или кала андо зало, кай тэлювас лэ Дэвлэсти, варисо терас. Тэ фэрин пэско зор и кай ла жизняса тэ на авэл нисо вэрыто, када май куч, чем и ловэ и время. Амаро Дэл вся время терэл кода, со правильно. Амэ камас тэ терас кадя же, сар во. И старейшиноря трэбуй тэ сэрэн, кай екжэнэ трэбуй тэ фэрин пэстири жизня и кай и мануша тэ фэрин пэстири жизня (Прит. 22:3). Если и старейшиноря ԥэнэн тумэнди пала кода, со трэбуй тэ терэн, кай тэ фэрин пэстири жизня, кай ласа нисо тэ на авэл вэрыто, тумэ трэбуй тэ кандэн (Гал. 6:1). Мэк тумэндэ андо ди авэл кацаво же, сар кай о Иегова каринг лэ манушэндири жизня, кай тэ на авэн тумэ дошалэ, если варикаско рат питяла.

СЫНДОН КАДЯ, САР САС ԤЭНДО АНДО ЗАКОНО

13, 14. Сар и старейшиноря андо Израилё могли тэ терэн кадя, сар о Иегова, саво сындой па чачимастэ?

¹³ О Иегова приԥэндя лэ старейшинонэнди, савэ сас андо Израилё, па чачимастэ тэ сындон о народо кадя, сар ԥэндо андо законо. Спэрва трэбуй сас тэ уӷанэн вся со стердяпэ. Кадяжэ лэнди трэбуй сас фартэ драго тэ полэн васо кодэва, ко умардя кадя стердя, со лэстэ андо ди, сар во варикала пэс андярэлас и тоди тэ диқэн можно лэс тэ жалуин анда вся оди чи най. Кала вонэ сэрэн кай о Дэл сындой па чачимастэ, вонэ трэбуй тэ полэн, во умардя аврэс «анда холи» или важ кода кай камэлас тэ умарэл. (Адиносар Числа 35:20—24d). Если сас кодэла, ко диқлэ, со стердяпэ, вонэ трэбуй сас тэ ԥэнэн, кай кодэва мануш на камля тэ умарэл, но умардя. Само набут лэн трэбуй сас тэ авэн дуй мануш (Чис. 35:30).

¹⁴ Кала и старейшиноря драго росполинэ кадэя дила, вонэ трэбуй сас тэ гиндон пала мануш, ай най кати пала кода, со во стердя. Лэнди трэбуй сас тэ полэн, васо када стердяпэ. Вонэ трэбуй сас тэ андярэн пэс кадя, сар о Иегова, саво жалуий анда вся оди, тэ полэн, васо во умардя и тэ сындон лэс па чачимастэ. Важ када лэнди трэбуй сас лэ Иеговаско свято духо (Исх. 34:6, 7).

15. Росԥэнэн, сар о Иисусо и фарисеёря гиндонас пала кодэла, ко терэнас бэзэх?

¹⁵ И фарисеёря диқэнас кати пэ кода, со о мануш стердя, ай най со сас лэстэ андо ди. Кала и фарисеёря диқлэ, кай о Иисусо авеля кай о Матфеё пэ мисяйля, вонэ пушлэ кай лэстирэ ученикоря: «Васо тумаро учителё хал кодэлэнца, ко стидэл и налогоря и кодэлэнца, ко терэл бэзэх?» О Иисусо ԥэндя: «О врачо трэбуй най кодэлэсти, кастэ исин зор, ай кастэ во нинай. Важ када жан и сытён, со када: „Мэ камав, кай тэ жалуин анда вся оди, ай най кода, савэ жертвы тумэ анэн“. Важ кода кай мэ авелэм тэ ақарав най кодэлэн, ко кандэн лэ Дэвлэс, ай кодэлэн, ко терэл бэзэх» (Матф. 9:9—13). Можно тэ ԥэнэс, кай важ о Иисусо о бэзэх сас всаек? Най. О Иисусо ԥэндя, кай тэ каинпэ пала бэзэх. Када сас фартэ важно анда кода, со во росԥэнэнас (Матф. 4:17). Но о Иисусо поля, кай дэсавэ анда кодэла, ко стидэнас и налогоря и кодэла, ко терэнас бэзэх, камэнас тэ парудён. Вонэ авелэ андо цэр каринг о Матфеё най кати тэ хан. Сар ԥэнэнпэ андэ Библия бут, ко стидэпэ, слинэ кодэла, ко жанас пала лэстэ (Мар. 2:15). Но бут фарисеёря кадя и на полинэ, саво лашимос о Иисусо виарақля андэ кодэла мануша. И фарисеёря ԥэнэнас, кай вонэ служин лэ Дэвлэсти, саво жалуий анда вся оди и саво сындой па чачимастэ. Но вонэ на андярэнас пэс кадя, сар о Дэл. Вонэ сындонас аврэ манушэн, и ԥэнэнас, кай вонэ найлашэ и никала на парудёнапэ.

16. Со трэбуй тэ уӷанэн и тэ полэн и старейшиноря, кала стидэнпэ по правово комитето?

¹⁶ Лэ старейшинонэнди, савэ христианоря, фартэ трэбуй тэ терэн кадя, сар о Иегова, саво «любий тэ сындой па чачимастэ» (Пс. 37:28). Спэрва лэнди трэбуй тэ росполэн, стердя мануш бэзэх чи най. Если во стердя о бэзэх, тоди и старейшиноря трэбуй тэ роздиқэн кадэя дила кадя, сар ԥэнэнпэ андэ Библия (Втор. 13:12—14). Кала стидэнпэ по правово комитето, и старейшиноря трэбуй тэ полэн, каийпэ о мануш пала бэзэх, саво во стердя чи най. Но када найвушэро тэ полэн. Важ кода трэбуй тэ уӷанэн, со андо ди кай кадэва мануш, сар во диқэл пэ пэско бэзэх и со во камэл тэ терэл (Отк. 3:3). Кодэва, ко стердя о бэзэх трэбуй тэ каийпэ, кай лэс тэ жалуин анда вся одиe.

17, 18. Со поможыя лэ старейшинонэнди тэ полэн анда оди о мануш каийпэ чи най? (Диқэн и картинка англа статья.)

¹⁷ О Иегова и о Иисусо могут тэ диқэн, со кай о мануш андо ди. И старейшиноря када нэ могут тэ терэн. Если ту старейшина, со поможыя тути тэ полэс, анда оди о мануш каийпэ чи най? Пэрво, мангпэ лэ Иеговасти важ и мудрость и кай тэ полэс кадэя дила (1 Цар. 3:9). Дуйто, гиндосар пала кода, со ԥэнэнпэ андэ лэ Дэвлэско Алав и, со подԥэпэн о верно и благоразумно рабо, кай тэ полэс, лэ манушэсти по ди ашэля ԥарэс, кай во шутя чик по Дэл, или важ кода кай во тердя ԥарэс по ди варикасти андэ кадэва миро (2 Кор. 7:10, 11). Драго уӷанэн анда Библия пала кодэла мануша, савэ каисайлэ пала пэско бэзэх, и пала кодэла, ко на каисайля. Со лэндэ сас по ди? Со вонэ терэнас? Со вонэ камэнас тэ терэн?

¹⁸ Гиндон пала мануш, ай най кати пала кода, со во стердя. На бистрэн, сар лэс барярэнас, васо во кадя стердя и саво ԥаримос лэстэ исин андэ жизня. Акэ, со ԥэнэнаспэ андэ Библия пала Иисусо, саво диқэл пала христианско собрания «Во на лэла тэ сындой кати па кода, со диқэн лэстирэ яқа и тэ спушэл кати важ кода, со во ашунэл. Во лэ чорорэн лэла тэ сындой па чачимастэ и тэ сындой кадя, кай кодэлэндэ, ко кандэл лэ Дэвлэс тэ авэл вся драго» (Ис. 11:3, 4). Старейшиноря, о Иисусо стодя тумэн, кай тумэ тэ диқэн пала собрания. Во поможыя тумэнди тэ сындон па чачимастэ и тэ жалуин лэ манушэн анда вся оди (Матф. 18:18—20). Сар же амэ благодарни, кай амэндэ исин старейшиноря, кай вонэ диқэн пала собрания! Кода, кай и старейшиноря поможын амэнди, дэла и амэнди помощь тэ обжаспэ драго аврэнца и тэ жалуисарас анда вся оди ек аврэс.

19. Сости тумэ можете тэ сытён?

¹⁹ Андэ лэ Моисеёско законо исин акэ со, када о чачимос пала Иегова и кода, со главно андэр лэстэ, и пэр со ритярдёлпэ лэ Дэвлэско Законо (Рим. 2:20). Кадя, о законо пала фороря, кай фэринпэ сытярэл лэ старейшинонэн тэ сындон «па чачимастэ», ай амэн сытярэл тэ сыкавас пэ дила, кай терас лашимос, важ кода кай любисарас, ай инке, кай жалуисарас анда вся оди ек аврэс (Зах. 7:9). О Иегова на паруделяпэ, хоть амэ и на терас кадя, сар ԥэнэнпэ андэ лэ Моисеёско Законо. Важ о Иегова и доси важно, кай тэ сындон па чачимастэ и тэ жалуин лэ манушэн анда вся оди. Сави же када честь, тэ тэлювас амарэ Дэвлэсти! Давайте тэ сытювас лэстар и тэ андярас пэс кадя, сар во. Мэк во авэл важ амэндэ кодэва, кастэ фэрисавас!