Фэриспэ ту кай о Иегова?
«О Иегова фэрий и жизня пэстирэ служителёнэнди, и ни пэр кастэ анда кодэла, ко лэстэ фэрийпэ, на ԥэнэна, кай во дошало» (ПС. 34:22).
1. Кода, кай пэрэжыля лэ Адамоско бэзэх, со может тэ авэл по ди кай лэ Иеговастирэ служителя, савэ на ашавэн лэс?
«БИБАХТАЛО мэ мануш!» (Рим. 7:24). Кадэла алава пала пэстэ ԥэндя о апостоло Павло. И бутэ манушэндэ, ко служий лэ Иеговасти, кацаво же по ди. Амэ всаворэ грешни, и кала амэндэ на вижал тэ терас кадя, кай тэ радосарас лэ Иеговас кодэлэса, со терас, амэ можем тэ гиндосарас, кай амэ на трэбуй лэ Иеговасти. Дэсавэ христианоря, савэ стердэ баро бэзэх гиндон, кай о Дэл никала лэн на простия.
2. а) Сар анда Псалом 34:22 дицол, кай о Дэл на камэл, кай лэстирэ служителя вся время пэс тэ дошалярэн? б) Пала со амэ подаса дума андэ кадэя статья? (Диқэн и рамка «Сости сытювас и сар кода, пала со росԥэнэнпэ, сыкавэл, сар када инке авэла англэ?».)
2 Анда Библия амэ уӷанас, кай кодэла, ко уже фэринпэ кай о Иегова, най васо вся время пэс тэ дошалярэн. (Адиносар Псалом 34:22a). Но со када, кала фэриспэ кай о Иегова? Со амэнди трэбуй тэ терас, кай о Дэл тэ жалуий анда вся оди и тэ простий амэн? Пала када амэ уӷанаса тоди, кала роздиқаса о законо, саво пала фороря, кай фэринпэ. Лэс динэ лэ израильтянонэнди андэ дэлмутни время. Может тумэ гиндон: «Но пала фороря, кай фэринпэ ԥэнэнаспэ андэ лэ Моисеёско законо, ай кадэва Законо парашэля андэ Пятидесятница 33 бэрш лэ Иисусостар!» Но трэбуй тэ сэрэн, кай о Законо дя о Иегова. Важ када кай амэ май драго уӷанаса, со ԥэнэнпэ андо законо важ и фороря, кай фэринпэ, амэ можем бут со тэ полас, сар о Иегова диқэл по бэзэх, пэ грешни мануша и пэ кода, кала о мануш каийпэ. Но спэрва вспомним, васо сас трэбуй кадэла фороря.
«ВИТИДЭН ВАЖ ПЭСТЭ ФОРОРЯ, КАЙ ФЭРИНПЭ»
3. Со израильтяноря трэбуй сас тэ терэн, кала о мануш камля тэ умарэл и умардя аврэс?
3 Если дэлмут андо Израилё о мануш умарэлас аврэ манушэс, важ о Иегова када сас баро бэзэх. Если о мануш камля и умардя лэ манушэс, тоди о мурш, саво «рия пала рат», трэбуй тэ умарэл кодэлэс, ко умардя лэстирэ родос. Када терэлас кодэва, ко сас родо лэ манушэсти, савэс умардэ (Чис. 35:19). Кода, кай умарэн найдошалэ манушэс, саво умардя аврэс, во потинэн пэстиря жизняса пала жизня, савэс во умардя. Кала йто ринас пала кода, кай о мануш умардя аврэ манушэс, када фэрияс и ԥув, пала сави о Иегова ԥэндя, кай авэла лэндири. Тоди кадэя ԥув сас най мэлали. Акэ со о Иегова пэндя: «На мэлярэн и ԥув, андэ сави тумэ жувэн, важ кода кай [манушэско] о рат [саво питяя] мэлярэл и ԥув» (Чис. 35:33, 34).
4. Со трэбуй сас тэ терэл о мануш, если на камля тэ умарэл, но умардя?
4 Но, со трэбуй сас тэ терэл о мануш, если во на камля тэ умарэл аврэ манушэс, но умардя? Па Законо во всаек сас дошало андэ кода, кай во лэс умардя (Быт. 9:5). Но кода, кай о Иегова лэс жалуисардя анда вся оди, во домэкля, кай о мануш тэ унашэлтар кодэлэстар, ко камэл тэ рий пала рат, и тэ гарадёл андэ ек анда шов фороря, кай фэринпэ. Кадэва мануш трэбуй сас тэ ашэлпэ андэ кодэва форо, пока на мэрэла о само баро рашай (Чис. 35:15, 28).
5. Васо о законо важ и фороря, кай фэринпэ поможый амэнди май драго тэ уӷанас лэ Иеговас?
5 О Иегова ԥэндя, ай най и мануша, кай тэ авэн и фороря, андэ савэ трэбуй сас тэ фэринпэ. О Иегова ԥэндя лэ Навиности: «Ԥэн лэ израильтянонэндирэ шавэнди: „Витидэн важ пэстэ фороря, кай фэринпэ“». Кадэла фороря сас витидэ лэ Иеговаса важ и особо служения (Иис. Н. 20:1, 2, 7, 8). Лэ Иеговасти сас важно, кай кадэла фороря тэ авэн. Вижал, кала амэ драго поласа о законо пала кадэла фороря, кай фэринпэ, амэ май драго уӷанаса, сар о Иегова жалуий анда вся оди. Кадяжэ амэ диқаса, сар адес амэ можем тэ фэрисавас кай о Иегова.
«ВО ТРЭБУЙ... ТЭ РОСԤЭНЭН ЛЭ СТАРЕЙШИНОНЭНДИ... ПАЛА КОДА, СО СТЕРДЯПЭ»
6, 7. а) Сар и старейшиноря розлэнас кода, кала о мануш на камля тэ умарэл, но умардя? (Диқэн и картинка англа статья.) б) Васо кодэва, ко умардя, трэбуй тэ жал каринг и старейшиноря?
6 Сар о мануш на камля тэ умарэл, но умардя, лэсти трэбуй сас тэ нашэлтар андо форо, кай фэринпэ и тэ «росԥэнэн лэ старейшинонэнди, савэ анда кодэва форо, пала кода, со стердяпэ». После када кодэлэсти, ко умардя, дэнас ҭан, кай тэ жувэл (Иис. Н. 20:4). Сар прожалас набут время, лэс бишалэнас каринг и старейшиноря, савэ анда кодэва форо, кай умардэ лэ манушэс. Котэ вонэ трэбуй сас тэ ԥэнэн лэсти, со лэса авэла па законо. (Адиносар Числа 35:24, 25b). О мануш мог тэ рийпэ андо форо, кай фэринпэ, кати тоди, кала и старейшиноря розлинэпэ, кай о мануш на камля тэ умарэл, но умардя.
7 Васо и старейшиноря трэбуй сас тэ розлэнпэ? Важ кода кай вонэ поможынас лэ народости, саво андо Израилё, тэ ашэнпэ вужэ андэ лэ Иеговастирэ яқа. Кадяжэ о Иегова мог тэ жалуий лэ манушэс анда вся оди, саво умардя аврэс кати тоди, кала кодэва мануш дэла дума лэ старейшинонэнца. Ек учёно пистросардя, если о мануш, саво умардя, на жал кай и старейшиноря, тоди «лэс могут тэ умарэн». Кадэва учёно инке ԥэндя: «Если лэс умарэна, андэ када дошало авэла во екжэно, важ кода кай во на фэрияспэ андэ кодэла фороря, пала савэ ԥэндя о Дэл». О мануш, саво на камля тэ умарэл, но умардя, мог тэ фэрийпэ, но важ када лэсти трэбуй сас тэ жал кай и старейшиноря и тэ терэл кода, со вонэ лэсти ԥэнэна. Во трэбуй сас тэ нашэл андо форо, кай фэринпэ, ай если во када на стерэла, тоди о родо кодэлэско, кас во умардя, умарэна лэс.
8, 9. Васо лэ христианонэнди, савэ стердэ баро бэзэх, трэбуй тэ жан каринг и старейшиноря?
8 Лэ христианонэнди, савэ стердэ баро бэзэх, кадяжэ трэбуй тэ жан кай и старейшиноря. Васо када трэбуй? Пэрво, важ кода кай о Иегова лэн стодя, кай вонэ тэ розлэн кацавэ дилы (Иак. 5:14—16). Дуйто, и старейшиноря поможын кодэлэнди, ко стердя баро бэзэх, кай о Дэл упалэ тэ авэл лэнго друго и кай вонэ упалэ тэ на терэн кадя, сар стердэ (Гал. 6:1; Евр. 12:11). Трито, и старейшиноря, када ԥрала, савэн сытярдэ, савэ ӷанэн, сар тэ поможын кодэлэсти, ко каисайля. Кадяжэ вонэ подритярэн манушэс, кай лэсти тэ авэл май вушэро по ди. О Иегова ԥэндя, кай кадэла мурша шонпэ пэ кода, кай можно тэ гарадёс барэ брышындэстар (Ис. 32:1, 2). Па чачимастэ и старейшиноря, када лэ Иеговаско подарко, через саво дицол, кай во амэн жалуий анда вся оди!
9 Бутэндэ кай лэ Дэвлэстирэ служителя ашэля по ди май вушэро, кала вонэ жылэ кай и старейшиноря. Акэ со сас еқэ ԥралэса, савэс ақарэн Дэниел. Во стердя баро бэзэх и най ек шон даралас тэ росԥэнэн пала када лэ старейшинонэнди. Акэ со во ԥэнэн: «Кала прожыля скати время, мэ уже лэм тэ гиндосарав, кай и старейшиноря нисар манди на поможына. Кадяжэ мандэ на сас драго по ди и мэ вся аштяравас, кала манди трэбуй авэла тэ роспотиндював пала пэско бэзэх. Вся время, кала мэ мангаваспэ кай о Иегова, мэ спэрва ԥэнавас, кай во ман тэ простий». И акэ о Дэниело жыля каринг и старейшиноря и вся лэнди росԥэндя. Во ԥэнэн: «Кай тэ жав и вся тэ росԥэнав, сас ԥарэс. Но сар мэ када стердэм, мандэ кабута спэля бар па оди! Акана ман нисо на ритярэл, кай тэ мангавпэ кай о Иегова». Акана лэско ди лэс на дошалярэл и во ашэля вужо англа Дэл и найдэлмут лэс стодэ, кай во тэ авэл служебно помощнико.
«ВО ТРЭБУЙ ТЭ УНАШЭЛ АНДЭ ЕК АНДА КАДЭЛА ФОРОРЯ»
10. Со трэбуй сас тэ терэл о мануш, саво на камля тэ умарэл, но умардя, если во камэл, кай лэс тэ жалуин анда вся оди?
10 О мануш, саво на камля тэ умарэл, но умардя, трэбуй сас йто варисо тэ терэл. Во трэбуй сас тэ нашэл андо форо, кай фэринпэ, саво май пашэ каринг лэстэ. Кати тоди во мог тэ аштярэл, кай лэс жалуина анда вся оди. (Адиносар Иисус Навин 20:4c). Ԥарэс авэла тэ полэс, кала о мануш, савэса кацаво стердяпэ, нисо на терэл. Если во нисо тэ на терэл, тоди лэс могли тэ умарэн! Лэсти трэбуй сас май йто тэ жал андо форо, кай фэринпэ и тэ ашэлпэ котэ. Кай тэ фэрийпэ кадэва мануш, во трэбуй сас бут со тэ ашавэл. Када пэско цэр, кода соса залэласпэ и кода, кай бут варикала варикай ездияс. Када вся во трэбуй сас тэ ашавэл жы кай и время, пока на мэрэла о само баро рашай (Чис. 35:25)d. Кай тэ фэрий пэстири жизня, када ашэлас кода, кай вся тэ ашавэл. Если о мануш тэ ужалтар анда форо, кай фэринпэ, тоди во сыкадоп кай лэсти всаек, кай во умардя манушэс и тоди лэс екжэнэс могли тэ умарэн.
11. Сар о христианино, саво каийпэ сыкавэла, кай во на гиндой, кай кадя и трэбуй, кай о Дэл лэс тэ жалуий анда вся оди?
11 Кадяжэ и адес, кала о мануш, саво стердя бэзэх, ай тоди каисайля и камэл кай о Дэл лэс тэ жалуий анда вся оди, лэсти инке трэбуй варисо тэ терэл. Со? Во трэбуй будэр тэ на терэл о бэзэх. Када тэ «унашэлтар» най кати кодэлэстар, кай тэ на терэл баро бэзэх, но и всаворэстар, со может тэ анэн каринг када. О апостоло Павло пистросардя, савэ дилы терэнас и христианоря анда Коринфо и сар лэндэ дуқалас оди пала кода, саво бэзэх вонэ стердэ. Акэ со во ԥэндя: «Кала тумэндэ по ди ашэля ԥарэс, кай шутэ чик по Дэл, диқэн, со тумэ линэ тэ терэн. Тумэ закамлэ май бут тэ терэн важ о Дэл, линэ тэ даран лэстар, ашэлэ вужэ англа Дэл, тумэнди ашэля гряца о бэзэх, фартэ закамлэ, ля и холи, кай тэ тердён пала законо и сар тумэ закамлэ тэ парудён!» (2 Кор. 7:10, 11). Если амэ йто терас вся, кай о бэзэх, саво стердям варикала, упалэ тэ на стерас, амэ сыкавас лэ Иеговасти, кай амэндэ па чачимастэ дуқал оди пала бэзэх, саво сас. Инке, кай на камас тэ гиндосарас, кай кадя и трэбуй, кай о Дэл амэн тэ жалуий анда вся оди.
12. Пэр со инке о христианино может тэ жал, кай о Дэл лэс и май англэ тэ жалуий анда вся оди?
12 Пэр со инке о христианино трэбуй тэ жал, кай о Дэл лэс и май англэ тэ жалуий анда вся оди? Во трэбуй тэ авэл готово тэ отԥэндёл всаворэстар, со андярэл каринг о бэзэх, даже кала када куч лэстирэ одести (Матф. 18:8, 9). Ԥэнаса, если варико анда тирэ другоря ԥэнэн тути тэ терэс кода, со на чалёл лэ Иеговасти, парашэса ту тэ проандярэс лэнца время? Кала тути ԥарэс тэ зритярдёс, кай тэ пэс бут, терэса ту вся, кай тэ на авэс котэ, кай закамэлапэ бут тэ пэс? Или кала ту терэс вся, кай тути тэ на камэлпэ билажавардимос, зритярэс ту пэс, кай тэ на диқэс киноря, тэ на зажас андо интернето или авэр дилы, через савэ могут тэ авэн билажавардэ гиндоря? Сэр, кай вся со ту терэс важ о Дэл, кай тэ ритярэс лэско законо, када най евья. Нинай нисо май ԥарэс по ди, кала гиндос, кай о Иегова тутар одбанделя. Но авря ригатар, нисо нинай май фэдэр, чем тэ полэс, кай во никала на ашавэла и на парашэла тэ любий тут (Ис. 54:7, 8, сноска).
«АНДЭ КАДЭЛА ФОРОРЯ ТУМЭ ЛЭНА ТЭ ФЭРИНПЭ»
13. Васо андо форо, кай фэринпэ, о мануш мог никастар тэ на дарал и тэ жувэл драго?
13 Андо форо, кай фэринпэ, о мануш, саво авеля интя тэ гарадёл, мог никастар и нисостар тэ на дарал, важ кода кай о Иегова ԥэндя: «Кадэла фороря авэна важ тумэндэ, кай тэ фэринпэ» (Иис. Н. 20:2, 3). О Иегова на камля, кай кодэлэс, ко умардя, тэ сындон упалэ важ када. Во кадяжэ приԥэнэнас кодэлэсти, ко камэл тэ рий пала рат, тэ на зажал андэ кадэва форо и тэ на умарэл кодэлэс, ко умардя лэстирэ родос. Кодэва, ко авеля андо форо, кай фэринпэ, мог тэ на дарал, кай лэс умарэна, важ кода кай лэс фэрияс о Иегова. О форо, кай фэринпэ на сас, сар баруно. Котэ о мануш мог тэ терэл бути, тэ поможый аврэнди, тэ служий лэ Иеговасти и никастар тэ на дарал. Андэ фороря, кай фэринпэ, о мануш мог тэ жувэл кадяжэ драго, сар тоди, кала во инке на сас андэ кадэва форо!
Патян, кай о Иегова простий анда вся оди (Диқэн и абзацоря 14—16.)
14. Андэр со могут тэ патян кодэла, ко стердя баро бэзэх, но каисайля?
14 Дэкала и христианоря, савэ стердэ баро бэзэх, ай тоди каисайлэ, всаек дошалярэн пэс важ када. И лэнди может тэ здэлпэ, кай андэ лэ Иеговастирэ яқа вонэ кадя и ашэнапэ дошалэ пала бэзэх. Если тумэ кадяжэ гиндон, тоди сэрэн акэ пала со. О Иегова жалуий анда вся оди и через када во тумэн простисардя, важ када тумэ никастар и нисостар на даран. Кацаво пэрэжудя о Дэниело, важ саво росԥэнэнаспэ май упрэ. И старейшиноря поможысардэ лэсти тэ парудёлпэ и кай лэско ди тэ авэл вужо англа Дэл. О Дэниело ԥэнэн: «И акэ манди ашэля май вушэро. Кала мэ стердэм вся, сар камэл о Дэл, тоди мандэ по ди ашэля май вушэро. О Иегова простисардя вся мэрно бэзэх. О Иегова, сар и дя алав, залэл амэндар амаро ԥаримос и одындярэл лэс кадя дур, кай будэр на шола лэс амэнди пэ яқа». Андо форо, кай фэринпэ, о мануш, саво авеля интя тэ гарадёл, мог тэ жувэл и тэ на дарал кодэлэстар, ко камэл тэ рий пала рат. Кадяжэ и амэнди, на трэбуй тэ дарас, кай если о Иегова простисардя амаро бэзэх, во упалэ шола лэс амэнди пэ яқа или спушэла упалэ пала лэстэ. (Адиносар Псалом 103:8—12e).
15, 16. Васо кода, кай о Иисусо амаро Само Баро Рашай и кодэва, саво витиндя амэн, дэл тэ патяс, кай о Иегова жалуий анда вся оди амэн?
15 Амэндэ исин инке май бут, чем кай израильтяноря, со доԥэнэн, кай о Иегова жалуий анда вся оди амэн. Кала о апостоло Павло ԥэндя пала ԥаримос, через саво во нэ мог андэ вся тэ кандэл лэ Иеговас, во зацыписайля: «Благодарисарас лэ Дэвлэс через о Иисус Христос, саво амаро Господо!» (Рим. 7:25). О Павло патялас, кай о Дэл простисардя лэс «через о Иисус Христос». Важ када во терэлас вся, кай лэсти тэ на камэлпэ кода, со нащи, ай кадяжэ, кай тэ на дошалярэл пэс пала кода, со во дэлмут стердя, но уже каисайля. Через о Иисусо, саво витиндя амэн, амэндэ ашэл драго по ди и вужо ди англа Дэл (Евр. 9:13, 14). Кадя, сар о Христос, амаро Само Баро Рашай, «во может вся время тэ фэрий кодэлэн, ко терэн, кай о Дэл тэ авэл лэнго друго через лэстэ, важ кода кай во вся время жундо, кай тэ дэл дума важ лэндэ» (Евр. 7:24, 25). Дэлмут андо Израилё через кода, кай служияс о само баро рашай, о Дэл простияс лэ народоско бэзэх. А через кода, кай служий о Само Баро Рашай о Иисус Христос, амэ можем инке май фартэ тэ патяс, кай о Иегова амэн жалуий анда вся оди и дэл лашимос, саво амэ на затердям (Евр. 4:15, 16).
16 Кай лэ Иеговастэ тэ фэрисавас, трэбуй тэ патяс, кай о Христос витиндя амэн. Важ када трэбуй най кати тэ ӷанас, кай о Иисусо отдя пэстири жизня пала бут мануша. Ай трэбуй тэ патяс, кай Иисусо отдя пэстири жизня важ тутэ (Гал. 2:20, 21). Патя, через кода, кай о Иисусо витиндя тут, о Дэл простия и тиро бэзэх. Кадяжэ, патя, через кода, кай о Иисусо витиндя тут, ту можешь тэ жувэс вечно. О Христос отдя пэстири жизня и када лэ Иеговаско подарко, саво важ тутэ.
17. Васо нинай нисо май фэдэр, чем тэ фэриспэ кай о Иегова?
17 О законо, пала фороря, кай фэринпэ, фартэ драго сыкавэл, кай о Иегова жалуий манушэн анда вся оди. И кадэлэстар амэ можем тэ сытювас. Кадэва законо сыкавэл най кати кода, кай важ о Иегова куч лэ манушэстири жизня, но и сытярэл акэ сости. И старейшиноря могут тэ поможын амэнди, и кадяжэ, о законо сыкавэл, кала о мануш каийпэ анда оди. Кадяжэ када ԥэнэн, кай о Иегова простий анда вся оди. Ай ту фэриспэ кай о Иегова? Нинай нисо май фэдэр, чем тэ фэриспэ кай о Иегова! (Пс. 91:1, 2). Андэ авэр статья амэ подаса дума, сар о законо важ и фороря, кай фэринпэ, поможый амэнди тэ сытювас кай о Иегова и тэ жалуисарас анда вся оди и тэ обжаспэ аврэнца драго.
a Псалом 34:22: «О Иегова фэрий и жизня пэстирэ служителёнэнди, и ни пэр кастэ анда кодэла, ко лэстэ фэрийпэ, на ԥэнэна, кай во дошало».
b Числа 35:24, 25: «Тоди и мануша трэбуй тэ розлэнпэ па законоря кодэлэса, ко дядап и кодэлэса, ко рия пала рат. И мануша трэбуй тэ фэрин кодэлэс, ко умардя, лэ манушэстирэ вастэстар, саво рия пала рат. Инке тэ рин лэс андо форо, андэ саво во нашля, кай тэ фэрийпэ. Во трэбуй сас тэ жувэл котэ жы кай и время, пока на мэрэла о само баро рашай, савэс мақлэ вулееса».
c Иисус Навин 20:4: «Во трэбуй тэ нашэл андэ ек анда кадэла фороря, тэ тердёл котэ паша вороты, кай зажан андо форо и тэ росԥэнэн лэ старейшинонэнди кадэлэ форости, со стердяпэ. После када вонэ прилэна лэс андэ пэско форо и дэна лэсти ҭан, кай во тэ жувэл лэндэ».
d Андэ дэсавэ справочникоря па иудаизмо ԥэнэнпэ, кай о родо кацавэ манушэско, авэлас каринг лэстэ андо форо, кай фэринпэ, кай тэ жувэл паша лэстэ.
e Псалом 103:8—12: «О Иегова жалуий анда вся оди и простий, во на грабийпэ тэ холявэл и кадя фартэ любий, кай никала на ашавэл. Во най вся время лэла тэ дошалярэл и на холявэла вечно. Во на обжалпэ амэнца кадя, сар затердям и на рий амэнди кода, со затердям через пэстирэ грехоря. Важ кода, сар о нэбо май упрэ ла ԥувьятар, кацави же бари лэстири любовь, через сави во на ашавэл кодэлэн, ко дарал лэстар. Сар дур ваздэлпэ о қам кодэлэстар, кай бэшэл, кадя ту амэндар дур стодян амарэ грехоря».