Мэк нисо на стерэла кадя, кай о Дэл тэ на дэл тумэнди пэско лашимос

1, 2. а) Саво лашимос лэ Дэвлэстирэ служителя аштярэн, кай лэндэ тэ авэл? б) Со поможый амэнди тэ на бистрас пала лашимос, саво дэла о Дэл? (Диқэн и картинка англа статья.)

И ПОМАЗАННИКОРЯ аштярэн о лашимос, саво важ лэндэ куч, када, кай вонэ лэна тэ жувэн по нэбо. О апостоло Павло ԥэндя, кай када «лашимос, саво камэл тэ дэл о Дэл, тэ жувэн по нэбо» (Флп. 3:14). Кадэла христианоря фартэ аштярэн, кала поджала и время, кала вонэ лэна вместе тэ правин лэ Иисусоса андэ небесно Царство. Вонэ лэна тэ поможын лэ манушэнди, кай вонэ тэ авэн совершенни (Отк. 20:6). Саво райкано лашимос о Дэл дэла англэ! И мануша, савэ жувэна пэ ԥув, кадяжэ фартэ аштярэн лашимос. О Иегова дя алав, кай вонэ лэна тэ жувэн вечно пэ ԥув (2 Пет. 3:13).

² О Павло камля тэ поможый лэ помазанниконэнди, савэ христианоря, кай вонэ тэ на парашэн тэ кандэн лэ Дэвлэс и кай о Дэл тэ дэл лэнди пэско лашимос. О Павло ԥэндя: «Гиндон пала небесно» (Кол. 3:2). Лэнди трэбуй сас тэ сэрэн пала кодэва лашимос, саво лэндэ авэла по нэбо (Кол. 1:4, 5). Кодэва, ко гиндой пала лашимос, саво дэла о Дэл, всаек кай во жувэла, пэ ԥув или по нэбо, поможыя тэ на шол сама пэ авэр варисо (1 Кор. 9:24).

3. Состар о Павло фэрисардя лэ христианонэн?

³ О Павло ԥэндя лэ христианонэнди, кай тэ фэринпэ кодэлэстар, кай вонэ могут тэ хасарэн о лашимос, саво камэл тэ дэл о Дэл. Кадяжэ во ԥэндя, через со када может тэ авэл. Андо письмо, саво о Павло пистросардя лэ колоссянонэнди, во ԥэндя пала найчачунэ христианоря, савэ гиндонас, кай тэ авэн лэ Иеговаско друго трэбуй кати тэ терэн кадя, сар ԥэнэнпэ андэ лэско законо, ай най тэ патян андо Христос (Кол. 2:16—18). Инке о Павло ԥэндя пала найлашимос, саво кадяжэ исин и адес. Во росԥэндя, сар тэ на подэнпэ, кала камэлпэ тэ стерэн билажавардэс, сар тэ ладин лэ ԥралэнца и лэ ԥэянца, савэ андэ собрания и со тэ терэн, кала андо ери исин проблемы. Давайте роздиқаса дэсо анда кода, со о Павло ԥэндя лэ колоссянонэнди, состар трэбуй тэ фэрисавас и подаса дума пала кода, со во подԥэндя.

КАМЭЛПЭ ТЭ ТЕРЭН БИЛАЖАВАРДЭС, «УМАРЭН» КОДА

4. Васо через кода, кай камэлпэ тэ стерэс билажавардэс, о Дэл на дэла пэско лашимос?

⁴ После кода, сар о Павло ԥэндя лэ христианонэнди пала лашимос, саво вонэ аштярэнас, саво фартэ лашо, во пистросардя: «Умарэн андэ тумари тила кода, со камэл тэ терэл билажавардэс, мэлалимос, кода, со камэлпэ, но нащи и тэ на авэн жадни» (Кол. 3:5). Кала лэ манушэсти фартэ камэлпэ тэ терэл билажавардэс, тоди о Дэл на дэла лэсти пэско лашимос. Акэ со ԥэндя ек ԥрал, савэса тердяпэ кацаво и через када во ашадя и собрания, ай тоди рисайля. Во ԥэнэн: «Манди кадя фартэ камэласпэ тэ стерав билажавардэс. Кала мэ обгиндосайлэм, мэ зажылэм уже фартэ дур».

5. Сар о мануш может тэ фэрий пэс, если лэсти прижыляпэ тэ авэл котэ, кай во мог тэ терэл нэправильно?

⁵ Амэ трэбуй фартэ тэ фэрисавас, если амэнди прижыляпэ тэ авас котэ, кай амэ могли тэ терас кода, со андэ лэ Иеговаско законо ԥэнэнпэ, кай нащи. Ԥэнаса, лэ христианиности, саво ля кати встречаться, трэбуй тэ подэл дума пала границы, савэ трэбуй тэ авэн машкар лэндэ, кала чуминдэнпэ, облэнпэ, и со вонэ лэна тэ терэн, кай тэ на ашэнпэ екжэнэ (Прит. 22:3). Кадяжэ лэ муршэсти или ла жувляти трэбуй тэ фэринпэ, кала ладэн пэ бути или кала терэн бути котэ, кай екжэно ашэлпэ лэса или ласа (Прит. 2:10—12, 16). Со трэбуй тэ терэс, кай тэ фэриспэ? Ԥэн, кай ту лэ Иеговаско свидетелё. Андяр пэс драго и сэр, кала кай и манушни цэлэн и яқа андо чикат или кала о мурш вэсэло диқэл, но на камэл тэ женийпэ, када может тэ анэн каринг и бида. Кадяжэ трэбуй тэ фэриспэ, кала умэкэс и вас или ԥарэс по ди кодэлэстар, кай здэлпэ, ту никасти на трэбуй. Андэ кадэя время камэлпэ, кай тэ авэл кодэва мануш, саво тут любия и савэсти ту авэса куч. Андэ кадэва ԥаро моменто мануш может тэ прилэл любонэ манушэстар кода, кай во шол сама. Если тутэ авэла кацаво по ди, мангпэ каринг о Иегова и манг кай лэско народо, кай тэ поможый тути. Када поможыя тути нисо тэ на стерэс кадя, кай о Дэл тэ на дэл тути пэско лашимос. (Адиносар Псалом 34:18a; Притчи 13:20b).

6. Пала со трэбуй тэ сэрас, кала витидас развлечения?

⁶ Кай «тэ умарэн» андэр пэстэ кода, со камэл тэ терэл билажавардэс, трэбуй тэ фэринпэ лэ найлашэ развлечений. Кода, сар адес бут мануша проандярэн время, шолпэ пэ кода, со сас андо форо Содомо и Гоморра (Иуды 7). И мануша, савэ вимэкэн и книжки, киноря, передачи, сыкавэн о найлашимос, сар кабута катэ нинай нисо и ашэн мулком пала кода, сави бида может тэ анэн кода, кала о мануш пэс кадя андярэл. Амэнди трэбуй тэ витидас, со тэ диқас, со тэ ашунас и со тэ адиносарас. Если кадя на тераса, тоди амэ стераса кодэва билажавардимос. Важ када трэбуй тэ витидас развлечения, через савэ о Иегова может тэ на дэл пэско лашимос (Прит. 4:23).

«УТИДЭНПЭ» АНДЭ ЛЮБОВЬ И АНДО ЛАШИМОС, САВО ТЕРЭН АВРЭНДИ

7. Савэ проблемы могут тэ авэн машкар ԥрала и ԥэя андэ собрания?

⁷ И христианско собрания, када бари благословение. Пэ амарэ собрании амэ сытювас па лэ Дэвлэско Алав и ек еқэс подритярас. Када поможый амэнди вся время тэ сэрас пала лашимос, саво во дэла. Но дэкала и ԥрала и ԥэя могут тэ на ладин машкар пэстэ. Если када тэ на улэн, тоди андэ лэнго ди может тэ авэл холи. (Адиносар 1 Петра 3:8, 9c).

8, 9. а) Кода, сар амэ пэс андярас, поможыя амэндэ тэ авэл о лашимос, саво дэла о Дэл? б) Если тут холярдэ, со тути трэбуй тэ терэс, кай тэ авэл мирно?

⁸ Сар тэ на домэкэс, кай через и тири холи о Дэл тэ на дэл тути пэско лашимос? О Павло ԥэндя лэ колоссянонэнди, со трэбуй тэ терэн: «Важ кода кай тумэн витидя о Дэл и тумэ святи и любими, утидэнпэ андэ бари любовь и андо лашимос, саво терэн аврэнди, полэн и жалуин, терэн лашимос, на гиндон пала пэстэ бут, андярэн пэс ковлэс, но авэн састэ андэ вера и ӷанэн тэ аштярэн. Если варикастэ исин васо тэ холявэн, на холявэн, ай анда вся оди простин ек аврэс. Сар о Иегова анда вся оди простисардя тумэн, кадя простин и тумэ. Ай инке, утидэнпэ андэ любовь, важ кода кай вой май главно и стидэл всаворэн» (Кол. 3:12—14).

⁹ И бари любовь и кода, кай о терэс аврэнди лашимос, поможыя тути тэ простис ек еқэс. Со тэ терэс, если о ԥрал или ԥэй холярдэ тут? Вспомни, кала ту лэ ԥралэс или ла ԥэя андэ собрания холярдян алавэса или кодэлэса, сар пэс андярдян, ай кадэва мануш простисардя тут. Хэба тути на сас драго, кала кадэва мануш сыкадя пэ дила, кай любий и терэл лашимос? (Адиносар Экклезиаст 7:21, 22d). Амэ благодарни лэ Иисусости важ о лашимос, саво во сыкадя пэ дила, кала стидя лэ Дэвлэстирэ служителёнэн андэ ек собрания (Кол. 3:15). Амэ всаворэ любисарас еқэ Дэвлэс, всаворэ росԥэнас ек дума важ о Дэл и амэндэ ек ԥаримос через амари вера. Если амэ ласа тэ любисарас, тэ простисарас ек еқэс, тоди амэ аваса, сар ек баро ери и можем тэ аштярас о лашимос, саво дэла о Дэл.

10, 11. а) Васо трэбуй тэ фэрисавас, кай андо ди тэ на авэл холи, кай варикастэ исин кода, со нинай амэндэ? б) Сар тэ на домэкас, кай через кадэя холи о Дэл тэ на дэл пэско лашимос?

¹⁰ Кадяжэ о Дэл на дэла пэско лашимос амэнди, если амэ холявас пэ варикастэ, важ кода кай амэндэ нинай кода, со исин аврэндэ. Андэ Библия росԥэнэнпэ пала мануша, савэндэ андо ди сас кацаво и каринг сави бида када андя. Лэ Каиности на чалеля, кай лэстэ на сас кода, со сас кай лэско ԥрал и во лэс важ када умардя. Кадяжэ кацаво сас андо ди кай о Кореё, о Дафано и о Авироно и важ када вонэ вазглэпэ против о Моисеё. О царё Сауло камэлас тэ умарэл лэ Давидос, важ кода кай во холяйля пэр лэстэ, кай лэстэ на сас кода, со сас кай о Давидо. Кода, со ԥэнэн лэ Дэвлэско Алав, када чаче: «Котэ, кай и мануша холявэн, кай лэндэ нинай, со исин аврэндэ и кай вонэ камэн тэ терэн кати кода, со лэнди камэлпэ, нинай порядко и котэ бут найлашимос» (Иак. 3:16, Нэво русско переводо).

¹¹ Если амэ любисарас и амэндэ лашо ди, тоди амэ на мэкаса, кай андэр лэстэ тэ авэл холи пэ авэр, кай лэндэ исин кода, со амэндэ нинай. Андэ лэ Дэвлэско Алава ԥэнэнпэ: «Кала о мануш любий, во ӷанэн тэ аштярэл и на холявэл, терэл лашимос, во на холявэл пэ кода, кай лэстэ нинай кода, со исин аврэндэ» (1 Кор. 13:4, Нэво русско переводо). Кай о мануш тэ на домэкэл пэсти холи андо ди, важ кода кай лэстэ нинай кода, со исин аврэндэ, лэсти трэбуй пэ вся тэ диқэл кадя, сар о Иегова и тэ андярэл пэс лэ ԥралэнца и лэ ԥэянца кадя, сар кабута вонэ ек тила, сави и исин христианско собрания. Када поможыя амэнди тэ радосавас пала авэр, важ кода кай андэ Библия ԥэнэнпэ: «Если еқэсти кода, со пэ тила, драго, тоди драго и всаворэсти, со пэ тила» (1 Кор. 12:16—18, 26). Давайте на ласа тэ холявас пэ ԥрала и пэ ԥэя, важ кода кай лэндэ исин кода, со амэндэ нинай, ай тэ радосавас важ лэндэ, кала лэндэ варисо вижал. Драго када сыкадя лэ Саулоско шаво о Ионафано. Во на ля тэ холявэл, кала о Дэл витидя лэ Давидос царёса, ай най лэс. О Ионафано андэ вся подритярэлас лэ Давидос (1 Сам. 23:16—18). Ай ту можешь тэ сыкавэс пэ дила, кай любис и терэс лашимос кадя, сар о Ионафано?

МЭК О ДЭЛ ДЭЛА ПЭСКО ЛАШИМОС ВСАВОРЭ́ ТИРЭ ЕРЕСТИ

12. Сар кода, со пистромэ андэ Библия поможыя тумарэ ерести, кай о Дэл тэ дэл тумэнди пэско лашимос?

¹² Если кажно андо ери терэл кадя, сар ԥэнэнпэ андэ Библия, тоди о ери авэла бахтало, лэндэ авэла мирно и о Дэл дэла всаворэ ерести пэско лашимос. О Павло драго подԥэндя лэ еренди: «Жувля трэбуй тэ кандэн пэстирэ хулан, сар трэбуй важ о Господо. Хулая на парашэн тэ любин пэстирэ хулаян и на авэн лэнца груби. Бэятцэ, кандэн пэстирэ родителёнэн андэ вся, важ кода кай када чалёл лэ Дэвлэсти. Дада, на холярэн пэстирэ бэятонэн» (Кол. 3:18—21). Сар кадэла алава могут тэ поможын тумарэ ерести?

13. Сар и хулаи, савятэ о хулай на служий лэ Иеговасти, может тэ терэл кадя, кай лако хулай би алавэнго тэ лэл тэ служий лэ Иеговасти?

¹³ Со трэбуй тэ терэл и хулаи, савятэ о хулай на служий лэ Иеговасти и лати здэлпэ, кай во на андярэл пэс ласа кадя, сар трэбуй? Если вой лэла пэр лэстэ тэ холявэл и тэ спорийпэ лэса, кадэлэстар ашэла май фэдэр? Даже если латэ вижала тэ стерэл кода, сар вой камэл, хэба после када во закамэла тэ служий лэ Иеговасти? Най. Если вой стола патив пэр лэстэ, кай во хулай андо ери, тоди андо ери авэла вся драго. Кода, сар вой пэс андярэл, лэла прославлять лэ Иеговас и, ко ӷанэн, может лако хулай би алавэнго патяла андо Иегова. И тоди о Дэл дэла пэско лашимос, кай вонэ тэ служин лэсти. (Адиносар 1 Петра 3:1, 2e).

14. Со трэбуй тэ терэл о хулай, савэстэ и хулаи на служий лэ Иеговасти и лэсти здэлпэ, кай вой на стол пэр лэстэ патив, сави трэбуй?

¹⁴ Ай со трэбуй тэ терэл о хулай, савэстэ и хулаи на служий лэ Иеговасти и лэсти здэлпэ, кай вой на стол пэр лэстэ кодэя патив, сави трэбуй? Лэла лэстири хулаи тэ полэл лэс май драго, если во лэла тэ цыпий пэр латэ и кадэлэса тэ сыкавэл, ко андо цэр хулай? Най. О Дэл камэл, кай о хулай тэ сытёл лэ Иисусостар и тэ любий пэстиря хулая (Эф. 5:23). Кала о Иисусо диқэл пала собрания, во любий и на грабийпэ тэ холявэл (Луки 9:46—48). Если о хулай терэла, сар о Иисусо, тоди лэстэ вижала тэ терэл кадя, кай вой лэла тэ патял андо Иегова и тоди вонэ лэна лэдуй тэ служин лэ чачунэ Дэвлэсти.

15. Сар о хулай, саво служий лэ Иеговасти, может тэ сыкавэл, кай любий пэстиря хулая?

¹⁵ Андэ лэ Дэвлэско Алав ԥэнэнпэ, со трэбуй тэ терэн и хулая: «Хулая на парашэн тэ любин пэстирэ хулаян и на авэн лэнца груби» (Кол. 3:19). О хулай, саво любий пэстиря хулая, виашунэн ла и сыкавэл, кай кода, со вой ԥэнэн важ лэстэ куч (1 Пет. 3:7). О хулай най вся время терэл кода, со мангэл лэстири хулаи, но дэкала во приашундёлпэ каринг кода, со вой ԥэнэн. Када поможый лэсти тэ витидэл, со май драго тэ терэл (Прит. 15:22). О хулай, саво любий пэстиря хулая, на лэла тэ мангэл, кай вой тэ стол пэр лэстэ патив, ай лэла тэ терэл кадя, кай вой екжэни када тэ закамэл. Кала о хулай любий ла хулая и пэстирэ бэятонэн, через када о ери может тэ закамэл тэ служий лэ Иеговасти и тэ аштярэл, кай о Дэл тэ дэл лэнди пэско лашимос, кай вонэ тэ жувэн вечно пэ ԥув.

ШАВЭ И ЩЕЯ, ТЕРЭН ВСЯ, КАЙ О ДЭЛ ТЭ ДЭЛ ТУМЭНДИ ПЭСКО ЛАШИМОС

16, 17. Со поможыя лэ тэрнэ шавэнди и щеянди тэ на холявэн пэ пэстирэ родителя?

¹⁶ Ай со можно тэ ԥэнэс важ и шавэ и щея? Андэ тэрнэ бэрша может тэ здэлпэ, кай и родителя христианоря, лэн на полэн и фартэ каринг лэндэ строги. И через када вонэ могут тэ загиндонпэ, трэбуй лэнди тэ служин лэ Иеговасти чи най. Но если и шавэ и щея закамэна тэ ашавэн лэ Иеговас, тоди вонэ йто полэна, кай нико на любий лэн кадя, сар лэндирэ родителя и ԥрала и ԥэя анда собрания.

¹⁷ Ай со если тумарэ родителя никала на сытярэн тумэн? Тоди тумэ линоп тэ гиндон, кай и родителя на шон пэр тумэндэ сама (Евр. 12:8). Но дэкала тумэнди на чалёл, сар и родителя тумэн сытярэн. На холявэн, ай полэн, васо вонэ тумэн сытярэн. На цыпин и на холявэн, кала вонэ тумэнди варисо ԥэнэн. Андэ Библия ԥэнэнпэ: «Ко зритярдёл андэ алава, кодэва бут полэл, и кодэва ко дур диқэл, йто на холявэл» (Прит. 17:27). Тер кадя, кай тэ авэс, сар кодэва, ко бут полэл, драго виашунэл и прилэл, со ԥэндэ, ай кадяжэ на на шол сама пэ кода, сар када ԥэндэ (Прит. 1:8). Када фартэ драго, кала и родителя любин лэ Иеговас! Вонэ фартэ камэн, кай о Иегова тэ дэл тумэнди пэско лашимос.

18. Васо трэбуй ритярас андо шэро о лашимос, саво дэла о Дэл?

¹⁸ И мануша, савэ лэна тэ жувэн по нэбо и кодэла, ко лэна тэ жувэн пэ ԥув, фартэ аштярэн о лашимос, саво авэла англэ. Када най кода, пала со о мануш кати может тэ гиндой, ай када лашимос, пала саво о Создателё дя алав. Андэ Библия ԥэнэнпэ: «Пала Иегова лэна тэ ӷанэн па вся ԥув» (Ис. 11:9). О Иегова лэла екжэно тэ сытярэл лэ манушэн, савэ жувэна пэ кадэя ԥув. Када ашэл, кай бут со тэ терэс. Важ када вся время сэрэн, саво о Иегова дя алав и мэк нисо тэ на стерэл кадя, кай о Дэл тэ на дэл тумэнди пэско лашимос!