Допрастэн о дром до конца

1. Со трэбуй тэ терэл кажно андар мэндэ?

ЕСЛИ тумэ насвалэ чи гиндон кай о зор кончийпэ, камлоп тумэ тэ прастэн па дром, саво найвушэро? Файма, най. Но о апостоло Павло ԥэндя, кай всаворэ христианоря прастэн па дром, па саво трэбуй тэ допрастэн до конца (Евреям 12:1). И всаворэ амэ тэрнэ чи ԥурэ, бут амэндэ зор чи набут, трэбуй тэ допрастас кадэва дром, если камас тэ диқас о лашимос лэ Иеговастар (Матфея 24:13).

2. Васо, сар запистромэ андэ 2 Тимофею 4:7, 8, о Павло моӷ смило тэ дэл дума, кай трэбуй тэ допрастэн о дром?

² О Павло смило моӷ тэ ԥэнэн лэ христианонэнди, кай трэбуй тэ нашэн па кадэва дром важ и жызня, важ кода кай екжэно «допрастая о дром до конца». (Адиносар 2 Тимофею 4:7, 8b.)

ПА САВО ДРОМ АМЭ ПРАСТАС?

3. Пала саво дром дэлас дума о Павло?

³ О Павло дэлас дума пала дэсавэ иӷры, савэ проандярэнас андэ Древнё Греция, кай кадэлэса тэ сытярэл амэн (1 Коринфянам 9:25—27; 2 Тимофею 2:5). Най еқвар во сыстояс и жызня лэ христианиности кодэлэса, кала прастэн па дром, па саво старыинпэ тэ донашэн со май пэрви (1 Коринфянам 9:24; Галатам 2:2; Филиппийцам 2:16). О мануш лэл тэ нашэл, кала болдёл, ай донашэла, кала о Дэл дэла лэсти вечно жызня (Матфея 25:31—34, 46; 2 Тимофею 4:8; 1 Петра 3:21).

4. Пала со подаса дума андэ кадэя статья?

⁴ Соса шолпэ, кала нашэс па лунго дром и и христианско жызня? Бут соса. Но амэ подаса дума пала трин маменторя. Пэрво, амэнди трэбуй тэ витидас правильно дром. Дуйто, амэнди нащи тэ бистрас пала лашимос, саво аштярэл амэн, кала допрастаса о дром. И трито, амэнди трэбуй тэ на парашас тэ нашас, дажэ кала исин ԥаримос па кадэва дром.

ВИТИДЭН ПРАВИЛЬНО ДРОМ

5. Савэ дромэса трэбуй тэ прастас и васо?

⁵ Кай тэ лэн и наӷрада, и спорцменоря трэбуй тэ прастэн па кодэва дром, па саво лэнди ԥэндэ тэ прастэн кодэла, ко диқэн пала кадэя дила. Кадя и амэ, сар камас, кай тэ дэн амэнди о лашимос, када и вечно жызня, амэнди трэбуй тэ прастас па христианско дром (Деяния 20:24; 1 Петра 2:21). Но о Сатана и кодэла, ко лэстар сытён, камэн кай амэ тэ терас па аврятэ. Вонэ камэн, кай амэ тэ прастас еқэҭанэ лэнца (1 Петра 4:4). Вонэ асанпэ кодэлэстар, сар амэ жувас, и ԥэнэн, кай о дром, саво вонэ витидэ, май лашо и андярэл каринг и свобода. Када баро хохаимос! (2 Петра 2:19).

6. Сости амэ сытювас кай о Брайано?

⁶ Любо мануш, саво прастэл кодэлэнца, пэр кастэ тасавэл и люма, савяса правий о Сатана, йто полэла, кай о дром, саво во витидя, андярэл най каринг и свобода, ай каринг о рабство (Римлянам 6:16). Акэ, со росԥэнэн о Брайано. Лэско дад и дэй камэнас, кай во тэ витидэл христианско дром. Но андэ тэрнэ бэрша лэсти на патяласпэ, кай пэ кадэва дром во авэла бахтало. Во закамля тэ прастэл кодэлэнца, ко жувэл па лэ Сатанастирэ законоря. О Брайано ԥэнэн: «Тоди мэ на полавас, кай кодэя свобода, сави кадя хвалинас и сави мэ кадя камавас, стерэла ман рабоса. Мэ ашэлэм наркомано, матювавас и андяравас пэс билажавардэс. Послидни бэрша мэ лэм тэ хав май сильни драба и нэ моӷ би лэнго. Пэ вся када трэбуй сас барэ ловэ и мэ лэм тэ битинав и наркотикоря». Но всаек о Брайано закамля тэ жувэл па лэ Иеговаско законо. Во витидя лэ Дэвлэско дром и андэ 2001 бэрш болделя. Акана во фартэ лошало, кай витидя кадэва дромc.

7. Савэ дуй дрома исин англа мэндэ, сар запистромэ андэ Матфея 7:13, 14?

⁷ Сар дэ важно тэ витидас правильно дром! О Сатана камэл, кай амэ тэ парашас тэ прастас па тисно дром, саво «андярэл каринг и жызня» и тэ пэрэжас по буӷло дром, саво витидэн май бут мануша андэ люма. Кадэва дром май вушэро, но во андярэл каринг и смерть. (Адиносар Матфея 7:13, 14d.) Кай тэ на змардювас па лашо дром, амэнди трэбуй тэ патяс лэ Иеговасти и тэ кандас лэс.

НА БИСТРЭН ПАЛА ЛАШИМОС, САВО ТУМЭНДИ ДЭНА

8. Со терэл кодэва, ко нашэл, кала пэрэл па дром?

⁸ Кодэла, ко прастэн лунго дром, диқэн англа пэстэ, кай тэ на спотыкнинпэ. Но лэн моӷут тэ толкыин кодэла, ко нашэл па кадэва жэ дром, чи вонэ моӷут екжэнэ тэ ԥэрэн па дром, важ кода кай уштадэ андэ яма. Дажэ если вонэ пэлинэ, вонэ ущен, кай тэ допрастэн о дром. Вонэ гиндон най пала кода, васо пэлинэ, ай пала кода, сар тэ допрастэн о дром и кай тэ лэн и наӷрада.

9. Со амэнди трэбуй тэ терас, если амэ пэлям па дром?

⁹ Па амаро дром, саво амэ нашас, амэ можэм тэ пэрас бут разоря, тэ шылисавас андэ алава и андэ дила. Чи кодэва, ко нашэл амэнца, еқэҭанэ моӷут тэ шылинпэ и тэ стерэн амэнди дуқанэс. Амэ на удивисавас кадэлэсти. Амэ всаворэ найсовершэни, и всаворэ прастас па ек «тисно дром», саво андярэл каринг и жызня. Важ када всаек дэкала амэ ласа ек еқэс тэ толкысарас. Амэ на трэбуй тэ дас наздив, если кацаво авэла. О Павло прижанэлас, кай дэкала амэндэ авэла, васо тэ холявас ек пэ еқэстэ (Колоссянам 3:13). Чем тэ шас сама пэ кода, со амэн змардя, фэдэр тэ погиндосарас пала лашимос, саво амэн аштярэл. Если амэ через варикастэ пэлям, ущям и на парашам тэ прастас. Если амэ холяваса и отԥэндюваса тэ служысарас лэ Иеговасти, амэ на допрастаса о дром и на ласа и наӷрада. Ай инке, если кадя тераса, амэ можэм тэ змарас аврэн ԥралэн и ԥэян, савэ старыинпэ тэ нашэн па «тисно дром», саво андярэл каринг и жызня.

10. Со поможыя амэнди тэ на терас кадя, кай через амэндэ тэ пэрэн кодэла, ко нашэл амэнца па правильно дром?

¹⁰ Со инке поможыя амэнди тэ на терас кадя, кай через амэндэ тэ пэрэн кодэла, ко нашэл амэнца па правильно дром? На трэбуй вся и время тэ тердювас пэ пэско, ай дэкала, кала када можно, мэк авэр терэн па пэстирятэ (Римлянам 14:13, 19—21; 1 Коринфянам 8:9, 13). Кадэлэса амэ фартэ на шаспэ пэ спорцменоря, савэ нашэн пала пэстири наӷрада. Вонэ камэн тэ авэн май лашэ аврэндар и камэн, со бы тэ на авэл, тэ победин. Важ када вонэ моӷут тэ толкыин аврэн, кай тэ допрастэн пэрви. Амэ на терас, сар вонэ и на терас, кай машкар амэндэ тэ авэл холи, важ кода кай варико май лашо амэндар (Галатам 5:26; 6:4). Амэ камас тэ поможысарас май бутэ манушэнди, кай и вонэ тэ допрастэн о дром и тэ получин и наӷрада, када и вечно жызня. Важ када амэ старысавас тэ терас кода, со ԥэндя лэ Дэвлэстар о апостоло Павло. Во ԥэндя, кай амэ тэ терас «драго най кати важ пэстэ, ай и важ авэр» (Филиппийцам 2:4).

11. Со трэбуй тэ ритярэн андо шэро кодэла, ко камэн тэ допрастэн о дром и васо?

¹¹ Кодэла, ко нашэн, най кати диқэн англа пэстэ па дром, но и инке ритярэн андо шэро кодэва маменто, сар вонэ допрастае. Дажэ если вонэ на диқэн о концо кадэлэ дромэско, вонэ моӷут тэ ритярэн андо шэро кадэва маменто, кала допрастэна и лэнди дэна и наӷрада, сави вонэ долӷо аштярэнас. Кадэва гиндо дэл лэнди зор тэ на парашэн тэ прастэн.

12. Пала со дэл алав о Иегова?

¹² О Иегова дэл алав, кай лэстирэ служытеля, савэ допрастэна о дром, лэна и наӷрада, када вечно жызня по нэбо чи андо раё пэ ԥув. Пала кадэя наӷрада, сави амэн аштярэл, пистромэ андэ Библия. Важ када амэ можэм тэ полас, сави дэ райкани тоди авэла и жызня. Если амэ на парашас тэ гиндосарас пала лашимос, саво о Иегова дэла амэнди англэ, тоди амэ на домэкаса, кай варисо тэ змарэл амэн и амэ тэ на допрастас о дром.

НА ПАРАШЭН ТЭ ПРАСТЭН, КАЛА ԤАРИМОС

13. Со амэндэ исин, ай кай и спорцменоря нинай?

¹³ Андэ дэлмутни время андэ Греция кодэлэнди, ко нашэнас пэ спортивни иӷры, трэбуй сас тэ пэрэандярэн разно ԥаримос. Вонэ цыёнас и можэт лэндэ варисо дуқалас. Но вся пэр со вонэ надеинаспэ, када сас лащи подӷотовка и лэнго зор. Амэ шаспэ лэнца кодэлэса, кай амэн кадяжэ сытярэн, сар тэ допрастас амаро дром. Но амэндэ исин кода, со лэндэ нинай. Када, кай амэ ӷанас кодэлэс, кастэ исин зор, саво никала на кончияпэ. О Иегова дэл алав амэнди, кай если амэ патяс лэсти, во най кати сытярэла амэн, но и стерэла кадя, кай амэ тэ авас састэ! (1 Петра 5:10).

14. Сар лэ Павлостирэ алава анда 2 Коринфянам 12:9, 10, поможына амэнди андо ԥаримос?

¹⁴ Кай о Павло сас бут ԥаримос. Пэр лэстэ ԥэнэнас найлашэ алава и ӷонинас. Инке дэкала во сас би зорэско, и лэсти прижаласпэ тэ пэрэандярэл о ԥаримос, пэ саво во ԥэндя, кай када сар колючка андэ лэстири тила (2 Коринфянам 12:7). Но через када во на умэкля и вас. Но во кадя диқэлас пэ пэско ԥаримос, кай через лэстэ во можэт тэ патял лэ Иеговасти. (Адиносар 2 Коринфянам 12:9, 10e.) Важ када о Иегова поможыяс лэсти андэ вся лэско ԥаримос.

15. Со амэндэ авэла по ди, если ласа тэ сытювас кай о Павло?

¹⁵ Пар мэндэ кадяжэ моӷут тэ ԥэнэн найлашэ алава и тэ ӷонин пала амари вера. Инке амэндэ можэт тэ авэл найдраго лэ зорэса чи амэндэ нинай зор. Но кала амэ сытювас кай о Павло, тоди андэ любо ԥаримос, амэ диқаса, сар о Иегова амэн любий и подритярэл.

16. Со тумэ можэте тэ терэн дажэ, кала тумэндэ вэрыто зор?

¹⁶ Ай со, если тумэ нащи ущен ҭанэстар чи бэшэн андо инвалидно кресло? Со если тумэнди ԥарэс тэ ԥирэн чи вэрыто диқэн лэ яқэнца? Вижала тумэндэ еқэҭанэ тэ нашэн лэ ԥралэнца и лэ ԥэянца, савэ тэрнэ и зоралэ? Вижала! Па дром, саво андярэл каринг и вечно жызня, прастэн бут христианоря, савэ ԥурэ и савэндэ нинай зор. Вонэ на гиндон, кай пэстирэ зорэса допрастэна. Вонэ патян, кай о Иегова дэла лэнди зор, кала проашунэн, со жал пэ собрании па телефоно чи диқэн па видеосвязь. Кадяжэ вонэ терэн и дила, сави поможый лэ манушэнди тэ ашэн лэ Иисусостирэ учениконэнца, кала росԥэнэн лэ врачонэнди, ко лэнца терэл бути и лэ родости.

17. Сар о Иегова полэл кодэлэн, кастэ нинай зор?

¹⁷ Если тумэндэ слабо зор, тоди тумэ можэте тэ гиндон, кай тумэндэ нинай зор, кай тэ допрастэн о дром, саво андярэл каринг и вечно жызня. Никала на домэкэн, кай тумэндэ тэ авэн кацавэ гиндоря. О Иегова любий тумэн, важ кода кай тумэ патян лэсти и бут бэрша на парашэн лэсти тэ служын. Акана тумэнди, сар никала трэбуй, кай во тумэнди тэ поможый. И о Иегова никала на ашавэла тумэн (Псалом 9:10). Во авэла инке май пашэ каринг тумэндэ. Акэ со росԥэнэн ек ԥэй, савятэ ԥарэс лэ зорэса: «Мэрно зор ашэл май вэрыто. Важ када мэ лэм май набут тэ росԥэнав аврэнди важ о Дэл. Хоть мэ и терав набут, но мэ ӷанав, кай лэ Иеговаско ди радуийпэ. Ай через када лошавав и мэ». Кала тумэнди ԥарэс по ди, на бистрэн, кай тумэ най екжэнэ, тумэнца о Иегова. Погиндон пала лэ Павлоско примеро и пала лэстирэ алава, савэ дэн зор: «Важ када мэ лошавав, кала исин слабости,... Важ кода кай, кала мандэ на хутилэл зор, тоди мэ зорало» (2 Коринфянам 12:10).

18. Саво ԥаримос исин кай дэсавэ христианоря?

¹⁸ Дэсавэ христианоря, савэ нашэн па дром, саво андярэл каринг и вечно жызня, пэрэандярэн авэр ԥаримос. Лэндэ кацаво ԥаримос, пала саво авэр дажэ на ӷанэн. Када можэт тэ авэл депрессия чи гиндоря, савэ даравэн и одлэн о зор. Васо кодэлэ ԥралэнди и ԥэянди, савэ амэнди куч, май ԥарэс? Важ кода кай, кала варико ԥагля о вас чи бэшэл андо инвалидно кресло, када дицол всаворэнди и всаворэ старыинпэ тэ поможын. Ай па кодэла, кастэ депрессия чи насвалэ нервы чи исин гиндоря, савэ даравэн и одлэн о зор, на дицол, кай лэнди ԥарэс. Но и дук, сави вонэ пэрэандярэн, кацави жэ, сар кодэлэндэ, ко ԥагэл о вас чи пэрно. Но о миро можэт и тэ на ӷанэн, сар лэнди дэ ԥарэс. Важ када лэн най кадя жалуин.

19. Сости амэ сытювас кай о Мемфивосфеё?

¹⁹ Если тумэ гиндон, кай авэр на полэн тумэн, тоди тумэнди можэт тэ дэл зор кода, со сас лэ Мемфивосфеёса. Кадяжэ, кода, со сас лэса, подритярэла, если тумэндэ ԥаримос, саво на мэкэл тумэн тэ терэн андэ служэния лэ Иеговасти, скати тумэ камлоп тэ терэн (2 Самуила 4:4). Па Мемфивосфеё дицолас, кай лэстэ сас найдраго лэ зорэса. Инке о царё Давидо на поля лэс и андярдя пэс лэса кадя, сар во на затердя. Вся када сас лэса най па лэсти дош. Но всаек во на холяйля и цэнияс о лашимос, саво лэстэ сас андэ лэсти жызня. Во сас блаӷодарно важ о лашимос, саво о Давидо стердя лэсти дэлмут (2 Самуила 9:6—10). Важ када, кала о Давидо андярдя пэс лэса нэсправедливо, о Мемфивосфеё на гиндояс ек пала када, ай камля тэ полэл всаворэ ригэндар, васо кадя сас. Во на холяйля, кай о Давидо шылисайля и нисо лэсти на ԥэндя. И во на ля тэ дошалярэл лэ Иеговас важ кода, со стердя о Давидо. Во гиндояс кати пала кода, сар тэ подритярэл лэ царёс, савэс стодя о Иегова (2 Самуила 16:1—4; 19:24—30). О Иегова стердя кадя, кай пала о Мемфивосфеё тэ авэл запистромэ андэ лэ Дэвлэско Алав, Библия. Амэ можэм тэ сытювас кай кадэва служытелё, саво на парашэлас тэ кандэл лэ Дэвлэс (Римлянам 15:4).

20. Сар дэко андярэл пэс, кала андо ди пэрэжывании и дар и сости во можэт тэ патял?

²⁰ Исин ԥрала и ԥэя, савэ дажэ тоди, кала найбари дила, всаек фартэ пэрэжывают и лэндэ исин дар. Кадяжэ вонэ моӷут черезчур тэ лажан аврэндар. Лэнди можэт тэ авэл ԥарэс, кала паша лэндэ бут миро, но вонэ всаек на промэкэн тэ ԥирэн пэ собрании и канӷрэсоря. Тэ задэн дума лэ манушэса, савэс вонэ на ӷанэн, лэнди фартэ ԥарэс, но вонэ всаек ԥирэн и росԥэнэн лэ мирости важ о Дэл. Если тумэндэ исин кацаво, тоди сэрэн, тумэ най екжэнэ. Кацаво терэлпэ бутэнца. Патян, кай о Иегова цэний кода, кай тумэ анда вся оди стон зор. Кода, кай тумэ на умэкэн и вас сыкавэл, кай о Иегова тумэн блаӷословий и дэл тумэнди зор, саво трэбуй (Филиппийцам 4:6, 7; 1 Петра 5:7)f. Хоть тумэндэ нинай зор и по ди пэрэжывания, но тумэ на парашэн тэ служын лэ Иеговасти, кадэлэса тумэ радуин лэ Иеговас.

21. Со амэндэ вижала тэ стерас лэ Иеговастирэ зорэса?

²¹ Сар дэ драго, кай на шолпэ кода, сар нашэнас и спорцменоря, и кода, пала со пистросардя о Павло. Андэ дэлмутни время и наӷрада дэнас кати еқэсти манушэсти, саво допрастэла пэрво. Ай по христианско дром па аврятэ. И наӷрада, када и вечно жызня, авэла кажнонэстэ, ко допрастэла (Иоанна 3:16). Всаворэ спорцменоря, савэ прастэнас, трэбуй сас тэ авэн зоралэ, кай тэ победин. Ай бутэндэ андар мэндэ, най фартэ лашо зор, и всаек амэ на парашас тэ прастас (2 Коринфянам 4:16). Лэ Иеговастирэ зорэса амэндэ вижала тэ допрастас о дром до конца!