Тэ радосавас. Када, со дэл лэ манушэнди о Дэл

ВСАВОРЭ мануша камэн, кай лэндэ андэ жизня тэ авэл радость. Но амэ жувас андэ послидни деса, пэ савэ андэ Библия ԥэнэнпэ: «фартэ ԥари время» (2 Тим. 3:1). О мануш лэл тэ полэл, кай лэстэ по набут парашэл тэ авэл и радость, кала лэса обжанпэ найдраго, ԥаримос лэ зорэса и нинай бути. Кадяжэ, кала муля варико анда чаче, фартэ загиндойпэ пала варисо или кала дарал варисостар. Дэкала даже лэ Дэвлэстирэ мануша хасарэн и радость и умэкэн и вас. Сар тумэндэ парашэля тэ авэл и радость, со трэбуй тэ терэн, кай упалэ вой тэ авэл тумэндэ?

Спэрва уӷанаса, со када чачуни радость. Кадяжэ сытюваса кодэлэндар, ко ашэляпэ радостно, хоть и сас ԥарэс. Тоди амэ подаса дума, со амэнди дэла зор, кай тэ ашэлпэ и радость. Ай инке подаса дума, со тэ терас, кай вой инке май бари тэ авэл.

СО КАДА ЧАЧУНИ РАДОСТЬ?

Чачуни радость, када май бут, чем кала лэ манушэстэ драго по ди. Диқаса акэ со. Кала о мануш бут пиля, лэстэ вэсэло по ди. Но, кала лэстар оджыля о пимос, лэсти най жы каринг кода, кай тэ асал. Во полэл, кай о ԥаримос на ашэля май набут. Кадэя радость лэстэ сас найбут время и вой на шолпэ пэ чачуни радость (Прит. 14:13).

И радость жал анда оди. Када авэла, кала «дэс варисо лашо и аштярэс лашимос». О мануш, савэстэ исин радость, во радостно андэ вся время, андэ ԥари время и андэ найԥари (1 Фес. 1:6). Дэкала во пала варисо фартэ загиндойпэ. Но лэстэ всаек на парашэл тэ авэл и радость андо ди. Еқвар лэ апостолонэн мардэ, важ кода кай вонэ росԥэнэнас важ о Иисусо. Но вонэ «ужылэтар анда Синедрионо радостни, кай лэн лажавардэ важ лэско алав» (Деян. 5:41). И апостолоря сас радостни най кодэлэстар, кай лэн мардэ, ай кай на парашэлэ тэ кандэн лэ Дэвлэс.

Кала о мануш арақадёлпэ, лэстэ инке нинай кацави радость андо ди и вой на лэлпэ корко пэстар. Васо? О мануш ашэл радостно, важ кода кай о Дэл терэл кадя пэстирэ духоса. Через лэ Дэвлэско духо о мануш «ашэл нэвэ манушэса». И, кала о мануш ашэл нэвэ манушэса, тоди лэстэ ашэл радость (Эф. 4:24; Гал. 5:22). Кала амэндэ андо ди чачуни радость, амэнди авэла май вушэро тэ пэрэандярас о ԥаримос андэ жизня.

ИСИН КАСТАР ТЭ СЫТЮВАС

О Иегова камэл, кай всаворэ мануша пэ ԥув тэ авэн бахталэ. Но адес пэ ԥув исин бут найлашимос. Стердя када, кай лэ Дэвлэстэ тэ на авэл радость? Най. Андэ Библия ԥэнэнпэ: «Котэ, кай во жувэл, исин радость и зор» (1 Лет. 16:27). Кадяжэ кай о Иегова радость по ди кодэлэстар, кай лэстирэ мануша терэн лашимос (Прит. 27:11).

Исин кастар тэ сытювас, када лэ Иеговастар. На трэбуй фартэ тэ загиндосаваспэ, кала варисо жал най кадя, сар амэ камлям. Фэдэр тэ шас сама, саво лашимос амэндэ исин и тэ аштярас, кай тэ авэл май драгоa.

Андэ Библия бут запистромэ пала лэ Дэвлэстирэ мануша, савэндар тэ сытювас. Вонэ на парашэнас тэ авэн радостни андэ ԥари время. Ек андар лэндэ, када о Авраамо. Лэс камлэ най еқвар тэ умарэн. Во кадяжэ пэрэандярдя бут ԥаримос, хоть во и на сас андэ када дошало (Быт. 12:10—20; 14:8—16; 16:4, 5; 20:1—18; 21:8, 9). Но о Авраамо всаек на парашэля тэ авэл радостно. Сар лэстэ када вижыля? Во вся время сэрэлас пала лашимос, кай тэ жувэл андо нэво миро, кала лэла тэ правий о Христос (Быт. 22:15—18; Евр. 11:10). О Иисусо ԥэндя важ лэстэ: «О Авраамо, тумаро дад, фартэ радосавэлас, кала камэлас тэ диқэл мэрно дес» (Иоан. 8:56). Амэ терас кадя, сар о Авраамо, кала гиндосарас пала лашимос, саво авэла англэ (Рим. 8:21).

О апостоло Павло и о Сила, саво лэса ԥирэлас тэ росԥэнэн важ о Дэл, кадяжэ сэрэнас пала лашимос, саво о Дэл дэла. Лэндэ сас састи вера. И нисаво ԥаримос на стерэла, кай тэ на авэл и радость. Еқвар лэн фартэ мардэ и шутэ андо баруно. Но после када «о Павло и о Сила мангэнаспэ лэ Дэвлэсти и андэ диля хвалинас лэ Дэвлэс» (Деян. 16:23—25). Лэнди дэлас зор, кай вонэ аштярэнас о лашимос, саво авэла англэ. Через када вонэ на парашэнас тэ авэн радостни. Вонэ полэнас, кай пэрэандярэн о ԥаримос важ лэ Христоско алав. Амэ тераса кадя сар вонэ, кала сэраса пала лашимос, саво авэла кодэлэстар, со стердям важ о Дэл (Флп. 1:12—14).

Адес андэ лэ Дэвлэско народо исин бут ԥрала и ԥэя, савэндэ ашэляпэ и радость андо ԥаримос. Акэ со сас. Андо ноябрё 2013 бэрш пэ центрально риг Филиппины дя фартэ баро ураӷано, пэ саво ԥэнэн «Хайян». Май бут чем тысяча еря, савэ лэ Иеговастирэ свидетеля, хасардэ и цэра. О Джорджо анда форо Таклобан, савэстэ о цэр сас розмардо, ԥэндя: «Хоть и стердяпэ кацави бида и ԥрала всаек сас бахталэ. Ԥарэс тэ пэрэдэс алавэнца, сави сас амэндэ радость». Амэ ашасапэ радостни андо ԥаримос, кала амэ гиндосарас и ԥэнас анда оди «наис» пала кода, со терэл важ амэндэ о Иегова. Со инке амэ тэ терас, кай тэ авас радостни?

ИСИН ВАСО ТЭ РАДОСАВАС

Само ӷлавно, васо амэ тэ радосавас, када кай амэндэ исин лащи дружба лэ Дэвлэса. Кати погиндон, амэ ӷанас кодэлэс, ко хулай понад вся и люма! Во амаро Дад, амаро Дэл и Друӷо (Пс. 71:17, 18).

Амэнди фартэ куч и жизня, сави о Дэл дя амэнди. Кадяжэ амэнди куч кода, сави радость и жизня амэнди анэн (Эккл. 3:12, 13). Кода, кай о Иегова дя, кай амэ лэс тэ ӷанас, амэ полас, со во камэл, кай амэ тэ терас (Кол. 1:9, 10). Важ када андэ амари жизня амэ полас, васо жувас и ӷанас, со андэр латэ ӷлавно. Бут мануша на ӷанэн, васо жувэн. О апостоло Павло ԥэндя, соса на шонпэ кадэла мануша: «„На диқля и як, и на ашундя о кан и на сас лэ манушэстэ андо ди, со о Дэл камэл тэ стерэл важ кодэла, ко любий лэс“. Ай амэнди о Дэл дя тэ полас через пэско духо» (1 Кор. 2:9, 10). Хэба кода, кай амэ полас, со камэл о Иегова, на дэл амэнди радость?

Погиндон, со инке о Иегова стердя важ амэндэ. Во стердя кадя, кай тэ простийпэ амаро бэзэх (1 Иоан. 2:12). Инке о Дэл дя амэнди лашимос, када кай тэ жувас вечно андо нэво миро (Рим. 12:12). Кадяжэ через о Иегова, амэндэ исин па вся миро ԥрала и ԥэя (Пс. 133:1). Анда лэ Дэвлэско Алав амэ ӷанас, кай о Иегова фэрий пэско народо лэ Сатанастар и лэстирэ бэнгэндар (Пс. 133:1). Кала амэ гиндосарас пала када, амэндэ ашэла инке май бари радость (Флп. 4:4).

СО ТЭ ТЕРАС, КАЙ ТЭ АВЭЛ МАЙ БАРИ РАДОСТЬ?

О христианино, савэстэ исин радость, со во инке трэбуй тэ терэл, кай тэ авэл май радостно? О Иисусо ԥэндя: «Ԥэнав тумэнди када, кай тумэ лэ одеса тэ полэн вся кодэя радость, сави исин мандэ» (Иоан. 15:11). Вижал, амэндэ авэла инке май бари радость. Када сар и яг. Кай тэ росԥабол вой май фартэ, трэбуй тэ шас кашта. Кадяжэ и кай амэндэ тэ авэл и радость, амэнди трэбуй лэ Дэвлэско свынто духо. Вижал, кай амари радость тэ авэл май бари, трэбуй тэ на промэкас тэ мангас лэ Иеговастар лэско свынто духо. Кадяжэ тэ гиндосарас, со пистромэ андэ Библия, сави сас пистромэ через кадэва духо (Пс. 1:1, 2; Луки 11:13).

Кай тэ авэл амэндэ май бари радость, амэнди трэбуй тэ терас бут дила, сави чалёл лэ Дэвлэсти (Пс. 35:27; 112:1). Васо? О Дэл амэн создал, кай амэ тэ дарас лэ чачунэ Дэвлэстар и тэ ритярас лэско законо. Сар ԥэнэнпэ андэ Библия «када, со трэбуй тэ терэл о мануш» (Эккл. 12:13). Аврэ алавэнца тэ ԥэнас, амэн о Дэл создал, кай тэ камас тэ терас, со во камэл. Через кода, кай амэ терас дила важ о Иегова, амэ па чачимастэ аваса радостниb.

РАДОСТЬ АНЭН ЛАШИМОС

Чачуни радость поможый амэнди андэ вся жизня. Амаро небесно Дад лэла амэн май фартэ тэ любий, кала радостно терас дила важ о Иегова и на шас сама по ԥаримос, саво амэндэ исин (Втор. 16:15; 1 Фес. 5:16—18). Кадяжэ, кала амэ сэрас, со анэн чачуни радость, амэ на ласа тэ стас о зор, кай тэ затерас май бут ловэ. Ай закамаса май бут тэ терас дила важ о царство (Матф. 13:44). Кала амэ диқас, саво лашимос када анэн, амэндэ авэла май бари радость и драго по ди. Кадяжэ амэ ласа тэ терас вся, кай авэр кадяжэ тэ авэн бахталэ (Деян. 20:35; Флп. 1:3—5).

И учёни мануша бут со стердэ, кай тэ полэн пала лэ манушэско зор. И тоди ек учёно анда Университето штата Небраска (США) поля: «Сар тумэнди адес чалёл тумари жизня и тумэ полэн, кай тумэ бахталэ, тоди англэ тумаро зор авэла инке май лашо». Када сжалпэ кодэлэса, со ԥэнэнпэ андэ Библия. Андэр латэ ԥэнэнпэ: «Кала андо ди радость тоди, сар лэ драбэндар фэдэр» (Прит. 17:22). Чаче, кала тумэ терэн, кай тэ авэл май бут радость, тумэндэ авэла май лашо зор.

Амэ жувас андэ найвушэро время. Но всаек амэндэ авэла радость. Кадэя радость на прожала, важ кода кай мангаспэ и о Иегова дэл пэско свынто духо, сытювас па Библия и гиндосарас, со адиносардям. Амэндэ авэла инке май бари радость, кала гиндосарас, саво лашимос амэндэ уже адес исин лэ Иеговастар. Кадяжэ, кала патяс, сар авэр лэ Дэвлэстирэ мануша и стас зор, кай тэ терас лэстири дила. Тоди амэ диқаса о чачимос, саво запистромэ андэ Псалом 64:10: «Кодэва, ко ритярэл лэ Дэвлэско законо лэла тэ радосавэл важ о Иегова и виарақэла ҭан, кай лэстэ тэ гарадёл».