Пушэн кодэла, ко адинон

О Христос, андо дэлмутно Израилё, трэбуй сас тэ авэл кати анда ери кай и барэдэра, савэнди пэрэлас и пай чи най?

Дэлмут амэ гиндосарасас, кай када кадя. Здэласпэ, кай када сжаласпэ лэ алавэнца анда Евреям 12:16. Андэ кадэва стихо ԥэнэнпэ, кай важ о Исаво на сас куч кода, со свынто и кай во «пала ек чаро лэ хамаса отдя и пай, сави пэрэлас лэсти, сар лэ барэдэрэсти». Амэ гиндосарасас, кай кадэла алава сыкавэн, кай вместе кодэлэса, кай и пай, сави пэля лэ Иаковости, сави трэбуй сас тэ пэрэл лэ барэдэрэсти, лэсти инке пэля и кода, кай о Христос тэ авэл лэстар (Матф. 1:2, 16; Луки 3:23, 34).

Анда Библия дицол, кай о мануш на трэбуй сас тэ авэл барэдэр, кай лэстар тэ авэл о Христос. Уӷанаса дэсо пала када.

Пэрво бэято, саво арақаделяпэ кай о Иаково и кай лэстири хулаи кай и Лия, када о Рувимо. Прожыля время и кай лэстири авэр хулаи кай и Рахиль, савя во фартэ любияс, арақаделяпэ о Иосифо. Кала о Рувимо стердя бэзэх, во хасардя и пай, сави пэрэлас лэсти, сар лэ барэдэрэсти, и кадэя пай дорэсляпэ лэ Иосифости (Быт. 29:31—35; 30:22—25; 35:22—26; 49:22—26; 1 Лет. 5:1, 2). Ни лэ Рувимостар, ни лэ Иосифостар на жыля о Христос. Во жыля лэ Иудастар. О Иуда сас штарто лэ Иаковоско шаво, савэс арақадя и Лия (Быт. 49:10).

Андэ Луки 3:32 ԥэнэнпэ инке пала панч мануша, савэндар жыля о Христос. Здэлпэ, кай вонэ сас барэдэра андо ери анда бэятцэ. Кай о Воозо арақаделяпэ о Овидо, саво ашэля дад лэ Иессеёско (Руфь 4:17, 20—22; 1 Лет. 2:10—12).

Но лэ Иессеёско шаво о Давидо на сас барэдэр андо ери. Во сас само цыкно анда восемь шавэ. Но о Христос жыля лэ Давидостар (1 Сам. 16:10, 11; 17:12; Матф. 1:5, 6). Кадяжэ и о Соломоно, савэстар трэбуй сас тэ жал о Христос, во на сас барэдэр андо ери (2 Сам. 3:2—5).

Всаек, нащи тэ ԥэнэс, кай лэ барэдэрэ шавэсти нисо на дэл, кай во арақадёлпэ пэрво. Лэсти дэн бари власть. Во ашэлас дуйто хулай андо ери после кода, сар муля лэско дад. Лэсти пэрэлас дуй пай кодэлэстар, со ашэласпэ лэстирэ дадэстар (Быт. 43:33; Втор. 21:17; Иис. Н. 17:1).

Андэ кодэя время и пай, сави прижал лэ барэдэрэсти, пэрэдэнас аврэ шавэсти. О Авраамо отбишалдя анда пэско цэр лэ Измаилос и пэрэдя и пай, сави прижалас лэ Измаилости, лэ Исаакости (Быт. 21:14—21; 22:2). Кадяжэ, сар сас ԥэндо кода, со прижаласпэ лэ Рувимости, сар барэдэрэсти, отдинэ лэ Иосифости.

Акана рисаваса каринг о стихо Евреям 12:16. Андэр лэстэ ԥэнэнпэ: «Кай тэ на авэл кодэва, ко андярэл пэс билажавардэс, ни кодэлэс, важ кастэ най куч, со свынто, сар о Исаво, саво пала ек чаро лэ хамаса битиндя и пай, сави пэрэлас лэсти, сар лэ барэдэрэсти». Сар тэ полас кадэла алава?

О апостоло Павло на дэлас дума, кастар жыля о Христос. Во ԥэнэнас лэ христианонэнди: «Стерэн дрома, кай ворта тэ авэн важ тумарэ пэрнэ». Тэ на тердоп вонэ билажавардимос, тоди о Дэл диноп лэнди пэско лашимос, саво вонэ на затердэ (Евр. 12:12—16). Тэ тердоп вонэ билажавардимос, тоди вонэ стердоп, сар тердя о Исаво, саво на ценияс, со свынто и парудя лэс пэ кода, со лэсти камэласпэ.

О Исаво жувэлас андэ время, кала жувэнас и пророкоря. Важ када, дэкала лэсти ԥэнэнас, кай во тэ анэн лэ Дэвлэсти жертва (Быт. 8:20, 21; 12:7, 8; Иов 1:4, 5). О Исаво гиндояс най сар лэ Дэвлэско мануш. Во парудя и свынто дила, сави во тердоп, важ кода кай барэдэр, по ек чаро юшка! Во камля, кай лэстэ тэ на авэл о ԥаримос, пала саво сас дэлмут ԥэндо, кай трэбуй тэ авэл кодэлэндэ, ко жала лэ Авраамостар (Быт. 15:13). Кадяжэ о Исаво сыкадя, кай на цений, со свынто, кала во женисайля пэ дуй манушня, савэ тэлёнас аврэ дэвлэнди. Через када, кай лэстирэ родителя сас найдраго по ди (Быт. 26:34, 35). Ай о Иаково на стердя, сар о Исаво. О Иаково витидя пэсти хулая, сави служияс чачунэ Дэвлэсти (Быт. 28:6, 7; 29:10—12, 18).

Со амэ полям анда кода, со уӷанглям? Бут мурша, кастар жыля о Христос, па чачимастэ сас барэдэра шавэ андэ еря, но най всаворэ. И евреёря ӷанэнас када и нисо андэ када на диқэнас вэрыто. Вонэ полэнас, кай о Христос кодэва, ко жыля лэ Давидостар, саво сас само цыкнэдэр шаво лэ Иессеёско (Матф. 22:42).